eSefarad Noticias del Mundo Sefaradi
Ver todos los capítulos publicados en esta sección
Sefer TORA NEVIIM UKETUVIM
El livro de la Ley, los Profetas, las Eskrituras
Trazladado en la lingua Espanyola
Estamperea de A. ‘H. Boyadjian
Konstantatinopla 1873
Transkrivido por Ye’huda Sidi. Febrero 2015
YE’HOSHUA
6
1Empero Yeriho estava serrada, i byen serrada, por kavza de los ijos de Yisrael; ninguno salia, i ninguno entrava. 2I disho A’ a Ye’hoshua: mira, yo entregi en tu mano a Yeriho, i a su rey kon los barraganes vayentes. 3I rodearesh la sivdad todos los varones de gerra, rodeando la sivdad una vez al dia; ansi arash sesh dias. 4I syete saserdotes yevaran syete trompetas de kuernos de karneros delante del arka; i en el dia seteno rodearesh la sivdad syete vezes, i los saserdotes tanyeran kon las trompetas. 5I sera, ke kuando sonaren largamente kon el kuerno de karnero, kuando oyeresh el sonido de la trompeta, todo el puevlo aularan kon aulasyon grande i la muraya de la sivdad kaera de su lugar, i el puevlo suviran kada uno en derecho de si.
6I yamo Ye’hoshua, ijo de Nun, a los saserdotes, i les disho, alsad el arka del firmayento; i syete saserdotes yevan syete trompetas de kuernos de karneros delante del arka de A’. 7I disho al puevlo pasad, i rodead la sivdad; i los ke estan armados pasaran delante del arka de A’. 8I fue, ke luego ke Ye’hoshua avia avlado al puevlo, los syete saserdotes yevando las syete trompetas de kuernos de karneros, pasaron delante de A’, i tanyeron kon las trompetas; i el arka del firmamyento de A’ iva detras de eyos. 9I los armados ivan delante de los saserdotes ke tanyan las trompetas, i el apanyamyento iva detras del arka, los saserdotes andando i tanyendo kon las trompetas. 10I Ye’hoshua enkomendo al puevlo, dizyendo: no aulesh, ni agash oir vuestra boz, ni salga palavra de vuestra boka, asta el dia ke yo vos digo, aulad; entonses aularesh. 11I el arka de A’ rodeo la sivdad, rodeando una vez; i vinyeron al real i repozaron en el real.
12I Ye’hoshua madrugo por la manyana, i los saserdotes alsaron el arka de A’. 13I los syete saserdotes, yevando las syete trompetas de kuernos de karneros delante del arka de A’, ivan andando i tanyendo kon las trompetas; i los armados ivan delante de eyos, el apanyamyento iva detras del arka de A’, los saserdotes andando i tanyendo kon las trompetas. 14I en el dia segundo rodearon la sivdad una vez, i se tornaron al real; ansi izyeron sesh dias. 15I fue, ke al dia seteno madrugaron kuando suvia el alba, i rodearon la sivdad de esta manera syete vezes; solamente en akel dia rodearon la sivdad syete vezes. 16I fue, ke a la setena vez, kuando los saserdotes tanyeron kon las trompetas, Ye’hoshua disho al puevlo: aulad, porke A’ vos a dado la sivdad. 17Ma la sivdad sera enheremada, eya i todo lo ke ay en eya, para A’; solamente Rahav la eskarada bivira, eya i todos los ke estan kon eya en kaza, por lo ke eskondyo a los mensanjeros ke enbiimos. 18Empero vozotros guardadvos de lo enheremado, no sea ke vos agash enheremados, kuando tomaresh de lo enhermado, i agash enheremado al real de Yisrael, i lo konturvesh. 