Sefer Tora en Djudeo Espanyol – Transkrivida kon letras latinas del livro por Ye’huda Sidi / VAYIKRA: 33 – BEHUKOTAY (27 a 26)

Ver todos los capítulos publicados en esta sección

Sefer TORA NEVIIM UKETUVIM
El livro de la Ley, los Profetas, las Eskrituras
Trazladado en la lingua Espanyola
Estamperea de A. ‘H. Boyadjian
Konstantatinopla 1873

Transkrivido por Ye’huda Sidi. Febrero 2015

33 – BEHUKOTAY

³Si anduvyeresh en mis fueros, i guardaresh mis enkomendansas, i las izyeresh, yo dare vuestra luvya en su tyempo, ⁴i la tyerra dara su ermoyo, i el arvol del kampo dara su fruto. ⁵I la triyadura vos alkansara a la vendimya, i la vendimya alkansara a la sementera, i komeresh vuestro pan a la artura, i moraresh seguros en vuestra tyerra. ⁶I dare paz en la tyerra, i durmiresh; i no avra kyen vos espante; i are kitar las animalyas malas de la tyerra, i por vuestra tyerra no pasara espada. ⁷I persegiresh a vuestros enemigos, i kaeran a espada delante de vozotros. ⁸I sinko de vozotros persegiran a syento, i syento de vozotros persegiran a dyez mil; i vuestros enemigos kaeran a espada delente de vozotros. ⁹I mirare a vozotros, i vos are fruchiguar, i vos muchiguare, i afirmare mi firmamyento kon vozotros. ¹⁰I komeresh lo vyejo envejesido, i sakaresh lo vyejo por kavza de lo nuevo. ¹¹I pondre mi morada entre vozotros, i mi alma no vos desechara. ¹²I andare entre vozotros, i sere vuestro Dyo, i vozotros seresh mi puevlo. ¹³Yo A’, vuestro Dyo, ke vos saki de la tyerra de Ayifto, de ser syervos a eyos; i rompi las varas de vuestro yugo, i vos ize andar derechos

