Shaka: El kavedji i el papagayo

Avia en Salonik una meana, tenida por Salomoniko.

Este Salomoniko avia merkado un papagayo a un navigador, i embezava diversas bavajadas i shakas al pasharo, i todos los mushteri se reyian.

Despues, vino el tiempo de la gerra.  Salomoniko embezo a su papagayo a gritar «Muerte a los Almanes!» lo ke azia dainda reyir los ombres del barrio,
ke estavan agora vestidos en askeres.

Se fueron a la gerra, i la piedriyeron. En unos kuantos dias, los Almanes estavan en Salonik. El primer ofisyer alman ke entro en la meana
de Salomoniko sentio el papagayo ke gridava «Muerte a los Almanes».

Yeno de ravia, se fue a bushkar a los askeres, por kastigar este kavedji.
Muerto de sar, Salomoniko se akodro  ke el haham vizino ke tenia tambien un pagayo, merkado al mizmo navigador.
 
«Por piada, aksepta de trokar vuestro papagayo kon el mio, porke los Almanes van a matar todo el mundo.»
 
Salomoniko atorno a su meana, kon el papagayo del haham. Poko despues, el ofisyer retorno, kon un yeno kamion de askeres en armas.
 
«Es aki ! Nallo, el papagayo !»  El Alman se metio a azer koshkias al papagayo. «Koko? Dime alguna koza! Avla, koko!»  El papagayo no dezia nada. El Alman se aravio, i se metio a gridar, por provokar el pasharo.

«Muerte a los Almanes, Koko! Muerte a los Almanes.» I el papagayo arespondio «El Dio ke te sienta, ijo mio!»

Cobert
Para Ladinokomunita