eSefarad Noticias del Mundo Sefaradi
Dia de lunes, el 6 Desiembre 2010 asiendiendo la 6en kandela de Hanuka en la sala de la Hitahdut Yotsey Turkiya tambien selebrando el 50en enkontro del Salon de Ladino.
A esta okazion, Orit Salinas, inspirada por su nombre (Orit, de orijen Or=Luz) apuntó a la importansia de este biervo i su sinyifikasion en las fiestas Pesah, Purim i Hanuka. En estas fiestas de luz, simbolo de milagros, es entrelasada en el kuento istoriko de kada uno de eyas. Orit termino sus palavras sinyalando ke asender la hanukiya es grande mitsva kuando esto se aze kon alegria ke viene de adientro de korason.
El konferensiante del dia era Selim Amado ke mos prezento la estoria de los Djudyos de Turkiya. Los Djudyos arrivaron a Anatolia muncho mas antes de los Turkos, kuando eyos fuyeron de Bavel o fueron vendidos komo esklavos sea por los Fenisianos, sea por los Romanos. La sinagoga de Sardis (AC 330) es una prova de sus egzistensia en estas tierras.
Basho la dominasion de Bizans, los Djudios sufrieron tanto ke se gustaron kuando ayegaron los Turkos. El fondador del Imperio Otomano, Osman I, permetyo a los Djudios de fraguar una sinagoga en Bursa, Ets-Hayim, ke egziste oy en dia.
Selim Amado meldo la letra del Rav Sarfati invitando a los Djudios de la gola de instalarsen en el Imperio Otomano onde las minoredades profitan de la libertad de relijion, kultura, komercho, ets.
Kuando Sultan Beyazit I avrio las puertas del Imperio a los Djudios ekspulsados de Espania, los Djudios trusheron kon eyos la kultura oksidental djuntos kon sus eksperiensas en munchos kampos.
Selim kontinuo a kontar las aktividades de Donna Grasia, Shabtay Tsvi, Rav Palachi, Yaakov Huli ke influensaron el dezvelopamiento de la komunidad Djudia.
La dekadensia del Imperio kavzo tambien la dekadensia de la komunidad. La Alliance Israelita servio un sierto a ameliorar el nivel kultural de los Djudios i munchos de eyos emigraron a otros paizes en Evropa i la Amerika del Sud.
Durante la Segunda Gerra Mondial, el famozo dasyo «Varlik Vergisi» ruino munchas famiyas Djudias. Munchos de eyos imigraron a Israel apenas se fondio el Estado en 1948, Oy egzisten serka de 16.000 Djudios en Istanbul, 1400 en Izmir, una chika komunidad en Antakya i unas kuantas famiyas en Ankara, Edirne, Bursa i Chanakkale.
En la segunda partida de la tadrada, Mati Bar-Shalom mos mostro fotos istorikas de su marido z»l i su famiya, i mos konto lo ke eyos sufrieron durante la II Gerra mundial.
La famiya Fridman era bien rika i renomada en Anvers, Beljika. El padre Fridman era el 13en de 16 kreaturas, entre eyas tres ijas. Eyos eran merkaderes de briyantes. Kuando los almanes okuparon la Beljika en 1939, eyos se fuyeron kon treno a la Fransia guadrandosen los briyantes en lugares inimajinavles. Una partida de estos briyantes servieron de regalos a los ofisiales de duana para pueder pasar la frontiera.
Eyos pasaron a Paris i despues abasharon al Sud de Fransia. Tuvieron grande mazal kuando eyos peryeron el vapor para la Amerika, porke este mismo vapor fue bombardeado por los almanes.
La Famiya Frisman, sin komer munchos dias, paso a la Espania, de ayi a Portugal, mas despues kon vapor a la Amerika, Cuba, Brazil i en fin a la Tierra Santa.
Niso Guvenis
Ramat Hasharon
Para Ladinokomunita
