Poemas de Haim Vitali Sadacca: "EL RIKO-EL PROVE"

Un riko en su palasyo bivia
Kontente de su vida,orozo se via,
Serka su morada un vizino tenia
Sentia sus kantes, ma a el no lo via.
El riko tuvo un selo de su alegria
Keria saver komo pasava su dia.
Lo yamo a su kaza”Dime hombre ke es tu ofisyo?
Estos kantes siempre hueron tu visyo?”
“Senyor en esta baraka yo bivo
Kon mis kantikas yo me arebivo
So un lavorante i lavoro duro
Poko es mi revinido vo lo djuro.
Oy lavoro para komer al dia,
Mis kantes me dan una enerjia,
Esto kontente de la vida mia
Siento en mi alma una alegria.
Bivo muy solo,no tengo famia,
Ni padre,ni madre,mismo una tia.”
El riko estuvo muy tokado de su destino
Subito un djesto humano vino a su tino
Le dio una bolsa yena kon dineros
“Toma esto para tus dias venideros.”
Sintyo la mas grande alegria de su vida
Rengrasyo de alma a esta persona kerida,
Entro a su kaza kon grande espanto
Sevia su tristeza i su grande enkanto.
Un ladron si se la rova sera su muerte
Topar un lugar seguro seria muy fuerte.
La enterro en la gruta aryento de un plato
A la noche el bruido ke izo un gato
Lo esperto,emosyonado abasho a la gruta
Izo una vijita kon espanto….una vijita kurta.
Suvyo… se asento en su kama,sin repozo
Pensativle i kalmo,komo uno kon dezrepozo
Fin la manyana su oyido en algun bruyido
No puedia dormirse, su eshuenyo era fuyido.
Las noches pasavan tristes,no avia mas kantes
Ke vida ermosa tenia en su baraka antes.
***
Se hue al riko,le konto lo de su alma
Su emosyon i su espanto ke no kalma,
“ Senyor, del dia de mi rikeza piedri mi alegria
No tengo mas kantes, ni la noche ni el dia,
Me enrikesi de dinero ma me emprovesi en gozo,
Me se bolo akel plaser,esto dezganozo i no orozo,
Por favor ke tome su dinero,yo empesare a mis kantes
Estare mas kontente de bivir komo antes.