eSefarad Noticias del Mundo Sefaradi
Ver todos los artículos de esta sección
Akademia nasyonala de djudeoespanyol en Israel
En 19-20 de Febrero 2018, tomo luguar la konvension akademika sovre la lingua djudeoespanyol en las salas de «Real Academia Española (RAE)», en Madrid. En esta konvension partisiparon 9 korespondentes akademikos Israelyanos de RAE en Israel, ke RAE los nomino dos anyos antes. La konvension termino en una sala grande (de tavan muy alto, ke efekta a las avlas un eko espantozo) kon la seansa de klausura ke la puedemoz ver en you tube:
Pasaron kaji dos mezes. Entremientes konversi kon unas kuantas personas, savyos ke se entyenden, meldi unos kuantos artikolos, vide unos kuantos videos… Kualo voz dizere, kedi kon sinyos grandes de demandas…
Ay ken dize: «Esto es onor grande!». Parese ke ya es. Ma la ultima ves ke me fui a empleyar en el supermarket no vide dinguna etiketa ke estava eskrita «Este artikolo se paga kon onor».
Uno de los korespondentes de RAE me disho: «Este arroz areyeva muncha agua». Yo me akodro de mi madre ke a kada kupa de arroz echava 2 kupas de agua. Ami me esta vinyendo ke este arroz tyene ser muy muy grande.
Otro demanda: «Ken de mozotroz se sonyava de un semejante evenimyento?». A mi si me demandash, no tengash adjele (prisa) de sonyar. Durme repozado…
Ay ken sita: «Esto oyendo el sono de la alas de la istoria» (אני שומע את משק כנפי ההיסטוריה). Bueno, ya ay muncho tyempo ke no me fui a egzaminar los oyidos. Vyejes es parese!! No esto oyendo bueno estos sonos…
Partajare kon vozotros unos kuantos sinyos de demanda ke me estan kavakando el meoyo:
«Sekretos militaryos…»
Si meldamoz la gazete «Haarets» del 23 febrero, en esta konvension se desido de:
1. Rekonoser la lingua djudeoespanyol komo una de las linguas espanyolas.
2. Fondar «Akademia nasyonala de djudeoespanyol» en Israel.
http://hebrew-literature.biu.ac.il/files/hebrew-literature/media/bqrvb_nkhlvm_gm_blydnv_0.pdf
En la seansa de klausura, Professor Shmuel Refael izo una deklarasyon en nombre de todos los korespondentes israelyanos de RAE. En ebreo deklaro ke «durante la konvensyon fue desidado de fondar akademia». En espanyol deklaro ke «los korespondentes kedaron de akordo a fondar akademia». En estas deklarasyones no se topa ni una sola palavra por la desizyon de rekonoser la lingua. I mas. No se entyende ken desido i kualo. En demandas ke ize entendi ke son los korespondentes ke desidaron de fondar la akademia. RAE no tyene dinguna parte en esta desizyon. l el rekonosinyento de la lingua i su konkluensas? Esto kedo komo un «sekreto militaryo».
Kualo es esta kayades??
No se si savesh, una de las kualidades de los Isrelyanos, kuando les afita una koza buena, es «Kontar a los amigos» (לספר לחברה). La prova tenemoz en estos dias propyo. Ya ay miles de anyos ke no kedamoz de kontar, a lo manko una ves en el anyo, los miraklos ke moz afitaron i ke moz kitaron de Ayifto.
I por la konvension? Kayades mi alma… No ay ken moz arekojga, no ay ken moz eksplike, no ay ken moz konte… Es posible ke la fondasyon de la akademia no es reala?
Los «Masones» de RAE
La seansa de klausura de la konvension kontinuo kaji medya ora. Munchos minutos se empleyaron para agradeser a diferentes personas ke tomaron parte. Malorozamente, no se topo ni un solo momento para darmoz a entender ke desizyones se tomaron de parte de RAE? kualo va ser la kontribusyon de RAE para realizer este fondamyento de la akademia? I si va aver una syerta kontribusyon, kualo va ser el «presyo» politiko? En este konteksto, aki pudesh ver una una prezentasyon muy enteresante de RAE, de parte del sinyor Carlos Yebra:
Carlos Yebra Lopez prezenta ‘La RAE i el Djudeo-Espanyol’ en UCLAdino, 2018
Tornaremoz a la seansa de klausura. No se save si avian en la sala jurnalistos. Si aviyan, por siguro ke eran «masones», no avyeron la boka…
Entremientes me ambezi una koza muy emportante:
De RAE, Apoyo de paras (dinero) no va aver!!
