Avladino kon Albert Israel en Yerushalayim: Kindertransport (9)

Ver todos los artículos de esta sección 

Kindertransport (9)

Hugo Marom

Hugo (Maizler) Marom nasyo en Brno Chekoslovakya en 1928. El padre era komersyador i su madre profesora de tenis i de ski. Eran tres ermanos. El grande se muryo mansevo de un gueso de gayna ke le kedo en el garon.

En los empesijos de agosto 1939, un mez antes ke empeso la sigunda gerra mondial, arivaron 231 ijikos del Kindertranport Chekoslovako a la istasyon del treno en londra.

Entre eyos arivaron Hugo de 10.5 anyos kon su ermano chiko de 8.5 anyos i otros 3 ijikos de la mizma sivdad, Brno. Sugun les avian enkomendado todos los 5 teniyan de ser arrekojidos de parte de una famiya de rabino, yamado Rabinovich. Los 5 chikos asperaron aya mas de 16 oras i dingunos no vinyeron a tomarlos. Un shofor de taksi, ke los vido atemados i se le estrecheo el korason, los tomo a su kaza (de 1 kamareta de echar), les dyo a komer i los abrigo kaji 3 dias. El treser dia los tomo i los yevo a una kaza de guerfanos en un kartye de djudyos. La responsable de la kaza refuzo a tomarlos a los ijikos porke no eran sofus. Los ijokos kedaron otro una noche en la kaza del shofor. Al diya el shofor los tomo a una ostel ke aya aviyan 120 ijikos vinidos kon el Kindertrasport de la Almanya. En este ostel kedaron los 5 un syerto tyempo. La ironia es ke los «ijikos Almanes» se peleyavan kon los «ijikos Chekoslovakos» komo inimigos, se davan haftonas de unos a los otros i no entendian ke, i estos i estos estan aya porke son djudyos.

Kuando empesaron los bombardemanes Almanes, «The Blitz», el  governo inglez alesho a todos los ijikos de londra, kaji 70 kilometros, para ke no les vengan danyo de los aviyones Almanes. Tambyen pago 10 shiling i 6 peni por kada ijiko, kada semana, a kada famiya ke estava pronta de dar abrigamyento a estas kriaturas.

Este modo, Hugo i su ermano se trokaron de ser refujidos i se izyeron evakuados. Los dos toparon abrrigo en una famiya yamada, Chensler. Aya estuvyeron kaji 6 mezes i dospues trokaron diferentes famias durante 3 anyos.

Komo ya mensyonimoz, un dia antes ke los nazistos entraron a chekoslovakya todos los lavorantes del governo de Chekoslovakya, enkluye los ministros del governo i sus famias, partyeron a la Ingletyerra. Durante el tyempo fraguaron aya eskola espesyal para los ijikos de los miembros del «Governo Deportado» de la Chekoslovakya en Ingletyerra, eskola yamada «Check state secondary school». En 1943 Hugo i su ermano pasaron a esta eskola ke teniya i fasilitades de pansyon para los ijikos. En esta eskola enkontro hugo a Yosef Alon ke era de la mizma sivdad suya en Chekoslovakya i ke era un anyo mas chiko de el. A los kavos de la gerra Hugo paso a «Air Training Corps (ATC)» para ambezarse los «Estudyos de Aviasyon» i tomo a su ermano i a Yosef Alon kon el.

Dospues de la gerra, en 1945, Hugo torno a Chekoslovakya. Malorozamente no topo a dingunoz de su famiya ke solamente una ija de su tia. Kaji 90 djudyos de su famiya se undyeron en los krimatoryos. Hugo empeso a meldar estudyos de «Inginer de Makinas». En el treser anyo de los estudyos, kon la fondasyon del estado de Israel, Hugo Marom i Yosef Alon emigraron a Israel. Esto fue dospues ke el estado rezin nasido se adereso al governo de Chekoslovakya i demando ayuda de pilotes. Los dos eskaparon el kurso numero 1 de pilotes en la «Fuersa de Aviasyon Israelyana» i sirvyeron en la arma Israelyana munchos anyos (Yosef Alon era el komandante mio, komandante de la baza de aviasyon, kuando sirvi yo en la arma Israelyana. Malorozamente en 1973, Yosef fue asesinado en Meryland de los estados unidos, kuando estava en el posto de «atashe militaryo» de Israel). Dospues Hugo paso a lavorar en la «Industria de aviasyon» komo pilot de eksperimentos. A la fin avrio una kompania de planeamyentos de aeroportos.

El ermano chiko de Hugo paso a la Amerika en 1946, sirvyo en la «Fuersa de Aviasyon» Amerikana komo pilot, gerreo en Korea 4 anyos i muryo de Parkinson antes unos kuantos anyos.

Dospues ke Nicholas Winton se deskuvrio en 1988, en el program de BBC, That’s Life, Hugo se empeso a enteresarse de su Salvador. Topo en Israel otros 18 ijikos del Kindertransport Chekoslovako i endjuntos lo envitaron a Nikolas al hotel Dan de la sinyora Federman, ke akel tyempo dainda no savia ke i eya estava en las listas de Nicholas i ke no pudo partir de Prag por kavzo de la gerra ke empeso djusto akel dia. Los «ijikos de Nicholas» lo tomaron al musafir al instituto «Yad Vashem» para ke obtenga el rekonosimyento del «Djusto Entre Las Nasyones». Dospues ke pasaron todas las investigasyones se demando la ultima demanda: «No sos djudyo i salvates munchos djudyos. Es ke tyenes alguna koneksyon kon el djudaismo?». Nicholas les respondyo ke el no konose una koza semejante ma se puede telefonear a su ermana i demandar. En akel minuto telefonaron a su ermana i se deskuvryo ke sus paryentes eran djudyos baptizados dos anyos antes ke el nasyo. Naturalmente ke Nicholas no pudo ser rekonosido komo «Djusto Entre Las Nasyones».

Hugo Marom era konvensido ke los eroikos verdaderos del Kindertransport son los padres i las madres de los ijikos ke izyeron este sakrifisyo grande, los mandaron a los ijikos solos a tyerra ajena i salvaron sus vidas. Kon esta konosensya Hugo lucho a fraguar monumentos ke ekspresan este konsepto en Evropa. En 27/5/2017 Hugo parvino a fruaguar el primer monumento en la istasyon del treno en Prag, en una forma de puerta de treno kon figuras de manos chikas i manos grandes en el vidro.

Malorozamente Hugo moz desho la vida buena en enero 2018. Tenia kaji 89 anyos. Los ke entyenden Ebreo puden ver aki una parte chika de una entrevista larga ke reushi a azer kon Hugo, 3 mezes antes de su muerte:

FIN