19Ma toda la plata, i el oro, i atuendos de alambre i de fyerro, sea santifikado a A’, i venga al tezoro de A’. 20I el puevlo aulo, i los saserdotes tanyeron kon las trompetas; i akontesyo, ke komo el puevlo oyo el sonido de la trompeta, el puevlo aularon kon aulasyon grande, i la muraya kayo de su lugar; i el puevlo suvyo a la sivdad, kada uno en derecho de si, i prendyeron la sivdad. 21I destruyeron todo lo ke avia en la sivdad, tanto varones komo mujeres, tanto mosos komo vyejos, asta los bueyes, i ovejas, i aznos, a tajo de espada. 22Ma Ye’hoshua disho a los dos varones ke avian eskulkado la tyerra: entrad en la kaza de la mujer eskarada, i sakad de ayi a la mujer, i a todo lo ke es suyo, komo le djurastesh. 23I los mansevos eskulkas entraron, i sakaron a Rahav, i a su padre, i a su madre, i a sus ermanos, i todo lo ke era suyo; i sakaron a todos sus linajes, i los puzyeron afuera del real de Yisrael. 24I kemaron kon fuego la sivdad, i todo lo ke avia en eya; solamente la plata, i el oro, i los atuendos de alambre i de fyerro, metyeron en el tezoro de la kaza de A’. 25I Ye’hoshua abidiguo a Rahav la eskarada, i a la kaza de su padre, i a todo lo ke tenia; i eya moro en medyo de Yisrael asta el dia de oy, por lo ke eskondyo a los mensanjeros ke Ye’hoshua enbio para eskulkar a Yeriho.
26I en akel tyempo Ye’hoshua kondjuro, dizyendo: maldicho sea delante de A’ el varon ke se levantare i fraguare esta sivdad de Yeriho; en su primodjenito la asementara, i en su menor asentara sus puertas. 27I A’ fue kon Ye’hoshua; i su fama fue en toda la tyerra.
7
1Empero los ijos de Yisrael falsaron falsia en lo enheremado; porke Ahan, ijo de Karmi, ijo de Zavdi, ijo de Zerah, del trivo de Ye’huda, tomo de lo enheremado; i el fulor de A’ se ensendyo kontra los ijos de Yisrael. .
2I Ye’hoshua enbio varones dezde Yeriho a Ay ke es serka de Bet-Aven al oryente de Bet-El; i les avlo dizyendo: suvid i eskulkad la tyerra. I los varones suvyeron i eskulkaron a Ay. 3I tornaron a Ye’hoshua, i le disheron: no suva todo el puevlo; ma suvan komo dos mil varones, o komo tres mil varones, i eriran a Ay. No fatiges a todo el puevlo ayi, porke son pokos. 4I suvyeron aya del puevlo komo tres mil varones; i fuyeron delante de los varones de Ay. 5I los varones de Ay iryeron de eyos komo trenta i sesh varones, i los persigyeron de delante de la puerta asta Shevarim, i los iryeron en la bashada; i el korason del puevlo se derrityo, i se izo komo agua
6I Ye’hoshua razgo sus vestidos, i se echo sovre sus fases a tyerra delante del arka de A’ asta la tarde, el i los vyejos de Yisrael; i echaron polvo sovre sus kavesas. 7I disho Ye’hoshua: ¡guay, Senyor A’! ¿porke iziste pasar a este puevlo el Yarden, para entregarnos en mano de los Emorios, para deperdernos? ¡o si nos uvyeramos kontentado i kedado al otro lado del Yarden. 8¡O A’! ¿ke dire, pues ke Yisrael bolvyo las espaldas delante de sus enemigos? 9Porke los Kenaanios, i todos los moradores de la tyerra oiran esto, i nos rodearan, i tajaran nuestro nombre de la tyerra; ¿i ke aras a tu nombre grande?
