Sefer Tora en Djudeo Espanyol – Transkrivida kon letras latinas del livro por Ye’huda Sidi / BAMIDBAR: 42 – MATOT (31 a 32)

Ver todos los capítulos publicados en esta sección

Sefer TORA NEVIIM UKETUVIM
El livro de la Ley, los Profetas, las Eskrituras
Trazladado en la lingua Espanyola
Estamperea de A. ‘H. Boyadjian
Konstantatinopla 1873

Transkrivido por Ye’huda Sidi. Febrero 2015

42 – MATOT

²I avlo Moshe a las kaveseras de los trivos de los ijos de Yisrael, dizyendo: esta es la koza ke A’ a enkomendado. ³Kuando un varon prometyere promesa a A’, o djurare djuramento, atando atadura sovre su alma, no esbivlara su palavra; segun todo lo ke salyo de su boka, ara. ⁴I kuando una mujer prometyere promesa a A’, i atare atadura sovre si en kaza de su padre en su mosedad; ⁵i su padre oyere su promesa, i su atadura ke ato sovre su alma, i su padre se le kayare, se afirmaran todas sus promesas, i toda atadura ke ato sovre su alma se afirmara. ⁶Ma si su padre le vedare en el dia ke oyere, ninguna de sus promesas i de sus ataduras ke ato sovre su alma se afirmara; i A’ la perdonara por kuanto su padre le vedo. ⁷Empero si fuere kazada tenyendo sus promesas sovre si, o deklaramyento de sus lavyos ke ato sovre su alma; ⁸i su marido lo oyere, i se le kayare en el dia ke oyere, se afirmaran sus promesas, i sus ataduras ke ato sovre su alma se afirmaran. ⁹Ma si en el dia ke su marido lo oyo, le vedo , entonses baldo su promesa ke esta sovre eya, i el deklaramyento de sus lavyos ke ato sovre su alma; i A’ la perdonara. ¹⁰I promesa de bivda, o kita, todo lo ke atare sovre su alma, se afirmara sovre eya. ¹¹I si uvyere prometedo en kaza de su marido, o uvyere atado atadura sovre su alma kon djuramento; ¹²i su marido oyo, i se le kayo, i no le vedo, entonses se afirmaran todas sus promesas, i toda atadura ke ato sovre su alma se afirmara. ¹³Ma si su marido baldar las baldo en el dia ke las oyo, kualkyer koza ke salyo de sus lavyos, por sus promesas, i por la atadura de su alma, no se afirmara; su marido las baldo; i A’ la perdonara. ¹⁴Toda promesa, i todo djuramento de atadura para afriir el alma, su marido lo afirmara, i su marido lo baldara. ¹⁵Empero si su marido kayar se le kayare de dia en dia, entonses afirmo todas sus promesas, i todas sus ataduras ke estan sovre eya: las afirmo, por lo ke se le kayo en el dia ke las oyo. ¹⁶Ma si baldar las baldare despues ke las oyo, entonses el yevara el delito de eya. ¹⁷Estos son los fueros ke A’ enkomendo a Moshe entre el varon i su mujer, entre el padre i su ija en su mosedad en kaza de su padre.

31

¹I avlo A’ a Moshe, dizyendo: ²az la vengansa de los ijos de Yisrael de los Midyanitas; despues seras apanyado a tus puevlos. ³I avlo Moshe al puevlo, dizyendo: armadvos algunos de vozotros para el fonsado, i seran kontra Midyan, para dar la vengansa de A’ en Midyan. ⁴Mil de kada trivo de todos los trivos de Yisrael enbiaresh al fonsado. ⁵Ansi fueron entregados de los miles de Yisrael mil por kada trivo, dodje mil armados para el fonsado. ⁶I Moshe los enbio al fonsado, mil por kada trivo, a eyos, i a Pinhas, ijo de Elazar el saserdote, al fonsado, kon los atuendos santos, i las trompetas de aulasyon en su mano. ⁷I pelearon kontra Midyan, komo A’ enkomendo a Moshe; i mataron a todo macho, ⁸i mataron entre los matados de eyos a los reyes de Midyan, Evi, i Rekem, i Tsur, i Hur, i Reva, sinko reyes de Midyan; i a Bilam, ijo de Beor, mataron kon espada. ⁹I kativaron los ijos de Yisrael a las mujeres de Midyan, i sus chikitos, i prearon todas sus kuatropeas, i todo su ganado, i toda su azyenda. ¹⁰I kemaron a fuego todas sus sivdades kon sus moradas, i todos sus palasyos. ¹¹I tomaron todo el espojo, i toda la preza, tanto de ombres komo de kuatropeas. ¹²I trusheron a Moshe, i a Elazar el saserdote, i a la kompanya de los ijos de Yisrael, los kativos, i la preza, i el espojo, al real, en las yanuras de Moav, ke estan djunto al Yarden de Yeriho.