¹⁴Empero si no me oyeresh, ni izyeresh todas estas enkomendansas, ¹⁵i si aborresyeresh mis fueros, i si vuestra alma desechare mis djuisyos, para no azer todas mis enkomendansas, baldando vozotros mi firmamyento: ¹⁶tambyen yo are esto a vozotros: enkomendare sovre vozotros turvasyon, la fyevre, i la kayentura, ke konsumen los ojos i adoloryan el alma; i sembraresh en vazio vuestra simyente, porke vuestros enemigos la komeran. ¹⁷I pondre mis fases kontra vozotros, i seresh eridos delante de vuestros enemigos; i los ke vos aborresen podestaran sovre vozotros. i fuyiresh sin ke ninguno vos persiga. ¹⁸I si aun kon estas kozas no me oyeresh, tornare a kastigarvos syete tantos por vuestros pekados. ¹⁹I kevrare la sobervya de vuestra fortaleza, i are vuestros syelos komo fyerro, i vuestra tyerra komo alambre. ²⁰I vuestra fuersa se gastara en vano; i vuestra tyerra no dara su ermoyo, i el arvol de la tyerra no dara su fruto. ²¹I si anduvyeresh konmigo en kontra, i no me kijyeresh oir, yo anyadire sovre vozotros yagas syete tantos segun vuestros pekados. ²²I enbiare entre vozotros animalyas del kampo i vos desijaran, i tajaran vuestras kuatropeas i vos apokaran, i vuestros kaminos seran desolados. ²³I si kon estas kozas no me fueresh kastigados, sino ke anduvyeresh konmigo en kontra, ²⁴yo tambyen andare kon vozotros en kontra, i vos erire tambyen yo syete tantos por vuestros pekados. ²⁵I traere sovre vozotros espada vengadura de la vengansa del firmamyento; i seresh akojidos a vuestras sivdades, i enbiare mortaldad entre vozotros, i seresh entregados en mano del enemigo. ²⁶Kuando yo vos kevrare el arrimo de pan, kozeran dyez mujeres vuestro pan en un orno, i tornaran vuestro pan por pezo; i komeresh i no vos artaresh. ²⁷I si kon este no me oyeresh, sino ke anduvyeresh konmigo en kontra, ²⁸yo andare kon vozotros en kontra kon sanya, i vos kastigare tambyen yo syete tantos por vuestros pekados. ²⁹I komeresh la karne de vuestros ijos, i la karne de vuestras ijas komeresh. ³⁰I destruire vuestros altares, i tajare vuestros imajines del sol, i pondre vuestros kuerpos sovre los kuerpos de vuestros idolos, i mi alma vos desechara. ³¹I pondre vuestras sivdades en dizyerto, i desolare vuestros santuvaryos, i no golere vuestro guezmo resivivle. ³²I yo desolare la tyerra; i se maraviyaran de eya vuestros enemigos ke moran en eya. ³³I a vozotros esparzire entre las djentes, i desvaynare espada detras de vozotros; i vuestra tyerra sera desolada. i vuestras sivdades seran dizyerto. ³⁴Entonses gozara la tyerra sus shabatot todos los dias ke asta desolada, i vozotros en la tyerra de vuestros enemigos; entonses olgara la tyerra, i gozara sus shabatot, ³⁵Todos los dias ke esta desolada, olgara lo ke no olgo en vuestros shabatot myentras ke moravash sovre eya. ³⁶I los ke kedaren de vozotros, yo traere espanto en sus korasones en las tyerras de sus enemigos, i el sonido de una oja bolante los persegira. I fuyiran komo de espada, i kaeran sin ke ninguno los persiga. ³⁷I entropisaran los unos en los otros komo delante de espada, aunke ninguno los persiga; i no podresh levantarvos delante de vuestros enemigos, ³⁸i vos deperderesh entre las djentes, i la tyerra de vuestros enemigos vos konsumira. ³⁹I los ke kedaren de vozotros se desleiran por su delito en las tyerras de vuestros enemigos; i tambyen por los delitios de sus padres, kon eyos se desleiran. ⁴⁰I atorgaran su delito, i el delito de sus padres, en su falsia ke falsaron kontra mi, i tambyen por lo ke anduvyeron konmigo en kontra, ⁴¹tambyen yo avre andado kon eyos en kontra, i los avre traido a la tyerra de sus enemigos: si entonses se kevrantare su korason serrado, i entonses enveluntaren el kastigeryo de su delito: ⁴²yo me akordare de mi firmamyento kon Yaakov, i tambyen de mi firmamyento kon Yitshak, i tambyen de mi firmamyento kon Avra’ham me akordare; i de la tyerra me akordare. ⁴³I la tyerra sera deshada de eyos, i gozara sus shabatot estando desolada de eyos, i eyos enveluntaran el kastigeryo de su delito; por kuanto aborresyeron mis djuisyos, i su alma desecho mis fueros. ⁴⁴I aun kon todo esto, estando eyos en la tyerra de sus enemigos, no los aborresere, i no los desechare para konsumirlos, baldando mi firmamyento kon eyos; porke yo soy A’ su Dyo. ⁴⁵I me akordare de eyos por el firmamyento de los primeros, a los kuales saki de la tyerra de Ayifto a ojos de las djentes para ser su Dyo: yo A’. ⁴⁶Estos son los fueros, i los djuisyos, i las leyes ke dyo A’ entre si i los ijos de Yisrael en el monte de Sinay por mano de Moshe.

27

¹I avlo A’ a Moshe, dizyendo: ²avla a los ijos de Yisrael. i diles: kuando alguno izyere promesa partikular, por tu presyo seran las personas para A’. ³I sera tu presyo, del macho de edad de vente anyos asta el de edad de sesenta anyos, tu presyo sera sinkuenta siklos de plata, al siklo del santuvaryo. ⁴I si fuere embra, tu presyo sera trenta siklos. ⁵ I si fuere de edad de sinko anyos esta la edad de vente anyos, tu presyo sera, por el macho vente siklos, i por la embra dyez siklos. ⁶I si fuere de edad de un mez asta la edad de sinko anyos, tu presyo sera, por el macho sinko siklos de plato, i por la embra tu presyo sera tres siklos de plata. ⁷I si fuere de edad de sesenta anyos i arriva, si fuere macho, tu presyo sera kinze siklos, i por la embra dyez siklos. ⁸Ma si fuere mas povre ke tu presyo, entonses se prezentera delante del saserdote, i el saserdote lo apresyara; segun lo ke alkansare la mano del ke promete lo apresyara el saserdote.

⁹I si fuere kuatropea de ke ayegan ayegasyon a A’, todo lo ke alguno dyere de eya a A’ sera santo. ¹⁰No lo mudara ni lo trokara, bueno por malo, ni malo por bueno; i si trokar trokare kuatropea por kuatropea, entonses eya i su trueke seran santos. ¹¹I si fuere alguna kuatropea enkonada de ke no ayegan ayegasyon a A’, entonses ara parar la kuatropea delante del saserdote; ¹²i el saserdote la apresyara, sea buena i sea mala; segun tu presyo, ¡o saserdote! ansi sera. ¹³I si regmir la regmyere, anyadira su kinto sovre tu presyo.

