Sefer Tora en Djudeo Espanyol – Transkrivida kon letras latinas del livro por Ye’huda Sidi / SHOFTIM (6-10)

Ver todos los capítulos publicados en esta sección

Sefer TORA NEVIIM UKETUVIM
El livro de la Ley, los Profetas, las Eskrituras
Trazladado en la lingua Espanyola
Estamperea de A. ‘H. Boyadjian
Konstantatinopla 1873

Transkrivido por Ye’huda Sidi. Febrero 2015

SHOFTIM

6

¹Ma los ijos de Yisrael izyeron lo malo en ojos de A’; i A’ los entrego en mano de Midyan syete anyos. ²I la mano de Midyan se enfortesyo kontra Yisrael; i por kavza de los Midyanitas los ijos de Yisrael se izyeron los kavernas ke estan en los montes, i las kuevas, i las enkastiyaduras.³I era, ke kuando los ijos de Yisrael avian sembrado, suvian los Midyanitas i Amalekitas i la [1]djente de oryente suvian kontra eyos. ⁴I pozavan serka de eyos, i danyavan el ermoyo de la tyerra asta la entrada de Aza; i no deshavan bivyenda en Yisrael, ni karnero, ni buey, ni azno. ⁵Porke eyos suvian kon sus ganados i kon sus tyendas; i venian komo langostas en muchedumbre, ke no avia numero en eyos ni en sus kameyos; i venian en la tyerrra para danyarla. ⁶I Yisrael se empovresyo mucho por kavza de los Midyanitas; i los ijos de Yisrael esklamaron a A’.

⁷I fue, ke kuando los ijos de Yisrael esklamaron a A’ por kavza de los Midyanitas, A’ enbio profeta a los ijos de Yisrael el kual les disho: ⁸ansi dize A’ Dyo de Yisrael: yo vos ize suvir de Ayifto, i vos saki de la kaza de syervos: ⁹i vos eskapi de mano de los Aisyanos, i de mano de todos los ke vos apretavan; i los desterri de delante de vozotros, i vos di su tyerra. ¹⁰I vos dishe: yo soy A’ vuestro Dyo; no temash a lo dyozes de los Emorios, en la tyerra de los kuales morash; ma no ovedesistesh a mi boz.

¹¹I vino el andjel de A’, i se asento debasho del pino ke esta en Ofra, ke era de de Yoash el Avi-Ezrita; i Gidon su ijo estava sakudyando trigo en el lagar, para eskondirlo de los Midyanitas. ¹²I el andjel de A’ se le aparesyo, i le disho: A’ es kontigo barragan vayente. ¹³I Gidon le disho: rogo, mi senyor, si A’ es kon vozotros, ¿por ke nos alkanso todo esto? ¿i onde estan todas sus maraviyas ke nuestros padres nos kontaron, dizyendo: ¿no nos izo suvir A’ de Ayifto? i agora A’ nos a deshado, i nos a entregado en mano de los Midyanitas. ¹⁴I A’ le miro, i disho: anda kon esta tu fuersa, i salvaras a Yisrael de mano de los Midyanitas; por syerto yo te enbio. ¹⁵I el le disho: rogo, mi senyor; ¿kon ke tengo yo de salvar a Yisrael? ek mi famiya es povre en Menashe, i yo el menor en la kaza de mi padre. ¹⁶I A’ le disho: syerto yo sere kontigo, i eriras a los Midyanitas komo a un varon. ¹⁷I el le disho: te rogo, si ayi grasya en tus ojos, dame senyal ke tu eres ke avlas konmigo. ¹⁸I rogo ke no te vayes de aki asta ke yo venga a ti, i sake mi prezente, i lo ponga delante de ti. I el disho: yo esperare asta ke tornes. ¹⁹I entro Gidon, i aparejo un kavrito de las kavras, i sensenyas de un epa de arina; puzo la karne en un kanastiyo, i el kaldo puzo en un kaldero, i lo sako a el dabasho del pino, i se lo prezento. ²⁰I el andjel del Dyo le disho: toma la karne i las senesenyas, i ponlo sovre esta penya, i vyerte el kaldo. I el izo ansi. ²¹I estendyo el andjel de A’ la punta de la vara ke tenia en su mano, i toko en la karne i en las sensenyas; i suvyo fuego de la penya, i konsumyo la karne i las sensenyas. I el andjel de A’ se fue de delante de el. ²²I vyendo Gidon ke era un andjel de A’, disho Gidon: ¡guay, senyor A’! porke tengo visto el andjel de A’ kara a kara. ²³I A’ le disho: paz a ti; no tengas myedo, no muriras. ²⁴I fraguo ayi Gidon ara a A’, i la yamo, A’-Shalom, la kual esta dainda asta este dia en Ofra del Avi-Ezrita.

