eSefarad Noticias del Mundo Sefaradi
Ver todos los capítulos publicados en esta sección
Sefer TORA NEVIIM UKETUVIM
El livro de la Ley, los Profetas, las Eskrituras
Trazladado en la lingua Espanyola
Estamperea de A. ‘H. Boyadjian
Konstantatinopla 1873
Transkrivido por Ye’huda Sidi. Febrero 2015
25 – TSAV
6
1I avlo A’ a Moshe dizyendo: 2enkomenda a A’haron i a sus ijos, dizyendo: esta es la ley de la alsasyon: es la alsasyon porke es ensendida sovre el ara toda la noche asta la manyana, i el fuego del ara sera ensendido en eya. 3I el saserdote se vestira su manto de lino. I se vestira panyetes de lino sovre su karne, i apartara la seniza en ke el fuego avra konsumido la alsasyon sovre el ara, i la pondra serka del ara. 4I se desnudara de sus vestidos, i se vestira de otros vestidos, i sakara la seniza afuera del real a un lugar limpyo. 5I el fuego sovre el ara sera ensendido en eya, no se amatara; i el saserdote ensendera sovre eya lenya kada manyana, i ordenara sovre eya la alsasyon; i saumara sovre eya los sevos del sakrifisyo de las pases. 6Fuego sera ensendido de kontino sovre el ara; no se matara.
7I esta es la ley del prezente: lo ayegaran los ijos de A’haron delante de A’, delante del ara. 8I apartara de el kon su punyo, de la semola del prezente, i de su azeyte, i todo el ensensyo ke esta sovre el prezente, i lo saumara en el ara por guezmo resivivle, por su membrasyon a A’. 9I el resto de el komeran A’haron i sus ijos: en sensenyas sera komido en el lugar santo; en la korte de la tyenda del plazo lo komeran. 10No sea kozido kon levadura. Yo lo tengo dado por su porsyon de mis ofrendas kemadas; es koza santisima, komo el sakrifisyo por pekado, i komo el sakrifisyo por kulpa. 11Todos los machos de los ijos de A’haron komeran de el, sera fuero de syempre a vuestros djerenansyos tokante a las ofrendas kemadas de A’: todo el ke tokare en eyas sera santifikado.
12I avlo A’ a Moshe dizyendo: 13esta es la ayegasyon de A’haron i de sus ijos, ke ayegaran en el dia de su ser untado: el dyezmo de una epa de semola por prezente kontinuo, su mitad a la manyana, i su mitad a la tarde. 14Sovre kasuela kon azeyte sera echa, frita la traeras; los pedasos kozidos del prezente ayegaras por guezmo resivivle a A’. 15I el saserdote untado en su lugar, de sus ijos, la ara; sera fuero de syempre para A’; toda eya sera saumada. 16I todo prezente de saserdote sera kemado entero; no sera komido.
17I avlo A’ a Moshe, dizyendo: 18avla a A’haron i a sus ijos, dizyendo: esta es la ley del sakrifisyo por pekado: en el lugar onde sera degoyada la alsasyon, sera degoyado el sakrifisyo por pekado delante de A’; es koza santisima. 19El saserdote ke lo ayegare por pekado lo komera; en el lugar santo sera komido, en la korte de la tyenda del plazo. 20Todo el ke tokare en su karne sera santifikado; i kuando se salpikare de su sangre sovre el vestido, akeyo sovre ke se salpiko lavaran en el lugar santo. 21I atuendo de barro en ke fuere kozinado, sera kevrado; i si fuere kozinado en atuendo de alambre, sera fregado, i enshaguado en agua. 22Todo macho entre los saserdotes lo komera; es koza santisima. 23Ma todo sakrifisyo por pekado de ke fuere traido algo de la sangre en la tyenda del plazo, para azer ekspiasyon (kapara) en el lugar santo, no sera komido; al fuego sera kemado.
