Sefer Tora en Djudeo Espanyol – Transkrivida kon letras latinas del livro por Ye’huda Sidi / SHEMUEL ALEF (6-10)

Ver todos los capítulos publicados en esta sección

Sefer TORA NEVIIM UKETUVIM
El livro de la Ley, los Profetas, las Eskrituras
Trazladado en la lingua Espanyola
Estamperea de A. ‘H. Boyadjian
Konstantatinopla 1873

Transkrivido por Ye’huda Sidi. Febrero 2015

SHEMUEL ALEF

6

¹I estuvo el arka de A’ en el pais de los Pelishtios syete mezes. ²I los Pelishtios yamaron a los saserdote i a los echizeros, dizyendo: ¿ke aremos kon el arka del Dyo? azednos saver komo la tenemos ke enbiar a su lugar. ³I eyos disheron: si enbiash el arka del Dyo de Yisrael, no la enbiesh vazia, sino ke tornar le tornaresh sakrifisyo de kulpa; entonses seresh melizinados i vos sera savido porke no se aparta su mano de vozotros. ⁴I disheron: ¿ke sera el sakrifisyo de kulpa ke le tornaremos? I eyos disheron: sinko almoranas de oros, i sinko ratones de oro, segun el numero de los prinsipes de los Pelishtios; porke la mizma mortaldad tenian todos eyos, i vuestros prinsipes. ⁵I aresh formas de vuestras almoranas, i formas de vuestros ratones ke danyan la tyerra, i daresh onra al Dyo de Yisrael; kizas alivyanara su mano de sovre vozotros, i de sovre vuestros dyozes, i de sovre vuestra tyerra. ⁶Ma ¿por ke apezgash vuestro korason, komo los Aisyanos i Paro apezgaron su korason? kuando uvro en eyos, ¿no los soltaron, i se fueron? ⁷Agora pues tomad i azed una karreta nueva, i tomad dos vakas alechantes, sovre las kuales no suvyo yugo, i atad las vakas a la karreta, i azed tornar sus bezerros de detras de eyas a kaza. ⁸I tomad el arka de A’, i metelda en la karreta, i las djoyas de oro ke le tornash por sakrifisyo por kulpa poned en una kashika al lado de eya, i enbialda, para ke se vaya. ⁹I mirad, si suvyere por el kamino de su termino a Bet-Shemesh, el nos izo este mal grande; i si no, entonses savremos ke su mano no nos toko, sino ke nos fue akaesimyento.

¹⁰I los varones izyeron ansi, i tomaron dos vakas alechantes, i las ataron a la karreta, i enserraron sus bezerros en kaza. ¹¹I puzyeron el arka de A’ en la karreta, i la kashika kon los ratones de oro, i kon las formas de sus almoranas. ¹²I las vakas se aderesaron en el kamino por el kamino de Bet-Shemesh, i ivan por la mizma kalsada andando i bramando, i no se apartavan ni a la derecha ni a la izkyerda. I los prinsipes de los Pelishtios anduvyeron detras de eyas asta el termino de Bet-Shemesh. ¹³I los de Bet-Shemesh segavan la segada del trigo en el vaye; i alsaron sus ojos, i vyeron el arka, i se alegaron de verla. ¹⁴I la karreta vino al kampo de Ye’hoshua de Bet-Shemesh, i se paro ayi; i ayi avia una pyedra grande; i partyeron los maderos de la karreta, i alsaron las vakas por alsayon a A’. ¹⁵I los Levitas abasharon el arka de A’, i la kashika ke estava kon eya, en la kual estavan las djoyas de oro, i la puzyeron sovre la pyedra grande; i los varones de Bet-Shemesh alsaron alsasyones, i sakrifikaron sakrifisyos en akel dia a A’. ¹⁶I los sinko prinsipes d e los Pelishtios lo vyeron, i se tornaron a Ekron en el mizmo dia.