²⁵I akontesyo ke la mizma noche A’ le disho: toma un toro de los bueyes de tu padre, el segundo toro de syete anyos; i derroka el ara de Baal ke tu padre tyene, i korta la arvolida [Ashera] ke esta djunto a eya. ²⁶I fragua ara a A’ tu dyo sovre la kavesera de esta penya en manera ordenada; i toma el toro segundo, i alsa alsasyon kon la lenya de la arvolida [Ashera] ke kortaras. ²⁷Entonses Gidon tomo dyez varones de sus syervos, i izo komo le avlo A’. I fue, ke komo tuvo myedo de azerlo de dia, por la kaza de su padre i por los varones de la sivdad, lo izo de noche. ²⁸I kuando los varones de la sivdad madrugaron por la manyana, ek, el ara de Baal estava derrokada, i la arvolida ke estava djunto a eya fue kortada, i el segundo toro fue echo alsasyon sovre el ara fraguada de nuevo. ²⁹I disheron el uno al otro; ¿kyen izo esta koza? i kuando peskuzaron i bushkaron, les disheron: Gidon, ijo de Yoash, izo esta koza. ³⁰Entonses los varones de la sivdad disheron a Yoash: saka tu ijo para ke muera, por lo ke derroko el ara de Baal, i por lo ke korto la arvolida ke estava djunto a eya. ³¹I disho Yoash a todos los ke estavan serka de el: ¿barajaresh vozotros por Baal? ¿vozotros lo salvaresh? akel ke barajare por el, sea matado myentras ke es de manyana. Si es dyo, baraje por si, porke derroko su ara. ³²I en akel dia lo yamo Yerubaal, dizyendo: baraje Baal kon el, porke derroko su ara.

³³I todos los Midyanitas, i los Amalekitas, i la [2]djente del oryente se adjuntaron auna, i pasaron, i pozaron en el vaye de Yizreel. ³⁴I el espirito de A’ envestyo a Gidon: i tanyo kon la trompeta, i Aviezer se adjunto detras de el. ³⁵I enbio mensajeros por todo Menashe, el kual tambyen se adjunto detras de el; i enbio mensajeros a Asher, i a Zevulun, i a Naftali; i suvyeron a enkontrarlos. ³⁶I disho Gidon al Dyo: si es de salvar a Yisrael por mi mano, komo avlaste; ³⁷ek yo espandire una traskiladura de lana en la era: si uvyere rosio en la traskiladura solamente, i sovre toda la tyerra sekura, entonses savre ke salvaras a Yisrael por mi mano, komo avlaste. ³⁸I akontesyo ansi. I madrugo por la manyana, i esprimyo la traskiladura, i esprimyo el rosio de la traskiladura, un vazo yeno de agua. ³⁹I disho Gidon al Dyo: no se ensyenda tu fulor kontra mi, i avlare solamente esta vez. Te rogo ke yo preve solamente esta vez kon la traskiladura: ke ayga agora sekura en la traskiladura solamente, i ayga rosio sovre toda la tyerra. ⁴⁰I el Dyo izo ansi akeya noche; i uvo sekura en la traskiladura solamente, i sovre toda la tyerra uvo rosio.

[1] Ebreo: ijos

[2] Ebreo: ijos

7

¹I madrugo Yerubaal, el kual es Gidon, i todo el puevlo ke estava kon el, i pozaron serka de la fuente de Harod. I tenia el real de los Midyanitas al norte, a la kuesta de More en el vaye.

²I disho A’ a Gidon: el puevlo ke esta kontigo es mucho para ke yo de a los Midyanitas en su mano, no sea ke se alave Yisrael kontra mi, dizyendo: mi mano me salvo. ³Agora pues, apregona agora en oidos del puevlo, dizyendo: kyen se espanta i se estremese, madruge i tornese del monte de Gilad. I se tornaron del puevlo vente i dos mil; i kedaron dyez mil.

