eSefarad Noticias del Mundo Sefaradi
Ver todos los capítulos publicados en esta sección
Sefer TORA NEVIIM UKETUVIM
El livro de la Ley, los Profetas, las Eskrituras
Trazladado en la lingua Espanyola
Estamperea de A. ‘H. Boyadjian
Konstantatinopla 1873
Transkrivido por Ye’huda Sidi. Febrero 2015
34 – BAMIDBAR
1
1Avlo A’ a Moshe en dizyerto de Sinay, en la tyenda del plazo, en el primer dia del mez segundo, en el segundo anyo de su salida de la tyerra de Ayifto, dizyendo: 2Tomad la kuenta de toda la kompanya de los ijos de Yisrael por sus linajes, por la kaza de sus padres, kon la kuenta de los nombres, todo macho por sus kavesas, 3de edad de vente anyos i arriva, todos los ke pueden salir al fonsado en Yisrael; los kontaresh por sus fonsados, tu i A’haron. 4I kon vozotros estara un varon de kada trivo, kada uno ke sea kavesera de la kaza de sus padres. 5I estos son los nombres de los varones ke estaran kon vozotros: de Reuven, Elitsur, ijo de Shedeur. 6De Shimon, Shelumiel, ijo de Tsurishaday. 7De Ye’huda, Nahshon, ijo de Aminadav. 8De Yissahar, Natanel, ijo de Tsuar. 9De Zevulun, Eliav, ijo de Helon. 10De los ijos de Yosef: de Efrayim, Elishama, ijo de Ami’hud: de Menashe, Gamliel, ijo de Pedatsur. 11De Binyamin, Avidan, ijo de Gidoni. 12De Dan, Ahiezer, ijo de Amishaday. 13De Asher, Pagiel, ijo de Ohran. 14De Gad, Elyasaf, ijo de Deuel. 15De Naftali, Ahira, ijo de Enan. 16Estos eran los nombrados de la kompanya, mayorales de los trivos de sus padres, kaveseras de los miles de Yisrael.
17I tomo Moshe i A’haron a estos varones, ke fueron deklarados por sus nombres. 18I adjuntaron auna a toda la kompanya en el primer dia del mez segundo; i fueron alinajados por sus linajes, por la kaza de sus padres, kon la kuenta de los nombres, de edad de vente anyos i arriva, por sus kavesas. 19Komo A’ enkomendo a Moshe, el los konto en el dizyerto de Sinay.
20I los ijos de Reuven, primodjenito de Yisrael, sus djerenansyos, por sus linajes, por la kaza de sus padres, segun la kuenta de los nombres por sus kavesas, todo macho de edad de vente anyos i arriva, todos los ke podian salir al fonsado; 21los kontados de eyos, del trivo de Reuven fueron kuarenta i sesh mil i kinyentos.
22De los ijos de Shimon, sus djerenansyos, por sus linajes, por la kaza de sus padres, sus kontados, segun la kuenta de los nombres por sus kavesas, todo macho de edad de vente anyos i arriva, todos los ke podian salir al fonsado; 23los kontados de eyos, del trivo de Shimon, sinkuenta i nueve mil i tressyentos.
24De los ijos de Gad, sus djerenansyos, por sus linajes, por la kaza de sus padres, segun la kuenta de los nombres. De edad de vente anyos i arriva, todos los ke podian salir al fonsado; 25los kontados de eyos, del trivo de Gad, kuarenta i sinko mil i seshsyentos i sinkuenta.
26De los ijos de Ye’huda, sus djerenansyos, por sus linajes, por la kaza de sus padres, segun la kuenta de los nombres, de edad de vente anyos i arriva, todos los ke podian salir al fonsado; 27los kontados de eyos, del trivo de Ye’huda, setenta i kuatro mil i seshsyentos.
28De los ijos de Yissahar, sus djerenansyos, por sus linajes, por la kaza de sus padres, segun la kuenta de los nombres, de edad de vente anyos i arriva, todos los ke podian salir al fonsado; 29los kontados de eyos, del trivo de Yissahar, sinkuenta i kuatro mil i kuatrosyentos.