¹⁷I estas son las almoranas de oro ke los Pelishtios tornaron por sakrifisyo por kulpa a A’: por Ashdod una, por Aza una, por Ashkelon una, por Gat una, por Ekron una. ¹⁸I los ratones de oro segun el numero de todas las sivdades de los Pelishtios, por los sinko prinsipatos, dezde las sivdades enkastiyadas asta las aldeas sin muraya, i asta la [1]pyedra grande, sovre la kual puzyeron el arka de A’, la kual esta este dia en el kampo de Ye’hoshua de Bet-Shemesh.

¹⁹I iryo a los varones de Bet-Shemesh porke avian mirado en el arka de A’, i iryo en el puevlo sinkuenta mil i setenta varones; i se alimunyaron el puevlo porke A’ iryo al puevlo kon erida grande. ²⁰I disheron los varones de Bet-Shemesh: ¿kyen podra estar delante de A’ este Dyo santo? ¿i kyen suvira de nozotros? ²¹I enbiaron mensajeros a los moradores de Kiryat-Yearim, dizyendo: Los Pelishtios tornaron el arka de A’, desended, i yevalda a vozotros.

[1] Ebreo: Abel

7

¹I vinyeron los varones de Kiryat-Yearim, i yevaron el arka de A’, i la trusheron en kaza de Avinadav en le kuesta; i santifikaron a Elazer su ijo para guardar el arka de A’.

²I akontesyo ke dezde el dia ke estuvo el arka en Kiryat-Yearim, se muchiguaron los dias, i fueron vente anyos, i toda la kaza de Yisrael alguayavan detras de A’. ³I avlo Shemuel a toda la kaza de Yisrael, dizyendo: si kon todo vuestro korason vos tornash a A’, kitad los dyozes estranyos i a Ashtarot de entre vozotros; i komponed vuestro korason a A’, i servid a el solo, i vos eskapara de mano de los Pelishtios. ⁴I los ijos de Yisrael kitaron a los Baalim i a Ashtarot, i sirvyeron a A’ solo.

⁵I disho Shemuel: adjuntad a todo Yisrael en Mitspa, i are orasyon por vozotros a A’. ⁶I se adjuntaron en Mitspa, i sakaron agua, i la vertyeron delante de A’, i ayunaron akel dia, i disheron ayi: pekimos kontra A’. I djuzgo Shemuel a los ijos de Yisrael en Mitspa. ⁷I oyeron los Pelishtios ke los ijos de Yisrael se avian adjuntado en Mitspa i suvyeron los prinsipes de los Pelishtios kontra Yisrael; i kuando los ijos de Yisrael lo oyeron, temyeron por kavza de los Pelishtios. ⁸I disheron los ijos de Yisrael a Shemuel: no te kayes de esklamar por nozotros a A’ nuestro Dyo, para ke nos salve de mano de los Pelishtios. ⁹I Shemuel tomo un kordero de leche, i lo also por alsasyon entera a A’; i esklamo Shemuel a A’ por Yisrael, i A’ le respondyo. ¹⁰I estando Shemuel alsando la alsayon, los Pelishtios se ayegaron para pelear kon Yisrael; ma A’ truno kon sonido grande en akel dia sovre los Pelishtios, i los alboroto; i fueron eridos delante de Yisrael. ¹¹I salyeron los varones de Yisrael de Mitspa, i persigyeron a los Pelishtios, i los iryeron asta abasho de Bet-Kar. ¹²I Shemuel tomo una pyedra, i la puzo entre Mitspa i Shen, i yamo su nombre Even-Ezer, dizyendo: asta aki nos ayudo A’. ¹³I los Pelishtios fueron kevrantados, i no vinyeron mas en el termino de Yisrael; i la mano de A’ fue kontra los Pelishtios todos los dias de Shemuel. ¹⁴I fueron tornadas a Yisrael las sivdades ke los Pelishtios avian tomado de Yisrael, dezde Ekron asta Gat; i sus terminos eskapo Yisrael de los Pelishtios. I uvo paz entre Yisrael i el Emorio. ¹⁵I djuzgo Shemuel a Yisrael todos los dias de su vida. ¹⁶I iva de anyo en anyo, i rodeava a Bet-El, i a Gilgal, i a Mitspa, i djuzgava a Yisrael en todos estos lugares. ¹⁷I se tornava a Rama; porke ayi estava su kaza, i ayi djuzgava a Yisrael; i fraguo ayi ara a A’.

