Sefer Tora en Djudeo Espanyol – Transkrivida kon letras latinas del livro por Ye’huda Sidi / BAMIDBAR: 35 – NASO (5 a 7)

Ver todos los capítulos publicados en esta sección

Sefer TORA NEVIIM UKETUVIM
El livro de la Ley, los Profetas, las Eskrituras
Trazladado en la lingua Espanyola
Estamperea de A. ‘H. Boyadjian
Konstantatinopla 1873

Transkrivido por Ye’huda Sidi. Febrero 2015

35 – NASO

²¹I avlo A’ a Moshe, dizyendo: ²²toma la kuenta de los ijos de Gershon tambyen a eyos por la kaza dee sus padres, por sus linajes. ²³Dezde el de edad de trenta anyos i arriva asta el de edad de sinkuenta anyos los kontaras.; todos los ke entran [1]en el fonsado para servir servisyo en la tyenda del plazo. ²⁴Este sera el servisyo de los linajes de los Gershonitas, para servir, i para karga: ²⁵yevaren las kortinas del tavernakulo, i la tyenda del plazo, su kuvyerta, i la kuvyerta de kueros de tejones, ke esta sovre eya por ensima, i la mamparansa de la puerta de la tyenda del plazo, ²⁶i las kortinas de la korte, i la mamparansa de la entrada de la puerta de la korte, ke esta serka del tavernakulo, i serka del ara al derredor, i sus kuerdas i todos los atuendos de su servisyo, i todo lo ke sera echo para eyos: ansi serviran. ²⁷Por orden de A’haron i de sus ijos sera todo el servisyo de los ijos de los Gershonitas en todas sus kargas, i en todo su servisyo; i les enkomendaresh en guardya todas sus kargas. ²⁸Este es el servisyo de los linajes de los ijos de los Gershonitas en la tyenda del plazo; i la guardya de eyos estara en mano de Itamar, ijo de A’haron el saserdote.

²⁹Los ijos de Merari, los kontaras por sus linajes, por la kaza de sus padres. ³⁰Dezde el de edad de trenta anyos i arriva asta el de edad de sinkuenta anyos los kontaras, todos los ke entran en el fonsado para servir el servisyo de la tyenda del plazo. ³¹I esta sera la guardya de su karga para todo su servisyo en la tyenda del plazo: las tavlas del tavernakulo, i sus serradores, ³²i sus pilares, i sus almirezes, i los pilares de la korte al derredor, i sus almirezes, i sus estakas, i sus kuerdas, kon todos sus atuendos, por todo su servisyo: i kontaresh por sus nombres los atuendos de la guardya de su karga. ³³Este es el servisyo de los linajes de los ijos de Merari para todo su servisyo en la tyenda del plazo, por mano de Itamar, ijo de A’haron el saserdote.

³⁴I konto Moshe i A’haron i los mayorales de la kompanya a los ijos de los Ke’hatitas por sus linajes, i por la kaza de sus padres, ³⁵dezde el de edad de trenta anyos i arriva asta el de edad de sinkuenta anyos, todos los ke entravan en el fonsado para el servisyo en la tyenda del plazo; ³⁶i los kontados de eyos por sus linajes fueron dos mil i syetesyentos i sinkuenta. ³⁷Estos fueron los kontados de los linajes de los Ke’hatitas, todos los ke servian en la tyenda del plazo, los kuales konto Moshe i A’haron por orden de A’ por mano de Moshe. ³⁸I los kontados de los ijos de Gershon por sus linajes, i por la kaza de sus padres, ³⁹dezde el edad de trenta anyos i arriva asta el de edad de sinkuenta anyos, todos los ke entravan en el fonsado para el servisyo en la tyenda del plazo; ⁴⁰los kontados de eyos por sus linajes, por la kaza de sus padres, fueron dos mil i seshsyentos i trenta. ⁴¹Estos fueron los kontados de los linajes de los ijos de Gershon, todos los ke servian en la tyenda del plazo, los kuales konto Moshe i A’haron por orden de A’. ⁴²I los kontados de los linajes de los ijos de Merari por sus linajes, por la kaza de sus padres, ⁴³dezde el de edad de trenta anyos i arriva, asta el de edad de sinkuenta anyos, todos los ke entravan en el fonsado para el servisyo en la tyenda del plazo; ⁴⁴los kontados de eyos por sus linajes fueron tres mil i dossyentos. ⁴⁵Estos fueron los kontados de los linajes de los ijos de Merari, los kuales konto Moshe i A’haron por orden de A’ por mano de Moshe. ⁴⁶Todos los kontados de los Levitas, ke konto Moshe i A’haron i los mayorales de Yisrael por sus linajes, i por la kaza de sus padres, ⁴⁷dezde el de edad de trenta anyos i arriva asta el de edad de sinkuenta anyos, todos los ke entravan para servir servisyo de ovra i servisyo de karga en la tyenda del plazo; ⁴⁸los kontados de eyos fueron ocho mil i kinyentos i ochenta. ⁴⁹Por orden de A’ por mano de Moshe, el los konto, kada uno segun su servisyo, i segun su karga, i fueron kontados komo A’ enkomendo a Moshe.

