Un kante para mamá: "Lavava la blanka ninya" – Sara Sufrin Baruch

Un dia en vijitando a mi kerida mama, la mi alma este anyo entro en noventa i dos anyos, sana ke este, la vidi ke esta dezganada, la salud no la tiene buena.
Le demandi :
– «mama kualo puedo azer para enkorajarte?»
– «kantame una kantiga», me respondiyo.
– «I kuala kantiga keres ke te kante?»  le demandi yo,
Eya penso un poko i me disho:
-«kantame – Lavava la blanka ninya»

Estuvi kuryoza a saver porke mi mama me demando ke le kante esta
antigua romansa ke no la oyi desde ke yo era muy chika.
Kuando le demandi ke ez la razon ke eskojo esta romansa ? me repondiyo kon un arranko ke esta era la romansa ke su madre le kantava, en su chikez,
antes ke se echava a durmir, ansina disho:

-«No me keriya irme a echar a durmir si mi mama no me kantava –» la de la blanka ninya».

Akel dia perkuri a bushkar esta romansa en el enternet, ensenyi las palavras
i la melodia i kuando me vo ande mi mama, le kanto i me emosiyono a var la sunriza en su kara.

Esta romansa paso de mandre a fija, de fija a la inyeta i yo la kanto tambien a la mi chika enyetika.

Aki puedesh a oyir a la kantadera Suzy kantando esta ermoza romansa

 
N.del E.: Sara enrejistro este kante kon su voz en un video ande el Dr. Itzhak Levi le izo un reportaje ke se puede ver AKI ¡Vos vash a namorar!

 
Fuente: Ladinokomunita