10I disho A’ a Ye’hoshua: levantate; ¿porke estas echado ansi sovre tus fases? 11Peko Yisrael, i tambyen traspasaron mi firmamyento ke les enkomendi; i tambyen tomaron de lo enheremado, i tambyen rovaron, i tambyen mentyeron, i tambyen puzyeron en sus atuendos. 12Por tanto los ijos de Yisrael no podran levantarse delante de sus enemigos, sino ke bolveran las espaldas delante de sus enemigos, porke se izyeron enheremados. No sere mas kon vozotros si no destruiresh al enheremado de entre vozotros. 13Levantate, santifika al puevlo, i di: santifikadvos para manyana; porke ansi dize A’ Dyo de Yisrael: enheremado ay en medyo de ti, Yisrael; no podras levantarte delante de tus enemigos asta ke kitesh el enheremado de entre vozotros. 14Vos ayegaresh pues a la manyana por vuestros trivos; i sera ke el trivo ke A’ prendyere se ayegara por sus linajes; i el linaje ke A’ prendyere se ayegara por sus kazas; i la kaza ke A’ prendyere se ayegara por los varones. 15I sera, ke el ke fuere prendido kon lo enheremedo sera kemado en fuego, el i todo lo ke tyene, por lo ke traspaso el firmamyento de A’, i por lo ke izo vileza en Yisrael.
16I Ye’hoshua madrugo por la manyana, i izo ayegar a Yisrael por sus trivos; i fue prendido el trivo de Ye’huda. 17I izo ayegar el linaje de Ye’huda, i prendyo al linaje de los Zarhitas; i izo ayegar el linaje de los Zarhitas por los varones, i fue prendido Zavdi. 18I izo ayegar su kaza por los varones, i fue prendido Ahan, ijo de Karmi, ijo de Zavdi, ijo de Zerah, del trivo de Ye’huda. 19I disho Ye’hoshua a Ahan: ijo mio, de agora onra a A’ el Dyo de Yisrael, i azle atorgamyento; i denunsyame agora lo ke iziste; no me lo enkuvras. 20I Ahan respondyo a Ye’hoshua, i disho: a la verdad yo peki kontra A’ el Dyo de Yisrael, i ansi i ansi ize: 21yo vide en el espojo un manto Babeloniko bueno, i dos syentos siklos de plata, i una lingua de oro de pezo de sinkuenta siklos, i los kovdesyi, i los tomi; i ek, estan eskondidos en la tyerra en medyo de mi tyenda, i la plata debasho del manto.
22I Ye’hoshua enbio mensajeros, i korryeron a la tyenda, i ek, estava eskondido en su tyenda, i la plata debasho de el. 23I los tomaron de en medyo de la tyenda, i los trusheron a Ye’hoshua, i a todos los ijos de Yisrael; i los vazyaron delante de A’. 24I Ye’hoshua, i todo Yisrael kon el, tomo a Ahan, ijo de Zerah, i la plata, i el manto, i la lingua de oro, i sus ijos, i sus ijas, i sus bueyes, i sus aznos, i sus ovejas, i su tyenda, i todo lo ke tenia; i los yevaron al vaye de Ahor. 25I disho Ye’hoshua: ¿por ke nos konturvaste? te konturvara A’ en este dia. I todo Yisrael lo apedrearon kon pyedras, i los kemaron en fuego, i los apedrearon kon pyedras. 26I levantaron sovre el un gran monton de pyedras, ke esta asta el dia de oy. I A’ se torno del eresimyento de su fulor. Por tanto se yamo el nombre de akel lugar el vaye de Ahor, asta oy.
8
1I disho A’ a Ye’hoshua: no temas ni te kevrantes; toma kontigo todo el puevlo de gerra, i levantate, suve a Ay, mira, yo entregi en tu mano al rey de Ay, i a su puevlo, i a su sivdad, i a su tyerra. 2I aras a Ay i a su rey, komo iziste a Yeriho i a su rey; empero su espojo i sus kuatropeas prearesh para vozotros. Pon para ti aselada a la sivdad detras de eya. 3I Ye’hoshua se levanto, i todo el puevlo de gerra, para suvir a Ay. I eskojyo Ye’hoshua trenta mil varones, barraganes vayentes, i los enbio de noche. 4I les enkomendo, dizyendo: mirad, vozotros aseladaresh a la sivdad, detras de la sivdad; no vos aleshesh mucho de la sivdad, i estaresh todos aparejados. 5I yo, i todo el puevlo ke esta konmigo, nos aserkaremos komo la primera vez, fuyeremos delante de eyos. 6I saldran detras de nozotros, asta ke los arrankemos de la sivdad; porke diran: fuyen delante de nozotros komo la primera vez; i fuyeremos delante de eyos. 7Entonses vozotros vos levantaresh de la aselada, i prenderesh la sivdad; i A’ vuestro Dyo la entregara en vuestra mano. 8I sera, ke kuando prendyeresh la sivdad, pondresh fuego a la sivdad. Segun la palavra de A’ aresh. Mirad, yo vos enkomendi. 9Entonses Ye’hoshua los enbio, i se fueron a la aselada, i se estuvyeron entre Bet-El i Ay, al oksidente de Ay; i Ye’hoshua repozo akeya noche entre el puevlo.