[1] Ebreo: para afonsedear fonsado

5

¹I avlo A’ a Moshe, dizyendo: ²enkomenda a los ijos de Yisrael ke enbian del real a todo leprozo, i a todo el ke tyene manantio, i a todo enkonado por muerto. ³Tanto macho komo embra enbiaresh, afuera del real los enbiaresh; i no enkonen sus reales, en medyo de los kuales yo moro. ⁴I izyeron ansi los ijos de Yisrael, i los enbiaron afuera del real; komo avlo A’ a Moshe, ansi izyeron los ijos de Yisrael.

⁵I avlo A’ a Moshe, dizyendo: ⁶avla a los ijos de Yisrael: varon o mujer, kuando izyeren alguno de todos los pekados del ombre, falsando falsia kontra A’, i akeya persona fuere kulpoza; ⁷atorgaran su pekado ke izyeron; i tornara su kulpa [1]enteramente, i anyadira su kinto sovre eyo, i lo dara a akel kontra kyen peko. ⁸I si el varon no tuvyere regmidor al kual la kulpa sea tornada, la kulpa sera tornada a A’, al saserdote, afuera del barvez de las ekspiasyones (kipurim) kon el kual ara ekspiasyon por el. ⁹I toda apartadura de todas las kozas santas de los ijos de Yisrael, ke eyos ayegaren al saserdote, sera suya. ¹⁰I las kozas santifikadas de kualkyer varon, suyas seran: lo ke kualkyera dyere al saserdote, suyo sera.