⁴I disho A’ a Gidon: dainda es mucho el puevlo; azlos desender a las aguas, i ayi yo te los esmerare. I sera, ke el ke yo te dishere: ke este vaya kontigo, el andara kontigo; i el ke yo te dishere: ke este no vaya kontigo, el no andara.

⁵I izo desender el puevlo a las aguas; i disho A’ a Gidon: kualkyera ke lambyere de las aguas kon su lingua, komo lambe el perro, akel pondras aparte; i kualkyera ke se arrodiyare sovre sus rodiyas para bever. ⁶I fue el numero de los ke lambyeron, yevando el agua kon su mano a su boka, tresyentos varones; i todo el resto del puevlo se arrodiyaron sovre sus rodiyas para bever agua.

⁷I disho A’ a Gidon: kon los tressyentos varones ke lambyeron vos salvare, i entregare a los Midyanitas en tu mano; i vayase todo el resto del puevlo kada uno a su lugar. ⁸I el puevlo tomaron vianda en su mano, i sus trompetas; i enbio a todos los otros Yisraelitas kada uno a sus tyendas, i detuvo a los tressyentos varones. I el real de Midyan estava debasho de el en el vaye.

⁹I akontesyo ke en akeya noche A’ le disho: levantate, desyende al real; porke yo lo entregi en tu mano. ¹⁰I si tyenes myedo de desender, desyende tu kon Pura tu moso al real. ¹¹I oiras lo ke avlan; i despues se enforteseran tus manos, i desenderas al real. I el desendyo kon Pura su moso al kavo de los armados ke estavan en el real. ¹²I Midyan i Amalek, i toda la [1]djente del oryente estavan echados en el vaye komo langostas en muchedumbre; i sus kameyos eran enumerables, komo la arena ke esta sovre la oriya de la mar en muchedumbre. ¹³I komo Gidon vino, ek, un varon estava kontando a su kompanyero un suenyo, i dizia: ek sonyi suenyo, i ek una torte de pan de sevada rodeava en el real de Midyan, i vino asta la tyenda, i la iryo de tal manera ke kayo, i la trastorno de arriva abasho, i la tyenda kayo. ¹⁴I su kompanyero respondyo i disho: esto no es otra koza sino la espada de Gidon, ijo de Yoash, varon de Yisrael; el Dyo a entregado en su mano a los Midyanitas kon todo el real.

¹⁵I fue, ke komo Gidon oyo el kuento del suenyo i su soltura, se enkorvo; i se torno al real de Yisrael, i disho: levantadvos, porke A’ a entregado en vuestra mano al real de Midyan. ¹⁶I espartyo los tresyentos varones en tres kompanyas; i dyo trompeta en mano de todos eyos i kantaros vazios, kon tizones adyentro de los kantaros. ¹⁷I les disho: miradme a mi, i azed komo yo ago; i ek, kuando yo vinyere al kavo del real, komo yo izyere, ansi aresh vozotros. ¹⁸Kuando yo tanyere kon la trompeta, yo i todos los ke estan konmigo, entonses vozotros tambyen tanyeresh kon las trompetas al derredor de todo el real, i diresh: ¡Por A’ i por Gidon!

¹⁹Vino pues Gidon, i los syen varones ke estavan kon el, al kavo del real, en el prinsipyo de la guardya del Midyan; solamente levantar avian levantado a los guardadores. I tanyeron kon las trompetas, i kevraron los kantaros ke yevavan en sus manos. ²⁰I las tres kompanyas tanyeron kon las trompetas, i kevraron los kantaros, i tomaron en sus manos izkyerdas los tizones, i en sus derechas las trompeta para tanyar, i gritaron: ¡la espada de A’ i de Gidon! ²¹I se estuvyeron kada uno en su lugar al derredor del real; i korryo todo el real, i gritaron, i fuyeron. ²²I los tressyentos tanyan las trompetas; i A’ puzo la espada de kada uno kontra su kompanyero en todo el real. I el real fuyo asta Bet-Shita en Tsererat, i asta la oriya de Avel-Mehola djunto a Tabat. ²³I se adjuntaron los varones de Yisrael de Naftali, i de Asher, i de todo Menashe, i persigyeron detras de los Midyanitas. ²⁴I Gidon enbio mensajeros por todo el monte de Efrayim, dizyendo: desended al enkuentro de los Midyanitas, i prended antes de eyos las aguas asta Bet-Bara i el Yarden. I se adjunatron todos los varones de Efrayim, i prendyeron las aguas asta Bet-Bara i el Yarden. ²⁵I prendyeron dos prinsipes de los Midyanitas, Orev i Zeev; i mataron a Orev en la penya de Orev, i a Zeev mataron en el lagar de Zeev; i persigyeron a los Midyanitas, i trusheron las kavesas de Orev i de Zeev a Gidon al otro lado de Yarden.