7
1I esta es la ley del sakrifisyo por kulpa; es koza santisima. 2En el lugar onde degoyaren la alsasyon, degoyaran el sakrifisyo por kulpa; i esparzira su sangre sovre el ara al derredor. 3I ayegara de el todo su sevo, la kola, el sevo ke kuvre las entranyas, 4i los dos rinyones, i el sevo ke esta sovre eyos, ke esta sovre las ijadas, i el rodanyo sovre el igado, kon los rinyones lo kitara. 5I el saserdote los saumara en el ara por ofrenda kemada a A’; es sakrifisyo por kulpa. 6Todo macho entre los saserdotes lo komera; en el lugar santo sera komido; es koza santisima. 7Komo el sakrifisyo por pekado ansi sera el sakrifisyo por kulpa; una mizma ley tendran; sera el saserdote ke izyere ekspiasyon kon el. 8I el saserdote ke ayegare alsasyon de alguno, el kuero de la alsasyon ke ayegare sera para el saserdote. 9I todo prezente ke fuere kocho en orno, i todo lo ke fuere echo en sarten, o sovre kasuela, sera para el saserdote ke lo ayegare. 10I todo prezente enbuelto en azeyte, i seko, sera para todos los ijos de A’haron; tanto al uno komo al otro.
11I esta es la ley del sakrifisyo de las pases ke ayegara a A’. 12Si lo ayegare por agradesimyento, ayegara kon el sakrifisyo del agradesimyento tortas sensenyas enbueltas en azeyte, i benmuelos de sensenyas untados kon azeyte, i semola frita en tortas enbueltas en azeyte. 13Kon tortas de pan levdo ayegara su ayegasyon en el sakrifisyo del agradesimyento de sus pases. 14I de el ayegara uno de toda ayegasyon por levantadura a A’, i sera para el saserdote ke esparzyere la sangre del sakrifisyo de las pases. 15I la karne del sakrifisyo del agradesimyento de sus pases, sera komida en el dia ke se ayegare; no deshara nada de eya asta la manyana. 16Ma si el sakrifisyo de su ayegasyon fuere promesa, o prezente veluntaryo, en el dia ke ayegare su sakrifisyo sera komido; i al otro dia tambyen el resto de el sera komido. 17I lo ke kedare de la karne del sakrifisyo en el terser dia sera kemado en el fuego. 18I si komer fuere komido algo de la karne del sakrifisyo de sus pases en el terser dia, no sera enveluntado, ni sera kontado a el ke lo ayegare; enkonado sera, i la persona ke komyere de el yevara su delito. 19I la karne ke tokare en alguna koza enkonada, no sera komida; en el fuego sera kemada; i a la karne, todo limpyo komera la karne. 20I la persona ke komyere la karne del sakrifisyo de las pases, ke es de A’, i su enkonamyento sovre si, akeya persona sera tajada de sus puevlos. 21I kuando alguno tokare en kualkyer koza enkonada, en enkonamyento de ombre, o en kuatropea enkonada, o en kualkyer abominasyon enkonada, i komyere de la karne del sakrifisyo de las pases, ke es de A’, akeya persona sera tajada de sus puevlos.
22I avlo A’ a Moshe, dizyendo: 23avla a los ijos de Yisrael dizyendo: no komash ningun sevo de buey, ni de karnero, ni de kavra. 24I el sevo de kalavrina, i el sevo de arrevatado, sera uzado para toda ovra, ma komer no lo komash. 25Porke todo el ke komyere el sevo de la kuatropea, de la kual se ayega ofrenda kemada a A’, la persona ke lo komyere sera tajada de sus puevlos. 26I no komash ninguna sangre, en todas vuestras moradas, sea de ave o de kuatropea. 27Kualkyer persona ke komyere alguna sangre, akeya persona sera tajada de sus puevlos.
