Nacido en Estambul, Gad Nassi graduó de la Galatasaray High School y de la Facultad de Medicina de la Universidad de Estambul. Comenzó su carrera como autor durante sus estudios de secundaria, escribiendo para revistas locales. se desempeñó como director de Shalom, el periódico de la comunidad judía de Turquía, como corresponsal de varias publicaciones extranjeras, y también dirigió la oficina de prensa del consulado israelí en Estambul. Es uno de los promotores y fundadores de El Amaneser, un suplemento mensual en judeo-español del periódico Shalom en Estambul.
Kada semana Gad mos dará artikolos de su kreasion para kompartir kon muestros lektores.

————————————————————————————————————————————————–

Garcia da Orta
El siyentisto exhumado 

Goa es una sivdad i un departamiento en la kosta Oeste de la India. Fue una provinsia del Portugal entre los anyos 1510 i 1961. En las primeras dekadas del siglo XVI, munchos Kristianos Muevos del Portugal se aresentieron en Goa. Lo ke avia insitado la opozision de los dirijentes portugezes, ke fueron molestados por sus influensa i sus solidaridad en la vida ekonomika i, sus aderensia al Djudaismo.  Este dekontentes provoko el establisimiento en 1560 de la Inkizision en Goa. Munchos Muevos Kristianos fueron persekutados; entre estos, el siyentisto Garcia da Orta. Portanto, seando djuzgado i kondanado despues de su muerte, su estoria i su suerte fueron diferentes.

La Biografia

Garcia da Orta nasio probablamente en 1501, en Castelo de Vide, Portugal. Sus jenitores eran djudios espanioles de Valencia de Alcántara, ke se avian refujiados en Portugal, en segido del dekreto de Expulsion en 1492. Da Orta estudio la medisina, los artes i la filozofia en las Universidades de Alcalá de Henares i de Salamanca, en Espania. Despues de ser graduado, abolto a Portugal en 1523. Pratiko la medisina en la sivdad ande nasio i del anyo 1526 en Lisbon, ande fue nominado profesor en la universidad en 1530 i en segito, miembro de su senato.

En esta perioda, se interesa en los reportos de los viajadores. El mundo viejo le parese chiko i limitado, i aspira a konoser de serka las tierras, vejetasiones i puevlos muevos ke son reportados.

De otra parte, los Muevos Kristianos kontinuan a ser persekutados, i en 1536, la Inkizision sera ofisialmente establisida en Portugal. Garcia i su famiya, aun ke avian nominalmente adoptado la relijion kristiana, estavan kontinuando a observar en sekreto la Ley djudia.

Posiblamente, krenyando el menaso de la Inkizision, i para pueder evitar la interdiksion de emigrasion instorada kontra los Muevos Kristianos, navigo en 1534 a la India en tanto ke Mediko en Kapo de la flota del Viserey Martim Afonso de Sousa, i partisipo a sus diferentes viajes. I en 1538, se aresento en Goa, Kapitala del Estado da India.

En estos tiempos Goa era una sivdad prospera i un sentro komersial aktivo, atirando merkadores no solo de Portugal i de Espania, ma i, de Italia, Gresia, Persia i de Asia. Fue el mediko de la noblesa indiana lokala, i en mizmo tiempo de los Visereyes i governores portugezes suksesivos de Goa; uno de estos le akordo la propriedad de la Izla de Bombay.

Su okupasion lo yevo a konoser munchas kostas del Oeste de la India i los merkados de kondimentos i de piedras presiozas, i le permetio de establisir kontaktos kon merkaderes i medikos de munchas partes del Sude de Asia i del litoral del Oseano Indiano. En la sima de su kariera, developo una pasion por la Farmakopea Indiana. Su inereso sovre las yervas medisinales lo yeva a krear guertas botanikas, prinsipalmente en Goa i en Bombay.

Da Orta, aparte del portugez i del kastiliano, avlava el ebreo, el latino, el grego i el arabo; su ovra amostra ke tenia konosimientos en persano, marati, konkani, sanskrito i kannada.

En 1540, se kazo kon Brianda de Solis, una pariente mueva kristiana rika. Al pareser esto fue un kazamiento non alegre. Les nasen doz ijas. En 1549, su madre i doz de sus ermanas, ke fueron enkarseradas en Lisbon, parvienen a topar refujio en Goa i se adjuntan a el.

Los ultimos anyos de su vida son yenos de sufriensas por da Orta ke deve de konfrontar apretos finansieros i litijas familiares. Muere en 1568 de una malatia grava.

La Ovra

Asigun lo tiene dicho el mizmo, Garcia fue fasinado de «todas las kozas i puevlos de la India«. Su konosensia eksepsionala de los kondimentes del Este es revelada en su unika ovra, Colóquios dos simples e drogas he cousas medicinais da Índia (Dialogo sovre plantas, drogas i substansias medisinalas de la India) publikada en Goa en 1563. La ovra eskrita en portugeze trata de una seria de materias, ke lo maz no eran non konosidas o eran objektos de konfuzion i de mizinformasion, en akeos tiempos en Evropa.