8

¹I akontesyo ke kuando Shemual envejesyo , puzo a sus ijos por djuezes a Yisrael. ²I el nombre de su ijo primodjenito fue Yoel, i el nombre de su segundo Aviya, los kuales eran djuezes en Beer-Sheva. ³I no anduvyeron sus ijos en los kaminos de el, sino ke se akostaron detras de la avarisya i resivyeron [1]coecho, i atorsyeron djuisyo.

⁴I todos los vyejos de Yisrael se adjuntaron i vinyeron a Shemuel a Rama. ⁵I disheron: ek, tu te envejesiste, i tus ijos no andan en tus kaminos; agora mete a nozotros rey para djuzgarnos komo todas las nasyones. ⁶I desplazyo la koza a Shemuel kuando disheron: danos rey para djuzgarnos. I Shemuel izo orasyon a A’.

⁷I disho A’ a Shemuel: oye a la boz del puevlo en todo lo ke disheron; porke no te desecharon a ti, sino ke a mi me desacharon de enreynar sovre eyos. ⁸Segun todas las ovras ke izyeron dezde el dia ke los ize suvir de Ayifto asta oy, en lo ke me desharon, i sirvyeron a otros dyozes, ansi azen tambyen a ti. ⁹I agora oye a su boz; ma kon todo atestiguar atestiguales, i deklarales la manera del rey ke enreynara sovre eyos.

¹⁰I disho Shemuel todas las palavras de A’ al puevlo ke le demandavan rey. ¹¹I disho: esta sera la manera del rey ke enreynara sovre vozotros: tomara vuestros ijos, i se los pondra en sus kuatriguas, i en sus kavayeros, i korreran delante de su kuatrigua: ¹²i para poner para si mayorales de miles, i mayorales de sinkuenta, i para arar su arada, i para segar su segada, i para azer sus armas de gerra, i los atuendos de sus kuatriguas. ¹³I tomara vuestras ijas por konfesyonaderas, i por kozineras, i por panaderas. ¹⁴I tomara vuestros kampos, i vuestras vinyas, i vuestros buenos olivares, i dara a sus syervos. ¹⁵I dyezmara vuestras simyentes, i vuestras vinyas, i dara a sus eunukos, i a sus syervos. ¹⁶I tomara vuestros syervos, i vuestras syervas, i vuestros buenos mansevos, i vuestros aznos, i los pondra a su ovra. ¹⁷Dyezmara vuestras ovejas; i vozotros le seresh por syervos. ¹⁸I esklamaresh en akel dia por kavza de vuestro rey ke vos avresh eskojido; i A’ no vos respondera en akel dia.

¹⁹Ma el puevlo no kijyeron eskuchar a la boz de Shemuel, i disheron: no, sino ke rey sera sovre nozotros. ²⁰I nozotros tambyen seremos komo todas las djentes; i nuestro rey nos djuzgara, i saldra delante de nozotros, i peleara nuestras peleas. ²¹I oyo Shemuel todas las palavras del puevlo, i las avlo en oidos de A’. ²²I disho A’ a Shemuel: eskucha a su boz, i az enreynar rey sovre eyos. I disho Shemuel a los varones de Yisrael: andadvos kada uno a su sivdad.

