Sefer Tora en Djudeo Espanyol – Transkrivida kon letras latinas del livro por Ye’huda Sidi / SHOFTIM (16-21)

Ver todos los capítulos publicados en esta sección

Sefer TORA NEVIIM UKETUVIM
El livro de la Ley, los Profetas, las Eskrituras
Trazladado en la lingua Espanyola
Estamperea de A. ‘H. Boyadjian
Konstantatinopla 1873

Transkrivido por Ye’huda Sidi. Febrero 2015

SHOFTIM

16

¹I anduvo Shimshon a Aza, i vido ayi una mujer eskarada, i entro a eya. ²I fue dicho a los de Aza: Shimshon es vinido aki. I lo rodearon , i lo aseladaron toda la noche en la puerta de la sivdad; i estuvyeron kayados toda la noche, dizyendo: asta la luz de la manyana, entonses lo mataremos. ³I Shimshon yazyo asta la medya noche; i a la medya noche se levanto, i travo las puertas de la puerta de la sivdad, i los dos postes, i los arranko kon la serradura, i los puzo sovre sus ombros, i los suvyo a la punta del monte ke esta enfrente de Hevron.

⁴I despues de esto akontesyo ke se enamoro de una mujer en al arroyo de Sorek, el nombre de la kual era Delila. ⁵I suvyeron a eya los prinsipes de los Pelishtios, i le disheron: sombaylo, i mira en ke esta su fuersa grande, i komo lo podremos venser, para ke lo atemos para aferrarlo, i nozotros te daremos kada uno mil i syen pyesas de plata. ⁶I Delila disho a Shimshon: te rogo ke me digas en ke esta tu fuersa grande, i kon ke podras ser atado para afriirte. ⁷I Shimshon le disho: si ma ataren kon syete kuerdas freskas ke no se enshugaron, entonses me enflakesere, i sere komo kualkyer otro ombre. ⁸I los prinsipes de los Pelishtios le trusheron syete kuerdas freskas ke no se avian enshugado, i eya lo ato kon eyas. ⁹I los aseladadores estavan kon eya en la kamara; i eya le disho: ¡los Pelishtios, sovre ti Shimshon! I el arranko las kuerdas, komo se arranka un ilo de estopa kuando guele el fuego. I su fuersa no fue konosida.

¹⁰I disho Delila a Shimshon: ek, tu te burlaste de mi. i me avlaste mentiras; agora te rogo ke me digas kon ke podras ser atado. ¹¹I el le disho: si atar me ataren kon kuerdas nuevas, kon las kuales nunka fue echa ovra, entonses me enflakesere, i sere komo kualkyer otro ombre. ¹²I Delila tomo kuerdas nuevas, i lo ato kon eyas, i le disho ¡los Pelishtios sovre ti, Shimshon? I los aseladadores estavan en la kamara, Ma el las arranko de sovre sus brasos komo un ilo. ¹³I disho Delila a Shimshon: asta agora te burlaste de mi, i avlaste mentiras; dime kon ke podras ser atado. I el le disho: si tesheres las syete vedejas de mi kavesa kon la tela. ¹⁴I eya la finko kon la estaka ,i le disho: ¡los Pelishtios sovre ti, Shimshon! ma el se desperto de su suenyo, i arranko la estaka del telar i la tela. ¹⁵I eya le disho ¿komo dizes, yo te amo, syendo ke tu korason no esta konmigo? Estas tres vezes te burlaste de mi, i no me dishiste en ke esta tu fuersa grande. ¹⁶I akontesyo, ke komo lo apreto kada dia kon sus palavras, i lo kanso, de modo ke su alma se angustyo asta la muerte, ¹⁷el le deskuvryo todo su korason, i le disho: nunka suvyo navaja sovre mi kavesa; porke yo so nezirio del Dyo dezde el vyentre de mi madre. Si fuere rapado, entonses mi fuersa se apartara de mi, i me enflakesere, i sere komo todos los otros ombres. ¹⁸I vyendo Delila ke le avia deskuvyerto todo su korason, enbio i yamo a los prinsipes de los Pelishtios, dizyendo: suvid esta vez, porke el me deskuvryo todo su korason. I los prinsipyos de los Pelishtios suvyeron a eya, i trusheron la plata en su mano. ¹⁹I eya lo izo durmir sovre sus rodiyas, i yamo a un varon, i lo izo rapar las syete vedejas de su kavesa; i empeso a afriirlo, i su fuersa se aparto de el. ²⁰I eya le disho: ¡los Pelishtios sovre ti, Shimshon! I se desperto de su suenyo, i disho: saldre komo las otras vezes, i me sakudare. I no savia ke A’ se avia apartado de el. ²¹Ma los Pelishtios lo travaron, i arrankaron sus ojos; i lo izyeron desender a Aza, i lo ataron kon kadenas; i estava molyendo en la kaza de los enkarselados. ²²I el kaveyo de su kavesa empeso a kreser, despues ke fue rapado.

