eSefarad Noticias del Mundo Sefaradi
Keridos amigos, en el Jewish News de esta semana en el kanton de Sichat Yosef, Yossi Aron tenia un artikolo muy interesante sovre la kestion si Israel va tener Un Gran Rabino o Dos. Uno para los Ashkenazim i el otro para los Sefaradim. Tzipi Livni komo Ministra de Justisia i Naftali Bennett komo Ministro De Asuntos Relijiozos kon su Deputado Eli Ben Dahan, sumetieron al Knesset la ley de tener solamente un Gran Rabino ke sierve a todas las komunidades. Israel tiene un Primer Ministro, un Presidente, un Shef de la Armada. Porke no un Gran Rabino solamente?
UN GRAN RABINO O DOS?
El tiempo ya vino para tener un Rabino para toda la nasion. Un Rabino ke va unir a todas las partes del Puevlo Judio en lugar de mantener una separasion antikuada. Este kambio es muy importante ke simboliza unidad. La kestion se poza porke no se izo antes? Oy kuando se kazan los Ashkenazim kon los Sefaradim o Yemenitos, no ay razon para tener 2 Gran Rabinos .
Komo es ke mos topimos en esta situasion?
Despues de las Kruzadas,los Judios imigravban a Israel de los paises vizinos komo la Siria i Ejipto. Los egziliados de Fransia vinieron en tiempo TOSAFIST. Avian otros ke venian de Espanya komo el RAMBAN/Nachmanides en el Siglo 13. Los Ashkenazim empesaron a venir en la Era Moderna kon Yehudah Ha Hasid en 1700. Eyos no tomaron raizes a la muerte del lider. Despues avia la imigrasion de los Judios de la Evropa del Este de Orijin Hasid. Esto fue segido por la imigrasion Sionista en la Segunda Parte del Siglo 19. Fue este grupo ke domino las shena de Israel. Mismo si al nasimiento de Israel se fueron ayi mas i mas Judios del Oriente, la influensia del otro lado se kedo ayi.
Viniendo al orijin del Gran Rabino, komo los otros elementos de «status quo» ke governan la relasion entre la relijion i el estado desde ke Israel gano su independensia, el Rabinato tambien topa sus orijines indo atras a los Otomanes. Los dirijentes tratavban a este lugar komo un «SANJAK SIRIANO» [Division de administrasion] del Imperio Otomano. Basho el Sistem de MILLET aplikado a traves el Imperio Otomano Musulmano, otras komunidades tenian el derecho de dirijir sus asuntos relijiozos i personales, segun los prinsipios basho el leadership de personas rekonosidas.
Basho este konteksto al empesijo del Siglo 17 el Titulo de Rishon LeTsion se dava al Rabino de Jerusalem. En 1842 el Rabino de Constantinople/Istanbul era el «HAHAM BASHI» ke representava a los Judios Turkos delantre el Sultan. Se kombino esto kon Rishon LeTsion/El Viejo Yeshuv. No avia una separasion entre los Ashkenazim i Sefaradim.
Fue durante el Mandato Britaniko de Palestina ke el Kommissioner Alto establesio el Rabinato Ortodoks en Rishon LeTsion. Se adjunto ayi el Gran Rabino Ashkenazi.
No ay duda ke las diferensias sosial i relijiozas en los primeros anyos djustifikavan tener 2 Rabinos diferentes. Ma en las 6 dekadas se vido un kambio grande i la separasion entre los 2 grupos se sentio menos i menos. Sovre todo al nivel politiko kon la kooperasion entre los 2 lados.
Si el Establesimiento Konservativo Ortodoks esta pronto por este kambio, ay ke verlo. Mismo si el ser unidos es una koza para alavarsen, avran siempre diskusiones en favor i kontra esto, antes ke se aga ley.
Entre tiempo ay ke dizir ke el Mundo Relijiozo Judio pasa por un tiempo interesante.
Shalom a todos.
Trezladado por Shimon Geron. Sydney
ADDENTUM A ESTE ARTIKULO
Una lista de los Gran Rabinos de Ashkenazim i Sefaradim.
Los Sefaradim
Yitshak Nissim.[1955-1973]
Ovadia Yosef [1973-1983]
Mordehai Eliyahu [1983-1993]
Eliyahu Baksi-Doron [1993-2003]
Shlomo Amar [2003-2013]
Yitshak Yosef [2013- ]
Los Ashkenazim
Isser Yehuda Unterman [1964-1973]
Shlomo Goren [1973-1983]
Avraham Shapira [1983-1993]
Yisrael Meir Lau [1993-2003]
Yona Metzger [2003-2013]
David Lau [2013- ]
Fuente: Ladinokomunita