10I madrugo Ye’hoshua por la manyana, i konto el puevlo, i suvyo, el i los vyejos de Yisrael, delante del puevlo a Ay. 11I todo el puevlo de gerra ke estava kon el, suvyeron, i se aserkaron, i vinyeron enfrente de la sivdad, i pozaron al norte de Ay; i el vaye estava entre el i Ay. 12I tomo komo sinko mil varones, i los puzo por aselada entre Bet-El i Ay, al oksidente de la sivdad. 13I el puevlo puzyeron a todo el real ke estava al norte de la sivdad, i su aselada al oksidente de la sivdad; i Ye’hoshua anduvo akeya noche en medyo del vaye. 14I fue, ke komo el rey de Ay vido esto, los varones de la sivdad se apresuraron, i madrugaron, i salyeron al enkuentro de Yisrael a la pelea, el i todo su puevlo al tyempo senyalado, delante de la yanura; ma el no savia ke avia aselada kontra el detras de la sivdad. 15I Ye’hoshua i todo Yisrael se izyeron komo yagados delante de eyos, i fuyeron por el kamino del dizyerto. 16I todo el puevlo ke estavan en la sivdad fueron yamados para persegir detras de eyos; i persigyeron detras de Ye’hoshua, i se arrankaron de la sivdad. 17I no kedo varon en Ay, ni en Bet-El, ke no salyera detras de Yisrael; i desharon la sivdad avyerta, i persigyeron detras de Yisrael.
18I disho A’ a Ye’hoshua; estyende la lansa ke tyenes en tu mano a Ay, porke en tu mano la entregare. I Ye’hoshua estendyo la lansa ke tenia en su mano a la sivdad. 19I la aselada se levanto presto de su lugar, i korryeron luego ke el estendyo su mano, i vinyeron a la sivdad, i la prendyeron, i se apresuraron, i puzyeron fuego a la sivdad. 20I kuando los varones de Ay miraron detras de si, vyeron, i ek, el umo de la sivdad suvia a los syelos; i no tenian [1]lugar para fuir a una parte ni a otra; i el puevlo ke iva fuyendo al dizyerto, se torno kontra los ke le persegiian. 21I vyendo Ye’hoshua i todo Yisrael ke la aselada avia prendido la sivdad, i ke el umo de la sivdad suvia, tornaron, i iryeron a los varones de Ay. 22I los otros salyeron de la sivdad a su enkuentro; ansi fueron enserrados en medyo de Yisrael, los unos de la una parte, i los otros de la otra; i los iryeron asta ke no desharon a ninguno de eyos ke remanesyera ni eskapara. 23I al rey de Ay prendyeron bivo, i lo trusheron a Ye’hoshua. 24I fue, ke komo Yisrael akavo de matar a todos los moradores de Ay en el kampo, en el dizyerto onde los avian persegido, i ke todos eyos avian kaido a tajo de espada asta ser konsumidos, todos los Yisraelitas se tornaron a Ay, i la iryeron a tajo de espada. 25I todos los ke kayeron en akel dia, tanto varones komo mujeres, fueron dodje mil, todos los varones de Ay. 26I Ye’hoshua no retiro su mano ke estendyo kon la lansa, asta ke destruyo todos los moradores de Ay. 27Empero los Yisraelitas prearon para si las kuatropeas i el espojo de akeya sivdad, segun la palavra de A’, ke el enkomendo a Ye’hoshua. 28I Ye’hoshua kemo a Ay, i la puzo en monton de syempre, desoladura asta el dia de oy. 29I al rey de Ay kolgo sovre la forka asta la ora de la tarde; i komo el sol se puzo, Ye’hoshua enkomendo ke abasharan su kalavrina de la forka, i ke la echaran a la entrada de la puerta de la sivdad; i levantaron sovre el un gran monton de pyedras, ke esta asta oy.
