Sefer Tora en Djudeo Espanyol – Transkrivida kon letras latinas del livro por Ye’huda Sidi / SHOFTIM (11-15)

Ver todos los capítulos publicados en esta sección

Sefer TORA NEVIIM UKETUVIM
El livro de la Ley, los Profetas, las Eskrituras
Trazladado en la lingua Espanyola
Estamperea de A. ‘H. Boyadjian
Konstantatinopla 1873

Transkrivido por Ye’huda Sidi. Febrero 2015

SHOFTIM

11

¹I Yiftah el Giladita era barragan vayente, i el era ijo de una mujer eskarada; i endjentro Gilad a Yiftah. ²I la mujer de Gilad le paryo ijos; i kuando los ijos de la mujer se engrandesyeron, echaron afuera a Yiftah, i le disheron: no eredaras en la kaza de nuestro padre, porke eres ijo de otra mujer. ³I fuyo a kavza de sus ermanos, i moro en la tyerra de Tov; i se akojyeron a Yiftah varones vanos, i salian kon el.

⁴I akontesyo, ke despues de algunos dias los ijos de Amon pelearon kon Yisrael. ⁵I fue, ke komo los ijos de Amon pelearon kon Yisrael, los vyejos de Gilad anduvyeron para tomar a Yiftah de la tyerra de Tov. ⁶I disheron a Yiftah: ven, i seras nuestro kapitan, para ke peleamos kon los ijos de Amon. ⁷I disho Yiftah a los vyejos de Gilad: ¿no me aborresistesh vozotros, i me echastesh de la kaza de mi padre? ¿i por ke venish a mi kuando estash en angustya? ⁸I los vyejos de Gilad disheron a Yiftah: por esto tornamos agora a ti, para ke vengas kon nozotros, i peleas kon los ijos de Amon, i nos seas por kavesera a todos los moradores de Gilad. ⁹I disho Yiftah a los vyejos de Gilad: si me tornash para pelear kon los ijos de Amon, i A’ los entregare delante de mi, ¿sere yo vuestra kavesera? ¹⁰I los vyejos de Gilad disheron a Yiftah: A’ oyga entre nozotros, si no te izyeremos segun tu palavra. ¹¹Entonses Yiftah anduvo kon los vyejos de Gilad, i el puevlo lo puzyeron sovre si por kavesera i por kapitan. I Yiftah avlo todas sus palavra delante de A’ en Mitspa.