30De los ijos de Zevulun, sus djerenansyos, por sus linajes, por la kaza de sus padres, segun la kuenta de los nombres, de edad de vente anyos i arriva, todos los ke podian salir al fonsado; 31los kontados de eyos, del trivo de Zevulun, sinkuenta i syete mil i kuatrosyentos.
32De los ijos de Yosef: de los ijos de Efrayim, sus djerenansyos, por sus linajes, por la kaza de sus padres, segun la kuenta de los nombres, de edad de vente anyos i arriva, todos los ke podian salir al fonsado; 33los kontados de eyos, del trivo de Efrayim, kuarenta mil i kinyentos.
34De los ijos de Menashe, sus djerenansyos, por sus linajes, por la kaza de sus padres, segun la kuenta de los nombres, de edad de vente anyos i arriva, todos los ke podian salir al fonsado; 35los kontados de eyos, del trivo de Menashe, trenta i dos mil i dossyentos.
36De los ijos de Binyamin, sus djerenansyos, por sus linajes, por la kaza de sus padres, segun la kuenta de los nombres, de edad de vente anyos i arriva, todos los ke podian salir al fonsado; 37los kontados de eyos, del trivo de Binyamin, trenta i sinko mil i kuatrosyentos.
38De los ijos de Dan, sus djerenansyos, por sus linajes, por la kaza de sus padres, segun la kuenta de los nombres, de edad de vente anyos i arriva, todos los ke podian salir al fonsado; 39los kontados de eyos, del trivo de Dan, sesenta i dos mil i syetesyentos.
40De los ijos de Asher, sus djerenansyos, por sus linajes, por la kaza de sus padres, segun la kuenta de los nombres, de edad de vente anyos i arriva, todos los ke podian salir al fonsado; 41los kontados de eyos, del trivo de Asher, kuarenta i un mil i kinyentos.
42De los ijos de Naftali, sus djerenansyos, por sus linajes, por la kaza de sus padres, segun la kuenta de los nombres, de edad de vente anyos i arriva, todos los ke podian salir al fonsado; 43los kontados de eyos, del trivo de Naftali, sinkuenta i tres mil i kuatrosyentos.
44Estos fueron los kontados, los kuales konto Moshe i A’haron. i los mayorales de Yisrael. Ke eran dodje varones: kada uno por la kaza de sus padres eran. 45I fueron todos los kontados de los ijos de Yisrael, por la kaza de sus padres, de edad de vente anyos i arriva, todos los ke podian salir al fonsado en Yisrael; 46fueron todos los kontados seshsyentos i tres mil i kinyentos i sinkuenta.
47Ma los Levitas, por el trivo de sus padres, no fueron kontados entre eyos. 48Porke avlo A’ a Moshe, dizyendo: 49solamente el trivo de Levi no kontaras, ni tomaras la kuenta de eyos entre los ijos de Yisrael. 50 Ma ordena tu a los Levitas sovre el tavernakulo del Testimonyo, i sovre todos sus atuendos, i sovre todo lo ke le pertenese: eyos yevaran el tavernakulo i todos sus atuendos, i eyos lo serviran, i al derredor del tavernakulo pozaran. 51I kuando el tavernakulo se a de mover, los Levitas lo abasharan; i kuando el tavernakulo sea de pozar, los Levitas lo levantaran; i el estranyo ke se ayegare, sera matado. 52I los ijos de Yisrael pozaran kada uno en su real, i kada uno djunto a su bandera por sus fonsados. 53Ma los Levitas pozaran al derredor del tavernakulo del Testimonyo, i no avra sanya sovre la kompanya de los ijos de Yisrael; i los Levitas guardaran la guardya del tavernakulo del Testimonyo. 54I izyeron los ijos de Yisrael segun todo lo ke A’ enkomendo a Moshe, ansi izyeron.
