Sefer Tora en Djudeo Espanyol – Transkrivida kon letras latinas del livro por Ye’huda Sidi / SHEMUEL ALEF (1-5)

Ver todos los capítulos publicados en esta sección

Sefer TORA NEVIIM UKETUVIM
El livro de la Ley, los Profetas, las Eskrituras
Trazladado en la lingua Espanyola
Estamperea de A. ‘H. Boyadjian
Konstantatinopla 1873

Transkrivido por Ye’huda Sidi. Febrero 2015

SHEMUEL ALEF

1

¹I uvo un varon de Ramatayim-Tsofim, del monte de Efrayim, i su nombre Elkana. ijo de Yeroham, ijo de Eli’hu, ijo de Tohu, ijo de Tsuf Efratio. ²I el tenia dos mujeres, el nombre de la una Hana, i el nombre de la otra Penina; i Penina tenia ninyos, ma Hana no tenia ninyos. ³I suvia este varon de su sivdad de anyo en anyo, para enkorvarse i para sakrifikar a A’ Tsevaot en Shilo; i ayi avia dos ijos de Eli, Hofni i Pinhas, saserdotes de A’. ⁴I fue ke al dia ke Elkana sakrifiko, dyo a Penina su mujer, i a todos sus ijos i ijas, porsyones. ⁵Ma a Hana dyo una porsyon de dos tantos; porke amava a Hana, aunke A’ avia serrado su bulba. ⁶I su komblesa tambyen la enojava mucho, kon motivo de azer la atristar, porke A’ avia serrado su bulba. ⁷I azyendo el ansi de anyo en anyo, kuando eya suvia a la kaza de A’, la otra de este modo la enojava; i eya yorava i no komia. ⁸I Elkana su marido le disho: ¿por ke yoras? ¿i por ke no komes? ¿i por ke piza en tu korason? ¿no soy yo mejor para ti ke dyez ijos? ⁹I Hana se levanto despues de su komer en Shilo, i despues de su bever. I Eli el saserdote estava sentado sovre una siya djunto al poste del palasyo de A’. ¹⁰I eya era amarga de alma, i azia orasyon a A’, i yorava mucho. ¹¹I prometyo promesa , i disho: A’ Tsevaot, si mirar mirares la afriisyon de tu syerva, i te akordares de mi, i no te olvidares de tu syerva, i dyeres a tu syerva un [1]ijo varon, yo lo dare a A’ todos los dias de su vida, i navaja no suvira sovre su kavesa. ¹²I fue, ke komo eya muchiguava a azer orasyon delante de A’, Eli mirava a su boka. ¹³Ma Hana, eya avlava en su korason, solamente su movian sus lavyos, i no se oia su boz; i Eli la tuvo por borracha. ¹⁴I Eli le disho: ¿asta kuando estaras borracha? kita tu vino de ti. ¹⁵I Hana respondyo, i disho: no, senyor mio; yo soy mujer apretada de espirito; no bevi vino ni sidra, ma verti mi alma delante de A’. ¹⁶No tengas a tu syerva por [2]mujer mala; porke de la muchedumbre de mi kesha i de mi ansya avli asta agora. ¹⁷I Eli respondyo, i disho; vate en paz; i el Dyo de Yisrael te de tu demanda ke demandaste de el. ¹⁸I eya disho: aye tu syerva grasya en tus ojos. I la mujer se fue a su kamino, i komyo, i no tuvo mas su kara triste. ¹⁹I madrugaron por la manyana, i se enkorvaron delante de A’; i se tornaron, i vinyeron a su kaza a Rama. I Elkana konosyo a Hana su mujer, i A’ se akordo de eya. ²⁰I fue, ke a la buelta de los dias despues ke Hana se emprenyo, paryo un ijo, i yamo su nombre Shemuel, dizyendo: porke de A’ lo demandi. ²¹I suvyo el varon Elkana kon toda su kaza para sakrifikar a A’ el sakrifisyo anual, i su promesa. ²²Ma Hana no suvyo; porke disho a su marido: no suvire asta ke el ninyo sea destetado, i entonses lo traere para ke sea prezentado delante de A’, i se kede ayi para syempre. ²³I Elkana su marido le disho: az lo ke te plaze; kedate asta ke lo destetes; solamente A’ afirme su palavra. I se kedo la mujer, i alecho a su ijo asta ke lo desteto. ²⁴I despues ke lo uvo destetado, lo izo suvir konsigo, kon tres toros, i una epa de arina, i un odre de vino, i lo trusho a la kaza de A’ en Shilo; i el ninyo era dainda chiko. ²⁵I degoyaron un toro, i trusheron el ninyo a Eli. ²⁶I eya disho: rogo mi senyor, biva tu alma, mi senyor, yo soy la mujer ke estuvi aki kontigo azyendo orasyon a A’. ²⁷Por este ninyo ize orasyon, i A’ me dyo mi demanda ke demandi de el. ²⁸I tambyen yo le empresti a A’; todos los dias ke bivyere sera emprestado a A’. I se enkorvo ayi a A’.

