Sefer Tora en Djudeo Espanyol – Transkrivida kon letras latinas del livro por Ye’huda Sidi / SHEMUEL ALEF (16-20)

Ver todos los capítulos publicados en esta sección

Sefer TORA NEVIIM UKETUVIM
El livro de la Ley, los Profetas, las Eskrituras
Trazladado en la lingua Espanyola
Estamperea de A. ‘H. Boyadjian
Konstantatinopla 1873

Transkrivido por Ye’huda Sidi. Febrero 2015

SHEMUEL ALEF

16

¹I disho A’ a Shemuel: ¿asta kuando te alimunyares por Shaul, i yo lo desechi ke no enreyne sovre Yisrael? Inche tu kuerno de azeyte, i ven, yo te enbiare a Yishay de Bet-Lehem; porke entre sus ijos vide para mi rey. ²I disho Shemuel: ¿komo ire? si Shaul lo oyere, me matara. I disho A’: tomaras una bezerra de las vakas en tu mano, i diras: para sakrifikar a A’ vine. ³I konbidaras a Yishay al sakrifisyo; i yo te are saver lo ke tyenes ke azer; i untaras para mi al ke yo te dishere. ⁴I Shemuel izo lo ke avlo A’, o vino a Bet-Lehem. I los vyejos de la sivdad se estremsyeron a su enkuentro, i disheron: ¿es pasfika tu venida? ⁵I el disho: pasifika. Para sakrifikar a A’ vine; santifikadvos, i venid konmigo al sakrifisyo. I santifiko a Yishay i a sus ijos, i los konbido al sakrifisyo. ⁶I akontesyo, ke kuando eyos vinyeron, el vido a Eliav, i disho: de syerto delante de A’ esta su untado.

⁷I disho A’ a Shemuel: no mires a su pareser, ni a la altura de su estatura, porke lo desechi; porke no es lo ke el ombre ve; porke el ombre ve la aparensya, ma A’ ve el korason. ⁸I Yishay yamo a Avinadav, i lo izo pasar delante de Shemuel. I el disho: ni tampoko a este eskojyo A’. ⁹I izo pasar Yishay a Shama. I Shemuel disho: ni tampoko a este eskojyo A’. ¹⁰I izo pasar Yishay sus syete ijos delante de Shemuel. I disho Shemuel a Yishay: no eskojyo A’ a estos. ¹¹I disho Shemuel a Yishay: ¿no tyenes mas ijos? I el disho: dainda kedo el mas chiko, i ek, etsa apasentando las ovejas. I disho Shemuel a Yishay: enbia, i tomalo: porke no nos asentaremos a la meza asta ke el venga aki. ¹²I enbio, i lo trusho. I el era ruvyo, i ermozo de ojos, i bueno de vista. I disho A’: levantate, untalo, porke este es. ¹³I Shemuel tomo el kuerno del azeyte, i lo unto entre sus ermanos. I el espirito de A’ paso sovre David dezde akel dia en adelante. I Shemuel se lavanto, i se fue a Rama.

¹⁴I el espirito de A’ se aparto de Shaul, i lo turvava un espirito malo de parte de A’. ¹⁵I los syervos de Shaul le disheron: ek agora, un espirito malo del Dyo te turva. ¹⁶Diga agora nuestro senyor a tus syervos ke estan delante de ti, ke bushken varon ke sepa tanyer la arpa; i sera, ke kuando fuere sovre ti el espirito malo del Dyo, tanyera kon su mano, i estaras byen. ¹⁷I disho Shaul a sus syervos: mirad agora para mi un varon ke tanya byen, i traedmelo. ¹⁸I respondyo uno de los mosos, i disho: ek yo vide a un ijo de Yishay de Bet-Lehem ke save tanyer, i es barragan vayente, i varon de gerra, i entendido en palavras, i varon ermozo, i A’ es kon el. ¹⁹I Shaul enbio mensajeros a Yishay, i disho: enbiame a David to ijo, el ke esta kon las ovejas. ²⁰I Yishay tomo un azno kargado de pan, i un odre de vino, i un kavrito de las kavras, i lo enbio por mano de David su ijo a Shaul. ²¹I vino David a Shaul, i se paro delante de el. I lo amo mucho, fue su yevador de armas. ²²I Shaul enbio a Yishay, dizyendo: te rogo ke esta David delante de mi, porke ayo grasya en mis ojos. ²³I era, ke kuando el espirito malo del Dyo era sovre Shaul, David tomava la arpa, i tanyia kon su mano, i Shaul tenia espasyo, i estava byen, i el espirito malo se retirava de el.