30Entonses Ye’hoshua fraguo ara a A’ Dyo de Yisrael en el monte de Eval, 31komo Moshe, syervo de A’, avia enkomendado a los ijos de Yisrael, komo esta eskrito en el livro de la Ley de Moshe: ara de pyedras enteras sovre las kuales ninguno mesyo fyerro. I alsaron sovre eya alsasyones a A’, i sakrifikaron sakrifisyos de pases. 32I eskrivyo ayi sovre las pyedras una kopya de la Ley de Moshe, la kual el eskrivyo delante de los ijos de Yisrael. 33I todo Yisrael, i sus vyejos, i ofisyales , i sus djuezes estavan de la una i de la otra parte del arka delante de los saserdotes los Levitas, ke yevavan el arka del firmamyento de A’, tanto el pelegrino komo el nasido entre eyos, la mitad de eyos a la frontera del monte de Grizim, i la otra mitad a la frontera del monte de Eval, komo Moshe, syervo de A’, avia enkomendado antes, ke bendisheran al puevlo de Yisrael. 34I despues de esto meldo todas las palavras de la Ley, la bendisyon i la maldisyon, segun todo lo ke esta eskrito en el livro de la Ley. 35No uvo palavra de todo lo ke enkomendo Moshe, ke Ye’hoshua no meldo delante de toda la kompanya de Yisrael, kon las mujers i los ninyos, i los pelegrinos ke andavan enre eyos.
[1] Ebreo: mano
9
1I akontesyo, ke komo oyeron estas kozas todas los reyes ke estavan de esta parte del Yarden, en el monte, i en la bashura, i en toda la kosta del mar grande enfrente del Levanon, el Hitio, i el Emorio, el Kenaanio, el Perizio, el Hivio, i el Yevusio, 2se adjuntaron auna para pelear kon Ye’hoshua i kon Yisrael, de un akordo.
3Ma los moradores de Givon, kuando oyeron lo ke Ye’hoshua avia echo a Yeriho i a Ay, 4eyos tambyen izyeron kon arte, i anduvyeron i aparejaron vianda; i tomaron sakos vyejos sovre sus aznos, i odres de vino, vyejos, i rotos, i atados; 5i sapatos vyejos i remendados en sus pyes, i vestidos vyejos sovre si; i todo el pan de su vianda fue seko i mofozo. 6I anduvyeron a Ye’hoshua al real en Gilgal, i disheron a el i a los varones de Yisrael; vinimos de tyerra leshana: agora pues tajad kon nozotros firmamyento. 7I los varones de Yisrael disheron a los Hivios: kizas vozotros morash entre nozotros; ¿Komo pues tajaremos firmamyento kon vozotros? 8I disheron a Ye’hoshua: nozotros somos tus syervos. I Ye’hoshua les disho: ¿kyen sosh vozotros, i de onde venish? 9I le disheron: de tyerra muy leshana vinyeron tus syervos por el nombre de A’ tu Dyo: porke oimos su fama, i todo lo ke izo en Ayifto, 10i todo lo ke izo a los dos reyes de los Emorios, ke estavan de la otra parte del Yarden, a Sihon rey de Heshbon, i a Og rey de Bashan, ke estava en Ashtarot. 11Por tanto nuestros vyejos i todos los moradores de nuestra tyerra nos avlaron, dizyendo: tomad en vuestra mano vianda para el kamino, i andad a su enkuentro, i dizeldes: nozotros somos vuestros syervos, i agora tajad kon nozotros firmamyento. 12Este nuestro pan tomimos kayente de nuestras kazas por vianda el dia ke salimos para andar a vozotros; i agora, ek, esta seko, i esta mofozo. 13I estos odres de vino ke inchimos, eran nuevos; i ek, estan rotos; i estos nuestros vestidos i nuestros sapatos estan vyejos por kavza de la grande largura del kamino. 