²³I los prinsipes de los Pelishtios se adjuntaron para sakrifikar sakrifisyo grande a Dagon su dyo, i para ayegarse; i disheron: nuestro dyo entrego en nuestra mano a Shimshon nuestro enemigo. ²⁴I kuando el puevlo lo vyeron, alavaron a su dyo; porke disheron: nuestro dyo entrego en nuestra mano a nuestro enemigo, i al destruidor de nuestra tyerra, el kual muchiguo nuestros matados. ²⁵I fue, ke estando alegre su korason, disheron: yamad a Shimshon, para ke nos aga riir. I yamaron a Shimshon de la kaza de los enkarselados, i djugava delante de eyos. I lo pararon entre los pilares. ²⁶I Shimshon disho al moso ke lo giava de la mano: deshame, i azme palpar los pilares sovre los kuales la kaza esta soportada, para ke me arrime sovre eyos. ²⁷I la kaza estava yena de ombres i mujeres, i todos los prinsipes de los Pelishtios estavan ayi; i sovre el tejado avia komo tres mil ombres i mujeres, ke estavan mirando el djuego de Shimshon. ²⁸I yamo Shimshon a A’, i disho Senyor A’, akordate de mi agora, i esfuersame agora solamanete esta vez, ¡o Dyo! para ke de una vez tome vengansa de los Pelishtios de mis dos ojos. ²⁹I Shimshon abraso los dos pilares del medyo sovre los kuales se soportava la kaza, i sovre kos kuales el se asofryo, el uno kon su mano derecha, i el otro kon su izkyerda. ³⁰I disho Shimshon: muera mi alma kon los Pelishtios. I se akosto kon fuersa, i kayo la kaza sovre los prinsipes, i sovre todo el puevlo ke estava en eya. I fueron los muertos ke mato en su muerte, muchos mas de los ke mato en su vida. ³¹I desendyeron sus ermanos, i toda la kaza de su padre, i lo yevaron i suvyeron, i lo enterraron entre Tsora i Eshtaol, en la fuesa de Manoah su padre. I el djuzgo a Yisrael vente anyos.

17

¹I avia un varon del monte de Efrayim, i su nombre Mihay’hu. ²I disho a su madre: los mil i syen siklos de plata ke fueron tomados de ti, i por los kuales tu maldizias, i tambyen lo dizias en mis oidos, ek, la plata esta konmigo; yo la tomi. I disho su madre: bendicho seas de A’, ijo mio. ³I torno los mil i syen siklos de plata a su madre; i disho su madre: santifikar santifike la plata a A’ de mi mano para mi ijo, para azer doladizo i imajen de fundisyon, i agora la tornare a ti. ⁴Ma el torno la plata a su madre; i su madre tomo dossyentos siklos de plata, i los dyo al platero; i el izo de eyos doladizo i imajen de fundisyon. I fue en kaza de Mihay’hu. ⁵I tuvo el varon Miha kaza de dyozes, i izo espaldar i terafim, i inchyo la mano de uno de sus ijos, i le fue por saserdote. ⁶En akeyos dias no avia rey en Yisrael; kada uno azia lo derecho en sus ojos. ⁷I avia un mansevo de Bet-Lehem de Ye’huda. del linaje de Ye’huda; i era Levita, i pelegrinava ayi. ⁸I el varon se avia ido de la sivdad de Bet-Lehem de Ye’huda para pelegrinar onde toparia lugar; i vino al monte de Efrayim asta la kaza de Miha, azyendo su viaje. ⁹I Miha le disho: ¿de onde vyenes? i el le disho: yo soy Levita de Bet-Lehem de Ye’huda, i voy a pelegrinar onde topare lugar. ¹⁰I Miha le disho: kedate konmigo, i seas a mi por padre i por saserdote, i yo te dare dyez siklos de plata al anyo, i un orden de vestidos, i tu mantenimyento. I el Levita se kedo. ¹¹I el Levita se kontento de morar kon el varon, i el mansevo le fue komo uno de sus ijos. ¹²I Miha inchyo la mano del Leavita, i el mansevo le fue por saserdote, i estuvo en kaza de Miha. ¹³I disho Miha: agora yo se ke A’ me ara byen, porke tengo un Levita por saserdote.

