Sefer Tora en Djudeo Espanyol – Transkrivida kon letras latinas del livro por Ye’huda Sidi / SHEMUEL ALEF (11-15)

Ver todos los capítulos publicados en esta sección

Sefer TORA NEVIIM UKETUVIM
El livro de la Ley, los Profetas, las Eskrituras
Trazladado en la lingua Espanyola
Estamperea de A. ‘H. Boyadjian
Konstantatinopla 1873

Transkrivido por Ye’huda Sidi. Febrero 2015

SHEMUEL ALEF

11

¹I suvyo Nahash el Amonita, i pozo serka de Yavesh-Gilad. I todos los varones de Yavesh disheron a Nahash: taja firmamyento kon nozotros, i te serviremos. ²I Nahash el Amonita les disho: kon esta kondisyon tajare firmamyento kon vozotros, ke vos arranke a todos el ojo derecho, i lo ponga por repudyo sovre todo Yisrael. ³I los vyejos de Yavesh le disheron: deshanos syete dias, para ke enbiemos mensajeros por todo el termino de Yisrael; i si no uvyere kyen nos salve, entonses saldremos a ti. ⁴I vinyeron los mensajeros a Giva de Shaul, i avlaron las palavras en oidos del puevlo. I todo el puevlo alsaron su boz, i yoraron. ⁵I ek, Shaul venia del kampo detras de los bueyes; i disho Shaul: ¿ke tyene el puevlo ke yoran? I le kontaron las palavras de los varones de Yavesh. ⁶I el espirito del Dyo paso sovre Shaul kuando oyo estas palavras, i se ensendyo su fulor mucho. ⁷I tomo un par de bueyes, i los desmembro, i los enbio por todo el termino de Yisrael por mano de unos mensajeros dizyendo: todo el ke no salyere detras de Shaul i detras de Shemuel, ansi sera echo a sus bueyes, I kayo pavor de A’ sovre el puevlo, i salyeron todos komo un varon. ⁸I los konto en Bezek; i fueron los ijos de Yisrael tressyentos mil, i los varones de Ye’huda trenta mil. ⁹I disheron a los mensajeros ke avian vinido: ansi diresh a los varones de Yavesh-Gilad: manyana en kayentando el sol, tendresh salvasyon. I vinyeron los mensajeros, i lo kontaron a los varones de Yavesh, los kuales se alegraron. ¹⁰I disheron los varones de Yavesh: manyana saldremos a vozotros, i aresh a nozotros todo lo ke vos parese byen.

¹¹I fue ke al otro dia, Shaul puzo al puevlo en tres kompanyas, i vinyeron en medyo del real a la guardya de la manyana, i iryeron a los Amonitas asta kayentarse el dia. I fue, ke los ke kedaron fueron esparzidos, ke no kedaron dos de eyos djuntos. ¹²I disho el puevlo a Shemuel: ¿kyen es el ke dizia? ¿enreynera Shaul sovre nozotros? dad los varones, i los mataremos. ¹³I disho Shaul: no sera matado ninguno en este dia; porke oy izo A’ salvasyon en Yisrael.

¹⁴I disho Shemuel al puevlo: venid i vamos a Gilgal, i renovaremos ayi el reyno. ¹⁵I anduvyeron todo el puevlo a Gilgal, i izyeron enreynar ayi a Shaul delante de A’ en Gilgal; i sakrifikaron ayi sakrifisyos de pases delante de A’. I se alegraron mucho ayi Shaul i todos los varones de Yisrael.