¹²I enbio Yiftah mensajeros al rey de los ijos de Amon dizyendo: ¿ke tyenes tu konmigo, ke viniste a mi para pelear en mi tyerra? ¹³I el rey de los ijos de Amon disho a los mensajeros de Yiftah: por lo ke Yisrael tomo mi tyerra kuando suvyo de Ayifto, dezde Arnon asta al Yabok, i asta el Yarden; i agora torna akeyas tyerras en paz. ¹⁴I Yiftah enbio de nuevo mensajeros al rey de los ijos de Amon, ¹⁵i le disho: ansi dize Yiftah: Yisrael no tomo tyerra de Moav, ni tyerra de los ijos de Amon. ¹⁶Ma suvyendo Yisrael de Ayifto, anduvo por dizyerto asta el mar ruvyo, i vino a Kadesh.¹⁷I enbio Yisrael mensajeros al rey de Edom, dizyendo: te rogo ke yo pase por tu tyerra; ma el rey de Edom no eskucho. I enbio tambyen al rey de Moav; i el no kijo. I Yisrael se kedo en Kadesh. ¹⁸I anduvo por el dizyerto, i rodeo la tyerra de Edom, i la tyerra de Moav, i vino por el lado oryental de la tyerra de Moav, i pozaron de la otra parte de Arnon, i no entraron adyentro del termino de Moav; porke Arnon es termino de Moav. ¹⁹I enbio Yisrael mensajeros a Sihon, rey de los Emorios, rey de Heshbon; i Yisrael le disho: te rogamos ke pasemos por tu tyerra asta mi lugar. ²⁰Ma Sihon no se fio de Yisrael para desharlo pasar por su termino, sino ke Sihon adjunto a todo su puevlo, i pozaron en Ya’hats, i peleo kon Yisrael. ²¹Ma A’ el Dyo de Yisrael entrego a Sihon i a todo su puevlo en mano de Yisrael, i los iryo. I Yisrael tomo en posesyon toda la tyerra del Emorio, ke morava en akeya tyerra. ²²I tomaron en posesyon todo el termino del Emorio, dezde Arnon asta Yabok, i dezde el dizyerto asta el Yarden. ²³Ansi ke A’ el Dyo de Yisrael desterro a los Emorios de delante de su puevlo Yisrael; ²⁴¿I tu lo eredaras? lo ke Kemosh tu dyo te dyere a eredar, ¿no lo eredaras? Ansi eredaremos nozotros a todo akel ke desterro A’ nuestro Dyo de delante de nozotros. ²⁵I agora, ¿eres tu mejor, ke Balak, ijo de Tsipor, rey de Moav? ¿barajar barajo el kon Yisrael? ¿pelear peleo kon eyos? ²⁶En lo ke Yisrael morava en Heshbon i en sus aldeas, i en Aroer i en sus aldeas, i en todas las sivdades ke estan al lado de los terminos de Arnon, por tressyentos anyos, ¿porke no las rekovrastesh en akel tyempo? ²⁷Ansi ke yo no peki kontra ti, ma tu azes mal konmigo peleando kontra mi. A’ ke es el djuez, djuzge oy entre los ijos de Yisrael i los ijos de Amon. ²⁸Ma el rey de los ijos de Amon no eskucho a las palavras de Yiftah ke le enbio.

²⁹I el espirito de A’ fue sovre Yiftah, i paso a Gilad i a Menashe, i paso a Mitspe de Gilad, i de Mitspe de Gilad paso a los ijos de Amon. ³⁰I Yiftah prometyo promesa a A’, i disho: si entregar entregares a los ijos de Amon en mi mano, ³¹sera ke [1]kualkyera ke salyere de las puertas de mi kaza para resivirme kuando yo tornare en paz de los ijos de Amon sera para A’, i lo alsare por alsasyon.

³²I paso Yiftah a los ijos de Amon para pelear kon eyos, i A’ los entrego en su mano. ³³I los iryo de erida muy grande dezde Aroer asta la entrada de Minit, vente sivdades, i asta Avel-Keramim. I fueron sodjiftados los ijos de Amon delante de los ijos de Yisrael.

³⁴I vino Yiftah a Mitspa a su kaza, i ek, su ija salyo a resivirlo kon panderos i kon bayles; i eya era su unika; afuera de eya no tenia ijo ni ija. ³⁵I fue, ke kuando la vido, razgo sus vestidos, i disho: ¡guay, ija mia! konturvar me konturvaste, i tu eres de los ke me konturvan; porke yo avri mi boka a A’, i no puedo tornar. ³⁶I eya le disho: padre mio, si avriste tu boka a A’, az a mi komo salyo de tu boka, pues ke A’ te izo vengansa de tus enemigos, de los ijos de Amon. ³⁷I disho a su padre: agase a mi esta koza; deshame dos mezes, para ke vaya i desyenda sovre los montes, i yorare por mi eskosidad, yo i mis kompanyeras. ³⁸I el disho: va, i la enbio dos mezes. I eya fue kon sus kompanyeras, i yoro por su eskosidad sovre los montes. ³⁹I fue, ke al kavo de dos mezes, torno a su padre; i izo kon eya segun su promesa ke prometyo. I eya no konosyo varon. I fue kostumbre en Yisrael, ⁴⁰ke de anyo en anyo ivan las ijas de Yisrael para endechar a la ija de Yiftah el Giladita kuatro dias en al anyo.