17

¹I los Pelishtios adjuntaron sus reales para la gerra, i se adjuntaron en Suko, ke es de Ye’huda; i pozaron entre Suko i Azeka en Efes-Damim. ²I Shaul i los varones de Yisrael se adjuntaron, i pozaron en el vaye del pino, i ordenaron la batalya kontra los Pelishtios. ³I los Pelishtios estavan en el monte de la una parte, i los Yisraelitas estavan en el otro monte de la otra parte, i el vaye entre eyos. ⁴I salyo un varon de los reales de los Pelishtios ke se puzo entre los dos reales, el nombre del kual era Golyat, de Gat, su altura sesh kovdos, i un palmo. ⁵I tenia un kapasete de alambre sovre su kavesa, i era vestido de maya de eskamas; i el pezo de la maya era sinko mil siklos de alambre. ⁶I tenia botines de alambre sovre sus pyes, i un lanson de alambre entre sus ombros. ⁷I el mango de su lansa era komo un enshuyo de teshedores i el fyerro de su lansa era de seshsyentos siklos de fyerro; i el ke yevava la adarga iva delante de el. ⁸I se paro, i grito a las ordenansas de Yisrael, i les disho: ¿para ke salesh a ordenar batalya? ¿no soy yo el Pelishtio, i vozotros syervos de Shaul? eskojadvos un varon, i desyenda a mi. ⁹Si podyere pelear konmigo, i me matare, nozotros seremos vuestros syervos; i si yo podyere mas ke el, i lo matare, vozotros seresh nuestros syervos, i nos serviresh. ¹⁰I disho el Pelishtio: yo repudyo las ordenansas de Yisrael en este dia; dadme un varon, i peleamos auna. ¹¹I kuando Shaul i todo Yisrael oyeron estas palavras del Pelishtio, se kevrantaron, i temyeron mucho.

¹²I David era ijo de akel varon Efratio de Bet-Lehem de Ye’huda, el nombre del kual era Yishay, i ke tenia ocho ijos. I el varon en los dias de Shaul era vyejo, entrado en edad , entre los varones. ¹³I los tres ijos grandes de Yishay anduvyeron detras de Shaul a la gerra; i los nombres de sus tres ijos ke anduvyeron a la gerra eran Eliav el primodjenito, i su segundo Avinadav, i el tersero Shama. ¹⁴I David era el mas chiko; i los tres garndes anduvyeron detras de Shaul. ¹⁵I David andava i tornava de kon Shaul para apasentar las ovejas de su padre en Bet-Lehem. ¹⁶I se aserkava el Pelishtio manyana i tarde; i ansi se paro kuarenta dias. ¹⁷I disho Yishay a David su ijo: toma agora para tus ermanos un epa de este grano tostado, i estos dyez panes, i korre al real a tus ermanos. ¹⁸I estos dyez kezos de leche traeras al mayoral de mil; i vijita a tus ermanos, para saver si estan buenos, i toma senya de eyos. ¹⁹I Shaul, i eyos, i todos los varones de Yisrael estavan en el vaye del pino, peleando kon los Pelishtios.

