eSefarad Noticias del Mundo Sefaradi
Selevramos la festividad de Sukot, es la fiesta de las kavanyas del Kalendario Evreo, onde por el tiempo de ocho días devemos morar en kavanyas. Damos eksplikasiones del simbol i signifikados de la festividad, ansí komo el modo de fraguar la kavanya. Es una festividad bazada en la natura, i es la fiesta onde pedimos al Dió por las luvias para toda la anyada. Konosemos komo fraguar la kavanya para ser apta, eyia reprezenta entre unotras kozas, la proteksión del Dió i mos rekodra las nuves de gloria ke davan kovijo i proteksión al puevlo durante el tiempo de las kuarenta anyadas traverso el desierto. Ofresemos kantes festivos i alegres komo el kante ke mos dezea una ermoza semana «Buena semana» interpretado por el Grupo Raíces, indemás sentimos el romance «En el jardín de la Reina» en la versión del Grupo Sirma, kon la soprano María José Cordero. Kurunamos el programa festivo kon el kante kontemporáneo dedikado a muestra lingua sefardí «A tí, lengua florida» en la interpretasión de Mónica Monasterio, dezeándovos una alegre i ermoza festividad de Sukot.
________________________________________________
DOMINGOS A LAS 22.30 HORAS, MARTES A LAS 18.30 HORAS UTC.
La «Emisión Sefarad» es un programa kultural de radio, en lingua sefardí o djudeo-espanyol, que se siente kada lunes enverso Oriente Medio i Mediterráneo i los martes enverso América Norte i Sur. Sefarad es uno de los nomvres de Espanya, i el sefardí es una lingua de baza medieval a la ke se adjuntan palavras de los dialektos i linguas de las sivdades onde los sefaradim moravan. Rajel Barnatán, apareja i prezenta las emisiones i sus kontenido por entero: entrevistas, presonajes, folklor i múzika de ancha diversidad, aktividades, tradisiones, literaturas i una lingüístika atada a la kultura ke tyene sus raízes en Espanya. Ansí «Emisión Sefarad» guadra el trezoro poétiko de los S X al XII en uno de los grandes patrimonios kulturales entregados a la umanidad. Ansiemzmo la kreasión kontemporánea arrebive en muestros días i atira el intereso de oyentes de diversos lugares i paízes.
