Sefer Tora en Djudeo Espanyol – Transkrivida kon letras latinas del livro por Ye’huda Sidi / VAYIKRA: 29 – AHAREI MOT (16 a 18)

Ver todos los capítulos publicados en esta sección

Sefer TORA NEVIIM UKETUVIM
El livro de la Ley, los Profetas, las Eskrituras
Trazladado en la lingua Espanyola
Estamperea de A. ‘H. Boyadjian
Konstantatinopla 1873

Transkrivido por Ye’huda Sidi. Febrero 2015

29 – AHAREI MOT

16

¹I avlo A’ a Moshe despues de la muerte de los dos ijos de A’haron kuando se ayegaron delante de A’, i muryeron. ²I disho A’ a Moshe: avla a A’haron tu ermano, ke no venga en todo tyempo en el lugar santo, adyentro del velo delante del kuvertero, ke esta sovre el arka, para ke no muera: porke en la nuve me aparesere sovre el kuvertero. ³Kon esto vendra A’haron en el lugar santo: kon un toro ijo de vaka por sakrifisyo por pekado, i un barvez por alsasyon. ⁴La tonga santa de lino vestira, i los panyetes de lino seran sovre su karne, i kon el senyidero de lino se senyira, i kon la toka de lino se tokara; estos son vestidos santos; i lavara su karne en agua, i los vestira. ⁵I de la kompanya de los ijos de Yisrael tomara dos kavritos de las kavras por sakrifisyo por pekado, i un barvez por alsasyon. ⁶I ayegara A’haron el toro del sakrifisyo por pekado ke es por el, i ara ekspiasyon (kapara) por si i por su kaza. ⁷I tomara los dos kavritos, i los ara parar delante de A’ a la puerta de la tyenda del plazo. ⁸I A’haron echara suertes sovre los dos kavritos, una suerto por A’, i otra suerte por [1]azazel. ⁹I ayegara A’haron el kavrito sovre el kual suvyo la suerte de A’, i lo ara sakrifisyo por pekado. ¹⁰I el kavrito sovre el kual suvyo la suerte por azazel, sera prezentado bivo delante de A’, para azer ekspiasyon sovre el, i para enbiarlo por azazel al dizyerto. ¹¹I ayegara A’haron el toro del sakrifisyo por pekado ke es por el, i ara ekspiasyon por si i por su kaza, i degoyara el toro del sakrifisyo por pekado ke es por el. ¹²I tomara el brazero yeno de brazas de fuego de sovre el ara de delante de A’, i sus punyos yenos de saumeryo golorozo menudo i lo traera adyentro del velo. ¹³I pondra el saumeryo sovre el fuego delante de A’, i la nuve del, saumeryo kuvrira el kuvertero ke esta sovre el Testimonyo, i no murira. ¹⁴I tomara de la sangre del toro, i esteyara kon su dedo sovre las fases del kuvertero al oryente; i delante del kuvertero esteyara de la sangre syete vezes kon su dedo. ¹⁵I degoyara el kavrito del sakrifisyo por pekado ke es por el puevlo, i traera su sangre adyentro del velo, i ara kon su sangre komo izo kon la sangre del toro, i la esteyara sovre el kuvertero, i delante del kuvertero. ¹⁶I ara ekspiasyon por el lugar santo de los enkonamyentos de los ijos de Yisrael, i de sus revilyos en todos sus pekados; i ansi ara a la tyenda del plazo, ke mora kon eyos en medyo de sus enkonamyentos. ¹⁷I ningun ombre estara en la tyenda del plazo kuando el entrare para azer ekspiasyon en el lugar santo, asta ke salga, i ayga echo ekspiasyon por si i por su kaza, i por toda la kompanya de Yisrael. ¹⁸I saldra al ara ke esta delante de A’, i ara ekspiasyon por eya, i tomara de la sangre del toro, i de la sangre del kavrito, i pondra sovre los kuernos del ara al derredor. ¹⁹I esteyara sovre eya de la sangre kon su dedo syete vezes, i la alimpyara, i la santifikara de los enkonamyentos de los ijos de Yisrael. ²⁰I kuando uvyere akavado de azer ekspiasyon por el lugar santo, i por la tyenda del plazo, i por el ara, ayegara el kavrito bivo. ²¹I pondra A’haron sus dos manos sovre la kavesa del kavrito bivo, i atorgara sovre el todos los delitos de los ijos de Yisrael, i todos sus revilyos en todos sus pekados, i los pondra sovre la kavesa del kavrito, i lo enbiara al dizyerto por mano de un varon aparejado. ²²I el kavrito yevara sovre si todos los delitos de eyos a tyerra despovlada; i soltara el kavrito en el dizyerto. ²³I vendra A’haron a la tyenda del plazo, i se desnudara de los vestidos de lino, ke avia vestido kuando entro en el lugar santo, i los deshara ayi. ²⁴I lavara su karne kon agua en el lugar santo, i vestira sus vestidos; i saldra, i ara su alsasyon, i la alsasyon del puevlo, i ara ekspiasyon por si i por el puevlo. ²⁵I saumara el sevo del sakrifisyo por pekado sovre el ara. ²⁶I el ke solta el kavrito por azazel, lavara sus vestidos, i lavara su karne en agua, i despues vendra en el real. ²⁷I sakara afuera del real el toro del sakrifisyo por pekado, i el kavrito del sakrifisyo por pekado, la sangre de los kuales fue traida para azer ekspiasyon en el lugar santo; i kemaran en el fuego sus kueros i sus karnes, i su fyenda. ²⁸I el ke los kemare lavara sus vestidos, i lavara su karne en agua, i despues vendra en el real.