Da Orta deskrivio las maladias tropikalas de la Asia, partikularmente la kolera; la otopsia ke  performo sovre una viktima de esta malatia, es el primer egzamen de este sorte, ke fue enrejistrado en India. De mizmo, su ovra se remarka por su kontenido independente de los tekstos gregos, latinos i arabos, reverados en esta perioda. Kon la aparision de sus traduksiones al latino – la lingua franca de la syensia en akeos tiempos – i a otras linguas, Colóquios fue konosida despues de un kurto tiempo en toda la Evropa. Aparte de ser konsiderado entanto ke «el primer eskrivano evropeo sovre la medisina tropikala» da Orta es i konsiderado komo «un pioniero de la farmakolojia».

Colóquios es redaktada en forma de un dialogo entre su otor i un mediko, yamado Ruano. Da Orta responde a munchas kestiones de su amigo, en developando sus komentarios personales, revizando no solo las plantas medisinales, ma en mizmo tiempo munchos produktos de la India komo el marfil, lakas, diamantes, i adjusta, «munchas kozas, ke son maz poko de la medisina ke de la istoria, ma ke meresen lo maz de ser konosidas«.

Aparte de la deskripsion de las malatias tropikales, la ovra prezenta 45 plantas medisinales, inkluendo sus klasifikasion, sus deskripsion botanika kon los kriteres de sus identifikasion. I a la fin, el kapitolo lo maz importante, «sus uzo en la medisina i sus efetos terapeutikos».

Una otra partikularidad de la ovra es ke inklue los primeros versos publikados de su amigo Luís de Camões, konsiderado de muestros diyas komo el poeto nasional de Portugal.

La salvasion del ovligo

Es kuaji siguro ke la ovra de Garcia iva kayer en el ovligo, en kavzo ke por un orozo hazardo, no iva ser deskuvrido por el ilustro botanisto fransez, Charles de Lécluse, konosido komo Carolus Clusius o Clusius. Es en 1564 ke, durante un viyaje en Portugal, Clusius topa uno de sus egzemplerios, en un oberjo ande rezide. Konsiente de su valor sientifika, la treslada al latino en forma de un rezumido al lugar de su forma orijinala de dialogo. Clusius publika sinko edisiones de la ovra, la primera en 1567 i la ultima en 1605. Parese de mizmo, sus treslasiones al italiano i al fransez.

La Inkizision en Goa

Muy probablamente, la insekuridad relijioza i politika de los djudios en Portugal determino la desizion de da Orta de abandonar el Portugal, i kontribuo ansi a su fasinasion por el paradiso de Goa. Portanto, la Inkizision lo estava asperando i a el en Goa.

Es en 1565 ke la Inkizision kon un tribunal fue establisido en Goa por el Visereynado de India. En konsekuensia, empeso la persekusion de los Djudios, Djudios sekretos, Induos i Muevos Kristianos. La Inkizision en Goa turo 252 anios, de 1560 a 1812, i maz de 39.000 almas – non solo Muevos Kristianos, ma i Goanes ke se avian konvertido al Katolisizmo – fueron kemados en autos da fé.

Munchos de la famiya de Garcia fueron i eyos viktimas de la Inkizision. No solo en Goa, ma, i en Portugal. Todo kon esto, Garcia muere de hazinura. Portanto, su ermana Catarina ke avia reushido de eskaparse de la Inkizision en Portugal, i se avia refujiado en Goa, es arestada por erezia en el anyo de la muerte de daOrta, i kemada biva en la plasa del merkado en 1569.

Garcia do Orta fue konsiderado entanto ke kristiano todo tiempo ke estuvo en vida. Portanto, los Aktos de la Inkizision, publikados en 1934, revelan klaramente ke fue un Konverso militante, ke avia bivido una vida relijioza doble  a lo largo de sus 30 anios en Goa.

Asigun la konfesion de su kuniado, Garcia da Orta uzava de sertifiar en privado ke «la Ley de Moshe es la verdadera Ley«. Lo ke konfirma ke da Orta, kon los otros miembros de su famiya, kedaron fidelos al Djudaismo.

Es 12 anios despues de su muerte, en 1580, ke da Orta fue kondanado en titolo postumo de aver observado la Ley djudia. Sus restos fueron exhumados, i kemados en auto da fé, i sus sinizas arondjadas al Oseano.

* * *

Su ovra, eskrita en portugez, Colóquios dos simples e drogas he cousas medicinais da Índia, avia sido  aprovada por la Inkizision, i rekomendada por el mediko ofisial del Viserey de Goa. Fue aklamada komo uno de los prinsipales logros del siglo XVI, una realizasion ke otorgo una grande onor al payis de su otor, Portugal.

—————————————————————-

Gad Nassi