12

¹I disho Shemuel a todo Yisrael: ek, yo eskuchi a vuestra boz en todo lo ke me dishistesh, i ize enreynar rey sovre vozotros: ²i agora, ek, el rey anda delante de vozotros, i yo ya soy vyejo i kano, i ek, mis ijos estan kon vozotros; i yo anduvi delande de vozotros dezde mi mosedad asta este dia. ³Aki estoy; atestiguad kontra mi delante de A’, i delante de su untado. ¿El buey de kyen tomi, i el azno de kyen tomi, i a kyen sovreforsi, a kyen kevranti, i de mano de kyen tomi presyo por enkuvrir mis ojos por eyos? i yo lo tornare a vozotros. ⁴I disheron: no nos sovreforsaste, ni nos kevrantaste, ni tomaste algo de mano de ninguno. ⁵I el les disho: A’ es testigo kontra vozotros, i su untado es testigo en este dia, ke no topastesh en mi mano ninguna koza. I disheron: testigo. ⁶I disho Shemuel al puevlo: A’ es ke ordeno a Moshe i A’haron, i ke izo suvir a vuestros padres de la tyerra de Ayifto. ⁷I agora paradvos, i razonare kon vozotros delante de A’ de todas las djustedades de A’, ke el izo a vozotros i a vuestros padres. ⁸Despues ke Yaakov vino a Ayifto, i vuestros padres esklamaron a A’, enbio a Moshe i a A’haron, i sakaron a vuestros padres de Ayifto, i los izyeron morar en este lugar. ⁹I se olvidaron de A’ su Dyo, i el los vendyo en mano de Sisera, kapitan del fonsado de Hatsor, i en mano de los Pelishtios, i en mano del rey de Moav, los kuales pelearon kon eyos. ¹⁰I esklamaron a A’, i disheron: pekimos, porke deshimos a A’, i servimos a los Baalim i a Ashtarot; i agora eskapanos de mano de nuestros enemigos, i te serviremos. ¹¹I A’ enbio a Yerubaal, i a Bedan, i a Yiftah, i a Shemuel, i vos eskapo de mano de vuestros enemigos al derredor, i morastesh seguros. ¹²I komo vistesh ke Nahash, rey de los ijos de Amon, venia kontra vozotros, me dishistesh: no, sino ke rey enreynara sovre nozotros, myentras ke A’ vuestro Dyo, es vuestro rey. ¹³I agora, ek el rey ke eskojistesh, i ke demandastesh; i ek, A’ puzo sovre vozotros rey. ¹⁴Si temeresh a A’, i lo serviresh, i oyeresh a su boz, i no reveyaresh al dicho de A’, tanto vozotros komo el rey ke enreynare sovre vozotros, seresh detras de A’ vuestro Dyo. ¹⁵Ma si no oyeresh a la boz de A’, i reveyaresh al dicho de A’, i reveyaresh a la boz de A’, i reveyaresh al dicho de A’, la mano de A’ sera kontra vozotros, i kontra vuestros padres. ¹⁶Tambyen agora paradvos, i mirad esta gran koza ke A’ ara delante de vuestros ojos. ¹⁷¿No es la segada de los trigos oy? Yo yamare a A’, i el dara truenos i luvya, para ke sepash, i veash ke es grande vuestra maldad ke izistesh en ojos de A’, en demandandovos rey. ¹⁸I Shemuel yamo a A’, i A’ dyo truenos i luvya en akel dia; i todo el puevlo temyo mucho a A’ i a Shemuel. ¹⁹I disheron todo el puevlo a Shemuel: az orasyon por tus syervos a A’ tu Dyo, para ke no muramos; porke anyadimos sovre todos nuestros pekados este mal, de demandar rey para nozotros. ²⁰I disho Shemuel al puevlo: no temash; vozotros izistesh todo este mal; kon todo esto no vos apartesh de detras de A’, sino servid a A’ kon todo vuestro korason. ²¹I no vos apartesh; porke andaresh detras de las vanidades, ke no aprovechan ni eskapan; porke son vanidades. ²²Porke A’ no deshara a su puevlo por amor de su nombre grande; porke A’ envelunto de azervos puevlo suyo. ²³A mi tambyen, leshos sea de mi de pekar kontra A’, detenyendome de azer orasyon por vozotros; i vos anbezare el kamino bueno de derecho. ²⁴Solamente temed a A’, i servildo de verdad kon todo vuestro korason; porke mirad kuan grandes kozas el izo kon vozotros. ²⁵Ma si izyeresh mal, tanto vozotros komo vuestro rey seresh destruidos.