2
1I avlo A’ a Moshe i a A’haron, dizyendo: 2los ijos de Yisrael pozaran kada uno djunto a su bandera, kon las senyales de la kaza de sus padres; a lo leshos al derredor de la tyenda del plazo pozaran. 3I los ke pozaran al Levante , al oryente, seran los de la bandera del real de Ye’huda por sus fonsados; i el mayoral de los ijos de Ye’huda sera Nahshon, ijo de Aminadav. 4I su fonsado, i los kontados de eyos, setenta i kuatro mil i seshsyentos. 5I los ke pozaran djunto a el seran el trivo de Yissahar; i el mayoral de los ijos de Yissahar sera Natanel, ijo de Tsuar. 6I su fonsado, i sus kontados, sinkuenta i kuatro mil i kuatrosyentos. 7I el trivo de Zevulun; i el mayoral de los ijos de Zevulun sera Eliav, ijo de Helon. 8I su fonsado, i sus kontados, sinkuenta i syete mil i kuatrosyentos. 9Todos los kontados del real de Ye’huda, syento i ochenta i sesh mil i kuatrosyentos por sus fonsados. Estos se moveran primeros.
10La bandera del real de Reuven estara al sud por sus fonsados; i el mayoral de los ijos de Reuven sera Elitsur, ijo de Shedeur. 11I su fonsado, i sus kontados, kuarenta i sesh mil i kinyentos. 12I los ke pozaron djunto a el seran el trivo de Shimon; i el mayoral de los ijos de Shimon sera Shelumiel, ijo de Tsurishaday. 13I su fonsado, i los kontados de eyos, sinkuenta i nueve mil i tressyentos. 14I el trivo de Gad; i el mayoral de los ijos de Gad sera Elyasaf, ijo de Deuel. 15I su fonsado, i los kontados de eyos, kuarenta i sinko mil i seshsyentos i sinkuenta. 16Todos los kontados del real de Reuven, syento i sinkuenta i un mil i kuatrosyentos i sinkuenta por sus fonsados. I estos se moveran segundos.
17Entonses se movera la tyenda del plazo, el real de los Levitas en medyo de los reales; komo pozan, ansi se moveran, kada uno en su lugar por sus banderas.
18La bandera del real de Efrayim por sus fonsados estara al oksidente; i el mayoral de los ijos de Efrayim sera Elishama, ijo de Ami’hud. 19I su fonsado, i los kontados de eyos, kuarenta mil i kinyentos. 20I djunto a el estara el trivo de Menashe; i el mayoral de los ijos de Menahse sera Gamliel, ijo de Pedatsur. 21I su fonsado, i los kontados de eyos, trenta i dos mil i dossyentos. 22I el trivo de Binyamin; i el mayoral de los ijos de Binyamin sera Avidan, ijo de Gidoni. 23I su fonsado i los kontados de eyos trenta i sinko mil i kuatrosyentos. 24Todos los kontados del real de Efrayim, syento i ocho mil i syento por sus fonsados. I estos se moveran terseros.
25La bandera del real de Dan estara al norte por sus fonsados; i el mayoral de los ijos de Dan sera Ahiezer, ijo de Amishaday. 26I su fonsado, i los kontados de eyos, sesenta i dos mil i syete syentos . 27I los ke pozaran djunto a el seran el trivo de Asher; i el mayoral de los ijos de Asher sera Pagiel, ijo de Ohran. 28I su fonsado, i los kontados de eyos, kurenta i un mil i kinyentos. 29I el trivo de Naftali; i el mayoral de los ijos de Naftali sera Ahira, ijo de Enan. 30I su fonsado, i los kontados de eyos, sinkuenta i tres mil i kuatrosyentos. 31Todos los kontados del real de Dan, syento i sinkuenta i syete mil i seshsyentos. Estos se moveran postreros por sus banderas.
