Sefer Tora en Djudeo Espanyol – Transkrivida kon letras latinas del livro por Ye’huda Sidi / SHEMUEL ALEF (26-30)

Ver todos los capítulos publicados en esta sección

Sefer TORA NEVIIM UKETUVIM
El livro de la Ley, los Profetas, las Eskrituras
Trazladado en la lingua Espanyola
Estamperea de A. ‘H. Boyadjian
Konstantatinopla 1873

Transkrivido por Ye’huda Sidi. Febrero 2015

SHEMUEL ALEF

26

¹I vinyeron los Zifios a Shaul a Giva, dizyendo: mira ke David se eskonde en la kuesta de Hahila enfrente de Yeshimon. ²I Shaul se levanto, i desendyo al dizyerto de Zif, i kon el tres mil varones eskojidos de Yisrael, para bushkar a David en el dizyerto de Zif. ³I Shaul pozo en la kuesta de Hahila ke esta enfrente de Yeshimon, sovre el kamino. I David estava en el dizyerto, i vido ke Shaul venia detras de el al dizyerto. ⁴I enbio David eskulkar i supo ke Shaul avia vinido por syerto. ⁵I David se levanto, i vino al lugar onde Shaul avia pozado; i vido David el lugar onde Shaul estava echado, i Avnereijo de Ner, kapitan de su fonsado. I Shaul estava echado en el lugar de las kuatriguas, i el puevlo estava pozado al derredor de el. ⁶I respondyo David i disho a Ahimeleh el Hitio, i Avishay, ijo de Tseruya, ermano de Yoav, dizyendo: ¿kyen desendera konmigo a Shaul al real? I disho Avishay: yo desendere kontigo. ⁷I vino David i Avishay al puevlo de noche; i ek, Shaul estava echado durmyendo en el lugar de las kuatriguas, i su lansa finkada en la tyerra a su kavesal; i Avner i el puevlo estavan echados al derredor de el. ⁸I disho Avishay a David: oy el Dyo entrego a tu enemigo en tu mano; agora pues lo erire agora kon la lansa, enklavandolo en la tyerra kon un golpe, i no segundare. ⁹I disho David a Avishay: no lo danyes; porke ¿kyen estendyo su mano kontra el untado de A’, i fue inosente? ¹⁰I disho David: bivo A’, ke A’ lo erira, o su dia vendra para ke muera, o desendera en batalya, i sera tajado. ¹¹I me guarde de estender mi mano kontra el untado de A’; ma agora toma, te rogo, la lansa ke esta a su kavesal, i la alkuza de agua, i nos vamos. ¹²I tomo David la lansa, i la alkuza de agua del kavesal de Shaul, i se fueron; i ninguno lo vido, ni ninguno lo supo, ni ninguno se desperto, porke todos durmian; porke adurmimyento de A’ avia kaido sovre eyos. ¹³I paso David a la otra parte, i se paro de leshos sovre la punta del monte, avyendo grande espasyo entre eyos. ¹⁴I yamo David al puevlo, i a Avner, ijo de Ner, dizyendo: ¿no respondes Avner? i Avner respondyo, i disho: ¿kyen eres tu ke yamas al rey? ¹⁵I disho David a Avner: ¿no eres tu varon? ¿i kyen ay komo tu en Yisrael? ¿por ke pues no guardaste a tu senyor el rey? porke entro uno del puevlo para destruir al rey tu senyor. ¹⁶Esta koza ke iziste no es buena; bivo A’ ke sosh meresedores de muerte, porke no guardastesh a vuestro senyor, al untado de A’. I agora mira onde esta la lansa del rey, i la alkuza de agua ke estava a su kavesal. ¹⁷I konosyo Shaul la boz de David, i disho: ¿es esta tu boz, ijo mio David? i disho David: mi boz es, mi senyor rey. ¹⁸I disho: ¿por ke persige ansi mi senyor detras de su syervo? porke ¿ke ize? ¿i ke mal ay en mi mano? ¹⁹I agora rogo ke mi senyor el rey oyga las palavras de su syervo. Si A’ te levanto kontra mi, guelga prezente; ma si son ijos de ombre, maldichos sean eyos delante de A’; porke me desterraron oy en adjuntarme en la eredad de A’, dizyendo: va, sirve a otros dyozes. ²⁰Agora pues, no kayga mi sangre a tyerra delante de las fases de A’; porke salyo el rey de Yisrael a bushkar una pulga, komo kyen persige un perdiz en los montes. ²¹I disho Shaul: peki; tornate, ijo mio David; porke no te are mas ningun mal, por lo ke mi vida fue presyada en tus ojos este dia; ek, yo enlokesi, i yerri muy mucho. ²²I respondyo David i disho: ek la lansa del rey, ke pase uno de los mosos, i la tome. ²³I A’ page a kada uno su djustedad i su fieldad; porke A’ te entrego oy en mi mano, ma no kije estender mi mano kontra el untado de A’. ²⁴I ek, komo tu vida fue estimada este dia en mis ojos, ansi sea mi vida estimada en los ojos de A’, i me eskape de toda angustya. ²⁵I disho Shaul a David: bendicho seas tu, ijo mio David; azer aras, i tambyen poder podras. I David se fue a su kamino, i Shaul se torno a su lugar.