18

¹En akeyos dias no avia rey en Yisrael; i en akeyos dias el trivo de los Danitas bushkava para si eredad para morar; porke asta akel dia no le avia kaido toda su suerte entre los trivos de Yisrael por eredad. ²I los ijos de Dan enbiaron de su linaje sinko varones de sus terminos, varones vayentes, de Tsora i de Eshtaol, para eskulkar la tyerra i para peshkirirla; i les disheron: andad, peshkirir la tyerra. I vinyeron al monte de Efrayim. asta la kaza de Miha, i repozaron ayi. ³I estando serka de la kaza de Miha, konosyeron la boz del mansevo Levita; i se ayegaron ayi, i le disheron: ¿kyen te trusho aki? ¿i ke azes aki? ¿i ke tyenes aki? ⁴I el les disho: ansi i ansi me izo Miha, i me alkilo, i soy a el por saserdote. ⁵I le disheron: te rogamos ke preguntes al Dyo, para ke sepamos si prosperara nuestro kamino ke vamos. ⁶I el saserdote les disho: andad en paz; delante de A’ es vuestro kamino ke vash.

⁷I los sinko varones partyeron, i vinyeron a Laysh; i vyeron ke el puevlo ke morava en eya estava deskuydado, segun la kostumbre de los Tsidonios, repozado i konfiado; i no avia en la tyerra kyen los maltratara en ninguna koza, ni kyen podestara sovre eyos; i estavan leshos de los Tsidonios, i no tenian negosyo kon ningun ombre. ⁸I vinyeron a sus ermanos a Tsora i Eshtaol, i sus ermano les disheron: ¿ke dizesh vozotros? ⁹I disheron: levantadvos, i suvamos kontra eyos; porke vimos la tyerra, i ek, es muy buena. ¿I vozotros vos estash kedos? No seash perezozos para ir a entrar a eredar la tyerra. ¹⁰Kuando yegaresh, vendresh a un puevlo deskuydido, i a una tyerra ancha de lugares; porke el Dyo la entrego en vuestro mano; lugar onde no ay falta de ninguna koza ke sea en la tyerra.

¹¹I partyeron de ayi del linaje de los Danitas, de Tsora i de Eshatol, seshsyentos varones senyidos de armas de gerra: ¹²i suvyeron i pozaron en Kiryat-Yearim en Ye’huda; por tanto yamaron akel lugar Mahane-Dan asta oy; ek, esta detras de Kiryat-Yearim. ¹³I pasaron de ayi al monte de Efrayim, i vinyeron asta la kaza de Miha. ¹⁴I respondyeron los sinko varones ke avian ido a eskulkar la tyerra de Laysh, i disheron a sus ermanos: ¿no savesh ke en estas kazas ay espaldar, i terafim, i doladizo, i imajen du fundisyon? Agora pues mirad lo ke tenesh ke azer. ¹⁵I se ayegaron ayi, i vinyeron a la kaza del mansevo Levita en kaza de Miha, i le preguntaron komo estava. ¹⁶I los seshsyentos varones, ke eran de los ijos de Dan, senyidos de sus armas de gerra, estavan parados a la entrada de la puerta. ¹⁷I suvyeron los sinko varones ke avian ido a eskulkar la tyerra, i vinyeron ayi, i tomaron el doladizo, i el espaldar, i los terafim, i la imajen de fundisyon, estando el saserdote a la entrada de la puerta kon los seshsyentos varones senyidos de armas de gerra. ¹⁸I akeyos entraron en la kaza de Miha, i tomaron el doladizo, el espaldar, i los terafim, i la imajen de fundisyon; i el saserdote les disho: ¿ke estash azyendo? ¹⁹I le disheron: kayate, pon tu mano sovre tu boka, i ven kon nozotros, i seras a nozotros por padre i por saserdote. ¿Es mejor ke seas saserdote a la kaza de un varon solo, o ke seas saserdote a un trivo i linaje en Yisrael? ²⁰I se alegro el korason del saserdote, i tomo el espaldar, i los terafim, i el doladizo, i se vino entre el puevlo. ²¹I se tornaron, i se fueron, i puzyeron los ninyos, i el ganado, i las kozas presyadas delante de si. ²²I kuando se avian aleshado de la kaza de Miha, los varones ke moravan en las kazas ke estavan serka de la kaza de Miha, se adjuntaron, i alkansaron a los ijos de Dan. ²³I yamaron a los ijos de Dan; i eyos boltaron sus fases, i disheron a Miha: ¿ke tyenes ke te adjuntaste? ²⁴I el disho: mis dyozes ke yo ize, los tomastesh kon el saserdote, i anduvistesh, ¿i ke me kedo mas? ¿i ke es esto ke me dizesh, ke tyenes? ²⁵I los ijos de Dan le disheron: no se oyga tu boz entre nozotros, no sea ke varones ravyozos vos ataken, i pyerdas tu vida i la vida de los de tu kaza. ²⁶I los ijos de Dan se fueron a su kamino, i vyendo Miha ke eran mas fuertes ke el, se bolto i se torno a su kaza. ²⁷I eyos tomaron lo ke avia echo Miha, i al saserdote ke tenia, i vinyeron kontra Laysh, kontra un puevlo repozado i deskuydado, i los iryeron a tajo de espada, i kemaron la sivdad en fuego. ²⁸I no uvo kyen los eskapara, porke estava leshos de Tsidon, i no tenian negosyo kon ningun ombre; i estava en el vaye ke ay en Bet-Rehov. I fraguaron la sivdad, i moraron en eya. ²⁹I yamaron el nombre de la sivdad Dan, segun el nombre de Dan su padre, ke fue nasido a Yisrael, aunke Laysh era el nombre de la sivdad al primero. ³⁰I los ijos de Dan levantaron para si el doladizo; i Ye’honatan, ijo de Gershom, ijo de Menashe, el i sus ijos fueron saserdotes al trivo de Dan asta el dia del kativeryo de la tyerra. ³¹I puzyeron para si el doladizo de Miha, ke el avia echo, todos los dias ke la kaza del Dyo estuvo en Shilo.

