Avladino kon Albert Israel en Yerushalayim: ENTRE ZIG I ZAG… (1)

Ver todos los artículos de esta sección 

ENTRE ZIG I ZAG… (1)

por Albert Israel

– Hoshgeldin Salamon, komo estas?

– Moshon, a si bivas tu, meteme un vaziko de raki kon dos borrekitas de berendjena…

– Ya se entendyo, tyenes ambre. Na, te meti i kezo blanko kon azitunas pretas, ke te artes… Ke haber?

– Ayer, en medyo de la noche yene me esperti. Empesi a pensar…

– El doktor te disho ke no penses! No es Bueno para la tansyon tuya…

– En mi mano esta?? Me esto espertando, luz no puedo ensender, televizyon no puedo avrir… Porke, ya saves, mi mujer me va matar. Kualo azere? Esto pensando…

– I ke penseryos tuvites esta noche?

– Pensi enriva de: «Kualo se puede enkashar entre zig i zag…»

– Esto vyendo ke no la tansyon sola te te esta pujando, te esta dando i al meoyo… Ayde veremoz, echa enbasho…
– Dizeremoz, por egzemplo, las relasyones entre los djudyos i los Inglezes… Si miras bueno, estas son relasyones de zig-zag…
– ???
– A los primeros djudyos los trusho el rey William el uno, de Normandia, en 1069. Kijo bankeres ke puedan emprestar paras (koza defendida entre los kristianos) i developar el pais. William se komporto kon eyos muy Bueno… Por este djesto nota un «Zig». Notates?
– Si, ya noti.
– Desde el medyo del siglo XII, uvo un kresimyento de antisemitismo en Ingletierra. Pogromes, kalomnias de sangre, asesinasyones, iftiras, taksos governales i mas. En 18 de julyo 1290 (ke era dia de tisha beav) afirmo el rey, Edward el uno, al edikto de ekspulsion por todos los djudios ke bivian en la Ingletierra. 16,000 djudios, fueron forsados de salir el pais fin a el 1/11/1290… Por esto nota un «Zag».

En 1655, Oliver Cromwell, ke era el primer lider Inglez dospues de la gerra sivil i ke lucho por la independensia del parlamento, dyo la permisyon ke los djudyos tornen al estado. Durante los anyos los djudyos ganaron derechos de sivil i fueron konsiderdos sivdadinos igules. Benjamin Disraeli (djudyo konvertido), se elekto por primer ministro del estado en 1857. El djudyo Lionel Nathan de Rothschild se elekto al parlamento, i mas djudyos tomaron posto en el governo inglez. En la primera gerra mondial mas de 50,000 djudyos sirvyeron en la arma ingleza. El «Legion Djudyo» de soldados djudyos volontaryos, fraguado de 5 batalyones, gerreyaron kovdo kon kovdo kon los inglezes. Esta «luna de miel» kontinuo asta los kavos de la primera gerra mondial i la okupasyon de la «tyerra de Israel» de las manos de la Imperia Osmana. Esto, absulutamente fue «Zig» grande! Mete al lado de este «Zig» una estreyika… Metites?
– Si, na mira «Zig*». Zig kon estreyika…
– Dospues empeso el mandato britaniko a governar en palestina. El governador Herbert Samuel izo yerro grande (malgrado ke era tsionisto), kito a Hadj Amin El Huseyni del prezo i lo nomino komo el mufti de Yerushalim. El Huseyni provoko a los arabos. Los arabos empesaron azer pogromes grandes kontra los djudyos. Syenes de djudyos muryeron en los atakos arabos. Los inglezes entendyeron ke «ay arabos en Palestina» i ke estos arabos estan fursudos. Donke empesaron a azer problemas a los djudyos. Prezos en Atlit, enforkamyentos de luchadores djudyos, ekspulsos de luchadores a kampos de prezo en Afrika i mas… En 1935, dospues ke pasaron las leyes de Nuremberg en almanya, munchos djudyos kijyeron emigrar a palestina. Ma los inglezes limitaron/defendieron la emigrasyon de los djudyos a palestina akordo el livro blanko de Passfield, «Passfield White Paper». I mas dospues akordo la paja blanka, antitsionista, de MacDonald, «White Paper of 1939». Los djudyos no eran permetidos a merkar terrenos en Palestina i los emigrantes fueron transpotados a Kipro.
Este peryodo fue un «Zag» grande.
– Tyenes razon…
– Antes de la sigunda gerra mondial los inglezes dieron abrigo en la Ingletyerra a mas de 50,000 djuyos vinidos de almanya, 10,000 ijikos djudyos del «Kindertransport» de Almanya, 669 ijikos djudyos del «Kindertransport» de chekoslovakya… Les daremoz un «Zig»??
– Les daremoz, ya lo meresen!!

En este momento empesi a pensar: Ke pipino grande les enkashimos a los Inglezes entre el «Zig*» (Zig kon la estreyika) i el «Zag» ke vino detras de el…

– Ke pipino les enkashimos??
– No te puedes imajinar!!! Te vas a kayer embasho solo de oyir… Ma te lo va kontar a la otra semana… Apareja las borrekitas de berendjena!
– Bueno kerido..
A kontinuar…

Albert Israel