27

¹I disho David en su korason: agora sere tajado algun dia por mano de Shaul; no ay koza mejor para mi ke eskaparme presto a la tyerra de los Pelishtios i Shaul se desfiguzyara de mi, por bushkarme mas por todo el termino de Yisrael; i ansi me eskapare de su mano. ²I David se levanto, i paso el i los seshsyentos varones ke estavan kon el, a Ahish, ijo de Maoh, rey de Gat. ³I moro David kon Ahish en Gat, el i sus varones, kada uno kon su famiya, David i sus dos mujeres, Ahinoam la Yizreelita i Avigayil la Karmelita, la ke fue mujer da Naval. ⁴I fue dado avizo a Shaul ke David se avia fuido a Gat, i no kontinuo mas a bushkarlo.

⁵I disho David a Ahish: si agora ayi grasya en tus ojos, ke me den lugar en una de las sivdades del paiz, para ke more ayi. ^¿I por ke tyene ke morar tu syervo kontigo en la sivdad real? ⁶I Ahish lo dyo en akel dia a Tsiklag; por tanto fue Tsiklag de los reyes de Ye’huda asta este dia.

⁷I el numero de los dias ke David moro en el paiz de los Pelishtios fue un anyo i kuatro mezes. ⁸I suvia David i sus varones, i espojavan a los Geshurios, i a los Gizrios, i a los Amalekitas; porke akeyos moravan de tyempo antiguo en la tyerra, dezde la entrada de Shur asta la tyerra de Ayifto. ⁹I eria David a la tyerra, i no abidiguava ombre ni mujer; i tomava ovejas, i vakas, i aznos, i kameyos, i ropas, i tornava i venia a Ahish. ¹⁰I dizia Ahish: onde vos espandistesh oy? i dizia David: sovre el sud de Ye’huda, i sovre el sud de los Yerahmeelitas, i sovre el sud de los Kenios, ¹¹Ni ombre ni mujer abidiguava David para traer las nuevas a Gat, dizyendo: no sea ke den avizo de nozotros, dizyendo: ansi izo David. I tal era su uzansa todos los dias ke estuvo en el paiz de los Pelishtios. ¹²I Ahish kreia a David dizyendo: afedesyo en su puevlo, en Yisrael, i sera mi syervo para syempre.

28

¹I akontesyo ke en akeyos dias, los Pelishtios adjuntaron sus reales al fonsado para pelear kon Yisrael. I disho Ahish a David: sepas por syerto ke tyenes ke salir konmigo en el real, tu i tus varones. ²I disho David a Ahish: por tanto savras lo ke ara tu syervo. I disho Ahish a David: por tanto te are guardador de mi kavesa todos los dias.

