Un Evenimiento Sefardi en Izmir

En el 13 de Deciembre 2012, se realizo una exposition i un filmo (pelicula) documental con la tema “De ayer a oy, las bodas Sefardis en Izmir” Toda la komunidad Judia de Izmir fue envitada. Avia tambien muncha gente del publico. El evenimiento tuvu grande exito. El mismo evenimiento se realiso el Julio passado en Paris, en la “32: Congresso de Genelogia Judia” i en la “1. conferençia Ladino en La Universidad de Enverano.”

La exposition de photographia de boda se compone de photos de 80 anyos, tomados (cogidos) de los archivos de familias. Las photos fueron classificados en orden de los costumbres traditional komo dota, entradura, ashugar, banyo de novya, alevantar la novya, kezada… muy special de bodas en Izmir. Kada parte fue explicado con apuntes. Las photos negro-blanco de los anyos pasados, con las photos de color ke apartiene a los anyos reciente fueron exposados enjuntos. Asi se ve como las traditiones pasaron de generation a generation, perdiendo poco.

Cuando, el filmo (pelicula) documental, un viaje en tiempo desde 1930 asta 2012, diversos judios de anyos 25 asta 99 tomaron parte en las conversationes. Malgrado de todas las inconviniencas, los anyos ke a pasado, tambien ke mos estamos amenguando kada dia i dia, de menos a menos, el filmo amostro con importancia, como la majoria de los costumbres se realisan ayende con el mismo ardor, savor i alegria. La majoria de las conversationes son en Ladino. Ma, existe tambien copias con sutitros en Turco, Ingles i Frances.

Era un grande plaser de ver la grande participacion de la Comunidad Judia en este evenimiento. Es muy raro de verlo. Los cantes de Sabi i Avram Aji, con las melodias de “Los Pasharos Sefardis” enrikesieron la pelicula. Una de los mas enfluente partida de la pelicula era los ultimas palabras de Sara Pardo ke arancaron los korasones: “Puede ser ke un dia los Judios no vamos mas existir en Izmir. Ma la herensia, la historia, la cultura de los Izmirlis ke apartiene a todos los Judios del mundo, nunca ni se va depedrer ni se va despareser.”

Esta obra extraordinaria fue realizado por Selim Bonfil con su ideal de fundar un “Centro de Expositione Sfardi” en Izmir. Se realiso con la collaboration (de su braso derecho, su mujer Sarit; su ijo Aksel) i siete volontarias: Beki Shikar, Katya Levi, Keti Asal, Rahel Hayim, Sara H. Enriquez, Sara T. Enriquez i Stella Azar. El intento del evenimiento es presentar el plano; yamar la atension i relevar los sentimientos de la comunidad. Asi aprontarlos para la collaboration en nuevos projectos en el futuro.

Rafael Algranati