eSefarad Noticias del Mundo Sefaradi
Ver todos los artículos de esta sección
EL KUVO BURAKADO
por Albert Israel
Estava muy oroza. Le nasyo una ermanika. Ke karika luzya!! blonda i ermoza… Ojikos blu… Manikas chikitikas kon dedos largos… Riyiya muncho… I kuando se riyiya, se le aziyan dos foyikos ermozos en las dos vandas de la boka…
Kada demanyana le demandava a su madre: «kuando mi ermanika va empesar a djugar kon mi?». I la madre le respondiya: «Pasensya ija, en un poko tyempo. Vaja ser ermanas amistozas i amigas senseras. Vaja djugar endjuntos, vaja konversar, i vaja protejar una a la otra..»
Pasensya!!! Pasensya!!! De ande topan los padres i las madres este karar de pasensya?? Eya no teniya pasensya. Keriya todo agora i pishin…
Una demanyana los vido, al padre i a la madre, kon unas karas muy seryozas. La madre estava yorando. El padre estava triste. Kualo afito? Deke la mama esta yorando? Deke estan avlando uno kon el otro en kayades, kon boz basha?
Les demando.
Eyos no le dyeron repuesta.
I eya se entristo. Le vino ganas de yorar. Se fue a su kamareta i empeso a yorar. Deke no le estan eksplikando lo ke esta afitando??
Paso kaji medya ora, vino el granpapa. Ke alegriya.. Lo keriya muncho byen a su granpapa. Se tresaliya de asentar kon el i oyir las konsejas ermozas ke le kontava. Se salto a sus brasos i lo empeso a bezar. I el granpapa la abraso kon fuersa i le disho ke lo aspere en su kamareta. Le prometyo ke se va asentar kon eya i le va kontar munchas kozas.
Los minutos pasaron komo anyos. Al kavo, vino el granpapa i se asento kon eya. Kualo esta afitando le demando a el? Deke mi mama esta yorando?
Kerida inyeta, le konto su granpapa. Oy se supo definivamiente ke tu ermana nasyo sodra de los dos oyidos. No esta oyendo lo ke estamos avlando. Tu padre i tu madre estuvyeron en el hospital i avlaron kon los responsables oras enteras. Estan muy tristes i no saven komo de dizirtelo a ti. Les dishe ke no se estrecheyen i ke yo va avlar kon ti.
Kualo kere dizir esto, le demando eya. No me va oyir lo ke le va dizir? Komo vamoz a djugar endjuntos?
Asenta te kontare una konsejika, le disho el granpapa:
«Antes tyempos, aviya un kazalino prove ke era gaynero. Se manteniya de engrandeser gaynas i vender los guevos. No teniya agua en kaza i en el doredor de la kaza. Kada demanyana era obligado de meter un palo a su ombro, enkolgar al palo dos kuvos, uno de kada parte, i irse medya ora de kamino fin al pozo del kazal. Inchiya del pozo los dos kuvos de agua i tornava a kaza. Solamente, uno de los kuvos teniya un burko chiko. Fin a ke el kazalino tornava a kaza la agua de este kuvo korriya del burako i medyo kuvo se vazyava en el kamino.
Este modo kontinuo el kazalino, munchos anyos, de irse kada demanyana al pozo i de trayer agua a kaza.
Un diya le demandaron los amigos i le disheron: Komo de bovo sos tu? No estas vyendo ke estas tornando a kaza kon medyo kuvo vaziyo. Deke no lo echas este kuvo burakado al syerko i merkas un kuvo muevo? El kazalino les respondyo:
Keridos amigos, en zahud de este kuvo, ke lo tengo en la parte derecha, la parte derecha del kamino se enflorese kada anyo de trandafilas. Las golores de las trandafilas moz alegran el korason i dan algriya al kazal entero. Los mansevos arankan rozas para sus namoradas i konkistan sus korasones. I yo, de ves enkuando, kuando esto estrecho de paras, aranko unos kuantos buketos de rozas i los vendo en el charshi. Por esto, amigos buenos, este kuvo es muy valorozo.»
Ansina, inyeta kerida, kada persona es persona espesyal. Los mas de los sodros saven deshifrar los mushos i entender lo ke dizen los otros, sin oyir. Por esto, tu ermana va djugar muncho kon ti i te va entender todo lo ke estas dizyendo.
I Agora te va deskuvrir un sekreto. Oyi, ke en vuestra eskola ay elevas ke saven meldar de enfrente los mushos de las amigas i entender lo ke avlan. Por esto, no seya ke avles kozas malas a dingunoz afilu si los amigos estan leshos deti. Te entyenden de leshos…
KUANDO EL DYO AHARVA DE UNA PARTE, APIYADA DE OTRA PARTE.