[1] Ebreo: semen de varones

[2] Ebreo: ija de Beliyaal

2

¹I Hana izo orasyon, i disho: mi korason se goza en A’; mi kuerno se enaltese en A’; mi boka se ensancha sovre mis enemigos, porke me alegro en tu salvasyon. ²No ay santo komo A’; porke no ay otro afuera de ti, i no ay fuerte komo nuestro Dyo. ³No muchiguesh avlando altigueza, altigueza; ni salga palavra fuerte de vuestra boka; porke Dyo de sensyas es A’, i por el son pezadas las ovras. ⁴Los arkos de los barraganes son kevrados, i los flakos se sinyeron de fuersa. ⁵Los artos se alkilaron por pan, i los ambryentos se vedaron, asta ke la manyera paryo syete, i la ke tenia muchos ijos se enflakesyo. ⁶A’ mata, i abidigua; el aze desender a la foya, i aze suvir. ⁷A’ empovrese, i enrikese; abate, i enaltese. ⁸El levanta del polvo al povre, i del muladar enaltese al menesterozo, para asentarlos kon prinsipes, i los aze eredar siya de onra; porke de A’ son los pilares de la tyerra, i el puzo sovre eyos el mundo. ⁹Los pyes de sus buenos guardara, ma los malos se kayaran a la eskuridad; porke ninguno se mayorgara kon fuersa. ¹⁰A’, seran kevrantados sus barajantes; sovre eyos trunara dezde los syelos; A’ djuzgara los kavos de la tyerra, i dara fortaleza a su rey, i enaltesera el kuerno de su untado.

¹¹I Elkana se fue a Rama a su kaza; i el moso ministrava a A’ delante de Eli el saserdote. ¹²Ma los ijos de Eli eran [1]ombres malos; no konosian a A’. ¹³I era la uzansa de los saserdotes kon el puevlo, ke kuando algun varon sakrifikava sakrifisyo, venia el moso del saserdote kuando la karne estava kozyendose, kon un piron de tres dyentes en su mano: ¹⁴i eria en la kaserola, o en la oya, o en el kaldero, o en la la kaldera; i todo lo ke azia suvir el piron, el saserdote lo tomava para si. Ansi azian a todos los Yisraelitas ke venian ayi en Shilo. ¹⁵Tambyen antes ke saumavam el sevo, venia el mose del saserdote, i dizia al varon ke sakrifikava; da karne para asar para el saserdote; porke no tomara de ti karne kozida, sino kruda. ¹⁶I si el varon le dizia: saumar saumaran el sevo agora, i despues tomas para ti komo dezeare tu alma; entonses dizia: no, sino ke agora la daras; i si no, la tomare por fuersa. ¹⁷I el pekado de los mosos era muy grande delante de A’; porke los varones menospresyavan el prezente de A’. ¹⁸I Shemul ministrava delante de A’, syendo moso, syendo de un espaldar de lino. ¹⁹I su madre lo azia un manto pekenyo, i se lo traia de anyo en anyo, kuando suvia kon su marido para sakrifikar el sakrifisyo anual. ²⁰I Eli bendisho a Elkana i a su mujer, i disho: A’ te de semen de esta mujer por el emprestido ke empresto a A’. I anduvyeron a su lugar. ²¹I vijito A’ a Hana, i se ensinto, i paryo tres ijos, i dos ijas. I el moso Shemuel se engrandesyo delante de A’.

²²I Eli era muy vyejo, i oyo todo lo ke sus ijos azian a todo Yisrael, i komo yazian kon las mujeres ke adjuntavan a la puerta de la tyenda del plazo. ²³I les disho: ¿por ke azesh tales kozas? porke yo oygo vuestros malos echos de todo este puevlo. ²⁴No, ijos mios; porke no es buena fama la ke yo oygo; azesh traspasar al puevlo de A’. ²⁵Si pekare ombre kontra ombre, el Dyo lo djuzgara; ma si el ombre pekare kontra A’, ¿kyen ara orasyon por el? Ma eyos no eskucharon a la boz de su padre, porke A’ envelunto de matarlos. ²⁶I el moso Shemuel iva engrandesyendose, i tenia favor tanto kon el Dyo komo kon los ombres.

