3 GRUPOS KE FORMARON MI PERSONALIDAD por SIMON GERON

Mirando a mi vida veo ke 3 grupos en 3 entornos influensaron mi personalidad. Antes de yegar a esto bivia en Şişhane/Istanbul kon un padre sufriyendo de tuberkulosis i una madre de kaza. Era el tiempo de la Segunda Gerra Mundial i kontando sovre el ayudo de los tios, en kondisiones de proveza. Eran los anyos de la Segunda Gerra i el pais se avia kedado neutro. Pero el Antisemitismo existia aki tambien i lo sentia indo a la eskola. En realidad bivia kortado de todo kaji sin kontakto kon el mundo exterior. No tenia djugetes i kaji dingun amigo para djugar. Al mirarme la djente pensava ke era un ijo bueno i kalmo, ma muy dormido. Avian munchas kozas ke no puedia azer komo djugar futbol, suvir en bisikleta, nadar i pelear. Tenia apenas 10 anyos kuando mi padre se murio i empesi a lavorar komo un Chirak en los komersios ke apartenian a los Judios serka de la kaza durante las vakansas i despues de las oras de eskola por unos groshes. Mi enkontro kon el mundo del lavoro fue un shok para mi. En supito me topi kritikado i resiviendo konsejos de los vizinos ande lavorava diziendo «Tienes el aire dormido. Mira a la djente aki ke empesan kon una esporta i en poko tiempo se azen fabrikantes i avren komersios. «Avre tus ojos si no muriras de ambre». Estos konsejos echos en burlando de mi me enfadavan i me azian mas mal ke bueno. Me davan un komplexo de inferioridad.

EL PRIMER GRUPO
En 1948 nasio Israel i en 1951 me fui kon un grupo de mansevos a Israel kuando tenia 14 anios. Me topi en un Kibuts lavorando medio dia en los terrenos de agrikultura i estudiando medio dia. Este grupo fue el Primero ke tuve mesklado kon los miembros del Kibuts ke venian de la Evropa Sentral avlando en Yidish. Eran Sionistos Idealistos i Pioneros determinados a krear un Estado Judio i defenderlo aziendo kada sakrifisio. Bivir en muestra patria mos dava el derecho de responder a kada abuzo i insulto kaminando kon la kavesa arriva orgulyozos de ser Judios. Tenia la intension de kedarme por siempre aki i ser un sivdadano bueno al estado. En un sirkulo de kolektividad uno se sentia seguro i resivia todo sin ke se rompa la kavesa para topar un echo i ganar el pan. Dinguno pensava aki ke era tonto dormido. Konosian mi valor. La sola koza kontra mi era ke mi madre bivda i vieja no puedia venir a Israel sin apoyo de la famiya. Ademas Istanbul i la famiya kon los amigos me mankavan i si kera o no me senti ovligado de tornar atras a Istanbul a la edad de 17 anyos. La eskola era terminada i la lucha kon la vida empesava.

Esta vez biviamos en Balat un barrio mas prove de los Judios al lado de Fener ke era el barrio de los Gregos. La kaza alkilada faltava de todo i no tenia elektrisidad, kozina, salon, banyo i la tualeta, era echa de un burako en el suelo kon agua para lavar el trasero. Komo empiego me topi lavorando en una fabrika en Mahmut Pasha fabrikando sinturas de kuero. Resivia 20 Liras por semana lavorando por 6 dias de manyana asta la noche. Mi salario se lo dava a mi madre i por moneda de aldikera tenia ke azer «over time». Era un entorno muy diferente con paisanos viniendo de Anatolia para bushkar el avenir en la sivdad biviendo en «Gece Kondu/Shanty Towns» ke eran ilegal. Eran porteros en jeneral kon pezgos en la espalda de sienes de kilos. Para mi fue la okazion de entrar en el mundo de los Turkos i vide la parte buena de la poblasion mayoritaria. Kon los Turkos tenia ke ser Turko i evitar de entrar en argumentos ke los enfadava. De karakter eran djente simple jeneroza, resiviendo bueno a todos. Komo un joven no puedia tener aventuras kon las muchachas porke una tenia ke ser virjen antes de kazarse. Ver a mis estudios interrumpidos me azia sentirme malo i la sola manera de remediarlo era de estudiar solo sin profesores en sujetos diferentes. Munchos me demandavan porke no me servia de mis linguas komo el Fransez, Ladino, Turko i ebreo.? Me desidi de ambezarme el Inglez del Linguaphone para amejorar mis shanses.
Poko a poko vide ke mi vida se estava trokando en korriendo detras de los turistos para praktikar mi Inglez. Tenia mismo korrespondensias kon muchachas Inglezas ke me ayudava a meldar i eskrivir la lingua. Un mundo muevo se avria en frente de mis ojos. Este ritmo de vida kontinuo asta mis 20 anyos aserkando de mi servisio militar en 1957.

