eSefarad Noticias del Mundo Sefaradi
Anyos enteros eya dyo azilyo i dinero a los lideres del terrorismo komo al-Kaida, el ISIS, i el Hamas. Los lideres del Hamas responsavles de las matansinas del 7 Octobre 2023 biven una vida luksuoza en Doha, la kapitala del Katar sin espanto de ser matados por Israel. Ademas el Katar i el Hamas azen parte de los Ermanos Muzulmanos, organizasyon antisemita ke endoktrina siertos muzulmanos i espesialmente los arabos a destruyir Israel. Ajustare ke el Akp partido en poder en Turkiya i los Ayetollahes iranianos sostienen esta ideolojia.
Imposivle de kreerse a las deklarasyones del Emir del Katar, ke no estava al koriente del 7 Octobre, kuando es el ke dio miliardas de dolares al Hamas i ke sin este ayudo no se podiya organizar el asalto ke tuvo lugar. Para deskulparse en los días pasados, resivido por el prezidente Macron kon munchas pompas en Paris, el atabafo las kestyones a este sujeto ke le aze mal en achetando a envestisir 10 miliardas de dólares en Fransya. En pokas palavras el Katar merka al mundo kon su dinero, obtenido grasias a sus reservas de gaz i de neft ilimitadas ke tiene.
El Katar en mizmo tiempo abriga la mas grande baza militar amerikana del Medyo Oriente. La baza al-Udeid es el sentro del komandamyento de las fuerzas de mas de 10 mil soldados amerikanos. Eya es la mas grande baza amerikana afuera de los payizes ke azen parte del Nato. Razon por la kuala el prezidente Biden mira siempre de komportarse kon amabilidad, i de achetarlo komo el solo medyator en el konflikto de Gazza. Bien entendido todas las potensyas del mundo lo ven de la mizma manera inkluzo Israel. El Katar payiz chiko kon poka povlasyon topandose entre el Iran i la Arabia Seudita siempre no benefisyo de ser ‘prima donna’. Durante 2017 La Arabia Seudita korto sus relasyones diplomatikas kon eya akuzandolo de tener relasyones kon los Ermanos Muzulmanos i kon las organizasyones terroristas, le metyo un ambargo ke fue aplikado por los payizes muzulmanos a la eksepsyon del Iran i de la Turkiya. Grasias a la prezensya amerikana la Arabia Seudita no lo atako i la Turkiya lo ayudo a sobrebivir del ambargo ke le fue inflijido.
La Kupa mundial de futbol de 2022 i su atadijo al spor de los payizes oksidentales en los kualos merko klubes renomados i envestisyo 4 miliardas de dólares lo izo el patron del futbol i del basketbol en Evropa i en los Estados Unidos. El Katar investisyo myentres en la kultura oksidentala en azyendo donasyones de miliyones de dólares a las universidades amerikanas prestijyozas komo Georgetown, Cornell, Carnegie Mellon, las kualas tienen seksyones en Doha.
EL emir del Katar oye kon atansyon lo ke el prezidente de los Estados Unidos le dize, por esta razón vino el tiempo ke Biden le diga a este sinyor de trokar su politika relasyonada kon los terroristos si kerera kedar komo el sentro de la diplomasiya globala. Komo se save los Estados Unidos emplea el Katar por sus enteresos kon las organizasyones terroristas i se aspera ke kon la vinida del futuro prezidente esto trokara. Los estados Unidos no poeden mas atchetar el djugo dopyo del Katar ke el buto final es de destruyir Israel i la demokrasiya oksidentala. El katar no es un independiente tresera partida en el konflikto de Gazza, porke no solo guadra a los lideres del Hamas en su tyerra i kontinua a finansar el esforso de gerra de esta organizasyon maldicha. Vino el tiempo de meter ambargo ekonomiko i politiko a este payis si no acheta de ezvachear de ovrar kon dos karikas. Basta ke el Prezidente de los estados Unidos le anonse ke serrara la baza militar la kuala es la sola garantiya de sovrebiviensa ke tiene para ke el emir perya su eshuenyo. Katar deve de ovrar si veramente kere ke el Medyo Oriente biva en pas es de arestar la gerra en Gazza en liberando los aravatados israelianos i ovligando el Hamas a dechar las armas, en entregándose.
Selim Salti
Fuente: BÜLTEN de los turkanos de Israel – turkisrael.org.il
