eSefarad Noticias del Mundo Sefaradi
Yerushalayim shel zahav es un kante popular israeliano eskrito por Naomí Shemer en 1967 i kantada por eya mizma i por munchos otros, komo Ofra Haza. Fue elejida el “Kante del anyo” en Israel en 1967. Es konsiderada komo un segundo imno no oficial de Israel.
Sus versos se referen a temas djudios tradicionales. Por exemplo “Yerushalayim de Oro” esta referado en el Talmud; “de todos tus kantes soy violin” ke se repite en kada estribiyo, esta parte la podemos enkontrar en un poema del poeta djudeo-espanyol Iehuda Haleví.
El kante fue kompozado arba de la Gerra de los Sesh Diyas, kuanto la parte Orientala de Yerushalayim, inkluyendo la Sivdad Vieja, ke se topava bajo el kontrol jordano, desde la gerra araba-israeliana de 1948.
Yerushalayim era sujeto kuaji tabú desde la partisión de la sivdad, i kuaji ningun artista se avia enkorajado a tomarlo musicalmente, esto yamó la atansion de los organisadores del “Festival Anual de la Canción en Israel”, ke pidieron a algunos kantadores rekonosidos, entre los ke estava Naomí Shemer, un kante kon Yerushalayim komo tema para la selevrasion de la Independensia (15 de mayo).
Solo tres semanas después, los soldados del Tzahal, (la armada de defensa Israeliana) rekovravan el este de la sivdad i yegavan al Muro de las Lamentasiones, asta ese diya inalkansavle para los djudios.
Se konta ke el kante fue el grito de gerra de los soldados israelianos durante esa guerra i ke kantaron Yerushalayim de Oro, tomados por la emosión, al entrar en la Sivdad Vieja.
Esto izo de este kante un otentiko imno para los israelianos asta el punto ke, en 1968, fue propozada en el Parlamento por el diputado Uri Avnery komo imno nasional oficial del Estado de Israel, trokando la Hatikva. Esta proposta no ayego a la votación, ma desde ese diya es simbolo de la viktoria en akeya gerra i tomada komo sigundo imno no ofisial de Israel.
Yerushalayim shel Zahav alkansó mizmo la fama internasionala porke akompanya la esmoviente parte finala de la Lista de Schindler.
Su kreadora, Naomi Shemer, poko antes de morir konfesó en una letra ke la muzika de este kante estava un poko inspirada en un kante ke avia oyido tokar a Pako Ibáñez (Pello Joxepe) kuando él avia vijitado Israel serka 1960.
Asigún dezía Naomi en su letra, lo izo sin pensar i se sintio muy mal kuando se dio kuenta. Paco Ibáñez dijo ke, malgrado el paresido, Shemer no tenía ningun motivo para sentirse kulpable.
