eSefarad Noticias del Mundo Sefaradi
Haim Vitali Sadacca, que escribió y publicó poesía en turco en sus años jóvenes, ahora compone sólo poesía en ladino, su amada lengua ancestral. Los poemas, elegidos por el propio autor, expresan las aspiraciones universales del alma humana para el amor, el afecto, la compasión, la generosidad, la paz y la armonía.
Disfrutaremos en esta sección la habilidad de Haim como poeta y su dominio de la lengua ladina.
«EL KONSEJO DE UN VIEJO«
Un profesor i su elevo se paseavan
Entre unos kampos ke aviya konstruksyones,
Analizar las fraguas modernas dezeyavan,
I preparar livro kon diferentes vizyones.
Vyeron una kamiza kon kalsados burakados
Ke estavan enkolgados en arvole sin flores
Miraron a sus doredor i a sus lados
No vyeron ni uno de los lavorantes proves.
El elevo penso divertirse kon un djugo azer
Eskonder un kalsado i ver lo ke va akonteser.
Komo se iva ir a su kaza ? Ke iva ser ?
Dezeyo ver la sufriyensa ke puedra naser.
El profesor no aksepto la idea inumana,
«No devez ridikularizar un prove por tu gana
No kale alesharlo de su famiya, de su gozo
No roves su deskanso, su alegriya i repozo.
Tu sos de famiya rika, puedes darle alegriya
Entenderes su felisitad de su fizyonomiya
Mete un dinero bastante a kada kalsado
Dale sonriza, alivyana su estado kansado.
Tu korason se alegra si ves el prove orozo
Tu ayudo lo salvara del estado angusyozo. »
Detras de unos arvelos serkanos se eskodyeron
De leshos kon kaminada kansada vinir lo vyeron
Despansensyozos por ver la reaksyon asperada
Del ombre ke estava en povresa dezesperada,
Tomo un kalsado ma a su pye no le kaviya !
Metyo la mano, topo un bulto ke no aviya
Ke era dinero, miro al enterno enkantado
El, yenno de duvda, komo un echizado.
Miro al otro kon kuryozitad sin kerer provarlo
Se renkontro kon el mizmo bulto, lo iva bolarlo !
Sus ojos en los sielos yamo a su Dio piadozo
Kon boz alta reingrasyo por el djesto maraviyozo.
El estudyante kedo profundamente afektado
Se sintyo muy triste por su mal propozado.
Hayim Vitali Sadacca
Istanbul