¹³I salyeron Moshe, i Elazar el saserdote, i todos los mayorales de la kompanya, a resivirlos afuera del real. ¹⁴I Moshe se ensanyo kontra los komandantes del fonsado, los mayorales de miles i los mayorales de syentos ke venian de la [1]gerra. ¹⁵I Moshe les disho: ¿ abidiguastesh a todas las embras? ¹⁶ek, eyas fueron las ke sombayeron a los ijos de Yisrael por konsejo de Bilam para azer traisyon kontra A’ en el echo de Peur, por lo kual fue la mortaldad en la kompanya de A’. ¹⁷Agora pues matad a todo macho entre los ninyos, i matad a toda mujer ke a konosido varon por aver yazido kon macho. ¹⁸I a todas las ninyas entre las mujeres, ke no an konosido yazedura de macho, abidiguad para vozotros. ¹⁹I vozotros kedadvos afuera del real syete dias: todo el ke uvyere matado persona, i kualkyera ke uvyere tokado a matado, vos alimpyaresh al dia tersero i al dia seteno, vozotros i vuestros kativos. ²⁰I todo vestido, i todo atuendo de kuero, i toda ovra de pelo de kavras, i todo atuendo de palo alimpyaresh.

²¹I Elazar el saserdote disho a los varones del fonsado ke se avian ido a le gerra: este es el fuero de la ley ke A’ enkomendo a Moshe: ²²solamente el oro, i la plata, el alambre, el fyerro, el estanyo, i el plomo, ²³toda koza ke entra en el fuego, aresh pasar por el fuego, i sera limpyo; empero kon las aguas de apartamyento se alimpyara; i todo lo ke no entra en el fuego, aresh pasar por el agua. ²⁴I lavaresh vuestros vestidos al dia seteno, i seresh limpyos, i despues entraresh en el real.

²⁵I avlo A’ a Moshe, dizyendo: ²⁶toma la kuenta de la preza del kativeryo, tanto de los ombres komo de las kuatropeas, tu i Elazar el saserdote, i las kaveseras de los padres de la kompanya. ²⁷I espartiras la preza entre los ke pelearon la pelea, los ke salyeron al fonsado, i toda la kompanya. ²⁸I apartaras para A’ dasyo de los varones de gerra ke salyeron al fonsado, una alma de kinyentos, de los ombres, i de los bueyes, i de los aznos, i de las ovejas. ²⁹De la mitad de eyos lo tomaresh, i daras a Elazar el saserdote la apartadura de A’. ³⁰I de la mitad de los ijos de Yisrael tomaras uno travado de sinkuenta, de los ombres, de los bueyes, de los aznos, i de las ovejas, de toda kuatropea, i los daras a los Levitas, ke gurdan la guardya del tavernakulo de A’. ³¹I izo Moshe i Elazer el saserdote komo A’ enkomendo a Moshe. ³²I fue la preza, la suma de la prea ke prearon el puevlo del fonsado, seshsyentos i setenta i sinko mil ovejas, ³³i setenta i dos mil bueyes, ³⁴i sesenta i un mil aznos, ³⁵i personas umanas de las mujeres ke no avian konosido yazedura de macho, todas las personas, trenta i dos mil. ³⁶I fue la mitad, la porsyon de los ke salyeron en el fonsado, el numero de las ovejas, tressyentas i trenta i syete mil i kinyentas. ³⁷I fue el dasyo para A’ de las ovejas, seshsyentas i setenta i sinko: ³⁸i de los bueyes, trenta i sesh mil; i el dasyo de eyos para A’ setenta i dos: ³⁹i de los aznos, trenta mil i kinyentos; i el dasyo de eyos para A’, sesenta i uno: ⁴⁰i de las personas, dyez i sesh mil; i el dasyo de eyas para A’, trenta i dos personas. ⁴¹I dyo Moshe el dasyo, ke era la apartadura de A’, a Elazar el saserdote, komo A’ enkomendo a Moshe. ⁴²I de la mitad de los ijos de Yisrael, ke aparto Moshe de los varones gerreros, ⁴³la mitad de la kompanya fue, de las ovejas, tressyentas i trenta i syete mil i kinyentas: ⁴⁴i de los bueyes, trenta i sesh mil: ⁴⁵i de los aznos, trenta mil i kinyentos: ⁴⁶i de las personas, dyez i sesh mil. ⁴⁷I de la mitad de los ijos de Yisrael tomo Moshe uno travado de sinkuenta, de los ombres i de las kuatropeas, i los dyo a los Levitas, ke guardavan la guardya del tavernakulo de A’, komo A’ enkomendo a Moshe.

