eSefarad Noticias del Mundo Sefaradi
Una pajina propia para Lilian
de Alicia Ramos González
En eskadrunyando en el Archivo Fotografiko de Yad Vashem, topí algunas fotografías ke enrejistravan rekordos sinyifikativos de la famiya Amir de Salónika en los anyos antes de la okupasión nazí de la Grecha. En tres estampas aparesía una djovinika i su nombre, Lilian Menashe, m’era konosido.
Anyos avia ke tuve meldado por la primera vez este nombre en el livro de su padre, el doktor Albert Menashe, reskapado de la Shoá. Durante los anyos, mientres ke investigava sovre el «klan de las gregas» en la frauenkapelle (komando de lavoro muzikal forsado de mujeres) de Birkenau, rasladeí en unos kuantos manaderos un punyadiko de sitasiones, magajikas de los kapitulos d’alkavo de su kurta vida, interrompida violentemente en el inferno Auschwitz. Ama el aparesimiento de Lilian en akeyas fotografias amanzió mi korasón i dechizí de adjuntar todas las fingas en una pájina propia.
No tengo haberes de Lilian fina 1938, data de la primera estampa: Lilian está en la edad de onse anyos i es la ijika regalada de Albert Menashe i su mujer, Zoly, de la alkunya Angel. El padre profita de una nombradía en Salónika en lavorando komo médiko i es un múziko muy talentuozo; su mujer es menajera i perkura ke su unika kriatura, agora eleva de la eskola primera i el konservatorio, devenga una kriansa adoravle. Lilian tiene airada de dramajona i kon su ojada manyetika parese ke entra al objektivo del aparey fotografiko ke la enrejistra para siempre i siempre.
En otra foto, datada de dos mezes antes ke la Italia fashista okupa la Grecha, Lilian se amostra kresida i enfloresida, i tiene buen parpar. Serkamente eskapará sus estudios muzikales i, meoyuda, pensa de ir a la eskola de medikería. Su padre topa mumcho plazer kuando en su tiempo libero pratika múzika endjunto a su ijika galana. En esta estampa Lilian parese sonriir lejeramente sin saver de la loka tempesta ke va deskadenarse al punto, ke amurchara su vida i deskalkara la alkunya Menashe de akea vieja sivdá djudiá ke ya nunka no va tornar.
Ayo un otro pedasiko de la vida de Lilian después ke pasaron tres anyos. Al empesar el mez de djunio 1943, viaja kon suS parientes en un treno a una destinasion deskonosida. En un vagón para bestiambre ande se apretan kaji sheshentos djudiós kon los sovrajes de sus vida, la brava muchachika kompoza un poema en grego ⎯»Eskrito en vagón siyado»⎯, testimoniansa de akeyos ocho dyas de arrebashante suplisio, trezoriko remanisido del koraje de la manseveriya akayada. Aun entre la mizeria i la suziedad parese ⎯komo marko el poeta Avner Perez⎯ ke el korasón de Lilian kontinuava kantar.
Ama su kante pishín devendrá alguayas en viendo el nombre de la estasión finala: ¡Auschwitz!
Algunos días se pasan. Se sienten alegres sones en razgando los sielos enkargados del frauenlager (kampamiento de mujeres) de Birkenau. Es la rezín kreada frauenkapelle ke tanye la unika múzika ke no es defendida de djugar en este kampo. Dainda es un chiko grupamiento de vente prizonieras i una de estas es Lilian. Apenas se rekonose: kashkuda, vistida kon handrajos, la matrikulasion al braso i la temoridad tatuada en su kuero.
Durante unas kuantas semanadas, la mas chikitika de las muzisianas esta enkargada kon una emportante misión: los sones de su tambur basho son la latida de los marshes almanes ke de manyana matrana i a la tadre asegundan a las esklavas de los komandos de lavoro en la ida i la venida a lazdrar i penar. Lilian, a la kavesera del komando musikal, karga el pompozo instrumento i sus kansos brasos se bambolean rítmikamente para produsir el sonido agudo ke marka el meneadero de las sirás de esklavas.
Disho el eskritor Lawrence Durrell ke la múzika es el amor ke bushka biervos. Ama en Auschwitz la múzika se enguerka siendo la voz del lager, la ekspresion presiza de su avanamiento. La múzika, ke espasió el korasón de Lilian desde su chikes, endagora es esklavaje: oras i oras de pratika, konsiertos repetando sin fin ni atemo las mizmas ovras muzikalas; djugar kon luvia i sol, akavada de kansería, atormentada en permanensia por el ambre, kon la alma kuvrida solo kon panyos de amargura.
Dunke afriida, la djovenika Menashe no esta asolada enteramente. De un lado, entre las prizonieras del komando de la múzika ay unas kuantas salonikiotas i adientro de este sírkolo puede sintir la lingua de su nonas i topar arrimo i mamparansa. Por seguro la kompanyía konfraternala akudia a Lilian para no deskaer. Del otro lado, su padre, de mizmo ke eya, lavora en el komando de la múzika de los prizoniero i durante kaji un mez su «banda» esta aplazada en el kampamiento de Lilian. Ansina ke en vezes eya se eskonde en un kantón para verlo tanyer la flavta i sekretamente arresevir de su moruk (viejo) una mirada kayente.
Ama a la primera metad del mez djulio se anunsia el trokamiento del komando de Albert Menashe a un muevo kampamiento. Albert da su adío a Lilian i los dos se abrasan silensiozamente, en perkurando amahar sus yoro.
El frauenlager es un lugar monstruozo i violente ama la inosente Lilian parese sana i salva en la frauenkapelle por mor de ke esta es un kapricho de Maria Mandl, kunduktrisa del kampo de mujeres, i las tanyederas son konsideradas a su ojos komo «animales de kompanyía».
Dezdichozamente, la kapo muzikante de la frauenkapelle, responsavle a engajar las múzikas, arondja a Lilian de su posto para klasar una amiga del grupo deskojido de «viejas polonezas», en deshando a la dezmazalada muchachika sin la proteksión de un lavoro.
A la fin de enverano 1943. Son días de tansión i temor. ¡Lagersperre! – se desbrocha una furia de seleksiones adientro el kampamiento de mujeres. Kon el korasón akevrantado, Lilian eskrive un avizo: «mi dulse papa, m’espanta de no verte mas nunka i mizmo a mamá. Echame tu bendisyón».
En una luvioza i freska tadrada del mez de oktobre, 800 ninyas lindas de Salónika, deskalsas i kaji deznudas, sin amparo i sin esperansa viajan suvidas sovre kamiones desde el maldicho bloko 25 fina el kavo de sus sufriensa. De afuera sienten la múzika de una lagerkapelle, el aire les yeva el susurro mielozo de una flauta ke el solisto, el prizoniero 124.454, tanye kon muncha maestrería. Una de estas ninyas se yama Lilian i tiene diezisesh anyos.
Se aleshan… Ama la lagerkapelle kontunea sonando mientres los sielos yoran lágrimas de siniza.
_________________
Esta es una de las 3 konsejas GANADORAS del KONKURSO DE KOMPOZISION 2024 en la kategoria PRINSIPIANTES.
