Sefer Tora en Djudeo Espanyol – Transkrivida kon letras latinas del livro por Ye’huda Sidi / DEVARIM: 48 – SHOFTIM (17 a 21)

Ver todos los capítulos publicados en esta sección

Sefer TORA NEVIIM UKETUVIM
El livro de la Ley, los Profetas, las Eskrituras
Trazladado en la lingua Espanyola
Estamperea de A. ‘H. Boyadjian
Konstantatinopla 1873

Transkrivido por Ye’huda Sidi. Febrero 2015

48 – SHOFTIM

¹⁸Djuezes i alguaziles te pondras en todas tus [1]sivdades ke A’ tu Dyo te da, en tus trivos; i djuzgaran al puevlo kon djuisyo djusto. ¹⁹No atuersas djuisyo; no konoskas fases, ni tomas [2]koecho; porke el koecho syega los ojos de los savyos, i atuerse las palavras de los djustos. ²⁰Djustetad, djustetad persegiras, para ke bivas, i eredes la tyerra ke A’ tu Dyo te da.

²¹No plantes para ti ashera de ningun arvol serka del ara de A’ tu Dyo, ke te aras. ²²Ni levantes para ti estansya , lo kual aborrese A’ tu Dyo.

[1] Ebreo: puertas

[2] dadiva para atorser

17

¹No sakrifikes a A’ tu Dyo buey i karnero en el kual ayga makula, o alguna koza mala; porke es abominasyon a A’ tu Dyo. ²Kuando se topare entre ti, en alguna de tus [1]sivdades ke A’ tu Dyo te da, varon o mujer, ke uvyere echo mal en ojos de A’ tu Dyo, traspasando su firmamyento, ³i uvyere ido i servido a otros dyozes, i se uvyere enkorvado a eyos, o al sol, o a la luna, o a todo el fonsado de los syelos, lo ke yo no enkomendi: ⁴I te fuere dado avizo, i oyeres, i rekeryeres byen; i ek, si fuere verdad, koza syerte, ke tal abominasyon fue echa en Yisrel; ⁵entonses sakaras a akel varon o a akeya mujer, ke uvyeren echo esta mala koza, a tus puertas, al varon o a la mujer, i los apedrearas kon pyedras, i muriran. ⁶Por dicho de dos testigos, o de tres testigos, sera matado el ke uvyere de murir; no sera matado por dicho de un testigo solo. ⁷La mano de los testigos sera primero sovre el para matarlo, i la mano de todo el puevlo despues; i eskombraras el mal de en medyo de ti.

⁸Kuando alguna koza te fuere difisil en djuisyo, entre sangre i sangre, entre djuisyo i djusio, i entre yaga i yaga en kozas de barajas en tus [2]sivdades, entonses te levantaras, i suviras al lugar ke A’ tu Dyo eskojyere. ⁹I vendras a los saserdotes los Levitas, i al djuez ke fuere en akeyos dias; i preguntaras, i te denunsyaran la sentensya del djuisyo. ¹⁰I aras segun la sentensya ke te denunsyaren los de akel lugar ke A’ eskojyere; i guardaras para azer segun todo lo ke te mostraren. ¹¹Segun la ley ke te mostraren, i segun el djuisyo ke te disheren, aras; de la sentensya ke te denunsyaren no te apartaras a la derecha ni a la izkyerda. ¹²I el varon ke izyere kon sobervya, no ovedesyendo al saserdote ke esta para ministrar ayi delante de A’ tu Dyo, o al djuez, akel varon murira; i eskombraras el mal de Yisrael. ¹³I todo el puevlo oiran , i temeran, i no sobervyaran mas.

¹⁴Kuando vinyeres a la tyerra ke A’ tu Dyo te da, i la eredares, i morares en eya, i disheres: pondre rey sovre mi, komo todas las djentes ke estan en mis derredores: ¹⁵poner pondras sovre ti por rey al ke A’ tu Dyo eskojyere; de entre tus ermanos pondras rey sovre ti; no podras poner sovre ti varon estranyo, ke no sea tu ermano. ¹⁶Empero ke no muchigue para si kavayos, ni aga tornar al puevlo a Ayifto para muchiguar kavayos; porke A’ vos disho: nunka mas tornaresh por este kamino. ¹⁷Ni muchigue para si mujeres, para ke no se aparte su korason; ni muchigue mucho para si plata ni oro. ¹⁸I sera, ke kuando se asentare sovre la siya de su reyno, eskrivira para si una kopya de esta ley en un livro, tomandola de delante de los saserdotes los Levitas. ¹⁹I la tendra konsigo i meldara en eya todos los dias de su vida, para ke aprenda a temer a A’ su Dyo, para guardar todas las palavras de esta ley, i estos fueros, para azerlos: ²⁰para ke no se enalteska su korason sovre sus ermanos, ni se aparte de la enkomendansa a la derecha ni a la izkyerda, para ke alarge dias en su reyno, el i sus ijos en medyo de Yisrael.

