eSefarad Noticias del Mundo Sefaradi
Keridos amigos i amigas.
Meldi el Jewish News de dalkavo de anyo ke ‘Shira Libartov» presento un artikolo sovre la istoria de los judios en Siria tratando de las sinagogas neglijadas despues ke partieron los djudios de ayi en numeros altos.
Oy despues de la kayida de Asad, los arkeolojistos estan al punto de verifikar kuanto mas fue perdido en los 2000 anyos ke bivieron ayi los Judios. Un tiempo indo atras a la Epoka Romana ke inkluyia a los djudios sefaradim ekspulsados de Espanya en 1492 i tambien a los Merkantes Evropeos.
Ma kon la suvida en el Siglo 20 de los Arabos Nasionalistos kon las Leyes Anti-Israel, munchos se fueron afuera. Un tiempo tenian 100.000 djudios al empesijo del Siglo 20 i el numero se abasho a 15.000 en 1947. Kon la kreasion del Estado de Israel en 1948, kuaji el resto de los djudios abandonaron este pais. Legalmente no eran libres de partir mismo al ser persegidos.
El Codex de Alepo marka del Siglo 10 de la Biblia en ebreo siendo danyada, ke termino siendo yevada a Israel en sekreto en el mismo tiempo. Yegando a 1992 kuando el padre de Asad, basho pression, forso a los djudios de emigrar, se kedavan en Alepo apenas 4000 djudios i mas pokos en Damasko i Qamishli. La mayoria se fueron despues. En 2022 se estima ke avian solamente 4. Este anyo son 3.
La mayoria de los sitios djudios no tenian dinguno a okuparse de eyos por dekadas. El konflikto se intensifiko kon el danyo aumentando. En 2020 la mitad de los sitios djudios fueron destruidos segun el raporte de «La Fondasion Del Heritaje Judio».
La «Sinagoga Jobar» de Damasko, ke es una de las solas ke se vijita, era ande los viejos se ivan a rogar en 2014. Oy se topa tornada en polvo i mankan ayi las Sefer Tora ansianas, los tapetes i las kandelarias. Aparesen unos en Turkia.
«La Sinagoga Bandara», una de las mas viejas en Alepo, tuvo danyos grandes en las gerras en la rejion. Fue renovada en los anyos 1990 i fue danyada de muevo en «La Gerra Sivil» en 2016.. «Tadar», una sivdad al este de Alepo, era un tiempo un destino importante para los djudios por el Monumento del «Profeto Ezra» ke paso por ayi en su kamino a Yerushalayim. Despues de un neglijio largo, el monumento fue ekskavado i yevado por los rebeldes i el Governo Sirio entre 2021 i 2022.
Los eskolares se preokupan sovre las Sinagogas de la Era Romana. en sivdades komo «Apamea i Dura Europos». Muncho fue rovado kuando estavan en manos de las Fuersas del Estado Islamiko. Son kozas presiozas para los muzeos.
Es difisil de saver la kantidad de danyos echos a los sitios djudios. Kon Siria oy avansando a su proxima era, el destino se keda en balansa i los artifaktos djudios sovrebiviran si el proximo rejime lo desha. El muevo rejime tiene sus raizes en el «Movimiento Fundamentalisto Islamiko» ke ultimamente se presenta komo «Pragmatisto», deshando afuera las kestiones de minoridades i sus intereses. Sus soporte es kritiko i nesesitamos djente ke ayudaran para ke se realize. No se save ke sera el futuro. Avran munchas gerras i no se save ke grupo ganara i diktara el pais.
SALUDES A TODOS. SELAMUN ALEYKUM. SHALOM ALEYHEM.
Trezladado por Simon Geron de Sydney
Fuente: Ladinokomunita