19

¹I akontesyo en akeyos dias, kuando no avia rey en Yisrael, ke uvo un varon Levita ke pelegrinava en los lados del monte de Efrayim, i tomo para si mujer donzeya de Bet-Lehem de Ye’huda. ²I su donzeya eskaro kontra el, i se fue de kon el a la kaza de su padre a Bet-Lehem de Ye’huda, i estuvo ayi por tyempo de kuatro mezes. ³I se levanto su marido, i se fue detras de eya para avlarle amorozamente para azerla tornar; i yevo kon si su moso, i un par de aznos. I eya lo trusho en kaza de su padre; i vyendolo el padre de la mosa, se alegro de resivirlo. ⁴I lo detuvo su suegro, padre dela mosa i estuvo kon el tres dias; i komyeron, i bevyeron, i repozaron ayi. ⁵I fue al kuarto dia, kuando madrugaron por la manyana, el se levanto para irse; i el padre de la mosa disho a su yerno: konforta tu korason kon un bokado de pan, i despues vos iresh. ⁶I se asentaron, i komyeron i bevyeron eyos dos djuntos; i el padre de la mosa disho al varon: te rogo, envelunta, i kedate esta noche, i se alegre tu korason. ⁷Ma el varon se levanto para irse; i su suegro porfio kon el, i se torno, i kedo ayi akeya noche. ⁸I al kinto dia madrugo por la manyana para irse; i el padre de la mosa disho: te rogo, konforta tu korason. I se detuvyeron asta despues de medyo dia, i komyeron ambos eyos. ⁹I el varon se levanto para irse, el, i su donzeya, i su moso; i su suegro, padre de la mosa, le disho: ek, agora el dia esta azyendose tarde, te rogo ke vos estesh la noche; ek, el dia se akava, kedate aki esta noche, i se alegre tu korason, i manyana vos levantaresh temprano a vuestro kamino, i andaras a tu tyenda. ¹⁰Ma el varon no kijo kedar la noche, sino ke se levanto, i partyo, i vino asta enfrente de Yevus, ke es Yerushalayim; i tenia kon el el par de aznos sinchados, i su donzeya estava kon el. ¹¹Estando eyos serka de Yevus, el dia avia abashado mucho; i disho el moso a su senyor: ven agora, i nos ayegeremos a esta sivdad de los Yevusios i pasaremos la noche en eya. ¹²I su senyor le disho: no nos ayegaremos a ninguna sivdad de estranyo, ke no sea de los ijos de Yisrael, sino ke pasaremos asta Giva. ¹³I disho a su moso: ven, i nos ayegemos a uno de estos lugares, i pasaremos la noche en Giva o en Rama. ¹⁴I pasaron i anduvyeron, i se les puzo el sol djunto a Giva, ke es de Binyamin. ¹⁵I se ayegaron ayi para entrar a pasar la noche en Giva; i entro, i se asento en la plasa de la sivdad, i no uvo kyen los resivyera en kaza para pasar la noche. ¹⁶I ek, un ombre vyejo venia a la tarde del kampo de su travajo, el kual era varon del monte de Efrayim, i pelegrinava en Giva; ma los varones del lugar eran de los ijos de