[1] Ebreo: puertas

[2] Ebreo: puertas

18

¹Los saserdotes los Levitas, todo el trivo de Levi, no tendran parte ni eredad kon Yisrael: de las oferendas kemadas de A’, i de su eredad komeran. ²No tendran pues eredad entre sus ermanos; A’ es su eredad, komo el les avlo.

³I esto sera el derecho de los saserdotes ke resiviran del puevlo, de los ke sakrifikan sakrifisyo, sea buey o karnero: daran al saserdote el braso, i las keshadas, i el kuajar. ⁴Las primisyas de tu sivera, de tu mosto, i de tu azeyte, i las primisyas de la traskiladura de tus ovejas le daras. ⁵Porke lo eskojyo A’ tu Dyo de todos tus trivos, para ke este para ministrar en el nombre de A’, el i sus ijos todos los dias.

⁶I kuando el Levita vinyere de alguna de tus [1]sivdades de todo Yisrael, en la ke uvyere pelegrinado, i vinyere kon todo el dezeo de su alma al lugar ke A’ eskojyere; ⁷entonses ministrara en el nombre de A’ su Dyo, komo todos sus ermanos los Levitas ke estaran ayi delante de A’. ⁸Porsyon komo la porsyon de los otros komeran, afeura de [2]las vendidas de sus patrimonyos.

⁹Kuando vinyeres a la tyerra ke A’ tu Dyo te da, no aprendas a azer segun las abominasyones de akeyas djentes. ¹⁰No sea ayado en ti kyen aga pasar su ijo o su ija por el fuego, ni kyen aga echizos, ni ogurero , ni adivinador, ni echizero, ¹¹ni enkantador de enkantamyentos, ni kyen pregunte a ov, ni madjiko, ni kyen bushke a los muertos. ¹²Porke es abominasyon a A’ todo el ke aze estas kozas, i por estas abominasyones A’ tu Dyo las desterra de delante de ti. ¹³Perfekto seras kon A’ tu Dyo. ¹⁴Porke estas djentes ke tu eredaras, a agoreros i a echizeros oian; ma tu, no ansi te a dado A’ tu Dyo. ¹⁵Profeta de en medyo de ti, de tus ermanos, komo yo, levantara para ti A’ tu Dyo; a el oiresh: ¹⁶segun todo lo ke demandaste de A’ tu Dyo en Horev, en el dia de la kompanya, dizyendo: no oyga yo de aki adelante la boz de A’ mi Dyo, ni vea yo mas este gran fuego, para ke no muera. ¹⁷I A’ me disho: byen avlaron en lo ke disheron. ¹⁸Profeta les levantare de en medyo de sus ermanos, komo tu, i pondre mis palavras en su boka; i el les avlara todo lo ke yo le enkomendare. ¹⁹I sera, ke el varon ke no oyere a mis palavras ke el avlara en mi nombre, yo lo rekerire de el. ²⁰Empero el profeta ke sobervyare de avlar palavra en mi nombre, ke yo no le enkomendi de avlar, o ke avlare en nombre de otros dyozes, akel profeta murira. ²¹I si disheres en tu korason: ¿komo savremos la palavra ke A’ no a avlado? ²²kuando el profeta avlare en nombre de A’, i no fuere la koza, ni vinyere, es palavra ke A’ no a avlado; kon sobervya la avlo el profeta; no tendras temor de el.

