KONTRIBUSION DE LOS DJUDIOS DE ESPANYA A LA NAVIGASION I AL DESKUVRIMIENTO DEL KONTINENTE AMERIKANO por Moshé Shaul

La importante kontribusion de los djudios de Espanya al dezvelopamiento de la kultura espanyola ya es un fakto akseptado i rekonosido oy dia por todos los ekspertos ke se okupan del estudio i investigasion de estos temas. Lo ke no es tan bien konosido es ke los djudios djugaron un rolo de grande importansia en numerozos otros kampos tambien de la vida – komo por enshemplo el kampo de la navigasion i sovre todo de la eksplorasion maritima ke permetio a los navigadores de Espanya i de Portugal de deskuvrir muevas tierras i kontinentes.

La primera kontribusion en este kampo fueron las “ Tablas Alfonsinas” – tablas ke indikan la pozision de las estreyas en el sielo a lo largo del anyo. Estas tablas son fruto de las observasiones echas en Toledo por los atronomos Yeuda ben Moshe i Isaac ben Sid, miembros del Kolejio de Traduktores, fondado en el siglo 13 por el Rey Alfonso el Savio, entre otras para trezladar del arabo al espanyol de entonces las principales ovras sientifikas eskritas en arabo.

Otra importante kontribusion, esta vez en el kampo de la kartografia, fue la de Avraam i Yeuda Crescas, dos kartografos de fama mundial ke bivieron en Mallorca i Portugal. Avraam Crescas azia para el rey Pedro IV de Aragon, kartas, astrolabios i otros instrumentos uzados entonses para la navigasion. Su ijo, el rey Juan, dio a Crescas el titolo de Magister Mapamundorum, o sea Maestro de las kartas del mundo. Su karta jeografika del mundo fue el regalo ke el rey de Aragon dio al rey Charles VI de Fransia, en 1381.

Avraam Crescas murio en Mallorca, en 1387. Su ijo, Yeuda, se fuyo a Barcelona, despues de la matansa de los djudios de Mallorca, en 1391, i de Barcelona fue a Sagres, en Portugal, onde ensenyo en la Akademia Navala fondada por el famozo prinsipe Henrique el Navigador. Kon su konversion al kristianizmo tomo el nombre de Jaime Ribes.

Las kartas de Yeuda Crescas fueron las primeras ke mostraron a la India komo peninsula. El invento instrumentos de navigasion ke ayudaron muncho a la aktividad maritima de akeya epoka. En 1399 lo nombraron Magister Cartarum Navigandi o sea Maestro de kartas de navigasion, ma el puevlo lo yamava El djudio de las busolas.

Otro dudio ke sovresalio por la importansia de su lavoro para la navigasion mundial fue el astronomo Avraam Ben Shemuel Zacuto, ke sus alkanses en el kampo de la astronomia i navigasion ayudaron muncho a Cristobal Colon en su deskuvierta de la Amerika, i a Vasco de Gama en su deskuvierta de la posibilidad de yegar a India por via de mar.

Avraam Zacuto nasio en Espanya en el anyo 1452. Despues de aver resivido la tradisional edukasion djudia en los kampos de la Biblia i del Talmud, el estudio astronomia en la Universidad de Salamanca, de la kuala salio komo profesor en este kampo. El se distingio bien presto por sus anchos konosimientos i su kapachidad intelektual ke se reflektan en los importantes livros ke eskrivio. El empeso kon el livro de astronomia » ‘Hahibur ‘hagadol» ke kompleto en el anyo 1473, en lo ke era aedado de 21 anyo solo, i kontinuo kon dos otros livros del mizmo kampo titulados – en traduksion al ladino – «Tratado Breve en las Influencias del Sielo» i el sigundo, «De las Eklipsas del Sol i de la Luna.»

Kuando los djudios fueron ekspulsados de Espanya, en 1492, Zacuto emigro a Portugal onde entro al servisio del rey Joao II. En el tiempo del rey Manuel el Primo, el astronomo djudio tuvo la okazion de djugar un rolo istoriko kuando, sovre la demanda del rey, embezo a los marineros de Vasco de Gama, ke estava aprontando su ekspedision a India, komo servirse de los instrumentos de navigasion. El les dio tambien las tablas astronomikas ke avia aprontado el mizmo, en baza de sus observasiones, i ke eran muncho mas exaktas ke las ke avian sido aprontadas, siglos atras, por los astronomos djudios del rey Alfonso el Savio

Las tablas astronomikas aprontadas por Avraam Zacuto fueron uzadas en realidad por todos los grandes navigadores del mundo. Estas tablas djugaron un rolo desizivo en la deskuvierta de Amerika, siendo ke permetieron a Colon de traversar el Oseano Atlantiko malgrado ke este era kaje totalmente deskonosido asta entonses.

Las tablas astronomikas de Zacuto ayudaron al selebre eksplorador espanyol no solo en el kampo de la navigasion, sino ke , posiblemente, a salvar su vida i las vidas de los ke estavan kon el. Segun se konta, en uno de sus viajes a Amerika, Cristobal Colon i sus marineros se toparon en una situasion kritika, arodeados por indianos ke amenazavan de matarlos; ma el reusho a salvar en akodrandose ke segun los kalkulos de Zacuto, akel dia mizmo devia tener lugar una eklipsa de la luna. Adresandose entonses a los indianos, el les deklaro ke tenia en su poder de azer despareser la luna i el sol i ke komo akavidamiento, aria despareser la luna dientro poko tiempo; i si este akavidamiento no bastaria, amenazo el, su sigiente paso seria de azer despareser al sol tambien, deshandolos en la eskuridad.

Ya se puede imajinar kual fue el espanto de los indianos al empesar la eklipsa i komo eyos trokaron bien presto sus aktitud enverso Colon i sus marineros ke konsideraron komo seres supernaturales. Todo esto grasias, entre otras, a las tablas astronomikas de Avraam Zacuto.

Los alkanses de los djudios de Espania en el kampo de la kartografia i astronomia, mos dan una idea de los ke uvieran alkansado en el kampo de la navigasion propia, al komando de una nave, si no eran las restriksiones ke les eran impozadas en lo ke toka los lavoros ke podian azer. Sus kapachidad en este kampo fue provada anyos mas tadre, kuando anusim de Espanya i Portugal toparon azilo en ‘Holanda, de onde dezveloparon una intensa aktividad komersiala kon paizes del Muevo Mundo, entre otras a bordo de naves ke komandavan eyos mizmos.

Fuente: turkisrael.org.il