32Estos son los kontados de los ijos de Yisrael, por la kaza de sus padres. Todos los kontados de los reales, por sus fonsados, fueron seshsyentos i tres mil i kinyentos i sinkuenta. 33Ma los Levitas no fueron kontados entre los ijos de Yisrael, komo A’ enkomendo a Moshe. 34I izyeron los ijos de Yisrael segun todo lo ke A’ enkomendo a Moshe; ansi pozavan por sus banderas, i ansi se movian, kada uno por sus linajes, segun la kaza de sus padres.
3
1I estos son los djerenansyos de A’haron i de Moshe en el dia ke A’ avlo a Moshe en el monte de Sinay. 2I estos son los nombres de los ijos de A’haron; Nadav el primodjenito, i Avi’hu, Elazar, i Itamar. 3Estos son los nombres de los ijos de A’haron, los saserdotes (kohanim) untados, la mano de los kuales el inchyo para servir en el saserdosyo (ke’huna). 4I Nadav i Avi’hu muryeron delante de A’ kuando ayegaron fuego estranyo delante de A’ en el dizyerto de Sinay, i no tuvyeron ijos; iI Elazar i Itamar sirvyeron en el saserdosyo a vista de A’haron su padre.
5I avlo A’ a Moshe, dizyendo: 6az ayegar el trivo de Levi, i azlo estar delante de A’haron el saserdote para ke le ministren. 7I guardaran su guardya, i la guardya de toda la kompanya delante de la tyenda del plazo, para servir el servisyo del tevernakulo. 8I guardaran todos los atuendos de la tyenda del plazo, i la guardya de los ijos de Yisrael, para servir el servisyo del tavernakulo. 9I daras los Levitas a A’haron i a sus ijos; eyos son dados dados a el de entre los ijos de Yisrael. 10I a A’haron i a sus ijos ordenaras, i guardaran su saserdosyo; i el estranyo ke se ayegare sera matado.
11I avlo A’ a Moshe, dizyendo: 12i yo, ek, yo tomi a los Levitas de entre los ijos de Yisrael en lugar de todo primodjenito ke avre la bulba entre los ijos de Yisrael; i los Levitas seran mios. 13Porke mio es todo primodjenito; en el dia ke eri a todo primodjenito en la tyerra de Ayifto, yo santifiki para mi todo primodjenito en Yisrael, dezde el ombre asta la kuatropea; mios seran: yo A’.
14I avlo A’ a Moshe en el dizyerto de Sinay, dizyendo: 15konta a los ijos de Levi por la kaza de sus padres, por sus linajes; todo macho de edad de un mez i arriva los kontaras. 16I Moshe los konto por dicho de A’, komo fue enkomendado. 17I estos fueron los ijos de Levi por sus nombres: Gershon, i Ke’hat, i Merari. 18I estos son los nombres de los ijos de Gershon por sus linajes: Livni, i Shimi. 19I los ijos de Ke’hat por sus linajes: Amram, i Yits’har, Hevron, i Uziel. 20I los ijos de Merari por sus linajes: Mahli, i Mushi. Estos son los linajes de los Levitas por la kaza de sus padres.
21De Gershon fue el linaje de los Livnitas i el linaje de los Shimitas; estos son los linajes de los Gershonitas, 22Los kontados de eyos por la kuenta de todos los machos de edad de un mez i arriva, los kontados de eyos fueron syete mil i kinyentos. 23Los linajes de los Gershonitas pozaran detras del tavernakulo al oksindente. 24I el mayoral de la kaza del padre de los Gershonitas sera Elyasaf, ijo de Lael. 25I la guardya de los ijos de Gershon en la tyenda del plazo sera el tavernakulo, i la tyenda, su kuvyerta, i la mamparansa de la puerta de la tyenda del plazo, 26i las kortinas de la korte, i la mamparansa de la puerta de la korte ke esta djunto al tavernakulo, i djunto al ara al derredor, i sus kuerdas para todo su servisyo.