14I resivyeron a los varones a kavza de su vianda , i no preguntaron a la boka de A’. 15I Ye’hoshua izo paz kon eyos, i tajo kon eyos firmamyento para abidiguarlos; i los mayorales de la kompanya les djuraron. 16I fue, ke al fin de tres dias despues ke tajaron kon eyos firmamyento, oyeron ke eran sus vezinos, i ke moravan entre eyos. 17I partyeron los ijos de Yisrael, i vinyeron a sus sivdades al terser dia. I sus sivdades eran Givon i Kefira, i Beerot, i Kiryat Yearim. 18I no los iryeron los ijos de Yisrael, porke los mayorales de la kompanya les avian djurado por A’ Dyo de Yisrael. I toda la kompanya murmuraron kontra los mayorales. 19Ma todos los mayorales disheron a toda la kompanya: nozotros les djurimos por A’ Dyo de Yisrael; i agora no les podemos tokar. 20Esto aremos kon eyos: los abidiguaremos, para ke no ayga sanya sovre nozotros por kavza de la djura ke les djurimos. 21I los mayorales les disheron: bivan; ma sean kortadores de lenya i sakadores de agua para toda la kompanya, komo los mayorales les avlaron. 22I Ye’hoshua los yamo, i les avlo dizyendo: ¿por ke nos enganyastesh, dizyendo: estamos muy leshos de vozotros, aunke morash en medyo de nozotros? 23I agora maldichos sosh, i no faltara de vozotros syervo, i kyen korte lenya, i sake agua para la kaza de mi Dyo. 24I respondyeron a Ye’hoshua, i disheron: porke fue dado avizo a tus syervos ke A’ tu Dyo avia enkomendado a Moshe su syervo de darvos toda la tyerra, i de destruir todos los moradores de la tyerra de delante de vozotros; por tanto temimos mucho por nuestras vidas a kavza de vozotros, i izimos esta koza. 25I agora, ek, estamos en tu mano; komo te parese bueno i derecho de azer a nozotros, az. 26I el les izo ansi, i los eskapo de mano de los ijos de Yisrael, i no los mataron. 27I Ye’hoshua los puzo akel dia por kortadores de lenya i sakadores de agua para la kompanya, i para el ara de A’, asta oy, en el lugar ke el eskojyera.
10
1I akontesyo, ke komo Adoni-Tsedek, rey de Yerushalayim, oyo ke Ye’hoshua avia prendido a Ay, i la avia destruido; (komo izo a Yeriho i a su rey, i ansi izo a Ay i a su rey;) i ke los moradores de Givon avian echo paz kon Yisrael, i estavan entre eyos; 2temyeron mucho, por ke Givon era una grande sivdad, komo una de las sivdades reales, i porke era mas grande ke Ay, i todos sus varones barraganes. 3I enbio Adoni-Tsedek, rey de Yerushalayim, a ‘Ho’ham, rey de Hevron, i a Piram, rey de Yarmut, i a Yafia, rey de Lahish, i a Devir, rey de Eglon, dizyendo: 4suvid a mi, i ayudadme, i eriremos a Givon; porke izo paz kon Ye’hoshua i kon los ijos de Yisrael. 5I se adjuntaron, i suvyeron, sinko reyes de los Emorios, el rey de Yerushalayim, el rey de Hevron, el rey de Yarmut, el rey de Lahish, el rey de Eglon, eyos i todos sus reales, i pozaron serka de Givon, i pelearon kontra eya. 6I los varones de Givon enbiaron a Ye’hoshua al real de en Gilgal, dizyendo: no afloshes tus manos de tus syervos; suve presto a nozotros, i salvanos, i ayudanos; porke todos los reyes de los Emorios, ke moran en las montanyas, se adjuntaron kontra nozotros. 7I suvyo Ye’hoshua de Gilgal, el i todo el puevlo de gerra kon el, i todos los barraganes vayentes.