Binyamin. ¹⁷I alsando sus ojos, vido al varon viajante en la plasa de la sivdad; i el ombre vyejo le disho: ¿onde vas, i de onde vyenes?. ¹⁸I el le disho: estamos pasando de Bet-Lehem de Ye’huda asta los lados del monte de Efrayim; de ayi yo soy, i anduvi asta Bet-Lehem de Ye’huda, i agora me voy a la kaza de A’, i no ay kyen me resiva en kaza. ¹⁹I tambyen tengo paja i sevada para nuestros aznos, i tambyen tengo pan i vino para mi i para tu syerva, i para el moso ke esta kon tus syervos; no ay falta de nada. ²⁰I el ombre vyejo disho: paz a ti; de syerto toda tu falta sea sovre mi; solamente no pases la noche en la plasa ²¹i lo trusho a su kaza, i dyo a komer a los aznos; i lavaron sus pyes, i komyeron i bevyeron. ²²Estando eyos alegrando su korason, ek, varones de la sivdad, varones [1]muy malos, rodearon la kaza, batyendo la puerta; i avlaron al ombre vyejo, patron de la kaza, dizyendo: saka al varon ke vino a tu kaza, para ke lo konoskamos. ²³I salyo a eyos el ombre, patron de la kaza, i les disho: no, mis ermanos; vos rogo ke no agash mal; syendo ke este varon vino a mi kaza, no agash esta vileza. ²⁴Ek mi ija eskosa, i su donzeya, yo las sakare agora, i afriildas, i azed kon eyas lo ke plaze en vuestros ojos; ma a este varon no agash esta vil koza. ²⁵Ma los varones no lo kijyeron oir; i el varon travo de su donzeya, i se la sako afuera. I eyos la konosyeron, i abuzaron de eya toda la noche asta la manyana; i la soltaron kuando suvia la manyana. ²⁶I vino la mujer kuando amanesia, i kayo a la puerta de la kaza del varon onde su senyor estava, asta ke fue klaro. ²⁷I su senyor se levanto de manyana, i avryo las puertas de la kaza, i salyo para ir a su kamino; i ek la mujer, su donzeya , estava kaida a la puerta de la kaza kon sus manos sovre el umbral. ²⁸I el le disho: levantate, i vamos. Ma eya no repondyo, i el la tomo sovre el azno, i se levanto el varon, i se fue a su lugar. ²⁹I kuando vino a su kaza, tomo un kuchiyo, i travo de su donzeya, i la despedaso por sus guesos en dodje partes, i la enbio por todo el termino de Yisrael. ³⁰I era, ke todo el ke veiya akeyo, dizia: nunka fue echa ni vista tal koza dezde el dia ke los ijos de Yisrael suvyeron de la tyerra de Ayifto asta oy; pensad byen sovre esto, akonsejadvos, i avlad.

[1] Ebreo: ijos de Beliyaal

20

¹Entonses salyeron todos los ijos de Yisrael, i se adjunto la kompanya komo un varon, dezde Dan asta Beer-Sheva, kon la tyerra de Gilad, a A’ en Mitspa. ²I los prinsipes de todo el puevlo, de todos los trivos de Yisrael, se pararon en la kompanya del puevlo del Dyo, kuatrosyentos mil varones a pye ke desvaynavan espada.

