eSefarad Noticias del Mundo Sefaradi
Zorka Grigorova
TE AMO LINGUA MIA KARA
Lingva mia dulse,
Lingva de mi chikez mazaluda,
Lingva de mis dias klaros,
Ke volaron tan presto
Komo volan pasharikos!
PREZENTASION
El numero de los ke avlan el djudeo espanyol esta menguando de anyo en anyo. Entre los djovenes sovre todo son pokos los ke saven avlar. Se va olvidar del todo? Se va a kedar solo en los archivos este trezoro de la lengua i de la kultura djudeo – espanyola?
Animados del dezeo de konservar, yevar asta las jenerasiones venideras esta rikeza sefaradi en el anyo 1998 (kon la ayuda de Chitalishte “Emil Shekerdjiski” i “Shalom”) formamos un klub al ke dimos el nombre “Ladino”.
En muestras memorias ainda espuntan rekuerdos de akeya vida patriarkal, yena de kolor, amistad, respeto; espuntan rekuerdos de la chikez; de los djugos en el kurtijo i en la kaleja. Aki avlamos, kontamos konsejas, anekdotas, refranes, meldamos “Aki Yerushalayim”, kantamos. El intereso asia muestro klub esta kresiendo: toman parte en su aktividad 40 personas i mas; kontinuamos las tradisiones sefaradas en las fiestas en la famiya i en la komunidad ebrea en Sofia.
El klub “Ladino” tomo parte en todos los festivales “Esperansa”de los sefardies de los paizes balkanikos. Establesio relasiones kon personalidades i institusiones ke lavoran para konservar i desvelopar el djudeo – espanyol. Muestros espektakulos fueron aresividos kon admirasion por el publiko estranjero porke ekspresavan en djudezmo kuadros autentikos de la vida sefaradi.
El klub “Ladino” kontinua su aktividad kon sus enkontros regulares i al mezmo tiempo dezvelopa sus relasiones internasionales. En los ultimos anyos sus miembros tomaron parte en tres eventos muy importantes, komo:
– “Erensia” organizado por “Kaza Sefarad – Israel”- Espanya, Embajada de Espanya en Bulgaria, la organizasion “Shalom” – Bulgaria;
– Enkontro kon grupo de Ladino komunita;
– La Universidad de verano sovre la lengua i kultura sefaradies, organizada por el prof. Michael Halevi del Instituto de bushkedas sovre la istoria de los djidios de Alemania.
Estudiantes de 20 paizes ademas de oyir konferensias sovre lingva i istoria, pudieron realizar kontaktos kon personas ke avlan el djudeo – espanyol i konservan las tradisiones sefaradies.
En muestro klub se kreo un ambiente de amistad i respeto. Kada uno desparta loke meldo o rekordos de su vida. Ansy aparesieron muevos kuentos ke prezentamos en este segundo livro “Para ke no se olvide”…
Unos de los kuentos contienen akontesimientos de la chikez o mansevez, portretos vivos i amables de nonas i nonos, madres i padres, tias i tios.
Otros kuentos ekspresan kon dolor i amargura los sufrimientos de los djidios en el periodo del fashismo en Bulgaria i la Ley de defensa de la nasion. Aunke en akeyos anyos eramos chikos en la memoria kedaron vivos los kuadros de dezesperasion, ansia i orror ante el desastre ke reinavan en muestras famiyas. Estan bivos tambien los aktos de solidaridad de vezinos, amigos i konosidos i a vezes deskonosidos bulgaros.
Kada uno de los autores de los tekstos paso su chikez i ambezo el djudezmo en varias sivdades, en famiyas ke avlavan de modo diferente, por esto no korijimos la prononsiasion. Uzamos la grafia de “Aki Yerushalaiym”.
Dedicamos estos kuentos al 70 aniversario de la salvasión del eksterminio de los djudios bulgaros.
Rengrasiamos al profesor Michael Halevi por el koraje i los rekursor finansieros sin los ke no podiamos realizar el livro.
Rengrasiamos a los 18 autores del livro i al senyor Leon Benatov por su lavoro en el ordenador. Rengrasiamos a los Sres. Dime Krastev, Mony Franses, Sami Cohen por los fotos. Rengrasiamos a Albert Benatov por el ayudo de aprontar las tapas.
Viktoria Atanasova- Marso, 2013