²⁰I madrugo David la manyana, i desho las ovejas kon un guardador, i se kargo i se fue, komo Yishay le enkomendo; i vino al lugar de las kuatriguas; i el fonsado salia a la ordenansa, i aulavan para la batalya. ²¹Porke Yisrael i los Pelishtios se ordenaron, ordenansa kontra ordenansa. ²²I David desho los atuendos de sovre si en mano del guardador de los atuendos, i korryo a la ordenansa, i vino i pregunto a sus ermanos si estavan buenos. ²³I estando el avlando kon eyos, ek, el varon ke se metia entre dos reales, el nombre del kual era Golyat, el Pelishtio de Gat, suvia de las ordenansas de los Pelishtios, i avlo las mizmas palavras; i oyo David. ²⁴I todos los varones de Yisrael, en vyendo al varon, fuyeron delante de el, i temyeron mucho. ²⁵I los varones de Yisrael dizian: ¿vistesh a este varon ke suve? syerto para repudyar a Yisrael suve; i sera , ke el varon ke lo matare, el rey lo enrikesera kon rikeza grande. I le dare su ija, i ara forra la kaza de su padre en Yisrael.

²⁶I avlo David a los varones ke estavan kon el, dizyendo: ¿ke sera echo al varon ke matare a este Pelishtio, i kitare el repudyo de Yisrael? porke ¿kyen es este Pelishtio serrado ke repudye las ordenansas del Dyo bivo? ²⁷I el puevlo le respondyo de esta manera, dizyendo: ansi se ara al varon ke lo matare. ²⁸I kuando Eliav su ermano mayor lo oyo avlar kon los varones, se ensendyo el fulor de Eliav kontra David, i disho: ¿para ke desendiste aki? ¿i a kyen deshaste akeyas pokas ovejas en el dizyerto? yo konosko tu sobervya, i la malisya de tu korason; syerto para ver la batalya desendiste. ²⁹I disho David: ¿ke ize agora? [1]¿estas no son palavras? ³⁰I se abolto de kon el enfrente de otro, i disho la mizma palavra; i le respondyeron el puevlo segun la primera respuesta. ³¹I fueron oidas las palavras ke avlo David, i las kontaron delante de Shaul; i el lo tomo. ³²I disho David a Shaul: no kayga el korason de ninguno por kavza de el; tu syervo andara i peleara kon este Pelishtio. ³³I disho Shaul a David: no podras ir kontra este Pelishtio para pelear kon el; porke tu eres moso, i el es varon de gerra dezde su mosedad.

³⁴I disho David a Shaul: tu syervo apasentava las ovejas de su padre, i kuando venia un leon o un onso, i levantava un karnero del revanyo, ³⁵yo salia detras de el, i lo eria, i lo eskapava de su boka; i kuando se levantava kontra mi, lo travava de su barva, i lo eria, i lo matava. ³⁶Tanto al leon komo al onso eria tu syervo; i este Pelishtio serrado sera komo uno de eyos, porke repudyo las ordenansas del Dyo bivo. ³⁷I disho David: A’ ke me eskapo de las garras del leon, i de las garras del onso, el me eskapara de la mano de este Pelishtio. I disho a Shaul a David: va, i A’ sea kontigo.

³⁸I Shaul vistyo a David de sus ropas, i metyo un kapasete de alambre sovre su kavesa, i lo vistyo de maya. ³⁹I sinyo David su espada sovre sus vestidos, i perkuro de andar, porke no lo avia provado. I disho David a Shaul: no puedo andar kon estos; porke no los tengo provado. I David los kito de sovre si. ⁴⁰I tomo su palo en su mano, i eskojyo para si sinko sheshos del arroyo, i los puzo en la bolsa de pastores ke tenia, i en el zurron, i tenia su fonda en su mano; i se aserko al Pelishtio. ⁴¹I el Pelishtio venia andando i aserkandose a David, i el varon ke yevava la adarga iva delante de el. ⁴²I kuando el Pelishtio miro, i vido a David, lo menospresyo; porke era mansevo, i ruvyo, i ermozo de vista. ⁴³I disho el Pelsihtio a David: ¿soy yo perro ke vyenes a mi kon palos? i el Pelishtio maldisho a David por sus dyozes. ⁴⁴I disho el Pelishtio a David: ven a mi, i dare tu karne a las aves de los syelos, i a las bestyas del kampo.