¹¹I avlo A’ a Moshe, dizyendo: ¹²avla a los ijos de Yisrael, i diles: kuando la mujer de algun varon atorsyere, i falsare falsia kontra el, ¹³i alguno se uvyere echado kon eya kon yazedura de semen, i la koza fuere eskondida de los ojos de su marido, i fuere enkuvyerto ke eya esta enkonada, i no uvyere testigo kontra eya, ni eya uvyere sido prenyada; ¹⁴i pasare sovre el espirito del zelo, i tuvyere suspicha de su mujer, i eya fuere enkonada; o pasare sovre el espirito de zelo, i tuvyere suspicha de su mujer, i eya no fuere enkonada: ¹⁵entonses el varon traera su mujer al saserdote, i traera su ayegasyon por eya, el dyezmo de una epa de arina de sevada; no vazyera sovre eya azeyte, ni pondra sovre eya ensensyo; porke prezente de zelos es, prezente de membrasyon, ke trae un memorya delito. ¹⁶I el saserdote la ara ayegar, i la ara parar delante de A’. ¹⁷I tomara el saserdote agua santa en un atuendo de barro; i tomara el saserdote del polvo ke uvyere en el suelo del tavernakulo, i lo pondra en el agua. ¹⁸I el saserdote ara parar a la mujer delante de A’, i deskuvrira la kavesa de la mujer, i pondra sovre sus palmas el prezente de la membrasyon, ke es el prezente de zelos; i en la mano del saserdote estaran las aguas amargas ke traen maldisyon. ¹⁹I el saserdote la kondjurara, i dira a la mujer: si ninguno se a echado kontigo, i si no a atorsido a enkonamyento, tomando otro en lugar de tu marido, livre seas de estas aguas amargas ke traen maldisyon: ²⁰ma si tu a atorsido, tomando otro en lugar de tu marido, i te a enkonado, i alguno se a echado kontigo afuera de tu marido: ²¹entonses el saserdote kondjurara a la mujer kon djura de maldisyon, i el saserdote dira a la mujer: A’ te de por maldisyon i por djura entre tu puevlo, azyendo A’ a tu anka ke kayga, i a tu vyentre ke se inche; ²²i estas aguas ke traen maldisyon entren en tus entranyas, para azer inchar tu vyentre, i para azer kaer tu anka. I la mujer dira, amen, amen. ²³I el saserdote eskrivira estas maldisyones en un livro, i las arrematara kon las aguas amargas. ²⁴I dara a bever a la mujer las aguas amargas ke traen maldisyon: i las aguas ke traen maldisyon entraran en eya por amargas. ²⁵Entonses tomara el saserdote de la mano de la mujer prezente de los zelos, i mesera el prezente delante de A’, i lo ayegara al ara. ²⁶I el saserdote tomara un punyado del prezente por su membrasyon, i lo saumara en el ara, i despues dara a bever las aguas a la mujer. ²⁷I kuando le avra dado a bever las aguas, sera, ke si fuere enkonada, i uvyere falsado falsia kontra su marido, las aguas ke traen maldisyon entraran en eya por amargas, i su vyentre se inchara, i su anka kaera; i la mujer sera por maldisyon entre su puevlo. ²⁸Ma si la mujer no fuere enkonada, sino ke fuere limpya, sera livre, i asementara semen. ²⁹Esta es la ley de los zelos, kuando una mujer atorsyere tomando otro en lugar de su marido, i fuere enkonada: ³⁰i del varon sovre el kual pasare espirito de zelo, i tuvyere suspicha de su mujer: ara parar a la mujer delante de A’, i el saserdote ara a eya toda esta ley. ³¹I el varon sera livre de delito, i akeya mujer yevara su delito.

[1] Ebreo: en su kavdal

6

¹I avlo A’ a Moshe, dizyendo: ²avla a los ijos de Yisrael i diles: varon o mujer, kuando se apartare prometyendo promesa de nazirio, para apartarse a A’: ³de vino i de sidra se apartara; vinagre de vino ni vinagre de sidra no bevera, ni bevera ninguna remojadura de uvas, ni komera uvas freskas ni sekas. ⁴Todos los dias de su apartamyento, de todo lo ke se aze de vid de vino, dezde los kueshkos asta la kashkara, no komera. ⁵Todos los dias de la promesa de su apartamyento no pasara navaja sovre su kavesa; asta ke se kumplan los dias ke se a apartado a A’, santo sera, i deshara kreser las vedejas de su kavesa. ⁶Todos los dias ke se apartare a A’, no vendra serka de persona muerta. ⁷Por su padre ni por su madre, por su ermano ni por su ermana, no se enkonara por eyos kuando muryeren; porke el apartamyento de su Dyo esta sovre su kavesa. ⁸Todos los dias de su apartamyento sera santo a A’. ⁹I kuando alguno muryere muy subito serka de el, i enkonare la kavesa de su apartamyento; entonses traskilara su kavesa en el dia de su alimpyamyento; al dia seteno la traskilara. ¹⁰I al dia ochavo traera dos tortolos, o dos palombinos al saserdote, a la puerta de la tyenda del plazo: ¹¹i el saserdote ara el uno por sakrifisyo por pekado, i el otro por alsasyon, i ara ekspiasyon (kapara) por el de lo ke peko sovre el muerto, i santifikara su kavesa en akel dia. ¹²I apartara a A’ los dias de su apartamyento, i traera un karnero de edad de un anyo por sakrifisyo por kulpa; i los dias primeros seran anulados, por lo ke fue enkonado su apartamyento.