8I disho A’ a Ye’hoshua: no los temas; porke en tu mano los entregare; ninguno de eyos se parara delante de ti. 9I Ye’hoshua vino a eyos en subito; porke toda la noche suvyo de Gilgal. 10I A’ los konturvo delante de Yisrael, i los iryo kon erida grande en Givon, i los persigyo por el kamino de la suvida de Bet-Horon, i los iryo asta Azeka i asta Makeda. 11I fue, ke komo ivan fuyendo delante de Yisrael, i estavan en la bashada de Bet-Horon, A’ echo sovre eyos pyedras grandes de los syelos asta Azeka, i muryeron. Muchos mas muryeron de las pyedras del pedrisko, ke los ke los ijos de Yisrael mataron kon espada.
12Entonses avlo Ye’hoshua a A’, en el dia ke A’ entrego al Emorio delante de los ijos de Yisrael, i disho a vista de Yisrael: sol detente en Givon, i luna, en el vaye de Ayalon. 13I el sol se detuvo, i la luna se paro, asta ke la djente se vengo de sus enemigos. ¿No esta eskrito esto en el livro de Yashar? I el sol se paro en medyo de los syelos. I no apresuro a ponerse kaji un dia entero. 14I no uvo tal dia antes ni despues de akel, oyendo A’ a la boz de varon; porke A’ peleava por Yisrael.
15I Ye’hoshua, i todo Yisrael kon el, se torno al real en Gilgal. 16I akeyos sinko reyes fuyeron, i se eskondyeron en la kueva en Makeda. 17I fue dado avizo a Ye’hoshua, dizyendo: los sinko reyes se toparon eskondidos en la kueva en Makeda. 18I disho Ye’hoshua: rebolved pyedras grandes a la boka de la kueva, i poned varones al lado de eya para guardarlos. 19I vozotros no vos detengash: persegid detras de vuestros enemigos, i mataldes los del kavo; no los deshesh entrar en sus sivdades, porke A’ vuestro Dyo los entrego en vuestra mano. 20I fue, ke komo Ye’hoshua i los ijos de Yisrael akavaron de erirlos kon muy grande erida, asta atemarlos, el resto ke kedaron de eyos entraron en sivdades enkastiyadas. 21I todo el puevlo tornaron al real a Ye’hoshua en Makeda, en paz: no uvo kyen movyera su lingua kontra alguno de los ijos de Yisrael. 22Entonses disho Ye’hoshua: avrid la boka de la kueva, i sakadme a estos sinko reyes afuera de la kueva. 23I izyeron ansi, i le sakaron de la kueva a estos sinko reyes, al rey de Yerushalayim, al rey de Hevron, al rey de Yarmut, al rey de Lahish, al rey de Eglon. 24I fue, ke kuando sakaron a estos reyes a Ye’hoshua, yamo Ye’hoshua a todos los varones de Yisrael, i disho a los kapitanes de los varones de gerra ke se avian ido kon el: ayegadvos, poned vuestros pyes sovre los piskuezos de estos reyes. I se ayegaron, i puzyeron sus pyes sovre los piskuezos de eyos. 25I Ye’hoshua les disho: no temash ni vos kevrantesh; esforsadvos i enfortesedvos; porke ansi ara A’ a todos vuestros enemigos kon los kuales peleash. 26I despues de esto Ye’hoshua los iryo, i los mato, i los kolgo sovre sinko forkas; i estuvyeron kolgados sovre las forkas asta la tarde. 27I fue, ke a la ora de ponerse el sol, enkomendo Ye’hoshua ke los abasharon de las forkas, i ke los echaron en la kueva onde se avian eskondido; i puzyeron pyedras grandes sovre la boka de la kueva, ke estan asta este mizmo dia.