⁴⁵I disho David al Pelishtio: tu vyenes a mi kon espada, i kon lansa, i kon lanson; ma yo vengo a ti en el nombre de A’ Tsevaot, el Dyo de las ordenansas de Yisrael, ke tu repudyaste. ⁴⁶En este dia A’ te entregara en mi mano, i te erire, i kitare tu kavesa de sovre ti, i dare los kuerpos del real de los Pelishtios en este dia a las aves de los syelos, i a las animalyas de la tyerra; i savra toda la tyerra ke ay Dyo en Yisrael. ⁴⁷I savra toda esta kompanya ke A’ no salva kon espada ni kon lansa; porke de A’ es la pelea, i el vos entregara en nuestra mano. ⁴⁸I akontesyo, ke komo el Pelishtio se levanto, i anduvo, i se aserko al enkuentro de David, David se apresuro, i korryo a la ordenansa al enkuentro del Pelishtio. ⁴⁹I David metyo su mano en la bolsa, i tomo de ayi una pyedra, i la tiro kon la fonda, i iryo al Pelishtio en su frente; i se ondyo la pyedra en su frente, i kayo sovre sus fases a tyerra. ⁵⁰I ansi vensyo David al Pelishtio kon la fonda i kon la pyedra, i iryo al Pelishtio, i lo mato; i no avia espada en mano de David. ⁵¹I korryo David, i se paro sovre el Pelishtio, i tomo su espada, i la desvayno de su vayna, i lo mato, i le korto kon eya la kavesa. I kuando los Pelishtios vyeron ke su varon era muerto, fuyeron. ⁵²I se levantaron los varones de Yisrael i de Ye’huda, i aularon, i persigyeron a los Pelishtios asta la entrade del vaye, i asta las puertas de Ekron. I kayeron matados de los Pelishtios en el kamino de Shaarim, asta Gat i asta Ekron. ⁵³I tornaron los ijos de Yisrael de persegir detras de los Pelishtios, i reoyaron sus reaIes. ⁵⁴I David tomo la kavesa del Pelishtio, i la trusho a Yerushalayim; i puzo sus aramas en su tyenda.

⁵⁵I kuando Shaul vido a David salir al enkontro del Pelishtio, disho a Avner, mayoral del fonsado: Avner, ¿ijo de kyen es este mansevo? I disho Avner: por la vida de tu alma, o rey, no se. ⁵⁶I disho el rey: pregunta tu de kyen es ijo este mansevo.

⁵⁷I kuando David se tornava de erir al Pelishtio, Avner lo tomo, i lo trusho delante de Shaul, kon la kavesa del Pelishtio en su mano. ⁵⁸I Shaul le disho: mansevo, ¿ijo de kyen eres? I disho David: ijo de tu syervo Yishay de Bet-Lehem.

[1]o , ¿no ay kavza?

18

¹I fue ke komo akavo de avlar kon Shaul, el alma de Ye’hontan fue atada kon el alma de David, i Ye’honatan lo amo komo a su alma. ²I Shaul lo tomo akel dia, i no lo desho tornar a kaza de su padre. ³I tajo Ye’honatan firmamyento kon David, por lo ke lo amava komo a su alma. ⁴I Ye’honatan se desnudo el manto ke tenia sovre si, i lo dyo a David, i sus vestidos, asta su espada, i asta su arko, asta su senyidero. ⁵I salia David a kualkyer parte ke Shaul lo enbiava, i se komportava prudentemente; i Shaul lo puzo sovre los varones de gerra; i agrado en ojos de todo el puevlo, i tambyen en ojos de los syervos de Shaul.

⁶I akontesyo ke komo venian, kuando David tornava de erir al Pelishtio, salyeron las mujeres de todas las sivdades de Yisrael kantando i baylando, a resivir al rey Shaul, kon panderos, kon alegria, i kon sonajas. ⁷I kantavan las mujeres ke baylavan, i dizian: Shaul iryo a sus miles, i David a sus milaryas. ⁸I Shaul se enojo mucho, i puzo esta palavra en sus ojos, i disho: a David dyeron milaryas, i a mi dyeron miles; ¿i ke le falta mas ke el reyno? ⁹I Shaul mirava a David kon mal ojo dezde akel dia en adelante.