¹³I esta es la ley de nazirio: en el dia ke se kumplyeren los dias de su apartamyento, sera traido a la puerta de la tyenda del plazo. ¹⁴I ayegara su ayegasyon a A’, un karnero sano de edad de un anyo por alsasyon, i una karnera sana de edad de un anyo por sakrifisyo por pekado, i un barvez sano por sakrifisyo de pases; ¹⁵i un sesto de sensenyas de semola, tortas enbueltas en azeyte, i benmuelos sensenyos untados kon azeyte, i su prezente, i sus templasyones, ¹⁶i el saserdote los ayegara delante de A’, i ara su sakrifisyo por pekado, i su alsasyon. ¹⁷I ara el barvez por sakrifisyo de pases a A’, kon el sesto de las sensenyas; i ara el saserdote su prezente, i su templasyon. ¹⁸I el nazirio traskilara la kavesa de su apartamyento a la puerta de la tyenda del plazo; i tomara el kaveyo de la kavesa de su apartamyento, i lo pondra sovre el fuego ke esta debasho del sakrifisyo de las pases. ¹⁹I tomara el saserdote el braso kozinado del barvez, i una torta sensenya del sesto, i un benmuelo sensenyo, i los pondra sovre las palmas del nazirio, despues ke se traskilo el kaveyo de su apartamyento. ²⁰I el saserdote los mesera por mesedura delante de A’: koza santa es para el saserdote, kon el pecho de la mesedura, i kon la anka de la levantadura; i despues podra bever vino el nazirio. ²¹Esta es la ley del nazirio ke prometyere, i de su ayegasyon a A’ por su apartamyento, afuera de lo ke alkansare su mano: segun su promesa ke prometyere, ansi ara segun la ley de su apartamyento.

²²I avlo A’ a Moshe dizyendo: ²³avla a A’haron, i a sus ijos dizyendo: ansi bendiziresh a los ijos de Yisrael, dizyendoles: ²⁴A’ ti bendiga, i te guarde: ²⁵aga alumbrar A’ su kara sovre ti, i te engrasye: ²⁶alse A’ su kara a ti, i ponga en ti paz. ²⁷I pondran mi nombre sovre los ijos de Yisrael, i yo los bendizire.

7

¹I akontesyo, ke en el dia ke akavo Moshe de levantar el tavernakulo, i lo unto, i lo santifiko, kon todos sus atuendos, i el ara kon todos sus atuendos, i los unto i los santifiko: ²los mayorales de Yisrael, kaveseras de la kaza de sus padres, los kuales eran los mayorales de los trivos, ke estavan sovre los kontados, ayegaron. ³I trusheron su ayegasyon delante de A’, sesh karretas kuvyertas, i dodje bueyes, una karreta por kada dos mayorales, i un buey por kada uno; i los ayegaron delante del tavernakulo. ⁴I avlo A’ a Moshe. dizyendo: ⁵tomalos de eyos, i seran para servir el servisyo de la tyenda del plazo; i los daras a los Levitas, a kada uno segun su servisyo. ⁶I Moshe tomo las karretas i los bueyes, i los dyo a los Levitas. ⁷Dos karretas i kuatro bueyes dyo a los ijos de Gershon, segun su servisyo. ⁸I kuatro karretas i ocho bueyes dyo a los ijos de Merari, segun su servisyo, debasho de la mano de Itamar, ijo de A’haron el saserdote. ⁹Ma a los ijos de Ke’hat no dyo nada; porke el servisyo del santuvaryo sovre eyos, en el ombro lo yevavan.

¹⁰I ayegaron los mayorales para el estrenamyento del ara en el dia ke fue untada, ayegaron los mayorales su ayegasyon delante del ara. ¹¹I disho A’ a Moshe: un mayoral un dia, i otro mayoral otro dia, ayegaran su ayegasyon para el estrenamyento del ara.