EL SEGUNDO GRUPO
Los ke tenian el diplom del liseo servian en el rango de sub-ofisiales kuando los otros servian komo soldados sin rango. El tratamiento del ofisial dava mas komforte i privilejio en komparando kon el soldado ordinario sujeto al abuzo de sus superiores. Fui embiado a Samsun en la Kosta de la Mar Preta komo un soldado ordinario a una kazerna de Entrenamiento en las kolinas. La mayoria de los soldados venian de los kazales de Anatolia, siendo kaji todos inalfabetos. Ansi les davan puntas de pies i shamares/bofetadas para ke sean efisientes. La autoridad era en el rango i todos basho de esto tenian ke ser sumetidos a un abuzo fiziko i agresivo. El soldado tenia un uniforme inferior, no resivia paga i no tenia mismo la fasiidad de lavarse i lavar sus vestidos. Le kortavan los kaveyos porke avian piojos ayi. La komida de la Karavana no konvenia a todos echa de manos de soldados ke no eran kozineros. Munchos exijian de sus famyas ke les den dinero.i merken algo de la Kantina. En este kadro me toparia en los proximos 2 anyos en un grupo mixto de Soldados i Of isiales. El entrenamiento azia lokos a los rekrutados resiviendo ordenes de la manyana asta la noche «SAGA DÖN, SOLA DÖN, RAHAT, YAT, KALK, ILERI MARSH «a derecha, a siedra, relax, echate, alevantate, kamina adelantre» Despues tenian la karga de un fusil ke servia komo bayoneta avansando verso un enemigo imajinario kon los gritos «Allahu Ekber». La disiplina era tan dura ke uno puedia murir i esto seria visto komo el dover de dar su alma por la patria. Estavan konvensidos ke tenian la fuersa de kombate kon el mas fuerte enemigo, la Union Sovietika. Los soldados ke venian aki kontavan su dias para ver la fin del servisio. Del otro lado se kreyia ke en pasando por este rejimen, un joven se azia maduro i estava pronto a asumir sus responsabilidades de famiya. Algo se paso en el terreno ke amejoro mi posizion.en la Armada. Tenian menester de djente en el «Karargah/Cuartel General’ kon una eskritura buena i ke eran artistos. Al ver ke tenia el talento, me nominaron komo artisto de la baza lavorando al lado del «Bin Bashi-Mayor». Mi echo aumento de dia en dia i todos los ofisiales se avian echo mis amigos kon sus demandas. No leshos de muestra kazerna en «Toraman Tepe» avia un Grupo de Radar Amerikano i kuando les dishe ke konosia el Inglez se desidieron de darme una mision de mas i servir como interprete entre los Turkos i Amerikanos. Vide asta ke punto los Amerikanos eran privilejiados viniendo de un pais muncho mas riko i poderozo. Me sentia mejor en sus prezensia kon el respekto ke tenian por los Judios. Komo si no tenia bastante okupasion los Ofisiales Turkos kerian ke me vayga a sus kazas en la sivdad para ensenyar el Inglez a sus ninyos. Supito me vide inondado kon tanto echo ke no vide los 2 anyos pasar. Kerian ke me kede en Samsun mismo despues de mi deskarga, i ke lavore por los Amerikanos i ensenye el Inglez. Ma mi intension era de tornar atras a Istanbul i lavorar en una Kompanyia Aerea o una Ajensia de Viajes. El kontakto ke tuve kon los «GI’s me dieron las ganas de imigrar a Los Estados Unidos o otros paises del Oksidente para ir mas adelantre en la vida.