13

¹Entonses Shaul avia enreynado un anyo; i kuando avia enreynado dos anyos sovre Yisrael, ²Shaul eskojyo para si tres mil de Yisrael, de los kuales dos mil estavan kon Shaul en Mihmas, i en el monte de Bet-El, i mil estavan kon Yonatan en Giva de Binyamin; i enbio al resto del puevlo kada uno a su tyenda. ³I Yonatan iryo la guarnisyon de los Pelishtios ke estava en Giva, i lo oyeron los Pelishtios i Shaul izo tanyer kon la trompeta por toda la tyerra, dizyendo: oygan los Ebreos. ⁴I todo Yisrael oyeron dizir: Shaul iryo la guarnisyon de los Pelishtios, i tambyen Yisrael se afedesyo kon los Pelishtios. I el puevlo se adjuntaron detras de Shaul a Gilgal. ⁵I los Pelishtios se adjuntaron para pelear kon Yisrael, trenta mil kuatriguas, i sesh mil kavayeros, i puevlo komo la arena ke esta sovre la oriya de la mar en muchedumbre; i suvyeron i pozaron en Mihmas, al oryente de Bet-Aven. ⁶I kuando los varones de Yisrael se vyeron en estrechura, porke el puevlo estava apretado, el puevlo se eskondyeron en las kuevas, i en las sarzas, i en los penyaskos, i en las torres, i en los pozos. ⁷I algunos de los Ebreos pasaron el Yarden a la tyerra de Gad i de Gilad; i Shaul estava dainda en Gilgal, i todo el puevlo ivan temblando detras de el. ⁸I el espero syete dias segun el plazo ke Shemuel avia dicho; i Shemuel no venia a Gilgal, i se esparzia el puevlo de kon el. ⁹I disho Shaul: ayegadme la alsasyon i los sakrifisyos de pases. I also la alsasyon. ¹⁰I fue, ke komo akavo de alsar la alsasyon, ek, Shemuel vino, i Shaul salyo a resivirlo para [1]saludarlo. ¹¹I disho Shemuel: ¿ke iziste? i disho Shaul: porke vide ke el puevlo se esparzia de konmigo, i ke tu no venias al plazo de los dias, i ke los Pelishtios estavan adjuntados en Mihmas. ¹²I dishe: los Pelishtios desenderan a mi en Gilgal, i no tengo rogado a las fases de A’. I me esforsi, i alsi la alsasyon. ¹³I disho Shemuel a Shaul: enlokesiste; no guardaste la enkomendansa de A’ tu Dyo, ke el te enkomendo; porke agora A’ uvyera konfirmado tu reyno sovre Yisrael para syempre. ¹⁴Ma agora tu reyno no sera firme; A’ bushko para si varon segun su korason, i A’ lo ordeno por prinsipe sovre su puevlo, por lo ke no guardaste lo ke A’ te enkomendo.

¹⁵I Shemuel se levanto, i suvyo de Gilgal a Giva de Binyamin. I Shaul konto al puevlo ke se topavan kon el, komo seshsyentos varones. ¹⁶I Shaul i Yonatan su ijo, i el puevlo ke topava kon eyos, se kedaron en Giva de Binymin; i los Pelishtios avian pozado en Mihmas. ¹⁷I los danyadores salyeron del real de los Pelishtios en tres kompanyas; la una kompanya se bolvyo por el kamino de Ofra a la tyerra de Shual: ¹⁸i otra kompanya se bolvyo por el kamino de Bet-Horon, i otra kompanya se bolvyo por el kamino del termino ke mira sovre el vaye de Tsevoim al dizyerto.

¹⁹I no se topava fyerrero en toda la tyerra de Yisrael; porke los Pelishtios avian dicho: no sea ke los Ebreos agan espada o lansa. ²⁰I todos los de Yisrael desendian a los Pelishtios para aguzar kada uno su azadon, i su resha, i su destral, i su sacho. ²¹Ma tenian una lima para los azadones, i para las reshas, i para las forkiyas de tres dyentes, i para los destrales, i para adovar el punchon. ²²I akontesyo ke el dia de la batalya, no se topo espada ni lansa en mano de ninguno de todo el puevlo ke estava kon Shaul i kon Yonatan; solamente se topo a Shaul i a Yonatan su ijo. ²³I salyo la guardya de los Pelishtios al pasaje de Mihmas.