³I Shemuel se avia muerto, i todo Yiseael lo avian endechado, i lo avian enterrado en Rama, en su sivdad; i Shaul avia echado de la tyerra los enkantadores i los adivinos. ⁴I se adjuntaron los Pelishtios, i vinyeron i pozaron en Shunen, i Shaul adjunto a todo Yisrael, i pozaron en Gilboa. ⁵I kuando Shaul vido el real de los Pelishtios, temyo, i su korason se estremesyo mucho. ⁶I demando Shaul a A’; ma A’ no le respondyo, ni por suenyos, ni por urim, ni por profetas. ⁷I disho Shaul a sus syervos: bushkadme una mujer enkantadera, i ire a eya, i preguntare por mano de eya. I sus syervos le disheron: ek, ay una mujer enkantadera en En-Dor. ⁸I Shaul se mudo, i se vistyo de otros vestidos, i se fue el, i dos varones kon el, i vinyeron a la mujer de noche. I el disho: te rogo ke me adivines kon el enkantamyento, i me agas suvir al ke yo te dishere. ⁹I la mujer le disho: ek, tu saves lo ke izo Shaul, komo tajo de la tyerra los enkantadores i los adivinos; ¿por ke pues enkampas a mi vida para matarme? ¹⁰I Shaul le djuro por A’, dizyendo: bivo A’, no te akontesera ninguna pena por esta koza. ¹¹I disho la mujer: ¿a kyen are suvir a ti? i el disho: azme suvir a Shemuel. ¹²I vyendo la mujer a Shemuel, esklamo kon boz grande; i avlo la mujer a Shaul, dizyendo: ¿por ke me enganyaste, syendo tu Shaul? ¹³I el rey le disho: no temas. ¿pues ke viste? i disho la mujer a Shaul: vide dyozes ke suven de la tyerra. ¹⁴I el le disho: ¿ke es su forma? i eya disho: un ombre vyejo suve, i esta kuvyerto kon un manto. I Shaul entyendo ke era Shemuel, i se umilyo kon sus fases a tyerra, i se enkorvo.

¹⁵I disho Shemuel a Shaul: ¿por ke me turvaste azyendome suvir? i disho Shaul: estoy muy angustyado; porke los Pelishtios pelean kontra mi, i el Dyo se aparto de mi, i no me responde mas, ni por mano de profetas, ni por suenyo; por tanto te yami, para ke me agas saver lo ke tengo ke azer. ¹⁶I disho Shemuel: ¿i para ke me demandas a mi, syendo ke se aparto de ti A’, i es tu enemigo? ¹⁷I A’ lo izo komo avlo por mi mano, i A’ razgo el reyno de tu mano, i lo dyo a tu komapnyero, a David. ¹⁸Por lo ke no ovedeste a la boz de A’, ni iziste el eresimyento de su fulor en Amalek, por tanto A’ te izo esta koza en este dia. ¹⁹I A’ entregara a Yisrael tambyen kontigo en mano de los Pelishtios, i manyana tu i tus ijos seresh konmigo; tambyen al real de Yisrael entregara A’ en mano de los Pelishtios. ²⁰I en akel punto kayo Shaul a lo largo a tyerra, i temyo mucho por las palavras de Shemuel; tambyen no kedo en el fuersa, porke no avia komido pan todo el dia i toda la noche. ²¹I vino la mujer a Shaul, i vido ke estava turvado mucho, i le disho: ek, tu syerva ovedesyo a tu boz, i puzi mi alma en mi palma, i eskuchi a las palavras ke me avlaste. ²²I agora te rogo ke tu tambyen eskuches a la boz de tu syerva, i pondre delante de ti un bokado de pan, i kome, para ke tengas fuersa kuando anduvyeres por tu kamino. ²³I el no kijo, i disho: no komere. Ma sus syervos, i tambyen la mujer, porfiraon kon el, i eskucho a su boz; i se levanto de la tyerra, i se asento sovre la kama. ²⁴I la mujer tenia un bezerro engordado en kaza, i se apresuro, i lo degoyo; i tomo arina i la amaso, i kozyo de eya sensenyas. ²⁵I lo trusho delante de Shaul i delante de sus syervos, i komyeron i levantaron i se fueron akeya noche.

