TU BİSHVAT por Forti Barokas (Teksto+audio)

forti barokas2

Un ombre estava meldando un livro de filozofiya a la sombra de un arvole. Alevanto la kavesa miro al arvole i disho kon boz alta :

-Sera ermozo de ser un arvole i bivir komo un lenyo sin pensar supito oyo ke el arvole le responde

-Meldar livros de filozofiya no puedo ma te puedo dar unas kuantas lisyones keres

-Sii ya kero kualo es ke me vas a ambezar el arvole empeso a kontarle

1-Todo tyene un tyempo. El arvole se enderecha kuando esta mojado. Djusto komo la vida, ma el tyempo es muy emportante, esto savelo byen! “ni al perro vyejo se ambeza djugos muevos, ni al lovo vyejo se ambeza kaminos muevos».

2- Al arvole ke kaye, todos chafteyan, alora tu miraver de no kayer en la vida, porke kuando estas fuerte, todos vyenen a tu solombra kuando kayes no te konosen.

3- No te espantes del enemigo de afuera, el enemigo de aryento es mas peligroso.

4- Kuando la raiz de un arvole es profunda, tanto es su altura. no te olvides nunka de tus raises porke si te olvidas de tu pasado no teneras tu futuro.

5- El arvole bive kon sus ojas. El benadam kon su famıya. Tu aze sintir tu prezensya a tu famiya, esto es muy emportante.

6- Los arvoles no demandan kuando va vinir primavera, kuando vana enfloreser, las ojas, eyas ya azen sus doveres, los arvoles asperan kon pasensya. si keres parvenir i tu aspera kon pasensya.

7- Al arvole ke da fruta echan pyedras, las personas konsideradas i ke reusheron en la vida kale ke seyan fuertes para arondjar las pyedras ke les echan. Si no, no pueden reushir.

8- Ombre! No mires a los arvoles komo lenyos, syempre tyenes menester de eyos. Seya kuando nases por la kuna, seya kuando mueres por el serkolyo.

El ombre dospues de oyir esto todo penso i disho:

No es el arvole ke es lenyo es yo ke so lenyo.

En el kalandaryo djudio el 15 del mez Şevat se fyesta “beraha las frutas” TU BİSHVAT. Tu bişvat es el roshahana de los arvoles ke dan frutas.

Tu Bishvat mos ambeza la jenerosidad de dyos i mozos en komyendo las frutas rengrasyamos kon orasyones, kon las berahas i plantamos arvoles.

Sigun las tradisyones djudias, los arvoles en esta data empesan a enfloreser. Por esto plamtamos arvolikos muevos para deshar un mundo vedre alas jenerasyones futuras.

Sigun las tradisyones de la komunidad sefaradi de Estanbul, el seder de Tu Bishvat se ordena dopues de komer i dospues ke se dize el birkat amazon. En la meza se mete spesyalmente las frutas kultivadas en la tyerra santa i otro modos de frutas i la seremoniya empesa kon berahas diferentes.

Terminaremos kon una anegdot riyeremos un poko, ke mos venga la primavera kon rizas kon salud i kon atslaha.

Moiziko i su famiya trokaron de sivdad. Ande se enstalaron no aviya eskola djudiya los paryentes fueron ovligados de eskrivirlo a una eskola de kristyanos. Un diya la profesora entro a la klasa i les disho a los elevos ke va azer una kompetensya i el ke va dar la repuesta djusta va ganar 50 dolares.

La demanda era

Ken fue la mas emportante persona en este mundo?

Los elevos empesaron a responder. Uno disho Newton, otro disho KARL MAX, otro ENSTEİN, un otro MADAM CURİ, La profesora disho a todo no no es djusto. A la fin lo yamo a Moiziko,

-Dize veremos en este mundo ken fue la mas emportante persona?

Moiz da repuesta:

-JESU profesora.

-Bravo Moiziko tu supites la repuesta djusta tu ganates los 50 dolares.

En la rekreasyon la profesora se fue allado de Moiziko i le disho

-Es verda ke dates la repuesta ke keriya yo ma tu sos djudyo deke dishites Jesu?

-Profesora si diziya Moshe Rabenu iva peryer 50 dolares.

TU BİSHVAT ALEGRE!

Forti Barokas

Fuente: turkisrael.org.il

Check Also

enkontros de alhad 15 flyer03 bryan rachel i hannah

ENKONTROS DE ALHAD – 31 MARSO 2024 :: UNA MUEVA ORGANIZACION EN LOS ESTADOS UNIDOS, LA LIGA AMERIKANA DEL LADINO – Balabay Dr. BRYAN KISCHEN – Musafiras RACHEL AMADO BORTNICK i Dra. HANNAH PRESSMAN – A las 13 oras (Arjentina) x Zoom – Mas orarios en el anunsio

Donativo para ayudar a Enkontros de Alhad ENKONTROS DE ALHAD Avlados en Djudeo-espanyol – Ladino …

Deja una respuesta

Tu dirección de correo electrónico no será publicada. Los campos obligatorios están marcados con *

Este sitio usa Akismet para reducir el spam. Aprende cómo se procesan los datos de tus comentarios.