eSefarad Noticias del Mundo Sefaradi
Ofresemos un programa kon versiones komparadas de romanses sefardíes a kapela i sus versiones modernas. Sentimos los romanses i las eksplikasiones de su orijin, romanses dokumentados a kapela, sus semedjansas y diferensias tanto en las melodías ansí komo en sus letras. Komo konosen muestros oyentes la tradisión oral se baza en la repetisión i la trasmisión de los romanses i kantes dientro de las famyias. En este senzo la musher sefardí konta kon un rolo muy importante, komo la kudiadora de la konservasión de las tradisiones linguístikas ansí komo gastronómikas. Los romanses i kantes eran de uzo en la morada, ma tambyén en las sinagogas se tomavan las melodías de algunos vieshos kantes i romanses en algunas orasiones, son kostumvres asta oy día.
Partajamos enshemplos a kapela del romanse «La muerte del Duque de Gandía», interpretado por una mujer sefardí, en versión de Turquía, i su versión moderna, tambyén sentiremos versiones komparadas del romanse a kapela «La galana i el mar» interpretado por el sefardí nasido en Saloniki Haim Dassa, i su versión moderna interpretado por Mónica Monasterio. Daremos fin al programa kon un romanse de lutio (endecha) de ermoza melodía a kapela «Alabanzas a Jerusalem» interpretado por la kantadera sefardí de Turquía Bienvenida Aguado i su versión moderna interpretada por el Grupo Sirma kon titoló «Irme quiero». Los romanses son konservados en la memoria de los sefardim.
________________________________________________
DOMINGOS A LAS 22.30 HORAS, MARTES A LAS 18.30 HORAS UTC.
La «Emisión Sefarad» es un programa kultural de radio, en lingua sefardí o djudeo-espanyol, que se siente kada lunes enverso Oriente Medio i Mediterráneo i los martes enverso América Norte i Sur. Sefarad es uno de los nomvres de Espanya, i el sefardí es una lingua de baza medieval a la ke se adjuntan palavras de los dialektos i linguas de las sivdades onde los sefaradim moravan. Rajel Barnatán, apareja i prezenta las emisiones i sus kontenido por entero: entrevistas, presonajes, folklor i múzika de ancha diversidad, aktividades, tradisiones, literaturas i una lingüístika atada a la kultura ke tyene sus raízes en Espanya. Ansí «Emisión Sefarad» guadra el trezoro poétiko de los S X al XII en uno de los grandes patrimonios kulturales entregados a la umanidad. Ansiemzmo la kreasión kontemporánea arrebive en muestros días i atira el intereso de oyentes de diversos lugares i paízes.