³I los ijos de Binyamin oyeron ke los ijos de Yisrael avian suvido a Mitspa. I disheron los ijos de Yisrael: dizid komo fue esta maldad. ⁴I el varon Levita, marido de la mujer matada, respondyo i disho: yo vine a Giva, ke es de Binyamin, kon mi donzeya, para pasar la noche. ⁵I se levantaron kontra mi los moradores de Giva, i rodearon sovre mi la kaza de noche; i pensaron de matarme, i afriiron a mi donzeya de modo ke muryo. ⁶I travi de mi donzeya, i la despedasi, i la enbii por todo el paiz de la eredad de Yisrael, por kuanto izyeron malechuria i vileza en Yisrael. ⁷Ek, todos vozotros sosh ijos de Yisrael, dad aki vuestra respuesta i konsejo. ⁸I todo el puevlo se levanto komo un varon, dizyendo: ninguno de nozotros andara a su tyenda, ni ninguno de nozotros se ayegara a su kaza: ⁹ma agora esta sera la koza ke aremos a Giva: suviremos kontra eya por suerte, ¹⁰I tomaremos dyez varones de kada syento de todos los trivos de Yisrael, i syento de kada mil, i mil de kada milarya, para tomar vianda para el puevlo, para ke agan en su venida a Giva de Binyamin segun todo la vileza ke izo en Yisrael. ¹¹I se adjuntaron todos los varones de Yisrael kontra la sivdad, djuntos komo un varon.

¹²I los trivos de Yisrael enbiaron varones por todo el trivo de Binyamin, dizyendo: ¿ke maldad es esta ke fue echa entre vozotros? ¹³Agora pues entregad los varones [1]muy malos ke estan en Giva, para ke los matemos, i eskumbremos el mal de Yisrael. Ma los ijos de Binyamin no kijyeron oir la boz de sus ermanos los ijos de Yisrael: ¹⁴sino ke los ijos de Binyamin se adjuntaron de las sivdades a Giva, para salir a pelear kontra los ijos de Yisrael. ¹⁵I en akel dia fueron kontados los ijos de Binyamin de las sivdades, vente i sesh mil varones ke desvaynavan espada, afuera de los moradores de Giva, ke fueron kontados syetesyentos varones eskojidos. ¹⁶De todo este puevlo avia syetesyentos varones eskojidos ke eran [2]izkyerderos; todos estos tiravan una pyedra kon la funda a un kaveyo, i no yerravan. ¹⁷I fueron kontados los varones de Yisrael afuera de Binyamin, kuatrosyentos mil varones ke desvaynavan espada; todos estos varones de gerra. ¹⁸I los ijos de Yisrael se levantaron, i suvyeron a Bet-El, i demandaron al Dyo, i disheron: ¿kyen suvira de nozotros el primero para pelear kontra los ijos de Binyamin? I disho A’: Ye’huda suvira primero. ¹⁹I los ijos de Yisrael se levantaron de manyana, i pozaron kontra Giva. ²⁰I salyeron los varones de Yisrael para pelear kontra Binyamin; i los varones de Yisrael ordenaron la batalya kontra eyos serka de Giva. ²¹I los ijos de Binyamin salyeron de Giva, i en akel dia echaron a tyerra vente i dos mil varones de Yisrael. ²²I el puevlo, los varones de Yisrael, se esforsaron, i tornaron a ordenar la batalya en el lugar onde la avian ordenado en el primer dia. ²³I los ijos de Yisrael suvyeron, i yoraron delante de A’ asta la tarde, i demandaron a A’, dizyendo ¿andare otra vez a pelear kontra los ijos de Binyamin mi ermano? I disho A’: suvid kontra el.

²⁴I los ijos de Yisrael se aserkaron a los ijos de Binyamin en el dia segundo. ²⁵I Binyamin salyo de Giva kontra eyos en el dia segundo, i echaron a tyerra otros dyez i ocho mil varones de los ijos de Yisrael; todos estos desvaynavan espada. ²⁶Entonses suvyeron todos los ijos de Yisrael, i todo el puevlo, i vinyeron a Bet-El, i yoraron , i se asentaron ayi delante de A’, i ayunaron akel dia asta la tarde; i alsaron alsasyones i sakrifisyos de pases delante de A’. ²⁷I los ijos de Yisrael demandaron a A’ (porke el arka del firmamyento del Dyo estava ayi en akeyos dias: ²⁸i Pinhas, ijo de Elazar, ijo de A’haron, estava delante de el en akeyos dias,) dizyendo: ¿saldre aun otra vez a pelear kontra los ijos de Binyamin mi ermano, o me vedare? I disho A’: suvid; porke manyana lo entregare en tu mano. ²⁹I Yisrael puzo aseladadores al derredor de Giva.