²⁷I vino un varon del Dyo a Eli, i le disho: ansi dize A’: ¿deskuvrir no me deskuvri a la kaza de tu padre, kuando estavan en Ayifto en la kaza de Paro? ²⁸I yo lo eskoji de todos los trivos de Yisrael por mi saserdote, para alsar sovre mi ara, para saumar saumeryo, para yevar espaldar delante de mi; i di a la kaza de tu padre todas las ofrendas kemadas de los ijos de Yisrael. ²⁹¿Por ke [2]menospresyash a mi sakrifisyo i a mi prezente, ke enkomendi en mi morada; i untarse a tus ijos mas ke a mi, engordandovos de lo mejor de todos los prezentes de mi puevlo Yisrael? ³⁰Por tanto dize A’ Dyo de Yisrael: a la verdad dishe: ke tu kaza i la kaza de tu padre andarian delante de mi para syempre; ma agora dize A’: leshos sea de mi; porke yo onrare a los ke me onran, i los ke me menospresyan seran desonrados. ³¹Ek, vyenen dias kuando kortare tu braso, i el braso de la kaza de tu padre, de todo ke no ayga vyejo en tu kaza. ³²I veras angustya en mi morada, en todo lo ke izyere byen a Yisrael; i no avra vyejo en tu kaza todos los dias. ³³I el varon tuyo ke yo no kortare de mi ara, sera para konsumir tus ojos, i para adoloryar tu alma; i toda la kria de tu kaza muriran mansevos. ³⁴I esto te sera la senyal, lo ke akontesera a tus dos ijos, Hofni i Pinhas: en un dia muriran ambos eyos. ³⁵I yo levantare para mi saserdote fiel, ke ara segun mi korason i segun mi veluntad; i yo lo fraguare kaza firme, i el andara delante de mi untado todos los dias. ³⁶I sera, ke todo el ke uvyere kedado en tu kaza, vendra a enkorvarse a el por una migaja de plata i un bokado de pan, i dira: te rogo ke me empyeges en algun servisyo del saserdosyo, para ke koma un bokado de pan.

[1] Ebreo: ijos de Beliyaal

[2] Ebreo: akoseash

3

¹I el moso Shemuel ministrava a A’ delante de Eli. I la palavra de A’ era presyada en akeyos dias; no avia vizyon deskuvyerta. ²I akontesyo en akel dia, ke estando Eli echado en su lugar, i sus ojos empesavan a eskureserse ke no podia ver: ³i antes ke el kandel del Dyo se amatara, i Shemuel estava durmyendo en el palasyo de A’, onde el arka del Dyo estava: ⁴A’ yamo a Shemuel; i el disho: aki estoy. ⁵I korryo a Eli, i disho: aki estoy, porke me yamaste. I el disho: no yami; tornate i echate. I el anduvo, i se echo. ⁶I torno A’ otra vez a yamar, Shemuel. I Shemuel se levanto, i anduvo a Eli i disho: aki estoy, porke me yamaste. I el disho: no yami, ijo mio; tornate i echate. ⁷I Shemuel dainda no konosia a A’, ni se le fue deskuvyerta dainda palavra de A’. ⁸I torno A’ a yamar a Shemuel la tersera vez; i el se levanto i anduvo a Eli, i disho: aki estoy, porke me yamaste. I Eli entendyo ke A’ yamava al moso. ⁹I disho Eli a Shemuel: va, echate; i sera ke si te yamare, diras: avla A’ porke tu syervo oye. I Shemuel se fue, i se echo en su lugar. ¹⁰I vino A’, i se paro, i yamo komo las otras vezes, Shemuel, Shemuel. I Shemuel disho: avla porke tu syervo oye.

¹¹I disho A’ a Shemuel: ek, yo are koza en Yisrael, ke todo el ke oyere, retenyeran sus dos orejas. ¹²En akel dia afirmare kontra Eli todo lo ke avli tokante a su kaza, empesando i akavando. ¹³I yo le denunsyi ke yo djuzgara a su kaza para syempre, por el delito ke el save; porke sus ijos se izyeron maldichos, i no los defendyo. ¹⁴I por tanto yo djuri tokante a la kaza de Eli, ke el delito de la kaza de Eli no sera ekspiado kon sakrifisyo ni kon prezente para syempre.