[1] Dadiva para atorser

9

¹I avia un varon de Binyamin, i su nombre Kish, ijo de Aviel, ijo de Tseror, ijo de Behorat, ijo de Afiah, ijo de varon de Binyamin, barragan vayente. ²I tenia el un ijo, i su nombre Shaul, mansevo i ermozo, i entre los ijos de Yisrael no avia varon mas ermozo ke el; de su ombro i arriva era mas alto ke todo el puevlo. ³I se avian perdido las aznas de Kish, padre de Shaul. I disho Kish a Shaul su ijo: toma agora kontigo uno de los mosos, i levantate, va, bushka las aznas. ⁴I paso por el monte de Efrayim. i paso por la tyerra de Shalisha, i no las toparon. I pasaron por la tyerra de Shaalim, i no estavan ayi. I paso por la tyerra de Binyamin, i no las toparon. ⁵I kuando vinyeron en la tyerra de Tsuf, disho Shaul a su moso ke estava kon el: ven, i tornemos, no sea ke mi padre deshe el kuydado de las aznas, i se ansye por nozotros. ⁶I el le disho: ek agora, ay un varon del Dyo en esta sivdad, i es varon onrado; todo lo ke el avla, por syerto vyene, agora vamos ayi; puede ser el nos mostrara nuestro kamino por el kual tenemos ke ir. ⁷I disho Shaul a su moso: byen, iremos; ¿ma ke traeremos al varon? porke el pan se akavo de nuestras talegas, i no tenemos prezente para traer al varon del Dyo; ¿ke tenemos? ⁸I el moso respondyo de nuevo a Shaul, i disho: ek, se topa en mi mano un kuarto de siklo de plata; se la dare al varon del Dyo, para ke nos mostre nuestro kamino. ⁹(Antiguamente en Yisrael kuando alguno iva a rekerir al Dyo, dizia ansi: venid i vamos asta el veedor; porke el ke oy se yama profeta, antes era yamado veedor.) ¹⁰I disho Shaul a su moso: byen dizes; ven, i vamos. I se fueron a la sivdad onde estava el varon del Dyo. ¹¹Suvyendo por la suvida de la sivdad, toparon unas mosas ke salian para sakar agua, i les disheron: ¿esta aki el veedor? ¹²I eyas les respondyeron i disheron: esta; ek, esta delante de ti; apresurate agora, porke oy vino a la sivdad; porke el puevlo tyene sakrifisyo oy en el altar. ¹³Kuando entraresh en la sivdad, luego lo toparesh, antes ke suva al altar a komer; porke el puevlo no komera asta ke el venga, porke el a de bendizir el sakrifisyo, i despues komeran los konbidados. Suvid pues agora, porke agora lo toparesh. ¹⁴I suvyeron a la sivdad; i kuando entravan adyentro de la sivdad, ek, Shemuel salia a su enkuentro para suvir al altar.