[1] Ebreo: puertas

[2] Ebreo: sus vendidas por los padres

19

¹Kuando A’ tu Dyo tajare las djentes, la tyerra de las kuales A’ tu Dyo te da, i tu las eredares, i morares en sus sivdades, i en sus kazas; ²apartaras para ti tres sivdades en medyo de tu tyerra ke A’ tu Dyo te da para eredarla. ³Aparejaras para ti el kamino, i partiras en tres partes el termino de tu tyerra, ke A’ tu Dyo te da a eredar, i sera para ke todo matador fuyga ayi. ⁴I este sera el kaso del matador ke fuyira ayi, i bivira: el ke uvyere erido a su kampanyero sin saver, i ke no lo aborresia dezde ayer i antes de ayer; ⁵komo kuando alguno anduvyere kon su kompanyero a la shara par kortar lenya, i levantando su mano kon el destral para kortar un lenyo el fyerro saltare del mango, i alkansare a su kompanyero, i el muryere; akel fuyira a una de estas sivdades, i bivira; ⁶no sea ke el regmidor de la sangre persiga detras del matador kuando se eskayentare su korason, i lo alkanse, por ser largo el kamino, i lo fyera [ferir] de muerte, aunke no meresia ser kondenado a muerte, por kuanto no lo aborresia dezde ayer ni antes de ayer. ⁷Por tanto yo te enkomendo dizyendo: tres sivdades te apartaras. ⁸I si A’ tu Dyo te ensanchare tu termino, komo djuro a tus padres, i te dyere toda la tyerra ke avlo de dar a tus padres, ⁹kuando guardares todas estas enkomendansas, para azerlas, ke yo te enkomendo oy, amando a A’ tu Dyo, i andando en sus kaminos todos los dias, entonses te anyadiras tres sivdades mas afuera de estas tres; ¹⁰para ke no sea vertida sangre inosente en medyo de tu tyerra ke A’ tu Dyo te da por eredar, i sea sovre ti kulpa de sangre.

¹¹Ma kuando uvyere ke alguno ke aborresyere a su kompanyero, i lo aseladare, i se levantare sovre el, i lo iryere de muerte de modo ke muryere, i fuyere a una de estas sivdades: ¹²entonses enbiaran los vyejos de su sivdad, i lo tomaran de ayi, i lo entregaran en mano del regmidor de la sangre, i murira. ¹³No se apiade de el tu ojo, i eskombraras la kulpa de la sangre inosente de Yisrael, i te sera byen.

¹⁴No esmovas el termino de tu kompanyero, ke senyalaron los antiguos en tu eredad, la ke eredares en la tyerra ke A’ tu Dyo te da para eredarla.

¹⁵No se levante un testigo solo kontra alguno por kualkyer delito, o por kualkyer pekado, en kualkyer pekado ke pekara: por dicho de dos testigos, o por dicho de tres testigos se afirmara la koza. ¹⁶Kuando se levantare testigo falso kontra alguno para atestiguar revilyo kontra el: ¹⁷entonses los dos varones ke tyenen la baraja se pararan delante de A’, delante de los saserdotes i los djuezes ke fueren en akeyos dias: ¹⁸I los djuezes peskuzaran byen, i ek, si el testigo fuere testigo falso, ke atestiguo falsamemte kontra su ermano: ¹⁹aresh a el komo el penso de azer a su ermano; i eskombraras el mal de en medyo de ti. ²⁰I los ke kedaron oiran, i temeran, i no tornaran mas a azer una mala koza komo esta en medyo de ti. ²¹I no se apiade tu ojo; vida por vida, ojo por ojo, dyente por dyente, mano por mano, pye por pye.

20

¹Kuando salyeres a la gerra kontra tus enemigos, i vyeres kavayos i kuatriguas, puevlo mucho mas ke ti, no tengas myedo de eyos; porke A’ tu Dyo es kontigo, el kual te izo suvir de la tyerra de Ayifto. ²I sera, ke kuando vos aserkaresh para pelear el saserdote se ayegara, i avlara al puevlo. ³I les dira: oye , Yisrael: vos ayegash oy en bataya kontra vuestros enemigos; no se enterneska vuestro korason, no temash, i no vos apresuresh; ni vos kevrantesh delante de eyos: ⁴porke A’ vuestro Dyo es el ke va kon vozotros para pelear por vozotros kontra vuestros enemigos, para salvarvos. ⁵I los ofisyales avlaran al puevlo, dizyendo: ¿kyen es el varon ke fraguo kaza nueva, i no la estreno? vaya i tornese a su kaza, no sea ke muera en la bataya , i otro varon la estrene. ⁶¿I kyen ez al varon ke planto vinya, i no la gozo? vaya i tornese a su kaza, no sea ke muera en la bataya i otro varon la goze. ⁷¿I kyen ez el varon ke se despozo kon mujer, i no la tomo? vaya i tornese a su kaza, no sea ke muera en la bataya, i otro varon la tome. ⁸I los ofisyales kontinuaran a avlar al puevlo, i diran: ¿kyen es el varon temedo, i tyerno de korason? vaye i tornese a su kaza, i no deslea el korason de sus ermanos, komo su korason. ⁹I sera, ke kuando los ofisyales akavaren de avlar al puevlo, ordenaran mayorales de los fonsados por kaveseras del puevlo.