¹⁵I Shemuel estuvo echado asta la manyana, i avryo las puertas de la kaza de A’. ¹⁶I Shemuel temia de deskuvrir la vizyon a Eli. I Eli yamo a Shemuel, i disho: Shemuel ijo mio. I el disho: aki estoy. ¹⁷I disho: ¿ke es la palavra ke te avlo? te rogo ke no me la enkuvras. Ansi te aga el Dyo, i ansi anyada, si me enkuvryeres palavra de toda la koza ke te avlo. ¹⁸I Shemuel le konto todas las palavras, i nada le enkuvryo. I el disho: A’ es, aga lo ke le parese byen.

¹⁹I Shemuel se engrandesyo, i A’ era kon el, i no desho kaer a tyerra ninguna de todas sus palavras. ²⁰I konosyo todo Yisrael, dezde Dan asta Beer-Sheva, ke Shemuel era ordenado por profeta a A’. ²¹I torno A’ a apareserse en Shilo; porke A’ se deskuvryo a Shemuel en Shilo kon palavra de A’.

4

¹I fue la palavra de Shemuel a todo Yisrael. I Yisrael salyo en batalya al enkuentro de los Pelishtios, i fueron serka de Even-Ezer; i los Pelishtios fueron en Afek. ²I los Pelishtios se ordenaron kontra Yisrael, i se espandyo la batalya, i Yisrael fue vensido delante de los Pelishtios; i iryeron en la ordenansa en el kampo komo kuatro mil varones. ³I kuando el puevlo vino al real, los vyejos de Yisrael disheron: ¿por ke nos iryo A’ oy delante de los Pelishtios? Tomemos a nozotros de Shilo el arka del firmamyento de A’, i venga en medyo de nozotros, i nos salve de mano de nuestros enemigos. ⁴I enbio el puevlo a Shilo, i alsaron de ayi el arka del firmamyento de A’ Tsevaot, ke esta entre los Keruvim; i los dos ijos de Eli, Hofni i Pinhas, estavan ayi kon el arka del firmayeto del Dyo. ⁵I akontesyo, ke komo el arka del firmamyento de A’ vino al real, todo Yisrael aularon kon aulasyon tan grande ke la tyerra resono. ⁶I kuando los Pelishtios oyeron la boz de la aulasyon, disheron: ¿ke boz de gran aulasyon es esta en el real de los Ebreos? i supyeron ke el arka de A’ avia vinido al real. ⁷I los Pelishtios tuvyeron myedo, porke disheron: vino el Dyo al real. I disheron: ¡guay de nozotros! porke no fue ansi ayer ni anteayer. ⁸¡Guay de nozotros! ¿kyen nos eskapara de mano de estos dyozes fuertes? Estos son los dyozes ke iryeron a Ayifto kon toda yaga en el dizyerto. ⁹Esforsadvos, i sed varones, Pelishtios, para ke no sirvash a los Ebreos, komo eyos sirvyeron a vozotros; sed varones, i pelead. ¹⁰I los Pelishtios pelearon, i Yisrael fue vensido, i fuyeron kada uno a su tyenda; i fue la erida muy grande; i kayeron de Yisrael trenta mil ombres a pye. ¹¹I el arka del Dyo fue tomado, i los dos ijos de Eli, Hofni i Pinhas, muryeron.

¹²I korryo de la ordenansa un varon de Binyamin, i vino a Shilo akel dia, razagados sus vestidos, i tyerra sovre su kavesa. ¹³I komo vino, ek, Eli estava sentado sovre una siya al lado del kamino atalayado; porke su korason estava temblando por el arka del Dyo. I kuando el varon vino en la sivdad para dar las nuevas, toda la sivdad esklamo. ¹⁴I Eli oyo la boz de la esklamasyon, i disho: ¿Ke kyere dizir la boz de esta rebuelta? I el varon se apresuro i vino, i dyo las nuevas a Eli. ¹⁵I era Eli de edad de noventa i ocho anyos, i sus ojos se avian eskuresido, ke no podia ver. ¹⁶I disho el varon a Eli: yo soy el ke vino de la ordenansa, i yo fuyi oy de la ordenansa. I el disho: ¿ke koza akontesyo, ijo mio? ¹⁷I respondyo el avizador, i disho: Yisrael fuyo delante de los Pelishtios, i tambyen uvo mortaldad grande en el puevlo, i tambyen tus dos ijos, Hofni i Pinhas, muryeron, i el arka del Dyo fue tomada. ¹⁸I akontesyo ke kuando enmento el arka del Dyo, Eli kayo de sovre la siya para atras al lado de la puerta, i se kevro su piskuezo, i muryo; porke era varon vyejo i pezagdo. I el avia djuzgado a Yisrael kuarenta anyos.