Boda sin novya..
El organizmo uniko en Israel ke tyene la otorita de permeter una fondasyon de akaemia es el ministeryo de kultura. El organizmo uniko ke tyene el poder de dar budjeto para este proyekto es el ministeryo de kultura. Keresh endevinar ken no estava enkluido entre los korespondentes de RAE (ke desidaron) i no estava prezente en la konvension?? Bravo! Tenesh razon. Un reprezentante del ministerio de kultura. En estos kavzos mi madre dizia «Boda sin novya». Solo ke en estos dias boda sin novya no es una sensasyon i este refran no vale mas. No se de ke, me akodri del enkontro de Moshon kon Salamon:
Moshon: «Bre Solomon, komo de bovo sos tu? Merkates de fulano la ora de la plaza de Yafo. Esta ora no era suya!! Es fraguada de parte de los Osmanos i apartyene al governo!!
Salamon: «Moshon! mirame bueno a mis ojos! Bovo me estas vyendo? I yo le pagi kon la Estatua de Agam en la plaza de Dizingof!!»
De ande va vinir…
En Israel tenemoz dos akademias de linguas. Ebreo i Arabo. Me enteresi, ke apoyo finansyal resive del governo la akdemia de la lingua ebrea? Me disheron 20% de su budjeto i adjustaron ke «esto es una partisipasyon muy jeneroza».
Moz akodraremoz de un evento muy emportante. La otoridad nasyonala de ladino i su kultura no se puedia fondar en 1996 si en mizmo momento no se fondo la otoridad nasyonala de yidish i su kultura. Para ke sepamoz ke la akademia de la lingua djudeoespanyol nunka se puedra fondar si en el mizmo minuto no se fondara la akademia de la lingua yidish. La konkluzyon es muy klara. El apoyo governal, el mas alto ke se va pueder obtener (si se va pueder obtener) para la akademia muestra va ser no mas de 10% de sus gastes. Agora moz kedo solo una demandika chika:
«De ande va vinir el kusur (el resto)??»
Los espanyoles ya se olvidaron…
Los espanyoles tyenen razon. Pasaron mas de 526 anyos, ya se olvidaron komo mozotros, los djudyos, savemoz pelear unos kon los otros. Voz dare un rezume chiko: No kale ser profeta para saver ke la primera kesyon de muestra kerida ministra de kultura, Miri Regev, va ser «Kualo trushites de Madrid en el sestiko vuestro?». No voz puedesh imajinar komo le plaze a la sinyora Miri kuando la djente vyenen kon manos vazias a demandar de eya bujeto i en mizmo tyempo le meten kondisyones. «Se tresale!». Dizeremoz ke los korespondentes de RAE penaron i lazdraron mezes enteros, dia i noche, i aparejaron un plano akademiko i finansyalo largo i ancho de unos kuantos dyezes de pajinas. I dizeremos ke este plano ya konvensio a la sinyora Miri Regev ke moz kere dar estos 10% miskinikos. Eya kale ke demande budjeto del ministro del finanzas. El ministro de finansaz kale ke se konvense, el mizmo, i lo entre en el budjeto del estado. La proksima estasyon es la meza del shef de la komite de finanzas en el parlamento, el sinyor Moshe Gafni, ke apartyene a la partida relijyoza. Moshe es eksperto de «enterramyentos». Propozisyon de ley ke no vyene kon un «bonbon relijyozo» se enterra tanto ondo ke los arkeologos los mas ekspertos en el mundo no lo pueden deskuvrir. A la fin esta ley deve de vinir a la meza del parlamento por su konfirmasyon. Aya empesa el peleto politiko grande entre las partidas diferentes.
Ahhhh me akodri… Ke pekado!!! La otra semana se konfirmaron los bujetos del 2018 i 2019. Agora kale asperar al bujeto de 2020…
Meldi en un jurnal ke la akademia va empesar a funksyonar en el anyo 2019. No se de ke me vyene riyir…
I dainda no avlimos de otros pletos komo el pleto grande sovre la «independensya» de la akademia komo «un braso» de la Otoridad Nasyonala de Ladino i su Kultura…
Una de las korespondentes de RAE me disho:
«Albert! Oyeme tu a mi. Akademia, no va salir de esto!!».
Si me demandash a mi, eya es la unika ke tyene razon.
Albert Israel