27I de Ke’hat fue el linaje de los Amramitas, i el linaje de los Yits’haritas, i el linaje de los Hevronitas, i el linaje de los Uzielitas; 28estos son los linajes de los Ke’hatitas. Segun la kuenta de todos los machos de edad de un mez i arriva, eran ocho mil i seshsyentos; ke guardavan la guardya del santuvaryo. 29Los linajes de los ijos de Ke’hat pozaran al lado del tavernakulo al sud. 30I el mayoral de la kaza del padre de los linajes de los Ke’hatitas sera Elitsafan, ijo de Uziel. 31I la guardya de eyos sera el arka, i la meza, i la almenara, i las aras, i los atuendos del santuvaryo kon ke ministran, i la mamparansa, i todo su servisyo. 32I el mayoral de los mayorales de los Levitas sera Elazar, ijo de A’haron el saserdote, tenyendo kargo de los ke guardan la guardya del santuvaryo.
33De Merari fue el linaje de los Mahlitas, i el linaje de los Mushitas; estos son los linajes de Merari. 34I los kontados de eyos, segun la kuenta de todos los machos de edad de un mez i arriva, fueron sesh mil i dossyentos. 35I el mayoral de la kaza del padre de los linajes de Merari sera Tsuriel, ijo de Avihayil; estos pozaron al lado del tavernakulo al norte. 36I el kargo de la guardya de los ijos de Merari sera las tavlas del tavernakulo, i sus serraderos, i sus pilares, i sus almirezes, i todos sus atuendos, i todo su servisyo, 37i los pilares de la korte al derredor, i sus almirezes, i sus estakas, i sus kuerdas.
38I los ke pozaran delante del tavernakulo al Levante, delante de la tyenda del plazo al oryente, seran Moshe, i A’haron, i sus ijos. Guardando la guardya del santuvaryo por la guardya de los ijos de Yisrael; i el estranyo ke se ayegare, sera matado. 39Todos los kontados de los Levitas, ke konto Moshe i A’haron por dicho de A’, por sus linajes, todos los machos de edad de un mez i arriva fueron vente i dos mil.
40I disho A’ a Moshe: konta todos los primodjenitos machos de los ijos de Yisrael de edad de un mez i arriva, i toma la kuenta de sus nombres. 41I tomaras a los Levitas para mi, yo A’, en lugar de todos los primodjenitos entre los ijos de Yisrael; i las kuatropeas de los Levitas en lugar de todos los primodjenitos entre las kuatropeas de los ijos de Yisrael. 42I konto Moshe, komo A’ le enkomendo, todos los primodjenitos entre los ijos de Yisrael. 43I todos los primodjenitos machos, segun la kuenta de los nombres, de edad de un mez i arriva, por los kontados de eyos, fueron vente i dos mil i dossyentos i setenta i tres.
44I avlo A’ a Moshe, dizyendo: 45toma a los Levitas en lugar de todos los primodjenitos entre los ijos de Yisrael, i las kuatropeas de los Levitas en lugar de sus kuatropeas; i los Levitas seran mios; yo A’. 46I por los reskates de los dossyentos i setenta i tres de los primodjenitos de los ijos de Yisrael, ke sovrepujan el numero de los Levitas, tomaras [1]sinko siklos por kavesa; 47segun el siklo del santuvaryo tomaras; el siklo es vente geras. 48I daras a A’haron i a sus ijos la moneda de los reskates de los ke sovran entre eyos. 49I Moshe tomo la moneda del reskate de los ke sovraron de mas de los reskatados por los Levitas. 50De los primodjenitos de los ijos de Yisrael resivyo la moneda, ke era mil i tressyentos i sesenta i sinko siklos, segun el siklo del santuvaryo. 51I Moshe dyo la moneda de los reskates a A’haron i a sus ijos, segun el dicho de A’, komo A’ enkomendo a Moshe.
