eSefarad Noticias del Mundo Sefaradi
Rachel:
Muestras madres empesavan las preparasiones de Pesah kon las limpiezas de kaza psihin despues de Purim («Purim purim lanu, Pesah en la mano» dizian). Solo el pensar me traye akeyas shenas delantre del ojo.
Las kalderas de aguas shavonadas dainda enbasho kuando viniya
de la eskola, las mujeres lazdrando, los guezmos de shavon, de vinagre, de naftalin (para guadrar los tapetes, asta Roshashana, porke en Pesah saliyan las «sedjades», tapetikos chikos enmedyo.). Despues era el trokar los platos i los tendjeres, enkomendar la karne i las geynas, merkar i merkar, i gizar i gizar.
La fiesta era una sezon aparte, era 8 dias ke kaje todo lo ke se komiya era diferente del resto del anyo. No avia shokolatas, no avia dondurma, no avia bonbones, nada de lo ke uzavamos merkarmos «de afuera.» Todo lo ke mos metiamos en boka era echo de kaza.
Aparte, siguro, de la masa (matza) i el vino paskual.
Agora ay mas «kolaylikes», i tambien puedeser munchos mos izimos mas «livianos», ma las memorias de akeyos dias, i de las noches de la agada, kon las estoryas i los kantes, i los 8 dias de la fiesta, mos kriyo memoryas de amistad i valor de famiya i de muestra relijion, ke era muestra kultura.
Mi ermano Selim kijo adjustar sus memoryas de los anyos 40-50 a lo ke eskribi yo sovre el Pesah en Izmir, kon sus guezmos, vistas, i savores.
Selim:
No se si en el anyo entero se merkava tantos kilos de patata i tantas diezenas de guevos para preparar las komidas spesialas de Pesah, ke eran las minas, i las fritadas. Los bimuelos (ke eran komo unas balikas de matza, patata eskaldada i guevo akompanyadas de arope, eran la «delicatesse» de las komidas de demanyana.
Arope era un konsentrado de uva i pasas pretas, un likido espeso i muy dulse yamado en Turko pekmez o petmez, no se si ayinda se fabrika. Entre el anyo se uzava de mesklarlo kon tahina.
Kada anyo avia un sujeto klasiko de diskusion: «komo salio este anyo la matza?». Munchas vezes saliyan komo piedra i avia ke mojarlas para
ke se ablanden antes de komer. No avia matzas diferentes komo ekziste
agora, avia solo la «matza shmura» kon la matza ke se uza kada dia, ke
era para komer en lugar del pan, ma la mas grande partida se uzava
para azer las «minas», seyga de karne, seyga de kezo , seyga de
ispinaka.
En los anyos de la Segunda Guerra Mundial uvo anyos ke no uvo bastante matza, i la patata eskaldada sirvio de matza. Nunka tengo sintido ke un Djudio de Izmir koma pan en dias de Pesah.
Un otro rekuerdo miyo es komo se preparavan las minas i fritadas en los anyos ke no avia orno en kaza: kon lumbre de karvon, i dos paylas
kon lumbre, una enriva otra debasho para kuajar las minas. No avia
enbiar al orno de Salhane komo se uzava entre el anyo para los boyos i
burekas, todo se kuajava en kaza, i era un lavoro ekstraordinario para
las mujeres.
Kuando a las dulserias, -por no eskrivirlo kon la ortografia ke uzamos
«gatos»! i para ke no pensej ke se trata de los gatikos ke no mankavan
de kada kaza- los «gateaux» de pesah se aziyan kon polvo de matza i
eran muy buenos. Avia mujers maestras de azer «sharope» en kaza, ke es
una masa echa de asukar i de agua, a la kuala adjustavan pistachios (samfistik) o almendra. Esto era para adulsar kon la «Tavla»
tradisyonal echa de plata lavorada a mano ke ekzistiya en kada kaza.
No me akodro ke alguno aga kuento de kalorias i de kolesterol kuando
komiya las komidas tradisyonalas de Pesah.
El «Seder» de Pesah siempre se fiestava kon la prezensia de munchos de
la famiya, i no avia meldar la Agada sin la traduksion en Judeo-Espanyol, ansina ke se azia muy larga i despues de komer a pokos les kedava ganas de kontinuar el resto de la agada. No se puede olvidar ke kon la «Alahmanya» se pasava la tavla kon el gueso i el vinagre i el haroset etc. por la kavesa de todos los miembros asentados, i munchos kantavan el kavretiko verso la fin de la komida del seder.