[1] Ebreo: Bendizirlo

14

¹I akontesyo un dia, ke Yonatan, ijo de Shaul, disho al moso ke yevava sus armos: ven, i pasaremos a la guarnisyon de los Pelishtios, ke esta mas aya. I no lo izo saver a su padre. ²I Shaul estava en el kavo de Giva, debasho de un granado ke avia en Migron; i el puevlo ke estava kon el era komo seshsyentos varones. ³I Ahiya ijo de Ahituv, ermano de I-Kavod, ijo de Pinhas, ijo deEli el saserdote de A’ en Shilo, yevava el espaldar. I el puevlo no savia ke Yonatan se avia ido. ⁴I entre los pasajes onde Yonatan bushkava de pasar a la guarnisyon de los Pelishtios, avia un dyente de penyasko de la una parte, i un dyente de penyasko en la otra parte. I el nombre de uno era Bozez, i el nombre del otro Sene: ⁵el un dyente parado al norte enfrente de Mihmas, i el otro al sud enfrente de Gava. ⁶I disho Ye’honatan al moso ke yevava sus armas: ven i pasaremos a la guarnisyon de estos serrados; kizas ara A’ por nozotros; porke no ay a A’ detenimyento de salvar kon muchos o kon pokos. ⁷I el ke yevava sus armas le disho: az todo lo ke tyenes en tu korason; akostate, ek, yo estoy kontigo a tu veluntad. ⁸I disho Ye’honatan: ek, pasaremos a estos varones i nos deskuvriremos a eyos. ⁹Si nos disheren ansi: esperad asta ke yegamos a vozotros; entonses no estaremos en nuestro lugar, i no suviremos a eyos. ¹⁰Ma si disheren ansi: suvid a nozotros: entonses suviremos, porke A’ los entrego en nuestra mano; i esto nos sera por senyal. ¹¹I se deskuvryeron los dos a la guarnisyon de los Pelishtios; i los Pelishtios disheron: ek, los Ebreos salen de los burakos onde se eskondyeron. ¹²I los varones de la guarnisyon respondeyeron a Yonatan i al ke yevava sus armas, i disheron: suvid a nozotros, i vos mostraremos una koza. I disho Yonatan al ke yevava sus armas: suve detras de mi, porke A’ los entrego en mano de Yisrael. ¹³I suvyo Yonatan trepando kon sus manos i kon sus pyes, i detras de el el ke yevava sus armas. I kayeron delante de Yonatan, i el ke yevava sus armas matava detras de el. ¹⁴I la primera erida ke iryo Yonatan kon el ke yevava sus armas, fue komo unos vente varones, en la mitad del espasyo de kampo ke un par de bueyes pueden arar. ¹⁵I uvo estremisyon en el real, en el kampo, i en todo el puevlo; la guarnisyom i los danyadores, tambyen eyos se estremesyeron, i temblo la tyerra; i fue estremisyon del Dyo. ¹⁶I los atalalayadores ke Shaul tenia en Giva de Binyamin vyeron; i ek, el fonsado era desecho, i iva majandose.

¹⁷I disho Shaul al puevlo ke estava kon el: kontad agora la djente, i ved kyen anduvo de kon nozotros. I kontaron: i ek, Yonatan i el ke yevava sus armas no estavan ayi. ¹⁸I disho Shaul a Ahiya: ayega el arka del Dyo. Porke el arka del Dyo estava akel dia kon los ijos de Yisrael.

¹⁹I akontesyo, ke myentras ke Shaul estava avlando al saserdote, la rebuelta ke avia en el real de los Pelishtios iva andando i muchiguandose. I disho Shaul al saserdote: rekoje tu mano. ²⁰I Shaul i todo el puevlo ke estava kon el se adjunatron, i vinyeron asta la batalya; i ek, la espada de kada uno era buelta kontra su kompanyero, kon matansa muy grande. ²¹I los Ebreos ke estavan kon los Pelishtios [1]de tyempo antes, ke avian suvido kon eyos en el real al derredor, tambyen eyos se pelearon para ser kon los Yisraelitas i estavan kon Shaul i Yonatan. ²²I todos los varones de Yisrael ke se avian eskondido en el monte de Efrayim, oyendo ke los Pelishtios fuian, tambyen eyos persigyeron detras de eyos en la batalya. ²³I A’ salvo a Yisrael en akel dia; i la batalya paso a Bet-Aven.