[1] Ebreo: el salyen

12

¹I se adjuntaron los varones de Efrayim, i pasaron al norte, i disheron a Yiftah: ¿por ke pasaste a pelear kon los ijos de Amon, i no nos yamaste para ir kontigo? kemaremos tu kaza sovre ti kon fuego. ²I Yiftah les disho: yo i mi puevlo tuvimos un gran pleyto kon los ijos de Amon; i esklami a vozotros i no me salvastesh de su mano. ³I vyendo ke tu no me salvavas, puzi mi alma en palma, i pasi kontra los ijos de Amon, i A’ los entrego en mi mano. ¿I por ke suvistesh a mi oy para pelear konmigo? ⁴I adjunto Yiftah a todos los varones de Gilad, i peleo kon Efrayim; i los varones de Gilad iryeron a Efrayim; porke avian dicho: eskapadijos de Efrayim sosh vozotros, Gilad tanto entre Efrayim komo entre Menashe. ⁵I los Giladitas prendyeron los pasajes del Yarden antes de los de Efrayim; i era, ke kuando los eskapadijos de Efrayim dizian: ¿pasare? los varones de Gilad dizian ¿eres tu Efrateo? Si el dizia, no; ⁶entonses le dizian: di agora «shibolet», i el dizia «sibolet»; porke no asertava de avlar ansi. Entonses lo travavan, i lo degoyavan a los pasajes del Yarden. I en akel tyempo kayeron de los de Efrayim kuarenta i dos mil. ⁷I Yiftah djuzgo a Yisrael sesh anyos. I muryo Yiftah el Giladita, i fue enterrado en las sivdades de Gilad.

⁸I despues de el djuzgo a Yisrael Ivtsan de Bet-Lehem. ⁹I tuvo trenta ijos, i trenta ijas ke enbio afuera; i trusho de afuera trenta ijas para sus ijos. I djuzgo a Yisrael syete anyos. ¹⁰I muryo Ivtsan, i fue enterrado en Bet-Lehem.

¹¹I despues de el djuzgo a Yisrael Elon el Zevulunita; i djuzgo a Yisrael dyez anyos. ¹²I muryo Elon del Zevulounita, i fue enterrado en Elon en la tyerra de Zevulun.

¹³I despues de el djuzgo a Yisrael, Avdon, ijo de ‘Hilel el Piratonita. ¹⁴I tuvo kuarenta ijos i trenta inyetos, ke kavayavan sovre setenta borrikos; i djuzgo a Yisrael ocho anyos. ¹⁵I muryo Avdon, ijo de ‘Hilel, el Piratonita, i fue enterrado en Piraton en la tyerra de Efrayim, en el monte de Amalek.

13

¹I los ijos de Yisrael tornaron a azer lo malo en ojos de A’, i A’ los entrego en mano de los Pelishtios kuarenta anyos..

²I avia un varon de Tsora del linaje de los Danitas, i su nombre Manoah; i su mujer era manyera, i no paria. ³I el andjel de A’ se aparesyo a la mujer, i le disho: ek agora, tu eres manyera, i no pariste; ma te ensintaras i pariras un ijo. ⁴I agora guardate, te rogo, ke no bevas vino ni sidra ni komas ninguna koza enkonada. ⁵Porke, ek, te ensintaras i pariras un ijo; i no suvira navaja sovre su kavesa; porke el muchacho sera nezirio del Dyo dezde el vyentre; i el empesara a salvar a Yisrael de mano de los Pelishtios. ⁶I la mujer vino, i lo konto a su marido, dizyendo: un varon del Dyo vino a mi, i su vista era komo de un andjel del Dyo, muy temeroza; ma no le pregunti de onde era, ni el me disho su nombre. ⁷I me disho: ek, te ensintaras, i pariras un ijo; i agora no bevas vino ni sidra, ni komas ninguna koza enkonada; porke el muchacho sera nezirio del Dyo dezde el vyentre asta el dia de su muerte.