[1] Ebreo: ijos

8

¹I los varones de Efrayim le disheron: ¿ke koza es esta ke iziste a nozotros , en no yamandonos kuando ivash a pelear kon Midyan? i barajaron kon el fuertemente. ²I el les disho: ¿ke ize yo agora komo vozotros? ¿no es el rebushko de Efrayim mejor ke la vendimya de Aviezer? ³En vuestro mano el Dyo a entregado a Orev i a Zeev, pinsipes de Midyan. ¿i ke pude yo azer komo vozotros? entonses se aflosho el enojo de eyos kontra el, kuando el avlo esta palavra.

⁴I vino Gidon al Yarden, i paso, el i los tresyentos varones ke estavan kon el, kansados i persigyentes. ⁵I disho a los varones de Sukot: vos rogo ke desh tortas de pan al puevlo ke estan en mi kompanya; porke estan kansados, i yo estoy persigyendo detras de Zevah i Tsalmuna, reyes de Midyan. ⁶I los mayorales de Sukot disheron: ¿ya esta la palma de Zevah i de Tsalmuna en tu mano, para ke demos pan a tu fonsada? ⁷I Gidon disho: por tanto kuando A’ uvyere entregado a Zevah i a Tsalmuna en mi mano, yo triyare vuestra karne kon espinos del dizyerto i kon kardos. ⁸I suvyo de ayi a Penuel, i avlo lo mizmo a eyos; i los varones de Penuel le respondyeron komo avian respondido los varones de Sukot. ⁹I el avlo tambyen a los varones de Penuel, dizyendo: kuando yo tornare en paz derrokare esta torre.

¹⁰I Zevah i Tsalmuna estavan en Karkor, i kon eyos sus reales, komo kinze mil varones todos los ke kedaron de todo el real de la [1]djente del oryente; i los kaidos fueron syento i vente mil varones ke desvaynavan espada. ¹¹I suvyo Gidon por el kamino de los ke moravan en tyendas, al oryente de Novah Yogbe’ha, i iryo al real; porke el real estava deskuydado. ¹²I Zevah i Tsalmuna fuyeron, i el persigyo detras de eyos, i prendyo a los dos reyes de Midyan, Zevah i Tsalmuna, i izo estremeser a todo el real. ¹³I Gidon, ijo de Yoash, torno de la pelea antes de suvir el sol. ¹⁴I prendyo un moso de los varones de Sukot, i le pregunto; i el le dyo por eskrito los mayorales de Sukot i sus vyejos, setenta i syete varones. ¹⁵I vino a los varones de Sukot, i disho: ek, Zevah i Tsalmuna, sovre las kuales me afrontastesh, dizyendo: ¿ya esta la palma de Zevah i de Tsalmuna en tu mano, para ke demos pan a tus varones kansados? ¹⁶I tomo a los vyejos de la sivdad, i espinos del dizyerto i kardos, i kastigo kon eyos a los varones de Sukot. ¹⁷I derroko la torre de Penuel, i mato a los varones de la sivdad. ¹⁸I disho a Zevah i a Tsalmuna: ¿ke manera de varones eran akeyos ke matastesh en Tavor? i disheron: komo tu; kada uno paresia komo ijo de rey. ¹⁹I el disho: mis ermanos eran, ijos de mi madre; bivo A’, si los uvyerash abidiguado, yo no vos mataria. ²⁰I disho a Yeter su primodjenito: levantate, matalos. Ma el muchacho no desvayno su espada, porke tenia temor, porke dainda era muchacho. ²¹Entonses disho Zevah i Tsalmuna: levantate tu, i matanos; porke komo es el varon, tal es su barragania. I Gidon se levanto, i mato a Zevah i a Tslamuna, i tomo las lunetas ke avia en las servizes de sus kameyos.