²⁴I los varones de Yisrael fueron apretados akel dia, porke Shaul avia kondjuardo al puevlo, dizyendo: maldicho sea el varon ke komyere pan asta la tarde, asta ke me ayga vengado de mis enemigos. I todo el puevlo no gosto pan. ²⁵I toda la djente de la tyerra vinyeron a una shara; i avia myel sovre la faz del kampo. ²⁶I entro el puevlo en la shara, i ek, korria la myel, i no uvo ninguno ke yevara su mano a su boka; porke el puevlo temia por la djura. ²⁷Ma Yonatan no oyo kuando su padre kondjuro al puevlo, i estendyo la punta de la vara ke tenia en su mano, i la unto en un panal de myel, i torno su mano a su boka; i sus ojos fueron aklarados. ²⁸I respondyo uno del puevlo, i disho: kondjuro tu padre al puevlo, dizyendo: maldicho sea el varon ke komyere pan oy. I el puevlo estava kansado. ²⁹I disho Yonatan: mi padre konturvo la tyerra; mirad agora komo se aklararon mis ojos por aver gostado un poko de esta myel. ³⁰¿Kuanto mas si el puevlo uvyere komido oy del espojo de sus enemigos ke topo? porke agora ¿no se uvyere muchiguado la matansa en los Pelishtios? ³¹I en akel dia iryeron a los Pelishtios dezde Mihmas asta Ayalon; i el puevlo se kanso mucho. ³²I el puevlo bolo al espojo, i tomaron ovejas, i vakas, i bezerros, i los degoyaron en tyerra, i el puevlo komyo kon la sangre. ³³I dyeron avizo a Shaul, dizyendo: ek, el puevlo peka kontra A’, komyendo kon la sangre. I el disho: vozotros falsastesh; rodeadme agora una pyedra grande. ³⁴I disho Shaul: esparzidvos en el puevlo, i dizeldes: traedme kada uno su buey, i kada uno su karnero, i degoyad aki, i komed, i no pekesh kontra A’ kon la sangre. I trusheron todo el puevlo kada uno su buey kon su mano akeya noche, i los degoyaron ayi. ³⁵I fraguo Shaul ara a A’, la kual fue primera ara ke fraguo a A’.

³⁶I disho Shaul: desendadmos de noche detras de los Pelishtios, i los prearemos asta la luz de la manyana, i no desharemos de eyos ninguno. I disheron: az todo lo ke te parese byen. I disho el saserdote: nos ayegemos aki al Dyo. ³⁷I Shaul demando al Dyo: ¿desendere detras de los Pelishtios? ¿los entregares en mano de Yisrael? ma no le respondyo en akel dia. ³⁸I disho Shaul: ayegadvos aki todos los prinsipales del puevlo, i saved i mirad en ke fue este pekado oy. ³⁹Porke bivo A’, ke salva a Yisrael, aunke sea en Yonatan mi ijo, murir murira. I no uvyo en todo el puevlo kyen le respondyera. ⁴⁰I disho a todo Yisrael: vozotros estaresh a un lado, i yo i Yonatan mi ijo estaremos a otro lado. I disheron el puevlo a Shaul: az lo ke te parese byen. ⁴¹I disho Shaul a A’ Dyo de Yisrael: da suerte prenizma. I fue prendido Yonatan i Shaul, i el puevlo salyeron livres. ⁴²I disho Shaul: echad entre mi i Yonatan mi ijo. I fue prendido Yonatan. ⁴³I disho Shaul a Yonatan: dime lo ke iziste. I Yonatan lo konto i disho: gostar gosti kon la punta de la vara ke tenia en mi mano un poko de myel; ek, tengo ke murir. ⁴⁴I disho Shaul: ansi aga el Dyo, i ansi anyada, ke murir muriras Yonatan. ⁴⁵I disho el puevlo a Shaul: ¿tyene ke murir Yonatan, el ke izo esta grande salvasyon en Yisrael? vedado sea; bivo A’ ke no kaera un kaveyo de su kavesa a tyerra; porke a ovrado kon el Dyo en este dia. I el puevlo reskataron a Yonatan, i no muryo.