⁸I Manoah izo orasyon a A’, i disho: te rogo, Adonay, ke al varon del Dyo ke enbiaste venga otra vez a nozotros, i nos mostre lo ke tenemos ke azer kon el muchacho ke a de naser. ⁹I el Dyo oyo la boz de Manoah, i el andjel del Dyo vino otra vez a la mujer estando eya en el kampo; ma su marido Manoah no estava kon eya. ¹⁰I la mujer se apresuro, i korryo, i avizo a su marido i le disho: ek, me se aparesyo el varon ke vino a mi el otro dia. ¹¹I Manoah se levanto, i anduvo detras de su mujer; i vino al varon, i le disho: ¿eres tu el varon ke avlaste a la mujer? I el disho: yo soy. ¹²I Manoah disho: agora kumplase tu palavra. ¿ke sera el orden del muchacho? ¿i ke sera su echo? ¹³I el andjel de A’ disho a Manoah: de todo lo ke yo dishe a la mujer, ke se guarde, ¹⁴no koma eya de todo lo ke sale de vid de vino, ni beva vino ni sidra, ni koma ninguna koza enkonada; ke guarde todo lo ke le enkomendi. ¹⁵I Manoah disho al andjel de A’: te rogo ke te detengamos, i pondremos delante de ti un kavrito de las kavras. ¹⁶I el andjel de A’ disho a Manoah: aunke me detengas, no komere de tu pan; ma si izyeres alsasyon, alsala a A’, Porke Manoah no savia ke el era andjel de A’. ¹⁷I disho Manoah al andjel de A’: ¿ke es tu nombre, para ke kuando se afirmare tu palavra, te onremos? ¹⁸I el andjel de A’ le disho: ¿por ke preguntas ansi por mi nombre, syendo ke es maraviyozo? ¹⁹I Manoah tomo un kavrito de las kavras, i un prezente, i lo also sovre una penya a A’. I el andjel izo maraviya, i Manoah i su mujer miravan. ²⁰I akontesyo, ke kuando la flama suvia de sovre el ara a los syelos, el andjel de A’ suvyo en la flama del ara. I Manoah i su mujer vyendolo, se echaron sovre sus fases a tyerra. ²¹I el andjel de A’ no se aparesyo mas a Manoah ni a su mujer. Entonses entyendo Manoah ke era andjel de A’. ²²I disho Manoah a su mujer: murir muriremos porke vimos al Dyo. ²³I su mujer le disho: si A’ enveluntara de matarnos, no uvyera tomado de nuestras manos alsasyon i prezente, ni nos uvyera mostrado todas estas kozas, ni en tal tyempo nos uvyera dado a entender koza komo esta. ²⁴I la mujer paryo un ijo, i yamo su nombre Shimshon. I el muchacho se engrandesyo, i A’ lo bendisho. ²⁵I el espirito de A’ empeso a despertarlo en el real de Dan entre Tsora i Eshtaol.

14

¹I desendyo Shimshon a Timnat, i vido en Timnat una mujer de las ijas de los Pelishtios. ²I suvyo, i lo konto a su padre i a su madre, i disho: yo vide en Timnat una mujer de las ijas de los Pelishtios; i agora tomadmela por mujer. ³I su padre i su madre le disheron: ¿no ay mujer entre las ijas de tus ermanos, ni en todo mi peuevlo, ke vayas a tomar mujer de los Pelishtios serrados? I disho Shimshon a su padre: tomamela; porke eya agrado en mis ojos. ⁴Ma su padre i su madre no savian ke esto era de A’, i ke bushkava achake kontra los Pelishtios; porke en akel tyempo los Pelishtios podestavan sovre Yisrael.