²²I los varones de Yisrael disheron a Gidon: podesta sovre nozotros tu, i tu ijo, i el ijo de tu ijo tambyen; porke nos salvaste de mano de Midyan. ²³I Gidon les disho: no podestare sovre vozotros, ni podestara mi ijo sovre vozotros; A’ podestara sovre vozotros. ²⁴I les disho Gidon: yo demandare de vozotros una demanda, ke me desh kada uno los anyazmes de su espojo; (porke tenian anyazmes de oro, syendo ke eran Yishmaelitas). ²⁵I disheron: dando daremos. I espandyeron una savana, i echaron ayi kada uno los anyazmes de su espojo. ²⁶I fue el pezo de los anyazmes de oro ke el demando, mil i syetesyentos siklos de oro, afuera de las lunetas, i las almiskleras, i vestidos de purpura, ke avia sovre los reyes de Midyan, i afuera de las shartas ke avia en las servizes de sus kameyos. ²⁷I Gidon izo de eyos un espaldar, i lo paro en sivdad de Ofra; i todo Yisrael eskararon detras de el ayi, i fue por enkampamyento a Gidon i a su kaza. ²⁸Ansi fue sodjiftado Midyan delante de los ijos de Yisrael, i nunka mas levantaron su kavesa. I repozo la tyerra kuarenta anyos en los dias de Gidon.

²⁹I Yerubaal, ijo de Yoash, anduvo i moro en su kaza. ³⁰I Gidon tuvo setenta ijos ke salyeron de su anka; porke tuvo muchas mujeres. ³¹I su donzeya ke estava en Shehem. tambyen eya le paryo un ijo, i le puzo por nombre Avimeleh. ³²I muryo Gidon, ijo de Yoash, en buena vejez, i fue enterrado en la fuesa de Yoash su padre, en Ofra de los Avi-Ezritas.

³³I akontesyo, ke komo muryo Gidon, los ijos de Yisrael tornaron i eskararon detras de los Baalim, i puzyeron para si a Baal-Berit por dyo. ³⁴I no se akordaron los ijos de Yisrael de A’ su Dyo, ke los avia eskapdo de mano de todos sus enemigos al derredor: ³⁵ni izyeron mersed kon la kaza de Yerubaal Gidon, segun todo el byen ke el avia echo a Yisrael.

[1] Ebreo: ijos

9

¹I anduvo Avimeleh, ijo de Yerubaal, a Shehem a los ermanos de su madre, i avlo kon eyos, i kon todo el linaje de la kaza del padre de su madre, dizyendo: ²vos rogo ke avlesh en oidos de todos los senyores de Shehem: ¿ke tenesh por mejor, ke podesten sovre vozotros setenta varones, todos los ijos de Yerubaal, o ke podeste sovre vozotros un varon? i akordavos ke yo soy vuestro gueso i vuestra karne. ³I avlaron por el los ermanos de su madre en oidos de todos los senyores de Shehem todas estas palavras. I el korason de eyos se akosto detras de Avimeleh, porke dizian: nuestro ermano es. ⁴I le dyeron setenta sikos de plata de la kaza de Baal-Berit, i kon eyos Avimeleh alkilo varones vazios i vanos ke anduvyeran detras de el. ⁵I vino a la kaza de su padre a Ofra, i mato a sus ermanos los ijos de Yerubaal, setenta varones, sovre una pyedra; ma kedo Yotam, el ijo chiko de Yerubaal, porke se avia eskondido. .