¹⁵I un dia antes ke Shaul vinyera, A’ avia deskuvyerto a la oreaja de Shemuel, dizyendo: ¹⁶manyana komo a esta ora, yo enbiare a ti un varon de la tyerra de Binyamin, i lo untaras por prinsipe sovre mi puevlo Yisrael, i el salvara a mi puevlo de mano de los Pelishtios; porke vide a mi puevlo, por kuanto su esklamasyon vino a mi. ¹⁷I kuando Shemuel vido a Shaul, A’ le respondyo, dizyendo: ek el varon del kual te dishe: este ensenyoreara en mi puevlo. ¹⁸I Shaul se ayego a Shemuel adyentro de la puerta i disho: te rogo ke me digas onde esta la kaza del veedor. ¹⁹I Shemuel respondyo a Shaul, i disho: yo soy el veedor; suve delante de mi al altar, i komeresh konmigo oy, i por la manyana te enbiare, i te deskuvrire todo lo ke tyenes en tu korason. ²⁰I por las aznas ke te se perdyeron oy aze tres dias, pyerde kuydado de eyos, porke ya se toparon. ¿I por kyen es todo el dezeo de Yisrael? ¿no es por ti, i por toda la kaza de tu padre? ²¹I Shaul respondyo i disho: ¿no soy yo Binyaminita, de uno de los mas chikos trivos de Yisrael, i mi linaje el mas chiko de todos los linajes del trivo de Binyamin? ¿por ke pues me avlaste tal palavra? ²²I tomo Shemuel a Shaul i a su moso, i los trusho a la kamara, i les dyo lugar en la kavesera de los konbidadods, ke eran komo trenta varones. ²³I disho Shemuel al kozinero: da aki la porsyon ke te di, la ke te dishe: metela konmigo. ²⁴I el kozinero also la espalda, i lo ke estava sovre eya, i la puzo delante de Shaul. I disho Shemuel: ek lo ke kedo, ponlo delante de ti, i kome; porke para este tyempo se guardo para ti, dezde ke yo dishe: yo konbidi al puevlo. I Shaul komyo kon Shemuel akel dia. ²⁵I desendyeron del altar a la sivdad, i Shemuel avlo kon Shaul sovre el tejado. ²⁶I al otro dia madrugaron; i fue, ke komo suvia la manyana, Shemuel yamo a Shaul al tejado, dizyendo: levantate, i te enbiare. I Shaul se levanto, i alsaron los dos el i Shemuel afuera. ²⁷I desendyendo eyos al kavo de la sivdad, disho Shemuel a Shaul: di al moso ke pase adelante de nozotros, (i el paso,) i tu espera agora, i te are oir palavra del Dyo.

10

¹I tomo Shemuel una alkuza de azeyte, i la vazyo sovre su kavesa, i lo bezo, i disho: ¿mira ke A’ te unto por prinsipe sovre su eredad? ²Kuando tu uvyeres ido de konmigo oy, toparas dos varones djunto a la fuesa de Rahel en el termino de Binyamin, en Tseltsah, i te diran: ya se toparon las aznas ke fuiste a bushkar, i ek, tu padre desho el echo de las aznas, i se ansya por vozotros, dizyendo: ¿ke are por mi ijo? ³I Kuando pasaras de ayi mas adelante i vendras asta la enzina de Tavor, ayi te enkontraran tres varones ke suven al Dyo a Bet-El, uno yevando tres kavritos, i otro yevando tres tortas de pan, i otro yevando un odre de vino. ⁴I te saludaran, i te daran dos panes, i los resiviras de su mano. ⁵Despues de esto vendras a la kuesta del Dyo, onde esta la guarnisyon de los Pelishtios; i sera, ke kuando vinyeres ayi a la sivdad, enkontraras una kompanya de profetas ke desyenden del altar, i delante de eyos navla, i pandero, i flauta, i arpa, i eyos profetizando. ⁶I el espirito de A’ pasara sovre ti, i profetizaras kon eyos; i seras mudado en otro varon. ⁷I sera, ke kuando te akontesyeren estas senyales, azte lo ke alkansare tu mano; porke el Dyo es kontigo. ⁸I desenderas delante de mi a Gilgal; i ek, yo desendere a ti para alsar alsasyon, i para sakrifikar sakrifisyos de pases. Syete dias esperaras asta ke yo venga a ti, i te aga saver lo ke tyenes ke azer. ⁹I fue, ke komo abolto su ombro para partirse de Shemuel, el Dyo le troko [1]su korason; i todas estas senyale akontesyeron en akel dia.