Oy me parese ke una buena partida de los uzos de Pesah no se konservan
mas. La idea ke en el mundo entero en akeyas oras todos estan asentados al deredor de una meza i nombrando la salidura de Ayifto kon todo lo ke simboliza, esto es una de las ermozas partes de la tradisyon paskuala.
Rachel:
El biervo «seder» no se uzava ande mozotros, diziamos «la Agada» o «noche de la Agada.» Komo disho Selim, se meldava la Agada de Pesah entera en ebreo i ladino. Para los ke no savian meldar en ebreo (ke era lo mas de las mujeres) los livrikos de Agada eran transliterados en letras «latinas-turkas»
(kon la s kon la «sediya» (kolika) debasho en biervos komo «kades» (kadesh) o «kidus» (kidush), i la c ke se pronunsa komo «ch», etc.) Mozotros todos la primera metad de la Agada la saviamos «de kavesa» (memorizada), en las dos linguas, ma despues de la metad ya estavamos tantos kansos, ke mas «no mos entrava en la kavesa» lo ke estavamos meldando.
El uzo de pasar la tavla (aki lo yaman «seder plate» en inglez) ensima las kavesas de todos los de la meza en kantando el «Alahmanya» («Alahmanya di ahalu avotenu….» /»Este es el pan de la afrisyon, ke komieron muestros padres….») no tengo visto yo aparte ke en Izmir (o entre los Izmirlis), i esto kuryoza de saver si se azia en otros lugares. (Los Amerikanos no tienen haber de este uzo, ni de munchos otros muestros!)
I ay otro uzo ke no se si ay en otro lugar , i esto es el kantar el «Kadesh-Urhas…» , ke es el orden ENTERO*, (de Kadesh asta Nirsa, esto es el «seder»!*) en kada paso de la seremoniya, i despues enpesarlo demuevo i kedar en el paso ke estamos, para dizir (o demandar), por egzemplo, «Kadesh, ke kere dezir?», kon la repuesta: «Salyendo de Arvit kuando se eskurese, inchiran los vazos de vino i diran Kidush.»
Kuando vinimos a las «diez firidas» (10 makot) el ritual muestro es diferente de lo ke veygo aki. Este pasuk era komo una drama serioza.
Kon el mentar kada firida (maka), i en ebreo i en ladino, el balabayit vazya un poko de vino en un legen espesial ke traye la mujer kon un djarro de agua. I kuando ya se eskapo de resitar todo, vazya al legen todo lo ke kedo del vino en la kupa, se enshagua la kupa kon la agua del djarro, i en un silensyo total, la mujer yeva el legen a la kuzina, lo vazya en la pila, lava el legen, i asta ke abolta a la meza, dingunos no pueden avlar ni un biervo. Mos espantavamos mezmo de meneyarmos en muestro lugar para ke no ayga ruido!
Los Ashkenazim meten el dediko chiko alientro de la kupa de vino, i van kitando damla damla al plato, i despues kontinuan.
Despues de komer, i despues ke ya eskapan de meldar el resto de la Agada, todos endjuntos kantavamos no solo Un Kavretiko, ma tanbien «Ken supiense i Entendiense» – esto ya se ke se uza en todas las komunidades sefaradis.
En los primos dos dias de Pesah en Izmir teniamos tambien el uzo de vijitar famiya, amigos, i vizinos para ogurarles «bon fete» (esto diziamos en fransez), ke es «fiesta buena». (Esto se azia dos vezes al anyo, en «Roshana» i en Pesah.)
Los ombres, a vezes kon los chikos, se ivan de famiya en famiya a azer estas vijitas, i las mujeres kedavan en kaza i ofresiya, al ke viniya, enprimero el dulse (sharope, ke mensiono Selim) i algun otro dulse (de pera o de bimbriyo) i tambien mogados de almendra, lo ke otros yaman «masapan» (siguro todo paskual, o «kasher lepesah» komo dizen en ivrit.) Estas vijitas duravan una medya ora en kada kaza, una detras de otra. Si komo no podian komer esta toda dulseriya, los ombres yevavan una riza limpya para guadrar los mogados ke no podian komer i yevarselos a sus kazas! (En Izmir avia tambien ken aziya marunchinos paskual ke se podian ofreser.)
Estas vijitas era un ermozo uzo ke trayiya un sentimiento de amistad i unidad a la komunidad. Puede ser ke el ser ofresido los mesmos dulses en todas las kazas ya era atagentozo, ma se via ke todos eramos parte de una kultura, de un puevlo espesial.
Rachel Amado Bortnick / Dallas, Texas – Selim Amado / Kfar Saba, Israel
