eSefarad Noticias del Mundo Sefaradi
Ver todos los artículos de esta sección
Se aferro el espiyon ke rovo el kalsado!!
por Albert Israel
Un muslumano de ingletierra, Asghar Bukhari, ke es uno de los fondadores del konsilyo islamiko en este paiz, publiko estado en su pagina de facebook i akuzo a Mosad de Israel ke entraron a su kaza en medya de la noche i rovaron un kalsado preto en las oras ke estava durmyendo. «Eyos keren ke me syenta espantozo en mi kaza. I esto no es la primera ves. Antes kuantos anyos me telefono una lidera muslumana i me konto, kon lagrimas, ke el Mosad entraron a su kaza i le izyeron todo de ariva abasho para ke se espante» disho. Aki puedemoz ver uno de estos filmos:
El primer ministro muestro, el sinyor Binyamin Natanyahu no kedo debasho, metyo al kenar (kanton) todos sus okupasyones komo el atom de persya, los surianos, Hizballa, Hamas… se libero por este sujeto de alta emportansya i reakto en el Twitter amostrando un kalsado preto i keshando del antisemitizmo. Ademas, dyo orden de investigar este sujeto emidyatamente. En konsikuensa, el kalsado se topo en la kaza de un espiyon del mosad. En repuesta a la demanda «Deke rovates el kalsado?» disho el espiyon ke kuando nado en el rio de Times para salvar un «disc on key» kon los sekretos de atom de los persyanos, le kayeron los kalsados al dip del rio i kedo deskalso. En el mosad le disheron ke agora estan ekonomizando i no tyenen paras para kalsados. «No teniya remedyo i fui forsado de rovar el kalsado del Asghar Bukhari, ke estava afuera de la kaza, allado de la puerta» disho.
«Deke rovatas solo un kalsado» le demandaron. «Me adjideyi de este desmazalado ombre ke va kedar sin kalsados, tomi solo uno i le deshi el otro. Por esto, ya ay tres mezes ke esto kaminando kosho, en saltando al un pye» respondyo. «Solo, a la otra ves, le rogo a Bukhari ke me deshe las kalsas aryentro de los kalsados, porke londra esta yelada, buz» ajunto…
Agora el Mosad estan investigando si este espiyon rovo tambyen el kalsado de sinderella.
De la otra vanda el Mosad konfisko el kasado rovado i este kalsado fue empleyado para ofrir el gato de shokolada, ke se dyo por savor de boka, al primer ministro de Japon ke vino musafir a la kaza de Binyamin Natanyahu.
Dospues ke se artaron todos en la meza reakto el primer ministro Shinzō Abe :
«El gato estava muy savrozo. Solamente, no se porke, teniya golor de kalsas…».
Biriden (entremientes) el espiyon del Mosad esta kaminando deskalso. «Esto espantozo» dize «me van a ver deskalso, me van a konoser ke so espiyon del mosad!! Ama kada mez esto avansando un poko de mi mezada. En serka va tener bastante moneda i me va pueder merkar kalsados muevos!».
Keridos!! Ken se le esta kuvriendo i no le pasa el tyempo ke venga a Israel. Aki no ay «Rega dal – רגע דל» (momento povre).
Albert Israel