⁵I Shimshon desendyo kon su padre i su madre a Timnat; i kuando vinyeron asta las vinyas de Timnat, ek, un kachorro de leon venia bramando a su enkuentro. ⁶I el espirito de A’ paso sovre el, i lo despedaso komo se despedasa un kavrito, sin tener nada en su mano. I no konto a su padre ni a su madre lo ke avia echo. ⁷I desendyo, i avlo a la mujer; i eya agrado en ojos de Shimshon.

⁸I despues de algunos dias torno para tomarla, i se ayego para ver la kalavrina del leon; i ek, avia en la kalavrina del leon un apanyamyento de abizbas, i myel. ⁹I la tomo en sus palmas, i se fue andando i komyendo; i vino a su padre i a su madre, i dyo a eyos, i komyeron; ma no les konto ke avia tomado la myel del kuerpo de leon.

¹⁰I desendyo su padre a la mujer; i Shimshon izo ayi konbite; porke ansi azian los mansevos. ¹¹I fue, ke komo lo vyeron, tomaron trenta kompanyeros ke estuvyeran kon el. ¹²I Shimshon les disho: vos propondre agora un enigma; si deklarar me los deklararesh en los syete dias del konbite, i lo deskuvryeresh, yo vos dare trenta savanas, i trenta modas de vestidos. ¹³Ma si no me lo podyeresh deklarar, vozotros me daresh trenta savanas, i trenta modas de vestidos. I le disheron: propon tu enigma, i lo oiremos. ¹⁴I les disho: del komedor salyo komida, i del fuerte salyo dulsura, I no pudyeron deklarar el enigma en tres dias. ¹⁵I fue ke al dia seteno, disheron a la mujer de Shimshon: sombaye a tu marido a ke nos deklarare el enigma, no sea ke te kemamos a ti i a la kaza de tu padre kon fuego. ¹⁶¿Nos yamastesh aki para espojarnos? ¹⁶I yoro la mujer de Shimshon delante de el, i disho: por syerto me aborreses, i no me amas.; propoziste un enigma a los ijos de mi puevlo, i no me lo deklaraste. I el le disho: ek, ni a mi padre ni a mi madre lo deklari, ¿i lo tengo ke deklarar a ti? ¹⁷I eya yoro delante de el los syete dias ke tuvyeron el konbite; i fue ke al dia seteno, se lo deklaro, porke lo apreto; i eya deklaro el enigma a los ijos de su puevlo. ¹⁸I al dia seteno, antes ke el sol puzyera, los varones de la sivdad le disheron: ¿ke ay mas dulse ke la myel? ¿i ke ay mas fuerte ke el leon? I el les disho: si no uvyerash arado kon mi bezerra, no uvyerash deskuvyerto mi engima. ¹⁹I el espirito de A’ paso sovre el, i desendyo a Ashkelon, i iryo trenta varones de eyos, i tomo sus espojos, i dyo las modas de vestidos a los ke avian deklarado el enigma. I se ensendyo su fulor, i suvyo a la kaza de su padre. ²⁰I la mujer de Shimshon fue dada a su kompanyero, ke lo akompanyava.

15

¹I akontesyo despues de algunos dias, ke en el tyempo de la segada del trigo, Shimshon vijito a su mujer kon un kavrito de las kavras, i disho: entrare a mi mujer a la kamara. Ma el padre de eya no lo desho entrar. ²I disho el padre de eya: dizir yo dishe ke aborreser la aborresias, i la di a tu kompanyero; ma su ermana menor, ¿no es mas ermoza ke eya? tomala pues en su lugar. ³I Shimshon les disho: yo sere sin kulpa esta vez de los Pelishtios, si mal les izyere. ⁴I Shimshon se fue, i aferro tressytentas rapozas; i tomo tizones, i bolto kola a kola, i puzo un tizon en medyo entre las dos kolas. ⁵I ensendyo los tizones i solto las rapozas en las myeses de los Pelishtios i kemo tanto fasinas komo myeses, i vinyas i olivaras. ⁶I disheron los Pelishtios: ¿kyen izo esto? i respondyeron: Shimshon, yerno del Timnita, porke le tomo su mujer, i la dyo a su kompanyero. I suvyeron los Pelishtios, i kemaron en fuego a eya i a su padre. ⁷I Shimshon les disho: aunke izistesh esto, kon todo yo me vengare de vozotros, i despues me vedare. ⁸I los iryo pyerna sovre anka kon grande erida; i desendyo i estuvo en el reskisyo de la penya de Etam.

