eSefarad Noticias del Mundo Sefaradi
Keridos amigos i amigas.
Munchas vezes tengo la impresion de ser rovado al envejeser. Ay kozas ke tenia antes i ke no las tengo oy. Kisas kozas ke no supe apresiarlas kuando las tenia. En una existensia tan redusida, veo ke uno se akostumbra a las piedritas komo se akostumbra a sus ganansias. Uno no tiene otra solusion. El tiempo ke pasa nunka torna atras. Ademas. todos tenemos ke pasar por esto. Ay unos ke sufren mas ke mosotros. La realidad es ke malgrado todo el sufrimiento, uno se ata a la vida.
La poesia siguiente mostra lo ke siento.
Saludes a todos.
——————————————————————————-
UNO SE ATA A LA VIDA
De todo lo ke he ganado desde mi manseves
Me parese perdido al yegar a la viejes
Me veo transportado a la miseria del pasado
Perdiendo las ganansias de una vida, kon el tiempo
Para yegar a algo tuve ke utilizar todas mis fuersas
Al fin veo ke lo ke tenia en mano eran kozas temporarias
El tiempo arranko de mi una koza tras la otra
Redusiendome a uno ke kaji no le kedava nada.
Echado afuera del echo ke me dava el pan diario
Abandonado por todos ke un tiempo estavan a mi lado
No era mas joven i potente en indo verso la viejes
Nunka puedia ser un aventurero i gozar de plazeres.
Estas piertas me izieron pedrer el guaspera amanyana?
Ke kedaria de mi al ser tanto rovado i disminuido?
La realidad es ke uno se ata a la vida mismo en perdiendo todo
PORKE PEDRER LA VIDA ES LA MAS GRANDE PIEDRITA
Eskrito por Shimon Geron
Sydney-2019
Fuente: Ladinokomunita