⁴⁸I se ayegaron a Moshe los komandantes ke estavan sovre los miles del fonsado, mayorales de miles i mayorales de syentos: ⁴⁹i disheron a Moshe: tus syervos tomaron la kuenta de los varones de gerra ke estan en nuestro poder, i no falto ninguno de nozotros. ⁵⁰I ayegamos pues ayegasyon a A’, kada uno de lo ke topo, djoyas de oro, ashorkas, i maniyas, aniyos, orejales, i kadenados, para azer ekspiasyon por nuestras almas delante de A’. ⁵¹ Moshe i Elazar el saserdote resivyeron el oro de eyos, todas djoyas ovradas. ⁵²I todo el oro de la apartadura ke apartaron para A’ de los mayorales de miles, i de los mayorales de syentos, fue dyez i sesh mil i syetesyentos i sinkuenta siklos. ⁵³Porke los varones del fonsado avian preado kada uno para si. ⁵⁴I Moshe i Elazar el saserdote resivyeron el oro de los mayorales de miles i de syentos, i lo trusheron a la tyenda del plazo, por membrasyon para ijos de Yisrael delante de A’.

[1] Ebreo: fonsado de la pelea

32

¹I los ijos de Reuven i los ijos de Gad tenian muy mucho ganado; i vyendo la tyerra de Yazer i la tyerra de Gilad, ke, ek, el lugar era lugar de ganado, ²vinyeron los ijos de Gad i los ijos de Reuven, i avlaron a Moshe, i a Elazar el saserdote, i los mayorales de la kompanya, dizyendo: ³Atarot, i Divon, i Yazer, i Nimra, i Heshbon, i Eleale, i Sevam, i Nevo, i Beon, ⁴la tyerra ke A’ eryo delante de la kompanya de Yisrael, es tyerra de ganado, i tus syervos tyenen ganado. ⁵I disheron: si ayimos grasya en tus ojos, dese esta tyerra a tus syervos por posesyon, i no nos agas pasar el Yarden. ⁶I disho Moshe a los ijos de Gad i a los ijos de Reuven: ¿vendran vuestros ermanos a la gerra, i vozotros vos kedaresh aki? ⁷¿i por ke desanimash el korason de los ijos de Yisrael de pasar a la tyerra ke A’ les dyo? ⁸ansi izyeron vuestros padres kuando los enbii de Kadesh-Barnea para ver la tyerra. ⁹Porke suvyeron asta el arroyo de Eshkol, i vyeron la tyerra, i desanimaron el korason de los ijos de Yisrael, para no venir a la tyerra ke A’ les avia dado. ¹⁰I se ensendyo el fulor de A’ en akel dia, i djuro, dizyendo: ¹¹no veran los varones ke suvyeron de Ayifto, de edad de vente anyos i arriva, la tyerra ke djuri a Avra’ham, a Yitshak, i a Yaakov, por lo ke no anduvyeron kumplidamente detras de mi: ¹²ke salvo Kalev, ijo de Yefune, el Kenizio, i Ye’hoshua, ijo de Nun, porke anduvyeron kumplidamente detras de A’. ¹³I se ensendyo el fulor de A’ en Yisrael, i los izo andar irantes en el dizyerto kuarenta anyos, asta ke fue konsumido todo el djerenansyo ke avia echo mal en ojos de A’. ¹⁴I ek, vozotros vos levantastesh en lugar de vuestros padres, rasa de varones pekadores, para anyadir mas al eresimyento del fulor de A’ kontra Yisrael. ¹⁵Si vos tornaresh de detras de el, el tornara otra vez a desharlos en el dizyerto, i danyaresh a todo este puevlo.

¹⁶I eyos se ayegaron a el, i disheron: fraguaremos aki vayados de ovejas para nuestro ganado, i sivdades para nuestras famiyas: ¹⁷i nozotros nos armaremos prontos para ir delante de los ijos de Yisrael, asta ke los traygamos a su lugar; i nuestras famiyas kedaran en sivdades enkastiyadas por kavza de los moradores de la tyerra. ¹⁸No tornaremos a nuestras kazas asta ke los ijos de Yisrael ereden kada uno su eredad: ¹⁹porke no eredaremos kon eyos al otro lado del Yarden ni adelante: porke ya nos vino nuestra eredad de este lado del Yarden al oryente.