⁹I los Pelishtios suvyeron, i pozaron en Ye’huda, i se estendyeron en Lehi. ¹⁰I los varones de Ye’huda disheron: ¿por ke suvistesh kontra nozotros? i eyos disheron: para atar a Shimshon suvimos, para azer a el komo el izo a nozotros. ¹¹I desendyeron tres mil varones de Ye’huda al reskisyo de la penya de Etam, i disheron a Shimshon: ¿no saves ke los Pelishtios podestan sovre nozotros? ¿ke es esto ke nos iziste? I el les disho: komo izyeron a mi, ansi ize a eyos. ¹²I le disheron: desendimos para atarte, para entregarte en mano de los Pelishtios. I Shimshon les disho: djuradme ke no me atakaresh vozotros. ¹³I le respondyeron, dizyendo: no; solamente atar te ataremos, i te entregamos en su mano, ma matar no te mataremos. I lo ataron kon dos kuerdas nuevas, i lo izyeron suvir de la penya. ¹⁴I komo el vino asta Lehi, los Pelishtios salyeron a enkontrarlo kon aulasyon; i el espirito de A’ paso sovre el, i las kuerdas ke estavan sovre sus brasos fueron komo lino ke esta kemado kon fuego, i sus atadores se [1]kayeron de sovre sus manos. ¹⁵I topo una keshada de azno freska, i estendyo su mano, i la tomo, i iryo kon eya mil varones. ¹⁶I disho Shimshon: kon la keshada de un azno ire mil varones. ¹⁷I fue, ke komo akavo de avlar, echo de su mano la keshada, i yamo a akel lugar Ramat-Lehi. ¹⁸I tuvo gran sed, i yamo a A’, i disho: tu as dado por mano de tu syervo esta grande salvasyon, i agora ¿tengo ke murir de sed, kaer en mano de los serrados? ¹⁹I partyo el Dyo una foya ke avia en Lehi, i salyeron de eya aguas, i bevyo, i retorno su espirito, i se rebivyo. Por tanto yamo su nombre En-‘Hakore, ke esta en Lehi asta oy. ²⁰I djuzgo a Yisrael en los dias de los Pelishtios vente anyos.

[1] Ebreo: derrityeron

Ver todos los capítulos publicados en esta sección

 ————————————————————————

About Yehuda Sidi

I was born in 1953 in Tekirdag, Turkey and grew up in Canakkale. My father Hayim Sidi served as rabbi in both Tekirdag and Cannakale. Yehuda immigrated to Israel at 1971 and has been living in Israel since then. I am a softwere engineer. I am neither a Ladino nor a Tanach scholar. Actually I have very basic knowlede in Judeo Espanyol.

A year ago I looked for a Ladino Tanach in latin characters, and eventually I ended transcribing the Ladino Tanach which was published bt the Protestant missionaries who were vet active in the Speharadic world in the 19th century. This Tanach (and other books) were very popular with the Sepharadic Jews. This Tanach was published in two volumes.

So far I have transcribed the Tora. I am now in the process of transcribing the rest of the first volume which covers Ye’hoshua, Shoftim, Shemuel Alef, Shemuel Bet, Melachim Alef and Melachim Bet. I hope to complete the transcription in a few months.

The transcription was not reviewed by the Ladino scholars. Please report the errors that you find.