⁴⁶I suvyo Shaul de persegir detras de los Pelishtios; i los Pelishtios se fueron a su lugar. ⁴⁷I Shaul prendyo el reyno sovre Yisrael, i peleo kon todos sus enemigos al derredor, kon Moav, i kon los ijos de Amon, i kon Edom, i kon los reyes de Tsova, i kon los Pelishtios, i en kualkyer parte ke se tornava, vensia. ⁴⁸I adjunto fonsado, i iryo a Amalek, i eskapo a Yisrael de mano de los ke reoyavan.

⁴⁹I los ijos de Shaul fueron Yonatan, i Yishvi, i Malki-Shua, i los nombres de sus dos ijas eran, el nombre de la primodjenita Merav, i el nombre de la menor Mihal. ⁵⁰I el nombre de la mujer de Shaul era Ahinoam, ija de Ahimaaz; i el nombre del kapitan de su fonsado era Avner, ijo de Ner, tio de Shaul. ⁵¹I Kish padre de Shaul, i Ner padre de Avner, fueron ijos de Aviel.

⁵²I la gerra era fuerte kontra los Pelishtios todos los dias de Shaul; i kuando Shaul veia kulkyer barragan, i kualkyer varon vayente, lo akojia a si.

[1] Ebreo: ayer i anteayer

15

¹I disho Shemuel a Shaul: A’ me enbio para untarte por rey sovre su puevlo, sovre Yisrael; i agora oye a la boz de las palavras de A’. ²Ansi dize A’ Tsevaot: vijitare sovre Amalek lo ke izo a Yisrael, ke se lo opozo en el kamino, kuando suvia de Ayifto. ³Agora va, i eriras a Amalek, i destruiresh a todo lo ke tyene, i no te apiades de el, ma mataras dezde varon asta mujer, dezde chikito asta mamante, dezde buey asta karnero, dezde kameyo asta azno.

⁴I Shaul adjunto al puevlo, i les konto en Telaim, dossyentos mil ombres a pye, i dyez mil varones de Ye’huda. ⁵I vino Shaul asta la sivdad de Amalek, i aselado en el vaye. ⁶I disho Shaul al Kenio: andavos, retiradvos, desended de entre Amalek, no sea ke yo te taje kon el; porke tu iziste mersed kon todos los ijos de Yisrael, kuando suvian de Ayifto. I el Kenio se retiro de entre Amalek. ⁷I Shaul iryo a Amalek dezde Havila asta la entrada de Shur, ke esta a la frontera de Ayifto. ⁸I prendyo bivo a Agag, rey de Amalek, i a todo el puevlo destruyo a tajo de espada. ⁹I Shaul i el puevlo se apiadaron de Agag, i de lo mejor de las ovejas i de las vakas i de los engordados, i de los karneros, i de todo lo bueno, i no kijyeron destruirlos; ma toda la azyenda despresiavle i desechada akeyo destruyeron.

¹⁰I fue palavra de A’ a Shemuel, dizyendo: ¹¹me arrepenti ke ize enreynar a Shaul por rey; porke se torno de detras de mi, i no afirmo mis palavras, i pezo a Shemuel, i esklamo a A’ toda la noche. ¹²I madrugo Shemuel para enkontrar a Shaul por la manyana. I fue dado avizo a Shemuel, dizyendo: Shaul vino a Karmel, i ek levanto para si un [1]trofeo, i rodeo, i paso, i desendyo a Gilgal. ¹³I vino Shemuel a Shaul, i Shaul le disho: bendicho seas tu de A’; yo afirmi la palavra de A’. ¹⁴I Shemuel disho: ¿i ke boz de ovejas es esta ke vyene en mis orejas, i el bramido de vakas ke oygo? ¹⁵I disho Shaul: de los Amalekitas los trusheron; porke el puevlo se apiado de lo mejor de las ovejas i de las vakas, para sakrifikar a A’ tu Dyo; i el resto destruimos.

¹⁶I disho Shemuel a Shaul: espera i te dire lo ke A’ me avlo anoche. I el le disho: avla.