¹⁰I akontesyo al otro dia, ke el espirito malo del Dyo paso sovre Shaul, i profetizava adyentro de la kaza; i David tanyia kon su mano komo los otros dias; i avia una lansa en mano de Shaul. ¹¹I echo Shaul la lansa i disho: erire a David kon la pared. I David se abolto de delante de el dos vezes. ¹²I Shaul temia de David, porke A’ era kon el, i se avia apartado de Shaul. ¹³I Shaul lo aparto de si, i lo puzo por mayoral de mil; i salia i entrava delante del puevelo.

¹⁴I David se komportava prudentemente en todos sus kaminos, i A’ era kon el. ¹⁵I vyendo Shaul ke se komportava tan prudentemente, temia de el. ¹⁶Ma todo Yisrael i Ye’huda amavan a David, porke el salia i entrava delante de eyos.

¹⁷I disho Shaul a David: ek mi ija mayor Merav, te la dare por mujer, kon tal ke me seas ombre vayente, i peleas las peleas de A’. Ma Shaul dizia en si: no sea mi mano sovre el, ma sea sovre el la mano de los Pelishtios. ¹⁸I disho David a Shaul: ¿kyen soy yo, i ke es mi vida, i el linaje de mi padre en Yisrael, ke yo sea yerno del rey? ¹⁹I akontesyo ke al tyempo en ke Merav, ija de Shaul, se avia de dar a David, fue dada por mujer a Adriel el Meholatita. ²⁰I Mihal, la otra ija de Shaul, amava a David; i lo kontaron a Shaul, i la koza plazyo en sus ojos. ²¹I Shaul disho en si: yo se la dare, para ke le sea por enkampamyento, i para ke la mano de los Pelishtios sea sovre el. I disho Shaul a David: kon una de las dos seras mi yerno oy. ²²I Shaul enkomendo a sus syervos: avlad a David en sekreto, dizyendo: ek, envulanta en ti el rey, i todos sus syervos te aman; agora pues seas yerno del rey. ²³I los syervos de Shaul avlaron estas palavras en oidos de David. I disho David: ¿vos parese livyano ser yerno del rey, syendo yo varon povre i despresyado? ²⁴I los syervos de Shaul le kontaron, dizyendo: talas palavras avlo David.

²⁵I disho Shaul: ansi diresh a David: no esta la veluntad del rey en dote, sino en syen serraduras de Pelishtios, para vengarse de los enemigos del rey. Ma Shaul pensave de azer kaer a David en mano de los Pelishtios. ²⁶I komo sus syervos kontaron a David estas palavras, plazyo la koza en ojos de David, para ser yerno del rey. I dainda los dias no se kumplyeron. ²⁷I David se levanto i anduvo, el i sus varones i iryo de los Pelishtios dossyentos varones; i David trusho sus serraduras, i las entregaron todas al rey, para ser yerno del rey. I Shaul le dyo a Mihal su ija por mujer. ²⁸I Shaul vido i konosyo ke A’ era kon David, i ke Mihal, ija de Shaul lo amava. ²⁹I temyose mas Shaul de David; i fue Shaul enemigo de David todos los dias. ³⁰I salian los mayorales de los Pelishtios; i era, ke kada vez ke salian, David se komportava mas prudemente ke todos los syervos de Shaul; i su nombre era muy presyado.

19

¹I avlo Shaul a Yonatan su ijo, i a todos sus syervos, para ke mataran a David; ma Ye’honatan, ijo de Shaul, enveluntava en David mucho. ²I Ye’honatan dyo avizo a David, dizyendo: Shaul mi padre bushka de matarte; i agora guardate, te rogo asta la manyana, i estate en sekreto, i eskondete. ³I yo saldre i estare al lado de mi padre en el kampo onde estuvyeres, i yo avlare de ti a mi padre; i vere ke ay, i te lo are saver.