⁶I se adjuntaron todos los senyores de Shehem, i toda la kaza de Milo, i fueron i izyeron enreynar a Avimeleh por rey serka de la enzina de estansya ke estava en Shehem. ⁷I kuando se lo kontaron a Yotam, anduvo i se paro en la punta del monte de Gerizim, i also su boz, i grito, i les disho: oidme, senyores de Shehem, ke el Dyo vos oyga. ⁸Andad anduvyeron los arvoles por untar rey sovre si; i disheron al olivo: enreyna sovre nozotros. ⁹I el olivo les disho: ¿tengo ke deshar mi grosura, kon ke por mi kavza onran al Dyo i a los varones, por ir a ser grande sovre los arvoles? ^1oI disheron los arvoles a la igera: ven tu, enreyna sovre nozotros. ¹¹I la igera les disho: ¿tengo ke deshar mi dulsura i mi buen fruto por ir a ser grande sovre los arvoles? ¹²I disheron los arvoles a la vid: ven tu, enreyna sovre noztros. ¹³I la vid les disho: ¿tengo ke deshar mi mosto, ke alegra al Dyo i a los varones, por ir a ser grande sovre los arvoles? ¹⁴I disheron todos los arvoles al espino: ven tu, enreyna sovre nozotros. ¹⁵I el espino disho a los arvoles: si en verdad me untash por rey sovre vozotros, venid i abrigadvos debasho de mi solombra; i si no, salga fuego del espino, i keme los alarzes del Levanon. ¹⁶Agora pues, si kon verdad i kon prenizmedad izistesh en azer rey a Avimeleh, i si avesh echo byen kon Yerubaal i kon su kaza, i si avesh echo a el segun el mereser de sus manos: ¹⁷(porke mi padre peleo por vozotros, i echo leshos su vida , i vos eskapo de mano de Midyan: ¹⁸i vozotros vos levantastesh kontra la kaza de mi padre oy, i matastesh a sus ijos, setenta varones, sovre una pyedra, i puzistesh por rey sovre los senyores de Shehem a Avimeleh, ijo de su syerva, por lo ke es vuestro ermano.) ¹⁹Si kon verdad i kon prenizmedad avesh echo kon Yerubaal i kon su kaza en este dia, ke gozesh de Avimeleh, i tambyen el goze de vozotros: ²⁰i si no, salga fuego de Avimeleh, i keme a los senyores de Shehem i la kaza de Milo, i keme a Avimeleh. ²¹I fuyo Yotam. i fuyo, i se fue a Beer, i moro ayi por myedo de Avimeleh su ermano.

²²I despues ke Avimeleh uvo ensenyoreado sovre Yisrael tres anyos, ²³enbio el Dyo un espirito malo entre Avimeleh i los senyores de Shehem, i los senyores de Shehem falsaron kontra Avimeleh: ²⁴para ke el adolme de los setenta ijos de Yerubaal vinyera, i para ke la sangre de eyos fuera puesta sovre Avimeleh su ermano, ke los mato, i sovre los senyores de Shehem, ke esforsaron las manos de el para matar a sus ermanos. ²⁵I los senyores de Shehem le puzyeron aseladadores en las kaveseras de los montes, i rovavan a todos los ke pasavan serka de eyos por el kamino; i fue dado avizo a Avimeleh.

²⁶I vino Gaal, ijo de Eved, kon sus ermanos, i pasaron a Shehem; i los senyores de Shehem se enfiguzyaron en el. ²⁷I salyeron al kampo, i vendimyaron sus vinyas, i pizaron las uvas, i izyeron alegria; i entraron en la kaza de sus dyozes i komyeron i bevyeron, i maldisheron a Avimeleh. ²⁸I disho Gaal. ijo de Eved: ¿kyen es Avimeleh, i kyen es Shehem, para ke sirvamos a el? ¿No es ijo de Yerubaal? ¿I no es Zevul su deputado? servid a los varones de Hamor , padre de Shehem. ¿I por ke tenemos ke servir a akel? ^29¡Kyen dyese a este puevlo debasho de mi mano, i yo echaria a Avimeleh! I disho a Avimeleh: muchigua tu fonsado i sal. ³⁰I Zevul, mayoral de la sivdad, oyendo las palavras de Gaal, ijo de Eved, se ensendyo su fulor. ³¹I enbio mensajeros a Avimeleh kon arte, dizyendo: ek, Gaal, ijo de Eved, i sus ermanos, vinyeron a Shehem; i ek, estan solevantado la sivdad kontra ti. ³²I agora pues, levantate de noche, tu i el puevlo ke esta kontigo, i aselada en el kampo. ³³I sera, ke por la manyana al salir del sol, madrugaras, i atakaras la sivdad; i ek, el i el puevlo ke esta kon el saldran kontra ti, i aras a el komo alkansare tu mano.