28I en akel dia prendyo Ye’hoshua a Makeda, i la iryo a tajo de espada, i destruyo a su rey, a eyos, i a todas las almas ke avia en eya. No desho kedar a ninguno; i izo al rey de Makeda komo avia echo al rey de Yeriho.
29I de Makeda paso Ye’hoshua, i todo Yisrael kon el, a Livna, i peleo kon Livna. 30I A’ entrego tambyen a eya, i a su rey, en mano de Yisrael; i la iryo a tajo de espada, i a todas las almas ke avia en eya; no desho ninguno en eya; i izo a su rey komo avia echo al rey de Yeriho.
31I paso de Livna Ye’hoshua, i todo Yisrael kon el, a Lahish, i pozo serka de eya, i peleo kon eya. 32I A’ entrego a Lahish en mano de Yisrael, i la prendyo en el dia segundo, i la iryo a tajo de espada, i a todas las almas ke avia en eya, segun todo lo ke izo a Livna.
33Entonses ‘Horam, rey de Gezer, suvyo para ayudar a Lahish; ma a el i a su puevlo iryo Ye’hoshua asta no desharlo ninguno.
34I de Lahish paso Ye’hoshua, i todo Yisrael kon el, a Eglon; i pozaron serka de eya, i pelearon kontra eya. 35I la prendyeron en el mizmo dia, i la iryeron a taja de espada; i destruyo en akel dia a todas las almas ke avia en eya, segun todo lo ke izo a Lahish.
36I suvyo Ye’hoshua, i todo Yisrael kon el, de Eglon a Hevron, i pelearon kontra eya. 37I la prendyeron, i la iryeron a tajo de espada, i a su rey, i a todas sus sivdades, i a todas las almas ke avia en eya; no desho kedar a ninguno, segun todo lo ke izo a Eglon; i la destruyo kon todas las almas ke avia en eya.
38I torno Ye’hoshua, i todo Yisrael kon el, a Devir, i peleo kontra eya. 39I la prendyo, i a su rey, i a todas sus sivdades; i los iryeron a taja de espada, i destruyeron a todas las almas ke avia en eya; no desho kedar a ninguno. Komo izo a Hevron, ansi izo a Devir i a su rey, i komo izo a Livna i a su rey.
40I iryo Ye’hoshua a toda la tyerra de la montanyas, i del sud, i de la bashura, i de los vertederos, i a todos sus reyes; no desho kedar a ninguno; ma a todo lo ke tenia vida destruyo, komo A’ Dyo de Yisrael avia enkomendado. 41I los iryo Ye’hoshua dezde Kadesh-Barnea asta Aza, i toda la tyerra de Goshen asta Givon. 42I a todos estos reyes i su tyerra prendyo Ye’hoshua de una vez, porke A’ el Dyo de Yisrael peleava por Yisrael. 43I torno Ye’hoshua, i todo Yisrael kon el, al real en Gilgal.
Ver todos los capítulos publicados en esta sección
————————————————————————
About Yehuda Sidi
I was born in 1953 in Tekirdag, Turkey and grew up in Canakkale. My father Hayim Sidi served as rabbi in both Tekirdag and Cannakale. Yehuda immigrated to Israel at 1971 and has been living in Israel since then. I am a softwere engineer. I am neither a Ladino nor a Tanach scholar. Actually I have very basic knowlede in Judeo Espanyol.
A year ago I looked for a Ladino Tanach in latin characters, and eventually I ended transcribing the Ladino Tanach which was published bt the Protestant missionaries who were vet active in the Speharadic world in the 19th century. This Tanach (and other books) were very popular with the Sepharadic Jews. This Tanach was published in two volumes.
So far I have transcribed the Tora. I am now in the process of transcribing the rest of the first volume which covers Ye’hoshua, Shoftim, Shemuel Alef, Shemuel Bet, Melachim Alef and Melachim Bet. I hope to complete the transcription in a few months.
The transcription was not reviewed by the Ladino scholars. Please report the errors that you find.