¹⁹I su nuera, mujer de Pinhas, estava prenyada, serkana al parto; i kuando oyo las nuevas ke el arka del Dyo era tomada, i ke su suegro era muerto, i su marido, se arodiyo i paryo; porke se tornaron sovre eya sus dolores. ²⁰I al tyempo de su murir, le disheron las ke estavan serka de eya: no temas, porke pariste ijo. Ma eya no respondyo, ni paro myentes. ²¹I yamo al ninyo I-Kavod, dizyendo: kativada es la onra de Yisrael; por lo ke fue tomada el arka del Dyo, i por su suegro, i su marido. ²²I eya disho: kativada es la onra de Yisrael, porke el arka del Dyo es tomada.

5

¹I los Pelishtios tomaron el arka del Dyo, i la trusheron de Even-Ezer a Ashdod. ²I tomaron los Pelishtios el arka del Dyo, i la trusheron en la kaza de Dagon, i la pararon al lado de Dagon. ³I madrugaron los Ashdodios al otro dia, i ek, Dagon avia kaido sovre sus fases a tyerra delante del arka de A’. I tomaron a Dagon, i lo tornaron a su lugar. ⁴I madrugaron por la manyana al otro dia , i ek, Dagon avia kaido sovre sus fases a tyerra delante del arka de A’; i la kavesa de Dagon, i las dos palmas de sus manos estavan kortadas sovre el umbral; solamente el tronko de Dagon le avia kedado. ⁵Por tanto los saserdotes de Dagon, i todos los ke entran en la kaza de Dagon, no pizan umbral de Dagon en Ashdod asta este dia.

⁶I la mano de A’ se apezgo sovre los Ashdodios, i los desolo; i los iryo kon almoranas, a Ashdod i a sus terminos. ⁷I kuando los varones de Ashdod vyeron ke les iva ansi. disheron: no kede kon nozotros el arka del Dyo de Yisrael; porke se enduresyo su mano sovre nozotros, i sovre Dagon nuestro dyo. ⁸I enbiaron, i adjunatron a si a todos los prinsipes de los Pelishtios, i disheron: ¿ke aremos kon el arka del Dyo de Yisrael? I eyos disheron: buelvase el arka del Dyo de Yisrael a Gat. I bolvyeron aya el arka del Dyo de Yisrael. ⁹I akontesyo ke despues ke la bolvyeron, la mano de A’ fue kontra la sivdad kon muy grande turvasyon; i iryo a los varones de la sivdad dezde chiko asta grande, i se les kuvryeron los syesos kon almoranas. ¹⁰I enbiaron el arka del Dyo a Ekron; i fue, ke komo el arka del Dyo vino a Ekron, los Ekronitas esklamaron, dizyendo: bolvyeron a mi el arka del Dyo de Yisrael por matarme a mi i a mi puevlo. ¹¹I enbiaron i adjuntaron a todos los prinsipes de los Pelishtios , i disheron: enbiad el arka del Dyo de Yisrael, i tornese a su lugar, i no mate a mi i a mi puevlo; porke avia turvasyon de muerte en toda la sivdad; la mano del Dyo se apezgo mucho ayi. ¹²I los varones ke no murian eran eridos kon almoranas, i la esklamasyon de la sivdad suvia a los syelos.

Ver todos los capítulos publicados en esta sección

 ————————————————————————

About Yehuda Sidi

I was born in 1953 in Tekirdag, Turkey and grew up in Canakkale. My father Hayim Sidi served as rabbi in both Tekirdag and Cannakale. Yehuda immigrated to Israel at 1971 and has been living in Israel since then. I am a softwere engineer. I am neither a Ladino nor a Tanach scholar. Actually I have very basic knowlede in Judeo Espanyol.

A year ago I looked for a Ladino Tanach in latin characters, and eventually I ended transcribing the Ladino Tanach which was published bt the Protestant missionaries who were vet active in the Speharadic world in the 19th century. This Tanach (and other books) were very popular with the Sepharadic Jews. This Tanach was published in two volumes.

So far I have transcribed the Tora. I am now in the process of transcribing the rest of the first volume which covers Ye’hoshua, Shoftim, Shemuel Alef, Shemuel Bet, Melachim Alef and Melachim Bet. I hope to complete the transcription in a few months.

The transcription was not reviewed by the Ladino scholars. Please report the errors that you find.