Mi madre estava kontente de verme atras i komo no tenia la intension de lavorar en las fabrikas de Mahmut Pasha, empesi a aharvar las puertas de las Kompanyias Aereas, las Ajensias de Viaje i los oteles Grandes. Me tomo un tiempo asta ke fui resivido en Turk Ekspres-Hilton» en «Taksim». No tenia diplomes altos, eksepto el Bon Servis de la Armada Turka. Me dieron un examen de Inglez i Fransez i me vide suviendo en la vida. Bivia i en Balat i lavorava en Taksim en un barrio de la klasa alta. Turk Ekspres vendia bilyetes de avion i vapor i organizava exkursiones privadas i en bus de la sivdad de Istanbul i todas sus atraksiones. En realidad munchos ke bivian aki no konosian todo lo ke avia a ver kon su istoria Bizantina i Otomana indo atras a la Epoka Grega i Romana. El Bosforo, Mar de Marmara i Mar Preta, kon sus 7 kolinas, Palasios, Kastillios, Mezkitas, Bazares i Banyos Turkos, Istanbul representava unas vistas esplendidas. Indo al echo kada dia era un plazer grande para mi, formando mismo amistades kon los turistos viniendo de todas partes del mundo, sovre los Judios Amerikanos viajando a Israel o tornando de ayi. En un dia me servia de todas las linguas ke konosia. Sin duda era el mejor empiego ke tuve desde ke empesi a lavorar despues de la muerte de mi padre. Del otro lado los salarios eran bashos en los mejores de empiegos. Se lavorava oras largas 6 dias por semana. Kon esto era imposivle de trokar de bivienda i pensar a kazarme un dia. Avlando kon los Judios de los Paises Oksidentales me metieron en la kavesa ke valia mas ke buske mi avenir en paises mas afortunados i libres. Mismo si mi intension era de guardar este empiego por lo mas largo posivle, vide ke era mas importante de instalarme en un pais mas riko i demokratiko para avansar mas en la vida .Ademas keria viajar i ver el mundo. Me vide supito en kontakto kon las Organizasiones de Bien Estar Judias ke ayudavan a los refujiados. Tenia el dezeo de irme a Amerika, pero el Sistem de Kuota de preferensia de Evropeos, me avia kitado esta posibiidad. Ansi me torni a otros paises komo Canada, Australia, Sud Afrika, Argentina i Brazil i no pude obtener el derecho de instalarme en uno de estos paises. A la fin un vijitor Australiano me metio en kontakto kon su amigo avokato Judio i el me metio en kontakto konc»Australian Jewish Welfare Society» enkavesada por un miembro del parlamento «Syd Einfeld». El presento mi petision a Canberra i fue refuzada por razon de «White Australia Immigration Policy». Al verme tanto deziluzionado kon el aktitud kontra la djente de Asia i Afrika, les dishe lo ke pensava de eyos. Mi petision siendo presentada por la segunda vez akseptaron a la fin a darme el permiso de instalarme en la Australia a kondision ke la Komunidad Judia Australiana tomaria toda responsabilidad. El viaje tomo un mez de Napoles a Sydney pasando por «Port Said,Aden i Colombo antes de yegar a las aguas Australianas de Perth, Melbourne i Sydney. No savia lo ke mos asperava en este pais sin tener una famya.

