eSefarad Noticias del Mundo Sefaradi
Haim Vitali Sadacca, que escribió y publicó poesía en turco en sus años jóvenes, ahora compone sólo la poesía en ladino, su amada lengua ancestral. Los poemas, elegidos por el propio autor, expresan las aspiraciones universales del alma humana para el amor, el afecto, la compasión, la generosidad, la paz y la armonía.
Disfrutaremos en esta sección la habilidad de Haim como poeta y su dominio de la lengua ladina.
«La mujer pesimista»
Era una kazalina de edad muy avansada,
Kortava lenya de la montanya estava kansada,
En su espalda la trayiya, en akel sol fuerte
Respirava kon difikultad, arogava su muerte.
«Me muerere i eskapare de esta mala vida,
En el sol, en el friyo, en la luvya i kada diya,
Kon mis pyernas ke me tramblan, me matan estos kargos,
Fin kuando yo puedre azer estos kaminos largos?»
Echo lo de su espalda por deskansarse un poko,
De leshos una solombra viniya poko a poko,
En vyendo esta kara feya tuvo grande espanto,
Empeso a azer orasyones a su Dyo Santo.
«Yo so la muerte, vine presto para ke kon mi vengas,
Me yamates para eskapar i repozo ke tengas.»
«Keeen Yooo? no senyor» diziya en tremblando i yorando
I kon sus manos flakas se estuvo aharvando.
«Yo esto kontente de mi vida, es verdad, me kanso,
Ma a todos mis dezeyos fasilmente los alkanso.
Yo keriya muncho ke uno venga por ayudarme,
Bushkava un ombre a ke venga un mano darme
So aedada, este kargo lo tengo muy pezgado,
Tengo dolores en la espalda, dolores en el lado.
Keriya kargar la lenya i a mi kabana yirme,
Esto sin fuersas en mi kama kero arebivirme.»
Se alevanto ,koryo kon su pezgo, komo fuyirse,
No pensava mas a su kanserya, ni a su tuyirse,
Una boz le diziya: «Kontentate kon tu suerte,
La vida es dulse, nunka aroges por tu muerte,
Mas vale estar bivyendo en sima de esta tierra,
Ke d’estar estirada debasho de una piedra.»
Haim Vitali Sadacca
Montreal
—————————————————————————————————————–
«No puedo olvidarte»
Tus ojos son kolor de miel ke reflektan tu dulsura,
Sus miradas son la dekorasyon de tu ermozura,
Todos mis dias los paso kon el dezeyo de verte,
Tu sos mi enspirasyon, a mi lado kero tenerte.
Tokar akeyos kaveyos sedozos i karesarte,
I kon akel fuego de mi alma dezeyo bezarte,
Tu sos mi mundo, mi alegriya .kero todo darte
Olvidar mis penas i de korason perdonarte.
Tornaremos a nuestra vida feliz komo antes
Dekorandola kon momentos muy alegres i kantes.
Estas en mi korason,yo no puedre olvidarte,
Fin la fin de mi vida vo kontinuar a amarte.
Los amorozos yoran en sekreto, ma sin lagrimas,
Kuando una espartisyon es sin razon mas i mas…
Tu repuesta me salvara de mi grande dezespero,
Lo mas tadre oy, o amanyana la noche te aspero.
Haim Vitali Sadacca
Montreal