29

¹I los Pelishtios adjuntaron todos sus reales en Afek; i los Yisraelitas estavan pozados a la fuente ke esta en Yizreel. ²I los prinsipes de los Pelishtios pasaron a syentos i a miles; i David i sus varones pasaron en la postrimeria kon Ahish. ³I disheron los mayorale de los Pelishtios: ¿ke azen aki estos Ebreos? I disho Ahish a los mayorales de los Pelishtios: ¿no es este David el syervo de Shaul, rey de Yisrael, ke estuvo konmigo estos dias o estos anyos, i no topi en el ninguna koza dezde el dia ke se paso a mi asta este dia? ⁴I los mayorales de los Pelishtios ensanyaron kontra el, i le disheron los mayorales de los Pelishtios: az tornar a este varon, i tornese a su lugar ke le senyalaste, i no desyenda kon nozotros a la batalya, no sea ke en la batalya nos sea por enemigo; porke ¿kon ke se agradesera este kon su senyor? ¿no serea kon las kavesas de estos varones? ⁵¿No es este David, de kyen kantavan en los vayes, dizyendo: iryo Shaul a sus miles, i David a sus milaryas?

⁶I Ahish yamo a David, i le disho: bivo A’, ke tu eres derecho, i agrado en mis ojos tu salida i tu entrada konmigo en el real, porke no topi en ti ningun mal dezde el dia ke viniste a mi asta este dia; ma en los ojos de los prinsipes no agradas. ⁷Agora pues tornate, i vate en paz, i no agas lo malo en ojos de los prinsipes de los Pelishtios. ⁸I disho David a Ahish: ¿pues ke ize? ¿i ke topaste en tu syervo dezde el dia ke estuvi kontigo asta este dia, para ke yo no vaya i pelee kontra los enemigos de mi senyor el rey? ⁹I respondyo Ahish, i disho a David: yo se ke tu eres bueno en mis ojos, komo un andjel del Dyo; empero los mayorales de los Pelishtios disheron: no suva kon nozotros a la batalya. ¹⁰Agora pues madruga por la manyana kon los syervos de tu senyor ke vinyeron kontigo, i levantadvos de manyana luego ke amanese, i andadvos. ¹¹I madrugo David, el i sus varones, para irse a la manyana, para tornar a la tyerra de los Pelishtios. I los Pelishtios suvyeron a Yizreel.

30

¹I akontesyo, ke komo David i sus varones vinyeron a Tsiklag al terser dia, los Amalekitas avian entrado al sud, i a Tsiklag, i avian erido a Tsiklag, i la avian kemado a fuego. ²I avian kativado a las mujeres ke estavan en eya, dezde chiko asta grande no avian matado a ninguno, sino ke los avian yevado, i se avian ido a su kamino. ³I vino David i sus varones a la sivdad, i ek, estava kemada a fuego, i sus mujeres, i sus ijos, i sus ijas fueron kativadas. ⁴I David, i el puevlo ke estava kon el, alsaron su boz i yoraron asta ke no les kedo fuersa para yorar. ⁵I las dos mujeres de David fueron kativadas, Ahinoam la Yizreelita, i Avigayil, la ke fue mujer da Naval el Karmelita. ⁶I David fue muy angustyado; porke el puevlo avlavan de apedrearlo; porke el alma de todo el puevlo era amarga, kada uno por sus ijos i por sus ijas; ma David se esforso en A’ su Dyo.