28I avlo A’ a Moshe dizyendo: 29avla a los ijos de Yisrael, dizyendo: el ke ayegare sakrifisyo de sus pases a A’, traera su ayegasyon a A’ del sakrifisyo de sus pases. 30Sus manos traeran las ofrendas kemadas de A’; traera el sevo kon el pecho, el pecho para meserlo por mesedura delante de A’. 31I el saserdote saumara el sevo en el ara; i el pecho sera para A’haron, i para sus ijos. 32I la anka derecha al saserdote por levantadura de los sakrifisyos de vuestras pases. 33El de los ijos de A’haron ke ayegare la sangre de las pases, i el sevo, el tendra la anka derecha por su porsyon. 34Porke el pecho de la mesedure i la anka de la levantadura yo tomi de los ijos de Yisrael, de los sakrifisyos de sus pases, i los di a A’haron el saserdote, i a sus ijos, por fuero de syempre, de kon los ijos de Yisrael. 35Esta es la parte por la untasyon de A’haron, i por la untasyon de sus ijos, de las ofrendas kemadas de A’, en el dia ke los ayego para servir a A’ en el saserdosyo: 36lo kual A’ enkomendo de darles de kon los ijos de Yisrael, en el dia ke los unto, por fuero de syempre a sus djerenansyos.
37Esta es la ley de la alsasyon, del prezente, i del sakrifisyo por pekado, i del sakrifisyo por kulpa, i de los inchimyentos, i del sakrifisyo de las pases: 38la kual enkomendo A’ a Moshe en el monte de Sinay, en el dia ke enkomendo a los ijos de Yisrael de ayegar sus ayegasyones a A’, en el dizyerto de Sinay.
8
1I avlo A’ a Moshe dizienedo: 2toma a A’haron, i a sus ijos kon el, i los vestidos, i el azeyte de la untasyon, i el toro del sakrifisyo por pekado, i los dos barvezes i el sesto de las sensenyas. 3I adjunta a toda la kompanya a la puerta de la tyenda del plazo. 4I izo Moshe komo A’ le enkomendo; i se adjunto la kompanya a la puerta de la tyenda del plazo. 5I disho Moshe a la kompanya: esta es la koza ke A’ enkomendo de azer. 6I Moshe ayego a A’haron i a sus ijos, i los lavo kon agua. 7I puzo sovre el la tonga, i lo senyo kon el senyidero, i le vistyo el manto, i puzo sovre el el espaldar, i lo senyo kon la sintura del espaldar, i lo ato kon eya. 8I puzo sovre el el pechoral, i metyo en el pechoral los urim i los tumim. 9I puzo la toka sovre su kavesa; i sovre la toka, delante de su frente, puzo el frontal de oro, la korona santa, komo A’ enkomendo a Moshe. 10I tomo Moshe el azeyte de la untasyon, i unto el tavernakulo, i todo lo ke avia en el, i los santifiko. 11I esteyo de el sovre el ara syete vezes, i unto el ara i todos sus atuendos, i el agua-manil i su asyento, para santifikarlos. 12I vazyo del azeyte de la untasyon sovre la kavesa de A’haron, i lo unto para santifikarlo. 13I Moshe ayego a los ijos de A’haron, i les vistyo tongas, i los senyo kon senyideros, i les ato kofyas, komo A’ enkomendo a Moshe. 14I ayego el toro del sakrifisyo por pekado; i A’haron i sus ijos puzyeron sus manos sovre la kavesa del toro del sakrifisyo por pekado. 15I lo degoyo; i tomo Moshe la sangre, i puzo kon su dedo sovre los kuernos del ara al derredor, i alimpyo el ara, i vazyo la sangre al simyento del ara, i la santifiko para azer ekspiasyon (kapara) sovre eya. 16I tomo todo el sevo ke estava sovre las entranyas, i el redanyo del igado, i los dos rinyones, i su sevo, i lo saumo Moshe en el ara. 17I el toro, i su kuero, i su karne, i su fyenda, kemo en fuego afuera del real, komo A’ enkomendo a Moshe. 18I ayego el barvez de la alsasyon; i A’haron i sus ijos puzyeron sus manos sovre la kavesa del barvez. 19I lo degoyo; i esparzyo Moshe la sangre sovre el ara al derredor. 