eSefarad Noticias del Mundo Sefaradi
6 Novembre de 2016: No vos olvidesh desta data
Entre 1942 i 1944, 5.200 Djudeo-Espanyoles fueron deportados de Fransia.
La Asosiasion Muestros Dezaparesidos fundada en 2010 i ke agrupa el kondjunto de las asosiasiones djudeo-espanyolas de Fransia:Aki Estamos-AALS, Al Syete, Centre Communautaire Don Isaac Abravanel, JEAA, Vidas Largas, Vidas Largas Marseille, UISF) esta aparejando la edision de un Memorial de la deportasion de los Djudeo-Espanyoles de Fransia. Este proyekto entra en el kamino avierto por el lavoro de memoria yevado por Haïm Vidal Sephiha i Michel Azaria kon la asosiasion JEAA ke, en 2003,estreno una laja komemorativa en djudeo-espanyol en Auschwitz para ke no se olvide la deportasion de los muestros. Este proyekto se aze kon la partisipasion del Memorial de la Shoah i obtuvo el apoyo de la Fondation pour la Mémoire de la Shoah.
Ademas de la lista de los 5.200 deportados, este livro tendra munchos kapitulos sovre la vida de los Sefardim en lo ke fue el Imperio Otomano, las kondisiones de sus ida verso Fransia, sus yegada i arresentamiento i sovre los anyos de gerra. Sera editado en 2016.
Un grande adjuntamento tendra lugar el alhad 6 novembre 2016, organizado komunmente kon la Mairie du 11 ème arrondissement de Paris para prezentar el Memorial. Este akontesimiento prezidido por Annette Wieviorka, sera onorado por la prezensia de Serge Klarsfeld. Despues son previstas tres konferensias, un momento muzikal i la tadre se akavara kon el vazo de la amistad.
Esperamos vuestra prezensia a todos i dezeamos ke kada uno i uno pueda venir kon sus ijos i ijos de sus ijos porte akeya manifestasion sera un momento privilejiado en la transmision de muestra kultura. Las inskripsiones serán aviertas en djunio. Por razón de seguridad kale ke kada uno i uno tome su inskripsion individualmente. Tengash en tino, oy mizmo, esta data del 6 de novembre i anunsiadla a todos los vuestros porte se trata a la ves de agrupar los Djudeo-Espanyoles i de dar a konoser muestra Estoria.