EL TRESER GRUPO
Al prinsipio las kozas no paresian andar bueno. Mi madre i yo mos topimos en una pension kompartiendo la sala de banyo i la kozina kon otros alkiladores. La mayoria venian de paises komo la Polonia i Hungria fuyendo de los Nazistos i Komunistos. Normalmente eyos lavorando duro en sus profesiones de vestidos i sapatos en poco tiempo tenian el dinero para pagar el depozito de una kaza. Tomava 20 o 30 anyos para pagar sus devdas kon el intereso akumulado. Yo no kije tener devdas por kaji toda mi vida i ansi mos kedimos ayi 7 o 8 anyos. En lo ke se trata de empiego a los imigrantes les davan los echos suzios i sus kualfikasiones no eran rekonosidas. Me topi kondanado a un lavoro de mano en las fabrikas. Kije estudiar en el colejio de noche en profesiones komo Ajente de Viaje o Artisto Komersial i me disheron ke en mi edad de 24 anyos no tenia la posibilidad de ser kolokado, sin tener la experiensia. A la djente del pais no les gustava tanto los ajenos teniendo el espanto ke trokarian el karakter del pais. La sola koza ke pude azer era de lavorar komo almasenero/storeman en una fabrika de textiles. La paga minima era 15 Libras por 8 oras al dia por 5 dias de la semana. Ensima de esto uno tenia 4 semanas de vakansas al anyo i derecho de retreta. El Treser Grupo ke enkontri era echo de Judios Jovenes ke se enkontravan una vez por semana en kazas diferentes avlando del Judaismo i de Israel. Tenian el nombre «TSIONA». Mis relasiones kon este grupo duraron por anyos asta ke se kazaron i tuvieron sus famiyas. Yo no pude azer lo mismo en la situasion ke estava. Las ijas Judias se interesavan mas a los doktores i avokatos. Las Australianas refuzavan de salir on los imigrantes. Del otro lado otros grupos entraron en el kadro del Trewer Grupo , en meskla kon los imigrantes de paises diferentes ke en konosiendo sus linguas me resivian komo uno de eyos. Tambien los Australianos ke kompartian mis intereses de kedarse en «Youth Hostels kon el Ruck Sack en la espalda viajando i kaminando en la natura. Al empesijo ize viajes kurtos en otros Estados del Pais i Mueva Zelanda. Me tomo 5 anyos para tener bastante moneda para ir á Evropa viajando modestamente kedando en el Youth Hostel, aziendo kampamento i merkando la komida en el Super Merkado. Viajar en tren grandes distansias me permetia azer multiples aparadas i ver kaji a todas las kapitales de la Evropa Oksidental durante 3 mezes. Este viaje me yevo tambien a Istanbul i vide ke mi estansia en el oksidente empesava a trokar mi postura i karakter dando la impresion a la djente ke era un Amerikano, alto i flako. Si les avlava en Turko me respondian en Inglez. Los viajes no duran por la vida i uno tenia ke enfrentar sus problemas de la vida diaria. No fue bueno para mi ver la fin del viaje i toparme de muevo en la misma pension i el mismo empiego. Tenia ganas de kontinuar mis viajes i ver el resto del mundo.

En Junio 1967 uvo la Gerra de 6 Dias en Israel i la Ajensia Judia en este pais bushkava krear un grupo de voluntarios para ayudar en los servisios detras las linias en kapasidad sivil. Vide a esto komo la okazion de ver en ke estado estava Israel desde ke parti de ayi en 1954. Le dishe a mi madre ke keria ver si puediamos bivir en Israel o si valia mas tornar a Turkia. Era un projekto de un anyo kon la mitad del pasaje pagado por eyos. Yegando a Tel-Aviv me topi kon voluntarios jovenes viniendo de munchas partes del mundo kon kenes me entendia bueno en avlando en Ingles, Frances i Espanyol. Ademas konosia el ebreo ke ayudava en las komunikaiones. Israel era un pais grande agora kon el Sinai, West Bank i Golan Heights ke me dava la imresion de ver 2 mundos diferentes, el Arabo i el Judio. Entrando en grupos de avla Ingles Frances i Espanyol paresia a una otra persona.i me vide inchendo trenchas alimpiando edifisios en abandono en Scopus/Jerusalem i tuve la okazion de ir a El-Arish en Sinaii para arekojer armas ke el enemigo avia deshado atras en fuyendo. Despues de unos kuantos mezes tomi el vapor i me fui a ver la famiya en Istanbul. La tentasion de ver otros paises me izo tomar el tren i viajar a traves toda la Evropa Komunista indo asta la Rusia. Tornando atras a Israel tuve el shok de ver ke mi grupo de voluntarios fue embiado atras a sus paises por sus mal komporte. No supe ke hacer i me fui a ver la Ajensia Judia para ke me den un bilyeto atras a la Australia en un barko merkantil ke les salia mas barato. El viaje de Eilat a Sydney duro 42 dias kon aparadas Penang, Singapore i Brisbane. Komo en mi primer viaje no tenia de muevo ganas de no toparme de regreso en la Australia. Ma entre los 3 paises era la Australia ke salia mejor. Arastar a mi madre de lugar en lugar en sus 70 anyos no era una idea buena. Agora avia venido el tiempo de empesar de muevo, topar un mejor empiego i kon las ekonomias echas entre 1961-1968 ver si se puedia merkar una bivienda chika i vieja. Tenia 31 anyos en el tiempo i ay munchas kozas a kontar sovre lo ke vino despues.