eSefarad Noticias del Mundo Sefaradi
Ver todos los artículos de esta sección
ALICE EN EL PAÍS DE LAS MARAVIYAS
por Albert Israel
Haimi (haimaki) Kohen nasyo en Salonik a los kavos del sieglo 19. Era kazado kon Rahel i tenian 5 kriaturas. 4 ijos i una ija. Un syerto tyempo Haimi era miembro del parlamento de Gresia. No se save komo, en el empesijo del sieglo 20 Haimi Kohen aviya ayudado al rey de Gresia, George I i el rey le aviya aprometido de kompensarlo por todo lo ke va tener de manester. Haimi no realizo este promisyo en su vida i muryo en 1943 djusto kuando los nazistos empesaron los transportos de los djudyos a los kampos de muerte. Tres de sus ijos reusheron a fuir a Ayifto. El kuatren, Mishel, no reusho. Torno atras del medyo del kamino i se auno kon su madre Rahel i su ermana Tilda. Los tres bushkaron remedyo para no ser transportados.
Alice era sodra de nasimyento i saviya meldar mushos. Teniya suditansya ingleza. Morava en un palasyo en Atena, kon su kunyado George II. Se okupava de bienfezensyas. Era volontarya en el kruz korolado. Sus ijas eran kazadas kon almanes i moravan en la Almanya. Sus yernos eran askeres nazistos en la arma de Almanya. Alice, kon muncha bravura los tomo a los tres i los eskondyo en su morada. Uvo vezes ke los nazistos se suspecharon de Alice i vinyeron a demandarle si ay djudyos en kaza. Eya se izo de la sodra, les disho ke no esta oyendo i no los esta entendyendo. Este modo se salvaron Rahel i sus dos kriaturas fin a la fin de la gerra. Alice muryo en 1969. En 1994 su ijo Philip i su ija Sofia aresivyeron del instituto Yad Vashem el titolo de «Djusta entre las nasyones» en nombre de sus madre Alice.
Esta istorya no la ivamoz a kontar si…
La reyna Aleksandrina Viktorya reyno en el reyno unido mas de 63 anyos, desde 1837 fin a el anyo 1901. Su bizinyeta, la prensesa Victoria Alice Élisabeth Julie Marie de Battenberg (En kurto Alice de Battenberg), nasyo 1885 en la kastia de Windsor. Era sodra de nasimyento. En 1903 se kazo kon el prens Andreas, el ijo del rey de gresya, George I. En 1930 fue egzaminada komo hazina de skizofrenia i ospitalisada por dos anyos en un sanatoryo en Suiza. Dospues ke salyo del sanatoryo, Alice paso a bivir en Atena ma aparte de su marido.
Mishel, el ijo de Haimi, ya savia el promisyo del rey George I, ke era el eshuegro de Alice, le aviya dado a su padre. Le konsejo a su madre Rahel ke vayga a Alice i ke le demande su ayudo para evitar sus transportos. Alice aksepto emidyatamente a ayudarlos i los eskondyo en su morada fin al kavo de la gerra.
Kreyo ke akseptash ke asta aki esta istorya ya esta bastante enteresante i puedemoz terminarla… Ma ke sorpreza!! La kontinuasyon es muncho mas enteresante…
Ya se save ke los inglezes en la tyerra de Israel moz kitaron la alma i moz izyeron muncho mal fin a ke se arremataron. Los livros blankos, los ekspulsos de los emigrantes a Kipro i a Uganda, las prezyones, los enforkos de los djusyos i mas…
I mozotros no kedimoz kayados. No pokos soldados inglezes muryeron en esta rejion. La operasyon la maz famada es la bomba ke se metyo en el hotel King David i ke mato 91 personas, entre eyos munchos soldados inglezes.
I oy, si ay munchos inglezes ke no mos keren bien (por no dizir antisemitos) son, entre otros, desendyentes de los soldados ke sirvyeron en muestra tyerra.
En este esfondo se puede entender porke, durante 70 anyos, desde la fundasyon del estado de Israel, dingun miembro de la famiya real ingleza no vino a vijitarmoz vijita ofisyala.
Tornaremoz a Alice. Alice paryo 5 kriaturas. 4 ijikas (Margarita, Theodora, Sesilia i Sofia) i un ijiko Philip (el opozito de Rahel). De una parte sus ijikas pasaron a morar en la almanya, se kazaron kon prenses almanes, ke eran miembros en la partida nazista i sirviyan en la arma Almana. De la otra parte su ijo, prens Philip, sirvyo en la marina real ingleza i se kazo en 1947 kon la reyna ke reyna oy en dia, Elizabeth II (las ermanas no fueron envitadas al kazamyento). Donke Alice era la eshuegra de la reyna. La reyna tyene oy 93 anyos. Philip el marido tyene 97 anyos.
El ijo de Philip es el prens Charles (ke era kazado kon Diana, ke este en gan eden). Charles tyene 70 anyos. El ijo de Charles es el prens William. La sira suya (el torno suyo) de reynar es dospues de Philip i Charles. No kale ser matematiko para entender ke William va ser el rey de ingletierra. Sino otros 5 anyos, otros 15 anyos.
Alice moz desho la Buena vida en 1969. En su testamento eskrivyo ke kere enterrase al lado de su tanti, la dushesa grande de Rusia Elizabeth Feodorovna. Ande esta enterrada su tanti? En la iglisya Santa Maria Magdalena en Yerushalayim (ke maraviya!!). Philip, El ijo, la enterro a Alice emprimero en la kastia de Windsor. En 1988 se tranferaron los guesos a la iglisya Santa Maria Magdalena. 6 anyos dospues, en 1994, vinyeron Philip i su ermana Sofia a Yerushalayim (vijita no ofisyal) a vijitar la tomba de sus madre i aresivir el titolo de «Djusta entre las nasyones» (ke maraviya!!).
I ken dizish moz vino a vijitarmoz el otro mes, en el 25 de djunyo 2018, vijito ofisyal? Por primera ves en 70 anyos? Si keridos, no otro ke el rey en futuro, el prens William, Duke de Cambridge (ke maravia!!). I ande dizish se alojo? Si presyados, en el hotel King David (ke maravia!!).
I komo lo topimoz a William? Antes ke venga, las gazetas (los jurnales) moz eskrivyeron ke no le demoz la mano si el no moz da emprimero. I ke moz abokemoz delantre de el. I otras kozas ke no konosemos aki. I kualo topimoz? Un mansevo «hevreman» (amigavle) ke no mete tino en estas bavajadas (ke maraviya!!). Se enkontro kon el prezidente Rivlin i kon el primer ministro Natanyahu, vijito la tomba de su biznona Alice, eskrivyo en el livro de musafires en Yad Vashem ke «syente onor de ser bizinyeto de una persona ke es djusta entre las nasyones», se enkontro kon la inyeta de Haimi, Idit i su ijo Filip, se enkontro kon ijikos del «Kindertransport» ke se salvaron en la Ingletierra, pateo un pendel i komyo dondurma kon Neta Barzilay, la ganadera muestra de la Erovizyon de alkavo (ke maraviya!!). aki tenemoz tres filmikos de esta vijita:
https://www.youtube.com/watch?v=hLdZk_R-1GE
https://www.youtube.com/watch?v=rytpEGktjLY
https://www.youtube.com/watch?v=z3oN_71EdEc
Agora estamoz siguros ke Alice esta en el pais de maraviyas!!
Albert Israel