²⁹I esto vos sera por fuero de syempre: en el mez seteno, a los dyez del mez, afriiresh vuestras almas, i no agash ninguna ovra, ni el nativo de la tyerra, ni el peligrino, ke pelegrina entre vozotros. ³⁰Porke en este dia el saserdote ara ekspiasyon por vozotros para alimpyarvos, i de todos vuestros pekados seresh alimpyados delante de A’. ³¹Shabat de olgansa sera a vozotros, i afriiresh vuestras almas, por fuero de syempre. ³²I ara ekspiasyon el saserdote a kyen el untare, i la mano de kyen el inchyere para servir en el saserdosyo (ke’huna) en lugar de su padre, i vestira los vestidos de lino, los vestidos santos. ³³I ara ekspiasyon por el santuvaryo santo, i por la tyenda del plazo; i ara ekspiasyon por el ara; i por los saserdotes, i por todo el puevlo de la kompanya ara ekspiasyon. ³⁴I esto vos sera por fuero de syempre, para azer ekspiasyon por los ijos de Yisrael de todos sus pekados una vez en el anyo. I izo komo A’ enkomendo a Moshe.

[1] el nombre del kavrito soltado

17

¹I avlo A’ a Moshe, dizyendo: ²avla a A’haron i a sus ijos, i a todos los ijos de Yisrael, i diles: esta es la koza ke enkomendo A’, dizyendo: ³kualkyer varon de la kaza de Yisrael ke degoyare buey, o karnero, o kavra, en el real, o ke lo degoyare afuera del real, ⁴i no lo trushere a la puerta de la tyenda del plazo, para ayegar ayeagasyon a A’ delante del tavernakulo de A’, sangre sera kontada a akel varon; sangre vertyo; i akel varon sera tajado de entre su puevlo: ⁵para ke traygan los ijos de Yisrael sus sakrifisyos ke sakrifikaren sovre la faz del kampo, para ke los traygan a A’ a la puerta de la tyenda del plazo, al saserdote, i los sakrifiken por sakrifisyos de pases a A’. ⁶I el saserdote esparzira la sangre sovre el ara de A’ a la puerta de la tyenda del plazo, i saumara el sevo por guezmo resivivle a A’. ⁷I no sakrifiken mas sus sakrifisyos a los diavlos, detras de los kuales eyos eskaran. Esto les sera fuero de syempre por sus djerenansyos. ⁸I los diras kualkyer varon de la kaza de Yisrael , o de los pelegrinos ke pelegrinan entre eyos, ke alsare alsasyon, o sakrifisyo, ⁹i no lo trushere a la puerta de la tyenda del plazo, para azerlo a A’, akel varon sera tajado de sus puevlos.

¹⁰I kulkyer varon de la kaza de Yisrael, o de los pelegrinos ke pelegrinan entre eyos, ke komyere alguna sangre, yo pondre mis fases kontra la persona ke komyere sangre, i la tajare de entre su puevlo. ¹¹Porke la vida de la karne en la sangre esta; i yo vo la di sovre el ara para azer ekspiasyon (kapara) por vuestras almas; porke la sangre es lo ke aze ekspiasyon por el alma. ¹²Por tanto disho a los ijos de Yisrael: ninguna persona de vozotros koma sangre, i el pelegrino ke pelegrina entre vozotros, no koma sangre. ¹³I kualkyer varon de los ijos de Yisrael, o de los pelegrinos ke pelegrinan entre eyos, ke kasare kasa de animal o de ave ke es de komer, vertera su sangre i la kuvrira kon polvo. ¹⁴Porke la vida de toda karne es, su sangre es por su vida; por tanto dishe a los ijos de Yisrael: no komash la sangre de ninguna karne; porke la vida de toda karne es su sangre; todo el ke la komyere sera tajado.

¹⁵I toda persona ke komyere kalavrina, o arrevetado, tanto de los nativos de la tyerra komo de los pelegrinos, lavara sus vestidos, i lavara a si mizmo en agua, i sera enkonada asta la tarde, i entonses sera limpya. ¹⁶Ma si no los lavare, ni lavare su karne, yevara su delito.