⁴I Ye’honatan avlo byen de David a Shaul su padre, i le disho: no peke el rey kontra su syervo, kontra David; porke el no peko kontra ti, i porke sus echos te an sido muy beunos. ⁵I puzo su alma en su palma, i iryo al Pelishtio, i izo A’ salvasyon grande a todo Yisrael. Tu lo viste, i te alegraste; ¿por ke pues pekaras kontra sangre inosente, matando a David sin kavza? ⁶I eskucho Shaul a la boz de Ye’honatan, i Shaul djuro: bivo A’, no sera matado. ⁷I yamo Ye’honatan a David, i Ye’honatan le konto todas estas palavras; i Ye’honatan trusho a David a Shaul, i estuvo delante de el komo [1]antes.

⁸I uvo de nuevo gerra; i salyo David i peleo kon los Pelishtios, i los iryo kon matansa grande, i fuyeron delante de el. ⁹I el espirito malo de A’ fue sovre Shaul; i estava sentado en su kaza kon su lansa en su mano, i David estava tanyendo kon la mano. ¹⁰I Shaul bushko de atravesar a David kon la lansa en la pared; ma el se aparto de delante de Shaul, el kual iryo kon la lansa en la pared. I David fuyo, i se eskapo akeya noche.

¹¹I Shaul enbio mensajeros a kaza de David para guardarlo, i para matarlo a la manyana; ma Mihal su mujer lo deskuvryo a David, dizyendo: si no eskapares tu vida esta noche, manyana seras matado. ¹²I Mihal abasho a David por la ventana; i el se fue, i fuyo, i se eskapo. ¹³I Mihal tomo los terafim, i los puzo en la kama, i puzo por kavesal un koshin de pelo de kavras, i los kuvijo kon un panyo. ¹⁴I kuando Shaul enbio mensajeros para tomar a David, eya disho: esta hazino. ¹⁵I otra vez Shaul enbio los mensajeros para ver a David, dizyendo: traedmelo en la kama para ke lo mate. ¹⁶I los mensajeros entraron, i ek, los terafim estavan en la kama, i un koshen de pelo de kavras por su kavesal. ¹⁷I disho Shaul a Mihal: ¿por ke me enganyaste ansi, i soltaste a mi enemigo de modo ke se eskapo? I disho Mihal a Shaul: el me disho: deshame ir; por ke tengo ke matarte? ¹⁸I fuyo Davud, i se eskapo, i vino a Shemuel a Rama, i le konto todo lo ke Shaul le avia echo. I se fue el i Shemuel , i moraron en Nayot.

¹⁹I fue dado avizo a Shaul, dizyendo: ek David esta en Nayot en Rama. I enbio Shaul mensajeros para tomar a David. ²⁰I vyeron a la kompanyas de los profetas ke profetizavan, i a Shemuel ke estava rejyendo sovre eyos, i fue el espirito del Dyo sovre los mensajeros de Shaul, i tambyen eypos profetizaron. ²¹I dyeron avizo a Shaul, i enbio otros mensajeros, i eyos tambyen prefetizaron. I Shaul torno a enbiar terseros mensajeros, i eyos tambyen profetizaron. ²²I el tambyen anduvo a Rama, i vino asta el pozo grande ke esta en Sehu, i el pregunto i disho: ¿onde estan Shemuel i David? I le fue dicho: ek, estan en Nayot en Rama. ²³I anduvo ayi a Nayot en Rama; i fue sovre el tambyen el espirito del Dyo, i iva andando i profetizando asta ke vino a Nayot en Rama. ²⁴I el tambyen se desnudo sus vestidos, i profetizo el tambyen delante de Shemuel, i kayo desnudo todo akel dia, i toda la noche. Por tanto dizian: ¿tambyen Shaul entre los profetas?