¹⁰I kuando yegaron ayi a la kuesta, ek, una kompanya de profetas venia a su enkuentro; i el espirito del Dyo paso sovre el, i profetizo entre eyos. ¹¹I fue, ke kuando todos los ke lo konosian [2]antes, vyeron ke, ek, profetizava kon los profetas, el puevlo dizia el uno al otro: ¿ke es esto ke akontesyo al ijo de Kish? ¿tambyen Shaul entre los profetas? ¹²I un varon de ayi respondyo i disho: ¿i kyen es el padre de eyos? por tanto se aze proverbyo, ¿tambyen Shaul entre los profetas? ¹³I akavo de profetizar, i vino al altar. ¹⁴I el tio de Shaul disho a el i a su moso: ¿onde fuistesh? i el disho: a bushkar las aznas, i komo vimos ke no se topavan, fuimos a Shemuel. ¹⁵I disho el tio de Shaul: dime, te rogo, lo ke vos disho Shemuel. ¹⁶I disho Shaul a su tio: deklarar nos deklaro ke las aznas se avian topado. Ma la koza del reyno, de ke Shemuel avia avlado, no se la deskuvryo.

¹⁷I Shemuel adjunto al puevlo a A’ en Mitspa. ¹⁸I disho a los ijos de Yisrael: ansi dize A’ el Dyo de Yisrael: yo ize suvir a Yisrael de Ayifto, i vos eskapi de mano de los Aisyanos, i de mano de todos los reynos ke vos apretavan. ¹⁹I vozotros oy desechastesh a vuestro Dyo, el kual vos salva de todos vuestros males i vuestras angustyas, i le dishistesh: no, sino ke pondras rey sovre nozotros. I agora paradvos delante de A’ por vuestros trivos, i por vuestros miles. ²⁰I Shemuel izo ayegar todos los trivos de Yisrael, i fue prendido el trivo de Binyamin. ²¹I izo ayegar el trivo de Binymin por sus linajes, i fue prendido el linaje de Matri, i fue prendido Shaul, ijo de Kish. I lo bushkaron, ma no fue ayado. ²²I demandaron otra vez a A’, si dainda avia de venir ayi el varon. I disho A’: ek, esta eskondido entre el moble. ²³I korryeron, i lo tomaron de ayi; i kuando se paro en medyo del puevlo, era mas alto ke todo el puevlo dezde su ombro i arriva. ²⁴I disho Shemuel a todo el puevlo: ¿avesh visto al ke A’ eskojyo, ke no ay komo el en todo el puevlo? I todo el puevlo aularon, i disheron: biva el rey.

²⁵I Shemuel konto al puevlo el djuisyo del reyno, i lo eskrivyo en el livro, i lo puzo delante de A’. I enbio Shemuel a todo el puevlo kada uno a su kaza. ²⁶I Shaul tambyen se fue a su kaza a Giva; i anduvyeron kon el una kompanya, el korason de los kuales el Dyo avia tokado. ²⁷Ma los [3]ombres malos disheron: ¿komo nos salvara este? i lo menospresyaron, i no lo trusheron prezente. Ma el no se dyo por entendido.

[1] Ebreo: otro

[2] De ayer i anteayer

[3] Ebreo: ijo de Belyaal

Ver todos los capítulos publicados en esta sección

 ————————————————————————

About Yehuda Sidi

I was born in 1953 in Tekirdag, Turkey and grew up in Canakkale. My father Hayim Sidi served as rabbi in both Tekirdag and Cannakale. Yehuda immigrated to Israel at 1971 and has been living in Israel since then. I am a softwere engineer. I am neither a Ladino nor a Tanach scholar. Actually I have very basic knowlede in Judeo Espanyol.

A year ago I looked for a Ladino Tanach in latin characters, and eventually I ended transcribing the Ladino Tanach which was published bt the Protestant missionaries who were vet active in the Speharadic world in the 19th century. This Tanach (and other books) were very popular with the Sepharadic Jews. This Tanach was published in two volumes.

So far I have transcribed the Tora. I am now in the process of transcribing the rest of the first volume which covers Ye’hoshua, Shoftim, Shemuel Alef, Shemuel Bet, Melachim Alef and Melachim Bet. I hope to complete the transcription in a few months.

The transcription was not reviewed by the Ladino scholars. Please report the errors that you find.