¹²I el ke ayego su ayegasyon en el primer dia fue Nahshon, ijo de Aminadav, del trivo de Ye’huda. ¹³I fue su ayegasyon un plato de plata de pezo de syento i trenta siklos, un djarro de plata de setenta siklos, segun el siklo del santuvaryo, ambos yenos de semola enbuelta en azeyte por prezente: ¹⁴un kucharon de oro de dyez siklos, yeno de saumeryo: ¹⁵un toro ijo de vaka, un barvez, un karnero de edad de un anyo por alsasyon: ¹⁶un kavrito de las kavras por sakrifisyo por pekado: ¹⁷i por sakrifisyo de pases, dos bueyes, sinko barvezes, sinko kavrones, sinko karneros de edad de un anyo. Esta fue la ayegasyon de Nahshon, ijo de Aminadav.

¹⁸En el segundo dia ayego Natanel, ijo de Tsuar mayoral de Yissahar, ¹⁹ayego por su ayegasyon un plato de plata de pezo de syento i trenta siklos, un djarro de plata de setenta siklos, segun el siklo del santuvaryo, ambos yenos de semola enbuelta en azeyte por prezente: ²⁰un kucharon de oro de dyez siklos, yeno de saumeryo: ²¹un toro ijo de vaka, un barvez, un karnero de edad de un anyo por alsasyon: ²²un kavrito de las kavras por sakrifisyo por pekado: ²³i por sakrifisyo de pases, dos bueyes, sinko barvezes, sinko kavrones, sinko karneros de edad de un anyo, esta fue la ayegasyon de Natanel, ijo de Tsuar.

²⁴En el terser dia ayego el mayoral de los ijos de Zevulun, Eliav, ijo de Helon. ²⁵Fue su ayegasyon un plato de plata de pezo de syento i trenta siklos, un djarro de plata de setenta siklos, segun el siklo del santuvaryo, ambos yenos de semola enbuelta en azeyte por prezente: ²⁶un kucharon de oro de dyez siklos, yeno de saumeryo: ²⁷un toro ijo de vaka, un barvez, un karnero de edad de un anyo por alsasyon: ²⁸un kavrito de las kavras por sakrifisyo por pekado: ²⁹i por sakrifisyo de pases, dos bueyes, sinko barvezes, sinko kavrones, sinko karneros de edad de un anyo, esta fue la ayegasyon de Eliav, ijo de Helon.

³⁰En el kuarto dia ayego el mayoral de los ijos de Reuven, Elitsur, ijo de Shedeur. ³¹Fue su ayegasyon un plato de plata de pezo de syento i trenta siklos, un djarro de plata de setenta siklos, segun el siklo del santuvaryo, ambos yenos de semola enbuelta en azeyte por prezente: ³²un kucharon de oro de dyez siklos, yeno de saumeryo: ³³un toro ijo de vaka, un barvez, un karnero de edad de un anyo por alsasyon: ³⁴un kavrito de las kavras por sakrifisyo por pekado: ³⁵i por sakrifisyo de pases, dos bueyes, sinko barvezes, sinko kavrones, sinko karneros de edad de un anyo. Esta fue la ayegasyon de Elitsur, ijo de Shedeur.

³⁶En el kinto dia ayego el mayoral de los ijos de Shimon, Shelumiel ijo de Tsurishaday. ³⁷Fue su ayegasyon un plato de plata de pezo de syento i trenta siklos, un djarro de plata de setenta siklos, segun el siklo del santuvaryo, ambos yenos de semola enbuelta en azeyte por prezente: ³⁸un kucharon de oro de dyez siklos, yeno de saumeryo: ³⁹un toro ijo de vaka, un barvez, un karnero de edad de un anyo por alsasyon: ⁴⁰un kavrito de las kavras por sakrifisyo por pekado: ⁴¹i por sakrifisyo de pases, dos bueyes, sinko barvezes, sinko kavrones, sinko karneros de edad de un anyo. Esta fue la ayegasyon de Shelumiel ijo de Tsurishaday.