¹⁴I kuando alguno santifikare su kaza por koza santa a A’, el saserdote la apresyara, sea buena o sea mala; komo el saserdote la apresyare, ansi se afirmara. ¹⁵I si el santifikante regmyere su kaza, anyadira el kinto de la moneda de tu presyo sovre el, i sera suya.

¹⁶I si alguno santifikare parte del kampo de su posesyon a A’, tu presyo sera segun su simyente; un homer de simyente de sevada se apresyara por sinkuenta siklos de plata. ¹⁷Si santifikare su kampo dezde el anyo del yovel, segun tu presyo se afirmara. ¹⁸Ma si despues del yovel santifikare su kampo, entonses el saserdote kontara kon el la plata segun los anyos ke kedaren asta el anyo del yovel, i sera menguada de tu presyo. ¹⁹I si regmir regmyere el kampo el ke lo santifiko, anyadira el kinto de la moneda de tu presyo sovre el, i se afirmara para el. ²⁰I si no regmyere el kampo, o si vendyere el kampo a otro varon, no sera regmido mas. ²¹I kuando salyere en el yovel, el kampo sera santo a A’, komo kampo [1]enheremado; su posesyon sera del saserdote. ²²I si alguno santifikare a A’ el kampo de su kompra, ke no es del kampo de su posesyon; ²³entonses el saserdote kontara kon el la suma de tu presyo asta el anyo del yovel, i en akel dia dara tu presyo komo koza santa a A’. ²⁴En el anyo del yovel tornare el kampo a akel de kyen el lo kompro, a akel de kyen era la posesyon de la tyerra. ²⁵I todos tus presyos seran segun el siklo del santuvaryo. Vente geras tyene el siklo.

²⁶Empero el primodjenito de las kutropeas, ke por la primodjenitura es de A’, ninguno lo santifikara; sea buey o karnero, de A’ es. ²⁷I si fuere de las kuatropeas enkonadas, lo regmira segun su presyo, i anyadira su kinto sovre el; i si no fuere regmido sera vendido segun tu presyo.

²⁸Empero ninguna koza enheremada ke alguno enheremare para A’ de todo lo ke tuvyere, de ombres i de kuatropeas, i del kampo de su posesyon, no sera vendida, ni sera regmida: todo enheremado es koza santisima a A’. ²⁹Todo enheremado de ombres ke fuere enheremado, no sera regmido; matar sera matado.

³⁰I todo dyezmo de la tyerra, tanto de la simyente de la tyerra, komo del fruto del arvol, de A’ es; koza santa a A’. ³¹I si alguno regmir regmyere algo de su Dyo, anyadira su kinto sovre eyo. ³²I todo dyezmo de vakas, i da ovejas, todo lo ke pasa de basho de la vara, el dezeno sera koza santa a A’. ³³No peskuzara entre bueno i malo, i no lo trokara; i si trokar lo trokare, eyo i su trueke seran santos; no sera regmido.

³⁴Estas son las enkomendansas ke enkomendo A’ a Moshe para los ijos de Yisrael en el monte de Sinay.

[1] apartado

Ver todos los capítulos publicados en esta sección

 ————————————————————————

About Yehuda Sidi

I was born in 1953 in Tekirdag, Turkey and grew up in Canakkale. My father Hayim Sidi served as rabbi in both Tekirdag and Cannakale. Yehuda immigrated to Israel at 1971 and has been living in Israel since then. I am a softwere engineer. I am neither a Ladino nor a Tanach scholar. Actually I have very basic knowlede in Judeo Espanyol.

A year ago I looked for a Ladino Tanach in latin characters, and eventually I ended transcribing the Ladino Tanach which was published bt the Protestant missionaries who were vet active in the Speharadic world in the 19th century. This Tanach (and other books) were very popular with the Sepharadic Jews. This Tanach was published in two volumes.

So far I have transcribed the Tora. I am now in the process of transcribing the rest of the first volume which covers Ye’hoshua, Shoftim, Shemuel Alef, Shemuel Bet, Melachim Alef and Melachim Bet. I hope to complete the transcription in a few months.

The transcription was not reviewed by the Ladino scholars. Please report the errors that you find.