³⁰I los ijos de Yisrael suvyeron kontra los ijos de Binyamin en el dia tersero, i se ordenaron kontra Giva, komo las otras vezes. ³¹I salyeron los ijos de Binyamin kontra el puevlo, i se arrankaron de la sivdad; i empesaron a erir algunos del puevlo, matando komo las otras vezes, en las kalsadas, una de las kuales suve a Bet-El, i la otra a Giva en el kampo, i mataron komo trenta varones de Yisrael. ³²I los ijos de Binyamin disheron: vensidos son delante de nozotros komo antes; ma los ijos de Yisrael disheron: fuygamos, i los arrankemos de la sivdad a las kalsadas. ³³I todos los varones de Yisrael se levantaron de su lugar, i se ordenaron en Baal-Tamar; i los aseladadores de Yisrael salyeron de su lugar, del prado de Giva. ³⁴I vinyeron kontra Giva dyez mil varones eskojidos de todo Yisrael, i la batalya se apezgo; ma eyos no savian ke el mal se aserkava sovre eyos.

³⁵I iryo A’ a Binyamin delante de Yisrael; i mataron los ijos de Yisrael en akel dia vente i sinko mil i syen varones de Binyamin; todos estos desvaynavan espada. ³⁶I vyeron los ijos de Binyamin ke eran vensidos; i los varones de Yisrael dyeron lugar a Binyamin, porke se enfiguzyaron en los aseladadores ke avian puesto djunto a Giva. ³⁷I los aseladadores se apresuraron, i se arrojaron kontra Giva; i los aseladadores se sontrusheron, i iryeron a toda la sivdad a tajo de espada. ³⁸I los varones de Yisrael tenian kon los aseladadores un tyempo taksado, ke izyeron suvir una flama grande kon umo de la sivdad. ³⁹I ansi los varones de Yisrael bolvyeron las espaldas en la batalya, i Binyamin empeso a erir i matar de los varones de Yisrael komo trenta varones; porke dizian: syertamente vensidos, vensidos son delante de nozotros, komo en la primera batalya. ⁴⁰Ma kuando la flama empeso a suvir de la sivdad kon un pilar de umo, Binyamin miro detras de si, i ek, el fuego de la sivdad suvia a los syelos. ⁴¹I los varones de Yisrael se tornaron, i los varones de Binyamin se turvaron; porke vyeron ke el mal avia vinido sovre eyos. ⁴²I bolvyeron las espaldas delante de los varones de Yisrael al kamino del dizyerto, ma la batalya los alkanso; i los ke salyeron de las sivdades los destruian en medyo de eyos. ⁴³Ansi reodearon a los de Binyamin, i los persigyeron, i kon repozo los pizaron asta enfrente de Giva, onde esklarese el sol. ⁴⁴I kayeron de Binyamin dyez i ocho mil varones, todos estos varones vayentes. ⁴⁵I se bolvyeron i fuyeron al dizyerto a la penya de Rimon; i rebushkaron de eyos en las kalsadas sinko mil varones; i persigyeron detras de eyos asta Gidom, i iryeron de eyos otros dos mil varones, ⁴⁶I todos los ke kayeron de Binyamin en akel dia fueron vente i sinko mil varones ke desvaynavan espada, todos estos varones vayentes. ⁴⁷I seshsyentos varones se bolvyeron i fuyeron al dizyerto, a la penya de Rimon, i estuvyeron en la penya de Rimon kuatro mezes. ⁴⁸I los varones de Yisrael tornaron a los ijos de Binyamin, i los iryeron a tajo de espada, tanto los ombres de la sivdad komo las kuatropeas, kon todo lo ke se topava; tambyen puzyeron fuego a todas las sivdades ke se topavan.

[1] Ebreo: ijos de Beliyaal

[2] Ebreo: serrador de su mano derecha

21

¹I los varones de Yisrael avian djurado en Mitspa, dizyendo: ninguno de nozotros dara su ija a los de Binyamin por mujer. ²I vino el puevlo de Bet-El, i estuvyeron ayi asta la tarde delante del Dyo; i alsaron su boz, i yoraron kon gran yanto. ³I disheron: ¡o A’ Dyo de Yisrael! ¿por ke akontesyo esto en Yisrael, ke falte oy en Yisrael un trivo? ⁴I fue ke al otro dia, madrugaron el puevlo, i fraguaron ayi ara, i alsaron alsasyones i sakrifisyos de pases..