⁴²En el dia sesheno ayego el mayoral de los ijos de Gad, Elyasaf, ijo de Deuel. ⁴³Fue su ayegasyon un plato de plata de pezo de syento i trenta siklos, un djarro de plata de setenta siklos, segun el siklo del santuvaryo, ambos yenos de semola enbuelta en azeyte por prezente: ⁴⁴un kucharon de oro de dyez siklos, yeno de saumeryo: ⁴⁵un toro ijo de vaka, un barvez, un karnero de edad de un anyo por alsasyon: ⁴⁶un kavrito de las kavras por sakrifisyo por pekado: ⁴⁷i por sakrifisyo de pases, dos bueyes, sinko barvezes, sinko kavrones, sinko karneros de edad de un anyo. Esta fue la ayegasyon de Elyasaf, ijo de Deuel.

⁴⁸En el dia seteno ayego el mayoral de los ijos de Efrayim, Elishama, ijo de Ami’hud. ⁴⁹Fue su ayegasyon un plato de plata de pezo de syento i trenta siklos, un djarro de plata de setenta siklos, segun el siklo del santuvaryo, ambos yenos de semola enbuelta en azeyte por prezente: ⁵⁰un kucharon de oro de dyez siklos, yeno de saumeryo: ⁵¹un toro ijo de vaka, un barvez, un karnero de edad de un anyo por alsasyon: ⁵²un kavrito de las kavras por sakrifisyo por pekado: ⁵³i por sakrifisyo de pases, dos bueyes, sinko barvezes, sinko kavrones, sinko karneros de edad de un anyo. Esta fue la ayegasyon de Elishama, ijo de Ami’hud.

⁵⁴En el dia ochavo ayego el mayoral de los ijos de Menashe, Gamliel, ijo de Pedatsur. ⁵⁵Fue su ayegasyon un plato de plata de pezo de syento i trenta siklos, un djarro de plata de setenta siklos, segun el siklo del santuvaryo, ambos yenos de semola enbuelta en azeyte por prezente: ⁵⁶un kucharon de oro de dyez siklos, yeno de saumeryo: ⁵⁷un toro ijo de vaka, un barvez, un karnero de edad de un anyo por alsasyon: ⁵⁸un kavrito de las kavras por sakrifisyo por pekado: ⁵⁹i por sakrifisyo de pases, dos bueyes, sinko barvezes, sinko kavrones, sinko karneros de edad de un anyo. Esta fue la ayegasyon de Gamliel, ijo de Pedatsur.

⁶⁰En el dia noveno ayego el mayoral de los ijos de Binyamin, Avidan, ijo de Gidoni. ⁶¹Fue su ayegasyon un plato de plata de pezo de syento i trenta siklos, un djarro de plata de setenta siklos, segun el siklo del santuvaryo, ambos yenos de semola enbuelta en azeyte por prezente: ⁶²un kucharon de oro de dyez siklos, yeno de saumeryo: ⁶³un toro ijo de vaka, un barvez, un karnero de edad de un anyo por alsasyon: ⁶⁴un kavrito de las kavras por sakrifisyo por pekado: ⁶⁵i por sakrifisyo de pases, dos bueyes, sinko barvezes, sinko kavrones, sinko karneros de edad de un anyo. Esta fue la ayegasyon de Avidan, ijo de Gidoni.

⁶⁶En el dia dezeno ayego el mayoral de los ijos de Dan, Ahiezer, ijo de Amishaday. ⁶⁷Fue su ayegasyon un plato de plata de pezo de syento i trenta siklos, un djarro de plata de setenta siklos, segun el siklo del santuvaryo, ambos yenos de semola enbuelta en azeyte por prezente: ⁶⁸un kucharon de oro de dyez siklos, yeno de saumeryo: ⁶⁹un toro ijo de vaka, un barvez, un karnero de edad de un anyo por alsasyon: ⁷⁰un kavrito de las kavras por sakrifisyo por pekado: ⁷¹i por sakrifisyo de pases, dos bueyes, sinko barvezes, sinko kavrones, sinko karneros de edad de un anyo. Esta fue la ayegasyon de Ahiezer, ijo de Amishaday.

