Poema: SI LO OSKURO DE TUS OJOS de Beatriz Mazliah

Del libro inédito «TRAPIKOS DEL ALMA» de Beatríz Mazliah

SI LO OSKURO DE TUS OJOS

¡Ay de ti mi palomika,
si te topa el gavilan!
Una a una tus plumikas
a la mar se kaeran.

En las olas de tu boka
yo pidri la rason,
punyalikos de tus manos
por eyos la vida dó.

Flores tienes en el pelo,
perlas blankas en lso pies,
alas negras en el alma
i es por eso no me ves.

Anklas tengo, galanika,
anklas de amr i pasion,
komo un pasharo sin ayre
klavado en la pedra estó.

Si lo oskuro de tus ojos
sovre mi keresh posar,
a mi korason firido
la salú le vas a dar.

Beatríz Mazliah
Buenos Aires, 2000

 ,