³⁴I se levanto de noche Avimeleh, i todo el puevlo ke estava kon el, i aseladaron kontra Shehem en kuatro kompanyas. ³⁵I Gaal, ijo de Eved, salyo i se paro a la entrada de la purta de la sivdad; i Avimeleh i el puevlo ke estava kon el se levantaron de la aselada. ³⁶I vyendo Gaal al puevlo, disho a Zevul: ek, puevlo esta desendyendo de las kaveseras de los montes. I Zevul le disho: tu ves la solombra de los montes, i te parese komo varones. ³⁷I Gaal avlo de nuevo, i disho: ek, puevlo desyenden por la suvida de la tyerra i una kompanya vyene por el kamino de la enzina de Meonenim. ³⁸I Zevul le disho: onde esta agora tu dicho ke dizias: ¿Kyen es Avimeleh, para ke sirvamos a el? ¿No es este el puevlo ke tenias en poko? Sal pues agora, i pelea kon el. ³⁹I salyo Gaal delante de los senyores de Shehem, i peleo kon Avimeleh. ⁴⁰I Avimeleh lo persigyo, i el fuyo delante de el; i kayeron matados muchos asta la entrada de la puerta. ⁴¹I Avimeleh se kedo en Aruma, i Zevul desterro a Gaal i a sus ermanos de morar en Shehem. ⁴²I akontesyo al otro dia ke el puevlo salyo al kampo; i dyeron avizo a Avimeleh. ⁴³I tomo al puevlo, i los espartyo en tres kompanyas, i aselado en el kampo; i miro, i ek, el puevlo salia de la sivdad; i se levanto kontra eyos, i los iryo. ⁴⁴I Avimeleh i la kompanya ke estava kon el se arrojaron, i se pararon a la entrada de la puerta de la sivdad; i las otras dos kompanyas se arrojaron sovre los ke estavan en el kampo, i los iryeron. ⁴⁵I Avimeleh peleo kontra la sivdad todo akel dia; i prendyo la sivdad, i mato al puevlo ke estava en eya, i derroko la sivdad, i la sembro de sal.

⁴⁶I komo oyeron esto todos los senyores de la torre de Shehem, entraron en la fortaleza de la kaza del dyo Berit. ⁴⁷I fue dado avizo a Avimeleh ke todos los senyores de la torre de Shehem se avian adjuntado. ⁴⁸I suvyo Avimeleh al monte de Tsalmon, el i todo el puevlo ke estava kon el; i tomo Avimeleh un destral en su mano, i korto una rama de los arvoles, i la levanto, i la puzo sovre su ombro. I disho al puevlo ke estava kon el: lo ke me vistesh azer, apresurad, i azed komo yo. ⁴⁹I todo el puevlo tambyen kortaron kada uno su rama, i anduvyeron detras de Avimeleh, i las puzyeron djunto a la fortaleza, i kon eyas puzyeron fuego a la fortaleza; i muryeron tambyen todos los varones de la torre, komo mil ombres i mujeres.

⁵⁰I Avimeleh se fue a Tevets, i pozo en Tevets, i la prendyo. ⁵¹I en medyo de la sivdad avia una torre fuerte; i ayi fuyeron todos los varones i las mujeres, i todos los senyores de la sivdad; i serraron detras de si las puertas i suvyeron al tejado de la torre. ⁵²I vino Avimeleh asta la torre, i peleo kontra eyos, i se ayego asta la puerta de la torre para kemarla en fuego. ⁵³I una mujer echo en pedaso de una pyedra de molino sovre la kavesa de Avimeleh, i rompyo su kavesa. ⁵⁴I luego el yamo al moso ke yevava sus armas, i le disho: desvayna tu espada i matame, para ke no digan de mi, una mujer lo mato. I su moso lo alanseo, i muryo. ⁵⁵I komo los varones de Yisrael vyeron ke Avimeleh era muerto, se fueron kada uno a su lugar. ⁵⁶Ansi torno el Dyo el mal de Avimeleh ke el izo a su padre en matando a sus setenta ermanos. ⁵⁷I todo el mal de los varones de Shehem torno el Dyo sovre sus kavesas; i vino sovre eyos la maldisyon de Yotam, ijo de Yerubaal.