⁷²En el dia onzeno ayego el mayoral de los ijos de Asher, Pagiel, ijo de Ohran. ⁷³Fue su ayegasyon un plato de plata de pezo de syento i trenta siklos, un djarro de plata de setenta siklos, segun el siklo del santuvaryo, ambos yenos de semola enbuelta en azeyte por prezente: ⁷⁴un kucharon de oro de dyez siklos, yeno de saumeryo: ⁷⁵un toro ijo de vaka, un barvez, un karnero de edad de un anyo por alsasyon: ⁷⁶un kavrito de las kavras por sakrifisyo por pekado: ⁷⁷i por sakrifisyo de pases, dos bueyes, sinko barvezes, sinko kavrones, sinko karneros de edad de un anyo. Esta fue la ayegasyon de Pagiel, ijo de Ohran.

⁷⁸En el dia dodjeno ayego el mayoral de los ijos de Naftali, Ahira, ijo de Enan. ⁷⁹Fue su ayegasyon un plato de plata de pezo de syento i trenta siklos, un djarro de plata de setenta siklos, segun el siklo del santuvaryo, ambos yenos de semola enbuelta en azeyte por prezente: ⁸⁰un kucharon de oro de dyez siklos, yeno de saumeryo: ⁸¹un toro ijo de vaka, un barvez, un karnero de edad de un anyo por alsasyon: ⁸²un kavrito de las kavras por sakrifisyo por pekado: ⁸³i por sakrifisyo de pases, dos bueyes, sinko barvezes, sinko kavrones, sinko karneros de edad de un anyo. Esta fue la ayegasyon de Ahira, ijo de Enan.

⁸⁴Este fue el estrenamyento del ara, en el dia ke fue untada, por los mayorales de Yisrael: dodje platos de plata, dodje djarros de plata, dodje kucharones de oro: ⁸⁵kada plato de plata de syento i trenta siklos, kada djarro de setenta, toda la plata de los atuendos fue dos mil i kuatrosyentos siklos, segun el siklo del santuvaryo. ⁸⁶Los dodje kucharones de oro yenos de saumeryo, de dyez siklos kada kucharon, segun el siklo del santuvaryo. Todo el oro de los kucharones fue syento i vente siklos. ⁸⁷Todos los bueyes por la alsasyon fueron dodje toros, los barvezes dodje, los karneros de edad de un anyo dodje, kon su prezente; i los kavritos de las kavras dodje, por sakrifisyo por pekado. ⁸⁸I todos los bueyes del sakrifisyo de pases fueron vente i kuatro toros, los barvezes sesenta, los kavrones sesenta, los karneros de edad de un anyo sesenta. Este fue el estrenamyento del ara despues ke fue untada. ⁸⁹I kuando entrava Moshe en la tyenda del plazo para avlar kon el oia la boz del ke le avlava de ensima del kuvertero ke estava sovre el arka del Testimonyo de entre los dos Keruvim i avlava a el.

Ver todos los capítulos publicados en esta sección

 ————————————————————————

About Yehuda Sidi

I was born in 1953 in Tekirdag, Turkey and grew up in Canakkale. My father Hayim Sidi served as rabbi in both Tekirdag and Cannakale. Yehuda immigrated to Israel at 1971 and has been living in Israel since then. I am a softwere engineer. I am neither a Ladino nor a Tanach scholar. Actually I have very basic knowlede in Judeo Espanyol.

A year ago I looked for a Ladino Tanach in latin characters, and eventually I ended transcribing the Ladino Tanach which was published bt the Protestant missionaries who were vet active in the Speharadic world in the 19th century. This Tanach (and other books) were very popular with the Sepharadic Jews. This Tanach was published in two volumes.

So far I have transcribed the Tora. I am now in the process of transcribing the rest of the first volume which covers Ye’hoshua, Shoftim, Shemuel Alef, Shemuel Bet, Melachim Alef and Melachim Bet. I hope to complete the transcription in a few months.

The transcription was not reviewed by the Ladino scholars. Please report the errors that you find.