20I desmembro el barvez por sus myembros; i Moshe saumo la kavesa, i los myembros, i el sevo. 21I las entranyas i las pyernas lavo kon agua; i saumo Moshe todo el barvez en el ara; alsasyon fue por guezmo resivivle, ofrenda kemada a A’, komo A’ enkomendo a Moshe. 22I ayego el otro barvez, el barvez de los inchimyentos, i A’haron i sus ijos puzyeron sus manos sovre la kavesa del barvez. 23I lo degoyo; i tomo Moshe de su sangre, i puzo sovre la ternura de la oreja derecha de A’haron, i sovre el pulgar de su mano derecha, i sovre el pulgar de su pye derecho. 24I ayego a los ijos de A’haron, i puzo Moshe de la sangre sovre la ternura de su oreja derecha, i sovre el pulgar de su mano derecha, i sovre el pulgar de su pye derecho; i esparzyo Moshe la sangre sovre el ara al derredor. 25I tomo el sevo, i la kola, i todo el sevo ke estava sovre las entranyas, i el redanyo del igado, i los dos rinyones, i su sevo, i la anka derecha. 26I del sesto de las sensenyas, ke estava delante de A’, tomo una torta sensenya, i una torta de pan de azeyte, i un benmuelo, i los puzo sovre los sevos, i sovre la anka derecha. 27I lo puzo todo sovre las palmas de A’haron, i sovre las palmas de sus ijos, i los mesyo por mesedura delante de A’. 28I los tomo Moshe de sovre sus palmas, i los saumo en el ara sovre la alsasyon; eran los inchimyentos por guezmo resivivle, ofrenda kemada a A’. 29I tomo Moshe el pecho, i lo mesyo por mesedura delante de A’, del barvez de los inchimyentos fue la parte de Moshe, komo A’ enkomendo a Moshe. 30I tomo Moshe del azeyte de la untasyon, i de la sangre ke estava sovre el ara, i esteyo sovre A’haron, sovre sus vestidos, i sovre sus ijos, i sovre los vestidos de sus ijos kon el; i santifiko a A’haron i sus vestidos, i a sus ijos, i los vestidos de sus ijos kon el.
31I disho Moshe a A’haron i a sus ijos: kozinad la karne a la puerta de la tyenda del plazo, i komelda ayi kon el pan ke esta en el sesto de los inchimyentos, komo yo enkomendi, dizyendo: A’haron i sus ijos la komeran. 32I lo ke sovrare de la karne i del pan, lo kemaresh en fuego. 33I de la puerta de la tyenda del plazo no salgash por syete dias, asta el dia ke se kumplieren los dias de vuestros inchimyentos; porke syete dias inchira veuestras manos. 34Komo se izo este dia, ansi enkomendo A’ de azer, para azer ekspiasyon (kapara) por vozotros, 35i a la puerta de la tyenda del plazo estaresh dia i noche syete dias, i guardaresh la guardya de A’, para ke no murash; porke ansi fue yo enkomendado. 36I izo A’haron i sus ijos todas las kozas ke A’ enkomendo por mano de Moshe.
Ver todos los capítulos publicados en esta sección
————————————————————————
About Yehuda Sidi
I was born in 1953 in Tekirdag, Turkey and grew up in Canakkale. My father Hayim Sidi served as rabbi in both Tekirdag and Cannakale. Yehuda immigrated to Israel at 1971 and has been living in Israel since then. I am a softwere engineer. I am neither a Ladino nor a Tanach scholar. Actually I have very basic knowlede in Judeo Espanyol.
A year ago I looked for a Ladino Tanach in latin characters, and eventually I ended transcribing the Ladino Tanach which was published bt the Protestant missionaries who were vet active in the Speharadic world in the 19th century. This Tanach (and other books) were very popular with the Sepharadic Jews. This Tanach was published in two volumes.
So far I have transcribed the Tora. I am now in the process of transcribing the rest of the first volume which covers Ye’hoshua, Shoftim, Shemuel Alef, Shemuel Bet, Melachim Alef and Melachim Bet. I hope to complete the transcription in a few months.
The transcription was not reviewed by the Ladino scholars. Please report the errors that you find.