18

¹I avlo A’ a Moshe, dizyendo: ²avla a los ijos de Yisrael, i diles: yo soy A’ vuestro Dyo. ³No agash komo se aze en la tyerra de Ayifto, en la kual morastesh, ni agash komo se aze en la tyerra de Kenaan, a la kual yo vos traygo: no andesh en sus fueros. ⁴Mis djuisyos aresh, i mis fueros guardaresh, andando en eyos: yo soy A’ vuestro Dyo. ⁵Por tanto guardaresh mis fueros i mis djuisyos, los kuales azyendo el ombre, bivira en eyos: yo A’.

⁶Ningun varon se ayege a ninguna karonal de su karne para deskuvrir su desnudez: yo A’. ⁷La desnudez de tu padre i la desnudez de tu madre no deskuvras; tu madre es; no deskuvras su desnudez.⁸La desnudez de la mujer de tu padre no deskuvras; la desnudez de tu padre es. ⁹La desnudez de tu ermana, ija de tu padre, o ija de tu madre, nasida en kaza, o nasida afuera, no deskuvras su desnudez. ¹⁰La desnudez de la ija de tu ijo, o de la ija de tu ija, no deskuvras su desnudez; porke tu desnudez son. ¹¹La desnudez de la ija de la mujer de tu padre, endjendrada de tu padre, tu ermana es; no deskuvras su dusnedez. ¹²La desnudez de la ermana de tu padre no deskuvras; karonal de tu padre es. ¹³La desnudez de la ermana de tu madre no deskuvras; porke karonal de tu madre es. ¹⁴La desnudez del ermano de tu padre no deskuvras; a su mujer no te ayeges; tu tia es. ¹⁵La desnudez de tu nuera no deskuvras; mujer de tu ijo es; no deskuvras su desnudez. ¹⁶La desnudez de la mujer de tu ermano no deskuvras; la desnudez de tu ermano es. ¹⁷La desnudez de mujer i la de su ija no deskuvras; la ija de su ijo, ni la ija de su ija no tomes, para deskuvrir su desnudez; sus karonales son; malechuria es.¹⁸I mujer kon su ermana no tomes para angustyarla, para deskuvrir su desnudez, afuera de eya en su vida.

¹⁹I a mujer en el apartamyento de su enkonamyento no te ayeges para deskuvrir su desnudez. ²⁰I a la mujer de tu kompanyero no des tu yazida kon simyente, enkonandote kon eya. ²¹I no des de tu semen para azerlo pasar por el fuego a Moleh; ni esbivles el nombre de tu Dyo: yo A’. ²²I kon macho no yazgas komo kon mujer; abominasyon es. ²³I no yazgas kon ninguna kuatropea enkonandote kon eya; i mujer no se pare delante de kuadropia para yazer kon eya; meskla es. ²⁴No vos enkonesh en ninguna de estas kozas, porke en todas estas kozas se enkonaron las djentes ke yo desterro delante de vozotros. ²⁵I si enkono la tyerra, i yo vijiti su delito sovre eya, i la tyerra vomito a sus moradores. ²⁶Guardaresh pues vozotros mis fueros i mis djuisyos, i no agash ninguna de todas estas abominasyones, ni el nativo de la tyerra ni el pelegrino ke pelegrina entre vozotros. ²⁷Porke todas estas abominasyones izyeron los varones de la tyerra, ke fueron antes de vozotros, i se enkono la tyerra. ²⁸I la tyerra no vos vomitara en vuestro enkonarla , komo vomito a la djente ku fue antes de vozotros. ²⁹Porke todo el ke izyere alguna de todas estas abominasyones, las personas ke tal izyeron seran tajadas de entre su puevlo. ³⁰Guardaresh pues mi guardya, para ke no agash ninguno de los fueros de las abominasyones ke fueron echas antes de vozotros, i no vos enkonesh en eyas: yo A’ vuestro Dyo.

Ver todos los capítulos publicados en esta sección

 ————————————————————————

About Yehuda Sidi

I was born in 1953 in Tekirdag, Turkey and grew up in Canakkale. My father Hayim Sidi served as rabbi in both Tekirdag and Cannakale. Yehuda immigrated to Israel at 1971 and has been living in Israel since then. I am a softwere engineer. I am neither a Ladino nor a Tanach scholar. Actually I have very basic knowlede in Judeo Espanyol.

A year ago I looked for a Ladino Tanach in latin characters, and eventually I ended transcribing the Ladino Tanach which was published bt the Protestant missionaries who were vet active in the Speharadic world in the 19th century. This Tanach (and other books) were very popular with the Sepharadic Jews. This Tanach was published in two volumes.

So far I have transcribed the Tora. I am now in the process of transcribing the rest of the first volume which covers Ye’hoshua, Shoftim, Shemuel Alef, Shemuel Bet, Melachim Alef and Melachim Bet. I hope to complete the transcription in a few months.

The transcription was not reviewed by the Ladino scholars. Please report the errors that you find.