eSefarad Noticias del Mundo Sefaradi
Partajamos un programa dedikado a la Djudería de Segovia, una de las mijores djuderías konservadas en Sefarad. Indemás ofresemos poesía kontemporánea sefardí. La Djudería de Segovia konta kon un gran patrimonio istóriko, en su kartier, fue una de una de las más enfloresientes Komunitades Djudías kon sus primas referensias desde el S XIII, malgrado ke los djudiós yevaban morando ayí muncho tiempo atrás, una Djudería kon interesantes aportes i detalyos ke konoseremos en este programa i ke vos azemos musafires para vishitar. Su istoria, el kartier de Barrio Muevo, las Sinagogas, el mikve (banyo ritual), las mezuras en kontra de los djudiós. En literaturas sefardim ofresemos enshemplos poétikos de la autora Matilda Koen Sarano (Israel). En Patrimonio muzikal partajamos diversos enshemplos komo el kante de amor kon ritmos orientales «Dos amantes» en la interpretasión de la soprano española María José Cordero, Grupo Sirma, del CD La llave de tu corazón, kontinuamos kon el kante «Pásharo d’ermozura» ke interpretan Janet & Jak Esim, kon ritmos oriemtales kapitoló en la temátika de tradisión oral sefardí, kuentesikos, kantes, rechetas i múzikas de diversos oríjenes. Kurunamos el programa istóriko i literario kon el ermozo kante «Yrme kero» en la versión del Grupo Sirma.
________________________________________________
DOMINGOS A LAS 22.30 HORAS, MARTES A LAS 18.30 HORAS UTC.
La «Emisión Sefarad» es un programa kultural de radio, en lingua sefardí o djudeo-espanyol, que se siente kada lunes enverso Oriente Medio i Mediterráneo i los martes enverso América Norte i Sur. Sefarad es uno de los nomvres de Espanya, i el sefardí es una lingua de baza medieval a la ke se adjuntan palavras de los dialektos i linguas de las sivdades onde los sefaradim moravan. Rajel Barnatán, apareja i prezenta las emisiones i sus kontenido por entero: entrevistas, presonajes, folklor i múzika de ancha diversidad, aktividades, tradisiones, literaturas i una lingüístika atada a la kultura ke tyene sus raízes en Espanya. Ansí «Emisión Sefarad» guadra el trezoro poétiko de los S X al XII en uno de los grandes patrimonios kulturales entregados a la umanidad. Ansiemzmo la kreasión kontemporánea arrebive en muestros días i atira el intereso de oyentes de diversos lugares i paízes.