¹⁷I disho Shemuel: ¿no es verdad ke kuando eras chiko en tus ojos, fuieste echo kavesera de los trivos de Yisrael, i A’ te unto por rey sovre Yisrael? ¹⁸I te enbio A’ en viaje, i disho: va i de destruye a los pekadores, los Amalekitas, i pelea kon eyos asta ke sean konsumidos. ¹⁹¿I por ke no ovedeste a la boz de A’, sino ke bolaste al espojo, i iziste lo malo en ojos de A’.

²⁰I disho Shaul a Shemuel: en verdad ovedesi a la boz de A’, i fue en el kamino ke A’ me enbio, i trushe a Agag, rey de Amalek, i destrui a los Amalekitas. ²¹Ma el puevlo tomo del espojo ovejas i vakas, el prinsipal de lo enheremado, para sakrifikar a A’ tu Dyo en Gilgal.

²²I disho Shemuel: ¿tyene A’ tanta veluntad en alsasyones i sakrifisyos komo en ovedeser a la boz de A’? ek, el ovedeser es mejor ke sakrifisyo, i el eskuchar ke el sevo de barvezes. ²³Porke komo pekado de echizo es el revilyo, i komo tortura i [2]idolatria es el porfiar. Por lo ke tu desechaste la palavra de A’, el te desecho ke no seas rey.

²⁴I disho Shaul a Shemuel: yo peki , porke traspasi el dicho de A’, i tus palavras; porke temi al puevlo, i ovedesi a su boz. ²⁵I agora te rogo ke perdones mi pekado, i torna konmigo, i me enkorvare a A’.

²⁶I disho Shemuel a Shaul: no tornare kontigo; porke desechaste la palavra de A’, i A’ te desecho ke no seas rey sovre Yisrael. ²⁷I komo Shemuel se abolto para irse, el travo de la alda de su mano, i se razgo.

²⁸I Shemuel le disho: A’ razgo el reyno de Yisrael de sovre ti oy, i lo dyo a tu kompanyero mejor ke tu. ²⁹I tambyen el fuerte de Yisrael no mentira, ni arrepentira; porke no es ombre para ke se arrepenta.

³⁰I el disho: yo peki; agora te rogo ke me onres delante de los vyejos de mi puevlo, i delante de Yisrael, i torna konmigo, i me enkorvare a tu Dyo. ³¹I torno Shemuel detras de Shaul; i Shaul se enkorvo a A’.

³²I disho Shemuel: traedme a Agag, rey de Amalek. I Agag vino a el delikademente. I disho Agag: syertamente se paso la amargura de la muerte. ³³I disho Shemuel: komo tu espada desijo mujeres, ansi sera desijada tu madre entre las mujeres. I Shemuel despedaso a Agag delante de A’ en Gilgal.

³⁴I Shemuel se fue a Rama, i Shaul suvyo a su kaza a Giva de Shaul. ³⁵I nunka mas vido Shemuel a Shaul asta el dia de su muerte; empero Shemuel se alimunyo por Shaul. I A’ se arrepentyo ke avia echo enreynar a Shaul sovre Yisrael.

[1]memoryal de viktorya, Ebreo: mano.

[2] Ebreo: terafim

Ver todos los capítulos publicados en esta sección

 ————————————————————————

About Yehuda Sidi

I was born in 1953 in Tekirdag, Turkey and grew up in Canakkale. My father Hayim Sidi served as rabbi in both Tekirdag and Cannakale. Yehuda immigrated to Israel at 1971 and has been living in Israel since then. I am a softwere engineer. I am neither a Ladino nor a Tanach scholar. Actually I have very basic knowlede in Judeo Espanyol.

A year ago I looked for a Ladino Tanach in latin characters, and eventually I ended transcribing the Ladino Tanach which was published bt the Protestant missionaries who were vet active in the Speharadic world in the 19th century. This Tanach (and other books) were very popular with the Sepharadic Jews. This Tanach was published in two volumes.

So far I have transcribed the Tora. I am now in the process of transcribing the rest of the first volume which covers Ye’hoshua, Shoftim, Shemuel Alef, Shemuel Bet, Melachim Alef and Melachim Bet. I hope to complete the transcription in a few months.

The transcription was not reviewed by the Ladino scholars. Please report the errors that you find.