²⁰I les disho Moshe: si azyeresh esta koza, si vos armaresh delante de A’ para la gerra, ²¹i todo varon de vozotros pasare armado el Yarden delante de A’, asta ke ayga desterrado a sus enemigos de delante de si, ²²i ke la tyerra sea sodjiguada delante de A’, i despues tornaresh, entonses seresh livres de A’ i de Yisrael, i tendresh esta tyerra por posesyon delante de A’. ²³Ma si no izyeresh ansi, ek, avresh pekado kontra A’, i saved vuestro pekado ke vos alkansara. ²⁴Fraguadvos sivdades para vuestras famiyas, i vayados para vuestras ovejas, i azed lo ke salyo de vuestra boka. ²⁵I avlaron los ijos de Gad i los ijos de Reuven a Moshe, dizyendo: tus syervos aran komo mi senyor enkomenda. ²⁶Nuestros ninyos, nuestras mujeres, nuestro ganado, i todas nuestras kuatropeas estaran ayi en las sivdades de Gilad. ²⁷I tus syervos pasaran todos armados de fonsado delante de A’ a la gerra, komo mi senyor dize. ²⁸I Moshe dyo orden tokante a eyos a Elazar el saserdote, i a Ye’hoshua, ijo de Nun, i a las kaveseras de los padres de los trivos de los ijos de Yisrael. ²⁹I Moshe les disho: si los ijos de Gad i los ijos de Reuven pasaren kon vozotros el Yarden, todos armados para la gerra delante de A’, i la tyerra fuere sodjiguada delante de vozotros, entonses les daresh la tyerra de Gilad por posesyon. ³⁰Ma si no pasaren armados kon vozotros, entonses se aposesyonaran entre vozotros en la tyerra de Kenaan. ³¹I los ijos de Gad i los ijos de Reuven respondyeron, dizyendo: komo A’ avlo a tus syervos, ansi aremos. ³²Nozotros pasaremos armados delante de A’ a la tyerra de Kenaan, i la posesyon de nuestra eredad sera de esta parte del Yarden. ³³Ansi Moshe les dyo, a los ijos de Gad i a los ijos de Reuven, i al medyo trivo de Menashe, ijo de Yosef, el reyno de Sihon, el reyno de los Emorios, i el reyno de Og, rey de Bashan, la tyerra kon sus sivdades en los terminos, las sivdades de la tyerra al derredor.

³⁴I los ijos de Gad fraguaron a Divon, i a Atarot, i a Aroer, ³⁵i a Atrot-Shofan, i a Yazer, i a Yogbe’ha, ³⁶i a Bet-Nimra, i Bet-Aran sivdades enkastiyadas; i vayadas de ovejas. ³⁷I los ijos de Reuven fraguaron a Heshbon, i a Elale, i a Kiryatayim, ³⁸i a Nevo, i a Baal-Meon, mudados los nombres, i a Sivma, i yamaron por otros nombres las sivdades ke fraguaron. ³⁹I los ijos de Mahir, ijo de Menashe , anduvyeron a Gilad, i la prendyeron, i desterraron al Emorio ke estava en eya. ⁴⁰I Moshe dyo a Gilad a Mahir, ijo de Menashe, i moro en eya. ⁴¹I Yair ijo de Menashe, anduvo i prendyo sus aldeas, i las yamo Havot-Yair. ⁴²I Novah anduvo i prendyo a Kenat i sus aldeas, i la yamo Novah, segun su nombre.

Ver todos los capítulos publicados en esta sección

 ————————————————————————

About Yehuda Sidi

I was born in 1953 in Tekirdag, Turkey and grew up in Canakkale. My father Hayim Sidi served as rabbi in both Tekirdag and Cannakale. Yehuda immigrated to Israel at 1971 and has been living in Israel since then. I am a softwere engineer. I am neither a Ladino nor a Tanach scholar. Actually I have very basic knowlede in Judeo Espanyol.

A year ago I looked for a Ladino Tanach in latin characters, and eventually I ended transcribing the Ladino Tanach which was published bt the Protestant missionaries who were vet active in the Speharadic world in the 19th century. This Tanach (and other books) were very popular with the Sepharadic Jews. This Tanach was published in two volumes.

So far I have transcribed the Tora. I am now in the process of transcribing the rest of the first volume which covers Ye’hoshua, Shoftim, Shemuel Alef, Shemuel Bet, Melachim Alef and Melachim Bet. I hope to complete the transcription in a few months.

The transcription was not reviewed by the Ladino scholars. Please report the errors that you find.