eSefarad Noticias del Mundo Sefaradi
El Kovid-19 enserro al mundo entero a kedar en kaza. En el oksidente, la mayoriya de la djente ekipada de komputadoras pasaron i pasan sus tiempos no solo a meldar las novelas i artikolos sosiales en los manaderos de la prensa eskrita i de sintirlos en la televizyon, ma mizmo a dar sus sentimientos politikos i sosyales sovre un muchedumbre de sujetos en los kualos el antisemitizmo suve al pino. Mas la komunikasyon se propaja mas las novelas falsas yenas de inimista i de aborresimyento se espanden. No siento la nesesita de darvos,keridos lektores, echemplos porke penso, ke la mayoriya de vozotros ya konosesh el sujeto. No me gustaría de enkluir palavras ke vos atristaran.
El jurnalizmo etiko i seryozo , dezde los dalkavos 20 anyos ke lucha i ke pena a egzistir en el sirkolo del internet,.se enkontra kon un muevo entrompeso ke es la palavra mintiroza, inkontrolada. Los governos en el oksidente por lo mas miran de dar apoyo juridiko i material a esta institusyon para ke la demokrasiya no sufra de sus konsikuensas.
Malgrado esto, seve una epidemia de nuvelas falsas ganar el tereno. Es fasil i sin konsikuensa de ser djuzgado i kondanado de espandir novelas falsas o yerradas en linya via la medya sosyala . Espesialmente durante el izolamyento ke mos kavzo la koronavirus, la palavra aborresida, antisemita topo el kampo libro i mos es prezentada en diversas formas mizmo kon fineza ke mos puncha el korason. En la istoria fue dicho a miles de vezes ke la palavra mata i se aze muy perikoloza, dunke es imperativo de kombatirla.
Los mesajes de antisemitizmo se dispersan estos dias kon la mizma velochita del virus. La enemisdad kontra los djudios komo individuales i komo antidad kollektiva va en juntos kon las teoriyas de komploto sovre las orijines de las krizas aktualas . La Komunita internasyonala de ve ser alarmada enfrente del diskorso de aborresimiento i del krimen fiziko , tandem danjorozo para la umanidad. Una kolaborasyon urjente entre los payizes oksidentales i espesialmente los evropeos , sus ajensias, las komunidades djudias es nesesarya. Eyos devran de serka siguir los aktos de antesimitizmo, de organizar komites afin de diskutir las konsikuensas de estos aktos i de propozar remedyos konsistyentes. Koza ke parese normal ma difisil a realizar.
La responsabilidad i la transparensya de la palavra de los politisyanos enserrados en sus lugares krea un problem juridiko i administrativo, no se save ken lo arreyevara. Los governos o los elektores? En despartes, en los parlamentos, las reunyones son echas kaji en salas vaziyas onde preguntas i diskusyones no son echas por mankura de participantes, difisil de poder debatir las kestyones importantes i urjentes sovre la vida de kada dia i ansi a mirar de rezolverlas. Mizmo durante la pandemiya se vido ke el Konsilyo Evropeo enfrente de siertas korrupsyones miro de empidirlas sin konsultasyon de los elijidos.
Demezmo danjorozo atmosfero para Israel i los djudios ke se topan en estos tiempos enfrente de la kestyon de la aneksyon de siertos territorios de Yehuda i Shomron. En el mes de Julio se aspera ke todos los inimigos ,sin falta ,ampesaran a refuzar de rekonoser este derecho a Israel malgrado ke los territorios de Yehuda i Shomron se espartiran entre la Otoridad Palestiniana i Israel i ke sovre el plano Trump Israel rekonosera la indepensya de la Palestina desarmada, koza ke no dara a agustar la derecha fondamantalista israeliana.
Achakes de esto, ken savra la kandidad de governos, organizasyones nasyonalas i internasyonalas ke se aparejan dezde oy, komo akuzar i kulpabilizar los djudios i Israel de todos los pekados i las malas echas del Medyo Oriente. El silensyo aktual, de los payizes arabos a este sujeto, no kere dizir ke el dia vinidero i eyos no se van enbirrarsen. La falsedad i el antisemitizmo son sujetos ke se dezveloparan mizmo en las kanchelerias de los estados kristyanos i muzulmanos akuzando a Israel de ser konkistador i keryendo krear un kanton apartado i isolado para los palestinianos. Ma la nasyon djudia es fuerte i en mayoriya unida para defenderse, sovre todo ke Israel egziste komo potensya independiente.
La kreativita teknolojika i la kapachidad de establisir muevos modos de defensia en el internet grasias a los instrumentos digitales perfeksyonados por Israel, se aspera poder krear barajes a los asaltos antisemitos i sovre todo de mirar de konvenser los puevlos i a sus dirijentes, si son demokratikos, de los derechos istorikos de Israel sovre los territorios de Yehuda i Shomron. Dar a entender ke nada trokara en en estos lugares visto ke Israel de fakto los kontrola de muncho tiempo.
Selim Salti
Fuente: BÜLTEN de los turcanos de Israel – turkisrael.org.il