[1] Ebreo: sinko sinko
4
1I avlo A’ a Moshe i a A’haron, dizyendo: 2toma la kuenta de los ijos de Ke’hat de entre los ijos de Levi, por sus linajes, por la kaza de sus padres, 3dezde el de edad de trenta anyos i arriva asta el de edad de sinkuenta anyos, todos los ke entran en el fonsado para azer ovra en la tyenda del plazo. 4Este sera el servisyo de los ijos de Ke’hat en la tyenda del plazo, en las kozas santisimas. 5I kuando se a de mover el real, vendra A’haron , i sus ijos, i abasharan el velo de la mamparansa i kuvriran kon el el arka del Testimonyo. 6I metaran sovre eya una kuvyerta de kuero de tejones. I espandiran por ensima un panyo todo de kardeno, i le pondran sus varas. 7I sovre la meza del pan de las fases espandiran un panyo de kardeno, i meteran sovre eya los platos, i los kucharones, i las templaderas, i las kupas de la templasyon; i el pan kontinuo estara sovre eya. 8I espandiran sovre eyos un panyo de karmezi, i lo kuvriran kon una kuvyerta de kuero de tejones. i le pondran sus varas. 9I tomaran un panyo de kardeno, i kuvriran la almenara de la lumbreria, i sus kandeles, i sus tenazas, i sus paletas, i todos los atuendos de su azeyte kon ke la serven. 10I la meteran kon todos sus atuendos en una kuvyerta de kuero de tejones, i la meteran sovre un palo. 11I sovre el ara de oro espandiran un panyo de kardeno, i la kuvriran kon una kuvyerta de kuero de tejones, i le pondran sus varas. 12I tomaran todos los atuendos del servisyo, kon ke serven en el santuvaryo, i los meteran en un panyo de kardeno, i los kuvriran kon una kuvyerta de kuero de tejones, i los meteran sovre un palo. 13I dessenizaran el ara i espandiran sovre eya un panyo de purpura. 14I meteran sovre eya todos sus atuendos kon ke serven sovre eya, los brazeros, los pirones, i las paletas, i las esparzideras, todos los atuendos del ara; i espandiran sovre eya una kuvyerta de kuero de tejones, i le pondran sus varas. 15I kuando uvyere akavado A’haron i sus ijos de kuvrir el santuvaryo, i todos los atuendos del santuvaryo, al moverse el real, despues de esto vendran los ijos de Ke’hat para yevarlo; ma no token ninguna koza santa, para ke no mueran. Estas son las kargas de los ijos de Ke’hat en la tyenda del plazo. 16I el kargo de Elazar, ijo de A’haron el seserdote, sera el azeyte de la lumbrarya, i el saumeryo golorozo, i el prezente kontinuo, i el azeyte de la untasyon. El kargo de todo el tavernakulo, i de todo lo ke esta en el, en el santuvaryo, i en sus atuendos.
17I avlo A’ a Moshe i A’haron, dizyendo: 18no tajesh el trivo de los linajes de los Ke’hatitas de entre los Levitas: 19ma esto azed kon eyos, para ke bivan i no mueran, en ayegandose a las kozas santisimas: A’haron i sus ijos vendran, i los pondran a kada uno en su servisyo, i a su karga. 20I no entren para ver kuando kuvryeren las kozas santas, i muriran.
Ver todos los capítulos publicados en esta sección
————————————————————————
About Yehuda Sidi
I was born in 1953 in Tekirdag, Turkey and grew up in Canakkale. My father Hayim Sidi served as rabbi in both Tekirdag and Cannakale. Yehuda immigrated to Israel at 1971 and has been living in Israel since then. I am a softwere engineer. I am neither a Ladino nor a Tanach scholar. Actually I have very basic knowlede in Judeo Espanyol.
A year ago I looked for a Ladino Tanach in latin characters, and eventually I ended transcribing the Ladino Tanach which was published bt the Protestant missionaries who were vet active in the Speharadic world in the 19th century. This Tanach (and other books) were very popular with the Sepharadic Jews. This Tanach was published in two volumes.
So far I have transcribed the Tora. I am now in the process of transcribing the rest of the first volume which covers Ye’hoshua, Shoftim, Shemuel Alef, Shemuel Bet, Melachim Alef and Melachim Bet. I hope to complete the transcription in a few months.
The transcription was not reviewed by the Ladino scholars. Please report the errors that you find.