[1]Ebreo: ayer i anteayer

20

¹I David fuyo de Nayot en Rama, i vino i disho delante de Ye’honatan: ¿ke ize? ¿ ke es mi delito? ¿i ke es mi pekado delante de tu padre ke el bushka de tomar mi vida? ²I el le disho: leshos sea, no muriras. Ek, mi padre no ara koza grande ni chika. sin ke la deskuvra en mi oreja ¿i por ke enkuvrira mi padre esta koza de mi? no es ansi. ³I David djuro de nuevo, i disho: tu padre save byen ke yo topi grasya en tus ojos, i dize: no sepa esto Ye’honatan, para ke no se atriste; i por syerto, bivo A’, i por la vida de tu alma, no ay mas ke un paso entre mi i la muerte. ⁴I disho Ye’honatan a David: ke dize tu alma, i lo yo are por ti. ⁵I disho David a Ye’honatan: ek, manyana sera nueva luna, i yo estoy akostumbrado a sentarme kon el rey a komer; ma tu me desharas ir para ke me eskonda en el kampo asta la tarde del terser dia. ⁶I kuando tu padre me topare faltado, diras: demandar demando de mi David lisensya de korrer a Bet-Lehem su sivdad; porke todo el linaje tyene ayi sakrifisyo anual. ⁷Si el dishere ansi: byen esta, tu syervo tendra paz; ma si se enoajare mucho, save ke el mal esta determinado de su parte. ⁸Aras pues mersed kon tu syervo, porke trushiste a tu syervo kontigo en firmamyento de A’, i si ay delito en mi, matame tu; ¿por ke me traeras asta tu padre? ⁹I disho Ye’honatan leshos sea [1]de mi, si ensender ensendyere yo ke mal fuere determinado de parte de mi padre para venir sovre ti, ke yo no te deskuvryera. ¹⁰Entonses disho David a Ye’honatan: ¿kyen me dara avizo, o si tu padre te respondyere kon dureza? ¹¹I disho Ye’honatan a David: ven, i salgamos al kampo. I salyeron ambos al kampo.

¹²I disho Ye’honatan a David: por A’ Dyo de Yisrael kuando avre peskuzado a mi padre komo a esta ora manyana, o al terser dia , i ek, si el avlare byen por David, i entonses yo enbiare a ti , i lo deskuvryere a tu oreja, A’ aga ansi a Ye’honatan, i ansi anyada. ¹³Ma si plazyere a mi padre de azerte mal, entonses lo deskuvrire a tu oreja, i te enbiare, i andaras en paz; i A’ sea kontigo, komo fue kon mi padre. ¹⁴I no solamente myentras ke yo bivo aras konmigo mersed de A’, para ke no muera: ¹⁵ma ke no tajes tu mersed de mi kaza para syempre, ni aun kuando A’ tajare a los enemigos de David kada uno de sovre las fases de la tyerra. ¹⁶Ansi Ye’honatan tajo firmamyento kon la kaza de David, dizyendo: A’ lo bushke de la mano de los enemigos de David. ¹⁷I otra vez Ye’honatan kondjuro a David por el amor ke le tenia; porke lo amava komo a su alma.

¹⁸I Ye’honatan le disho: manyana es nueva luna; i te seras faltado, porke tu asyento sera vazio. ¹⁹I estaras tres dias, i luego desenderas, i vendras al lugar onde estavas eskondido en el dia del echo, i esperaras al lado de la pyedra de Azel. ²⁰I yo tirare tres saetas a su lado, komo ke yo tirara al fito. ²¹I ek, enbiare el moso; dizyendo: va bushka las saetas. Si yo dishere al moso: ek, las saetas estan mas aki de ti, tomalas; entonses ven, porke tyenes paz, i no ay nada de mal bivo A’. ²²Ma si yo dishere al moso ansi: ek, las saetas estan delante de ti, entonses vate, porke A’ te enbio. ²³I tokante a la palavra ke avlamos yo i tu, ek, A’ sea testigo entre mi i ti para syempre.

²⁴I David se eskondyo en el kampo; i fue la nueva luna, i el rey se asento a la meza para komer. ²⁵I el rey se asento sovre su asyento komo kada vez, en el asyento de la pared; i Ye’honatan se levanto, i Avner se asento al lado de Shaul, i el lugar de David kedo vazio. ²⁶Ma akel dia Shaul no avlo nada; porke disho en si: le akontesyo alguna koza; no esta limpyo, syertamente no esta limpyo.