⁵I disheron los ijos de Yisrael: ¿kyen ay de todos los trivos de Yisrael ke no suvyo en la kompanya a A’? Porke se avia echo gran djurasyon kontra el ke no suvyese a A’ a Mitspa, dizyendo: matar sera matado. ⁶I los ijos de Yisrael se arrepentyeron por kavza de Binyamin su ermano, i disheron: un trivo es kortado oy de Yisrael. ⁷¿Ke aremos por mujeres para los ke kedaron, syendo ke nozotros djurimos por A’ de no darles de nuestra ijas por mujeres? ⁸I disheron: ¿kyen es akel de los trivos de Yisrael ke no suvyo a A’ a Mitspa? I ek, ninguno avia vinido de Yavesh-Gilad al real a la kompanya. ⁹I el puevlo fue kontado, i ek, no uvo ayi ninguno de los moradores de Yavesh-Gilad. ¹⁰I la kompanya enbiaron ayi dodje mil varones de los vayentes, i les enkomendaron, dizyendo: andad i erir a tajo de espada a los moradores de Yavesh-Gilad, i las mujeres, i los ninyos. ¹¹I esta es la koza ke aresh: a todo macho, i a toda mujer ke uvyere konosido yazedura de macho, destruiresh. ¹²I ayaron de los moradores de Yavesh-Gilad kuatrosyentas mosas eskosas ke no avian konosido varon por yazedura de macho; i las trusheron al real en Shilo, ke es en la tyerra de Kenaan.

¹³I toda la kompanya enbiaron a avlar a los ijos de Binyamin ke estavan en la penya de Rimon, i les apregonaron paz. ¹⁴I en akel tyempo los de Binyamin tornaron; i les dyeron las mujeres ke avian abidiguado de las mujeres deYavesh-Gilad; ma no los bastaron estas. ¹⁵I el puevlo se arrepentyo por kavza de Binyamin; porke A’ avia echo portiyo en los trivos de Yisrael.

¹⁶I los vyejes de la kompanya disheron: ¿ke aremos por mujeres para los ke kedaron, syendo ke las mujeres an sido destruidas de Binyamin? ¹⁷I disheron: kale ke ayga eredad a los ke eskaparon de Binyamin, para ke no sea arrematado un trivo de Yisrael. ¹⁸Ma nozotros no podemos darles mujers de nuestras ijas; porke los ijos de Yisrael djuraron, dizyendo: maldicho sea el ke dyere mujer a Binyain. ¹⁹I disheron: ek, ay fyesta de A’ en Shilo kada anyo, en un lugar ke es al norte de Bet-El, al lado oryental de la kalsada ke suve de Bet-El a Shehem, i al sud de Levona. ²⁰I enkomendaron a los ijos de Binyamin, dizyendo: andad, i aseladad en las vinyas: ²¹i mirad, i ek, kuando salyeren las ijas de Shilo a baylar en dansas entonses saldresh de las vinyas, i arrevataresh para vozotros kada uno su mujer de las ijas de Shilo, i vos iresh a la tyerra de Binyamin. ²²I sera, ke kuando vinyeron sus padres o sus ermanos a kesharse a nozotros les diremos: tened piadad de eyos por amor de nozotros, porke no tomimos kada uno su mujer en la gerra; porke vozotros no se las avesh dado para ke agora seash kulpozos. ²³I los ijos de Binyamin izyeron ansi, i tomaron segun su numero, de las ke baylavan a las kuales eyos rovaron; i se fueron i se tornaron a su eredad, i farguaron las sivdades, i moraron en eyas. ²⁴I en akel tyempo los ijos de Yisrael se fueron de ayi kada uno a su trivo i a su linaje, i salyeron de ayi kada uno a su eredad. ²⁵En akeyos dias no avia rey en Yisrael, kada uno azia lo derecho en su ojo.

Ver todos los capítulos publicados en esta sección

 ————————————————————————

About Yehuda Sidi

I was born in 1953 in Tekirdag, Turkey and grew up in Canakkale. My father Hayim Sidi served as rabbi in both Tekirdag and Cannakale. Yehuda immigrated to Israel at 1971 and has been living in Israel since then. I am a softwere engineer. I am neither a Ladino nor a Tanach scholar. Actually I have very basic knowlede in Judeo Espanyol.

A year ago I looked for a Ladino Tanach in latin characters, and eventually I ended transcribing the Ladino Tanach which was published bt the Protestant missionaries who were vet active in the Speharadic world in the 19th century. This Tanach (and other books) were very popular with the Sepharadic Jews. This Tanach was published in two volumes.

So far I have transcribed the Tora. I am now in the process of transcribing the rest of the first volume which covers Ye’hoshua, Shoftim, Shemuel Alef, Shemuel Bet, Melachim Alef and Melachim Bet. I hope to complete the transcription in a few months.

The transcription was not reviewed by the Ladino scholars. Please report the errors that you find.