¹⁰Kuando te aserkares a una sivdad para pelear kontra eya, le apregonaras paz. ¹¹I sera, ke si te respondyere paz, o te avryre sus puertas: entensos sera, ke todo el puevlo ke se topare en eya te seran pecheros, i te serviran. ¹²Ma si no izyere paz kontigo. i izyere kontigo gerra, entonses la asedyaras. ¹³I kuando A’ tu Dyo la entregare en tu mano, eriras a todo macho suyo a tajo de espada. ¹⁴Solamente las mujeres i los ninyos, i las kuatropeas, i todo lo ke uvyere en la sivdad, todo su espojo, prearas para ti; i komeras el espojo de tus enemigos ke A’ tu Dyo te dyo. ¹⁵Ansi aras a todas las sivdades ke estan muy leshos de ti, ke no son de las sivdades de estas djentes. ¹⁶Empero de las sivdades de estos puevlos ke A’ tu Dyo te da por eredad, no abidigues a ninguna persona: ¹⁷sino ke destruir los destruiras, al Hitio, i al Emorio, i al Kenaanio, i al Perizio, al Hivio, i al Yevusio, komo A’ tu Dyo te enkomendo: ¹⁸para ke no vos anbezen a azer segun todas sus abominasyones, ke eyos izyeron a sus dyozes, i pekesh kontra A’ vuestro Dyo.

¹⁹Kuando asedyares a una sivdad muchos dias, peleando kontra eya para prenderla no danyas sus arvoles levantando sovre eyos destral; porke de eyos komeras i no los tajaras, ([1]porke el arvol del kampo es la vida del ombre,) para bivir delante de ti en el asedyo. ²⁰Ma el arvol ke supyeres ke no es arvol para komer, lo danyaras i lo tajaras; i fraguaras enkatsiyadura kontra la sivdad ke aze pelea kontigo, asta sodjiguarla.

[1] o ¿es el arvol del kampo ombre?

21

¹Kuando fuere ayado en la tyerra ke A’ tu Dyo te da para eredarla, algun matado echado en el kampo, i no se supyere kyen lo iryo: ²entonses saldran tus vyejos i tus djuezes, i mezuraran asta las sivdades ke estan al derredor del matado. ³I sera, ke la sivdad ke esta mas serkana al matado, los vyejos de akeya sivdad tomaran una bezerra de las vakas, kon la kual no se ayga lavrado, ke no ayga yevado yugo. ⁴I los vyejos de akeya sivdad abasharan la bezerra a un vaye fuerte, ke no ayga sido lavrado ni sembrado, i desservigaran la bezerra ayi en el vaye. ⁵I se ayegaran los saserdotes, ijos de Levi; porke a eyos eskojyo A’ tu Dyo para servirle, i para bendizir en nombre de A’; i por dicho de eyos sera determinada toda baraja i toda yaga. ⁶I todos los vyejos de akeya sivdad, ke estan mas serkanos al matado, lavaran sus mano sovre la bezerra desservigada en en el vaye. ⁷I responderan i diran: nuestras manos no vertyeron esta sangre, ni nuestros ojos lo vyeron. ⁸Afalagate kon tu puevlo Yisrael, al kual regmiste, ¡o A’! i no pongas kulpa de sangre inosente entre tu puevlo Yisrael. I la sangre les sera perdonada. ⁹I tu eskombraras la kulpa de sangre inosente de en medyo de ti, kuando izyeres lo derecho en ojos de A’.

Ver todos los capítulos publicados en esta sección

 ————————————————————————

About Yehuda Sidi

I was born in 1953 in Tekirdag, Turkey and grew up in Canakkale. My father Hayim Sidi served as rabbi in both Tekirdag and Cannakale. Yehuda immigrated to Israel at 1971 and has been living in Israel since then. I am a softwere engineer. I am neither a Ladino nor a Tanach scholar. Actually I have very basic knowlede in Judeo Espanyol.

A year ago I looked for a Ladino Tanach in latin characters, and eventually I ended transcribing the Ladino Tanach which was published bt the Protestant missionaries who were vet active in the Speharadic world in the 19th century. This Tanach (and other books) were very popular with the Sepharadic Jews. This Tanach was published in two volumes.

So far I have transcribed the Tora. I am now in the process of transcribing the rest of the first volume which covers Ye’hoshua, Shoftim, Shemuel Alef, Shemuel Bet, Melachim Alef and Melachim Bet. I hope to complete the transcription in a few months.

The transcription was not reviewed by the Ladino scholars. Please report the errors that you find.