²⁷I al otro dia, al segundo dia del mez, akontesyo ke el lugar de David estava vazio; i Shaul disho a Ye’honatan su ijo: ¿por ke no vino el ijo de Yishay ni ayer ni oy a la meza? ²⁸I respondyo Ye’honatan a Shaul: David demandar me demando ke lo deshare ir asta Bet-Lehem. ²⁹I disho: te rogo ke me deshes ir, porke tenemos sakrifisyo del linaje en la sivdad, i mi ermano mizmo me enkomendo ke yo vaya; i agora, si ayi grasya en tus ojos, me eskapare agora, i vijitare a mis ermanos. Por tanto no vino a la meza del rey.

³⁰I el fulor de Shaul se ensendyo kontra Ye’honatan, i le disho: ¡ijo de la atorsedera i revelde! no se yo ke eskojiste al ijo de Yishay por tu rejisto , i por rejisto de la verguensa de tu madre? ³¹Porke todos los dias ke el ijo de Yishay bivyere sovre la tyerra, ni tu seras firmo, ni tu reyno. Por tanto agora enbia i traemelo, [2]porke tyene ke murir.

³²I Ye’honatan respondyo a Shaul su padre, i le disho: ¿por ke sera matado? ¿ke izo? ³³I Shaul lo arrojo la lansa por erirlo; i Ye’honatan entendyo ke su padre estava determinado de matar a David. ³⁴I Ye’honatan se levanto de la meza kon eresimyento de fulor, i no komyo pan el segundo dia del mez; porke se atristo por David, porke su padre lo avia frontado.

³⁵I akontesyo a la manyana ke Ye’hontan salyo al kampo al tyempo aplazado kon David, i un muchacho pekenyo kon el. ³⁶I disho a su muchahcho: korre, bushka agora las saetas ke yo tiro. I el muchacho korryo, i el tiro la saeta ke pasara mas aya de el. ³⁷I kuando vino el muchacho asta el lugar de la saeta ke Ye’honatan avia tirado, Ye’honatan grito detras del muchahcho, i disho ¿no esta la saeta adelante de ti? ³⁸I Ye’honatan grito detras del muchahco: presto, apresurate, no te detengas. I el muchacho de Ye’honatan akojyo las saetas, i vino a su senyor. ³⁹I el muchacho no entendyo nada; solamente Ye’honatan i David entendian la koza. ⁴⁰I Ye’honatan dyo sus armas a su muchacho, i le disho: vate, yevalas a la sivdad. ⁴¹Luego ke el muchacho se avia ido, David se levanto de la parte del sud, i se echo sovre sus fases a tyerra, i se enkorvo tres vezes, i se bezaron el uno al otro, i yoraron el uno kon el otro, asta ke David muchiguo el yoro. ⁴²I disho Ye’honatan a David: vate en paz; porke ambos djurimos por el nombre de A’, dizyendo: sea entre mi i ti, i entre mi semen i tu semen para syempre.

[1]Ebreo: a ti

[2] Ebreo: ijo de muerte

Ver todos los capítulos publicados en esta sección

 ————————————————————————

About Yehuda Sidi

I was born in 1953 in Tekirdag, Turkey and grew up in Canakkale. My father Hayim Sidi served as rabbi in both Tekirdag and Cannakale. Yehuda immigrated to Israel at 1971 and has been living in Israel since then. I am a softwere engineer. I am neither a Ladino nor a Tanach scholar. Actually I have very basic knowlede in Judeo Espanyol.

A year ago I looked for a Ladino Tanach in latin characters, and eventually I ended transcribing the Ladino Tanach which was published bt the Protestant missionaries who were vet active in the Speharadic world in the 19th century. This Tanach (and other books) were very popular with the Sepharadic Jews. This Tanach was published in two volumes.

So far I have transcribed the Tora. I am now in the process of transcribing the rest of the first volume which covers Ye’hoshua, Shoftim, Shemuel Alef, Shemuel Bet, Melachim Alef and Melachim Bet. I hope to complete the transcription in a few months.

The transcription was not reviewed by the Ladino scholars. Please report the errors that you find.