10

¹I despues de Avimeleh se levanto para salvar a Yisrael Tola. ijo de Pua, ijo de Dodo, varon de Yissahar; i el morava en Shamir en el monte de Efrayim. ²I djuzgo a Yisrael vente i tres anyos, i muryo , i fue enterrado en Shamir.

³I despues de el se levanto Yair el Giladita, i djuzgo a Yisrael vente i dos anyos. ⁴I tuvo trenta ijos ke kavayavan sovre trenta borrikos, i tenian trenta sivdades, ke se yamaron las aldeas de Yair asta oy, las kuales estan en la tyerra de Gilad. ⁵I muryo Yair, i fue enterrado en Kamon.

⁶I los ijos de Yisrael tornaron a azer lo malo en ojos de A’, i sirvyeron a los Baalim i a Ashtarot, i a los dyozes de Aram, i a los dyozes de Tsidon, i a los dyozes de Moav, i a los dyozes de los ijos de Amon, i a los dyozes de los Pelishtios; i desharon a A’, i no le sirvyeron. ⁷I se ensendyo el fulor de A’ kontra Yisrael; i los vendyo en mano de los Pelishtios, i en mano de los ijos de Amon. ⁸I kevrantaron i apartaron a los ijos de Yisrael dezde akel anyo dyez i ocho anyos, a todos los ijos de Yisrael ke estavan de la otra parte del Yarden en la tyerra del Emorio, ke es en Gilad. ⁹I los ijos de Amon pasaron el Yarden para pelear tambyen kon Ye’huda, i kon Binyamin, i kon la kaza de Efrayim. I Yisrael fue angustyado mucho. ¹⁰I los ijos de Yisrael esklamaron a A’, dizyendo: pekimos kontra ti, porke deshimos a nuestro Dyo, i servimos a los Baalim.

¹¹I disho A’ a los ijos de Yisrael: ¿no vos eskapi de los Aisyanos, i de los Emorios, de los ijos de Amon, i de los Pelishtios? ¹²I los Tsidonios, i los Amalekitas, i los Maonitas, vos apretaron; esklamastesh a mi, i vos salvi de su mano. ¹³Ma vozotros me avesh deshado, i avesh servido a otros dyozes; por tanto yo no vos salvare mas. ¹⁴Andad i esklamad a los dyozes ke eskojistesh, ke eyos vos salven en el tyempo de vuestra angustya. ¹⁵I los ijos de Yisrael disheron a A’: pekimos; az tu kon nozotros segun todo lo ke parese byen; solamente ke agora nos eskapes en este dia. ¹⁶I kitaron de entre si los dyozes estranyos, i sirvyeron a A’; i su alma fue angustyada por kavza de la lazerya de Yisrael.

¹⁷I los ijos de Amon se adjuntaron, i pozaron en Gilad; i se adjunatron los ijos de Yisrael, i pozaron en Mitspa. ¹⁸I el puevlo, i los mayorales de Gilad disheron el uno al otro: ¿kyen sera el varon ke empesara a pelear kon los ijos de Amon? el sera kavesera de todos los moradores de Gilad.

Ver todos los capítulos publicados en esta sección

 ————————————————————————

About Yehuda Sidi

I was born in 1953 in Tekirdag, Turkey and grew up in Canakkale. My father Hayim Sidi served as rabbi in both Tekirdag and Cannakale. Yehuda immigrated to Israel at 1971 and has been living in Israel since then. I am a softwere engineer. I am neither a Ladino nor a Tanach scholar. Actually I have very basic knowlede in Judeo Espanyol.

A year ago I looked for a Ladino Tanach in latin characters, and eventually I ended transcribing the Ladino Tanach which was published bt the Protestant missionaries who were vet active in the Speharadic world in the 19th century. This Tanach (and other books) were very popular with the Sepharadic Jews. This Tanach was published in two volumes.

So far I have transcribed the Tora. I am now in the process of transcribing the rest of the first volume which covers Ye’hoshua, Shoftim, Shemuel Alef, Shemuel Bet, Melachim Alef and Melachim Bet. I hope to complete the transcription in a few months.

The transcription was not reviewed by the Ladino scholars. Please report the errors that you find.