eSefarad Noticias del Mundo Sefaradi
Nos sonyimos una semana onde una kultura menazada de ulvido ma vyeja de serka dos mil anyos de istorya salga de muevo en medyo del mundo i ke todos la puedan alkansar. Mozotros pensimos ke durante una semana entera mansevos i menos mansevos, universitaryos i simples kuryozos vinidos de todas partes del mundo se enkontren para ambezarsen, para avlar, para kantar, para gizar i bivir endjuntos al modo djudeo-espanyol. Puede ser ke sea una lokura, si miramos a los tyempos prezentes i afilu un desfio. Kuantas vezes tenemos trokado de lengua i de paiz ? Kuantas vezes fuimos asentensyados a la disparisyon ? I yine dainda estamos aki – « Aki Estamos » i esto aze ke este enkuentro sea tambyen atraktivo. Tenemos grande responsabilita : azer ke muestra memorya i muestra kultura es syerto, ma i muestra modo de bivir, de pensar, de komportarmos se transmeta. Siguro esta ke no se puede ir atras del tyempo pasado. Kale ke seamos djudyos modernos en muestro atadijo al Djudezmo, a Israël, al mundo ispaniko i mediterraneo.
L’Aliansa Izraelita Universal, ande munchos de muestros paryentes i nonos izyeron sus estudyos, trae su ayudo i mos akoje en un luguar tanto moderno komo agradavle : el muevo Sentro Aliansa Edmond J. Safra. Durante una semana, tendrech la okazyon de deskuvrir la lingua, los kantes i la kozina djudeo-espanyoles, de aprofondizar sus konosensyas ; partisiparech a konferansyas i mezas redondas ; asistirech a konshertos, verech filmos ineditos i todo esto para vuestro mas grande plazer. Ma sovre todo sera la reuchida kumplida si logramos ke las kozas mas importantes afiten en los tinos i korazones, myentras komemos endjuntos o enderedor de un kaviko para ke estos momentos presyados puedan alargarse myentras todo el anyo.
8 al 13 de djulio de 2012
Seach byenvenidos a la primera Universita de Djudyo !