⁷I disho David a Evyatar el saserdote, ijo de Ahimeleh: te rogo ke me aserkes el espaldar. I Evyatar aserko el espaldar a David. ⁸I David demando a A’, dizyendo: ¿persegire detras de esta banda? ¿la alkansare? i el le disho: persige; porke alkansar alkansaras, i eskapar eskaparas. ⁹I se fue David, el i los seshsyentos varones ke estavan kon el, i vinyeron asta el arroyo de Besor, onde se estuvyeron los ke kedaron. ¹⁰Ma David persigyo, el i kautrosyentos varones; porke se kedaron dossyentos varones, ke estavan tan kansados ke no pudyeron pasar el arroyo de Besor. ¹¹I toparon un ombre Aisyano en el kampo, i lo trusheron a David; i le dyeron pan, i komyo, i le dyeron a bever agua. ¹²I le dyeron un pedaso de masa de igos, i dos razimos de pasas. I kuando komyo, torno a el su espirito; porke no avia komido pan, ni bevido agua por tres dias i tres noches. ¹³I David le disho: de kyen eres tu? ¿i de onde eres? i el le disho: yo soy moso Aisyano, syervo de un varon Amalekita; i me desho mi amo, porke me enfermi oy aze tres dias. ¹⁴Nozotros nos espandimos al sud de los Keretios, i sovre lo de Ye’huda, i sovre el sud de Kalev; i a Tsiklag kemimos a fuego. ¹⁵I le disho David: ¿me yevaras tu a esta banda? i el disho: djurame por el Dyo ke no me mataras, ni me entregaras en mano de mi amo, i yo te yevare a esta banda. ¹⁶I lo yevo; i ek, estavan espandidos sovre la faz de toda la tyerra, komyendo, i bevyendo, i azyendo fyesta, por todo el espojo grande ke avian tomado de la tyerra de los Pelishtios, i de la tyerra de Ye’huda. ¹⁷I David los iryo dezde la noche asta la tarde del otro dia; i no eskapo de eyos ninguno, sino kuatrosyentos mansevos, ke kavayaron sovre kameyos, i fuyeron, ¹⁸I eskapo David todo lo ke los Amalekitas avian tomado, i David eskapo a sus dos mujeres. ¹⁹I no les falto ni chiko ni grande, ni ijos ni ijas, ni del espojo, ni de todo lo ke les avian tomado; todo lo torno David. ²⁰I tomo David todas las ovejas i las vakas, i lo giaron delante de akel ganado, i dizian: este es el espojo de David. ²¹I vino David a los dossyentos varones ke estavan tan kansados ke pudyeron andar detras de David, a los kuales izyeron kedar al arroyo de Besor; i eyos salyeron a resivir a David, i a resivir al puevlo ke estava kon el. I kuando David se aserko al puevlo, los saludo. ²²I todos los varones malos i los [1]peores de los varones ke avian ido kon David, respondyeron i disheron: por lo ke no anduvyeron kon nozotros, no les daremos del espojo ke eskapimos, sino a kada uno su mujer i sus ijos, i ke los tomen i se vayen. ²³I disho David: no agash ansi, mis ermanos, de lo ke A’ nos dyo, el kual nos guardo, i entrego en nuestra mano la banda ke vino sovre nozotros. ²⁴¿I kyen vos eskuchara en esta koza? porke kuanta es la parte del ke desyende a la batalya, tanta sera la parte del ke keda kon los atuendos; espartiran egualmente. ²⁵I fue ansi dezde akel dia en adelante, i lo puzo por fuero i por djuisyo a Yisrael asta este dia.

²⁶I kuando David vino a Tsiklag, enbio del espojo a los vyejos de Ye’huda sus amigos, dizyendo: ek [2]prezente para vozotros del espojo de los enemigos de A’; ²⁷a los de Bet-El, i a los de Ramot del sud, i a los de Yatir, ²⁸i a los de Aroer, i a los de Sifmot, i a los de Eshtemoa, ²⁹i a los de Rahal, i a los ke estavan en las sivdades de los Yerahmeelitas, i a los ke estavan en las sivdades de los Kenios. ³⁰I a los de Horma, i a los de Bor-Ashan, i a los de Atah, ³¹i a los de Hevron, i a todos lo lugares onde andava David kon sus varones.

[1] Beliyaal

[2] Bendisyon

Ver todos los capítulos publicados en esta sección

 ————————————————————————

About Yehuda Sidi

I was born in 1953 in Tekirdag, Turkey and grew up in Canakkale. My father Hayim Sidi served as rabbi in both Tekirdag and Cannakale. Yehuda immigrated to Israel at 1971 and has been living in Israel since then. I am a softwere engineer. I am neither a Ladino nor a Tanach scholar. Actually I have very basic knowlede in Judeo Espanyol.

A year ago I looked for a Ladino Tanach in latin characters, and eventually I ended transcribing the Ladino Tanach which was published bt the Protestant missionaries who were vet active in the Speharadic world in the 19th century. This Tanach (and other books) were very popular with the Sepharadic Jews. This Tanach was published in two volumes.

So far I have transcribed the Tora. I am now in the process of transcribing the rest of the first volume which covers Ye’hoshua, Shoftim, Shemuel Alef, Shemuel Bet, Melachim Alef and Melachim Bet. I hope to complete the transcription in a few months.

The transcription was not reviewed by the Ladino scholars. Please report the errors that you find.