eSefarad Noticias del Mundo Sefaradi
Ver todos los artículos de esta sección
ENTRE ZIG I ZAG… (2)
por Albert Israel
– Ven Salamon, Ven. Ya te apareji el vaziko de raki kon las borrekitas… kontinua veremoz el kuento. Kedi muy kuryozo. Ke pipino les enkashimoz a los Inglezes entre Zig* i Zag??
– Me trushites agua yelada para el raki? An bravo!! Ande kedimoz??
Bueno, en 1915 el ministro djudyo en el kabinet inglez, Herbert Louis Samuel, eskrivyo un memorandum yamado «The future of Palestine» (El future de palestina). Este memorandum, ke avla de la importansya del fondamiento de un sentro djudyo en palestina, tuvo muncha influensa a los ministros Inglezes.
En 1917 la ingletyerra estava afondada en el kanyo de la gerra sin pueder ver el kavo. Los planos no estavan progresando. La ingletyerra teniya menester de eksplosivos fuertes i poderozos. Para la produksyon de estos eksplosivos aviya menester de aseton. Aseton se produizava solo en la Almanya. Los estados unidos dainda no entraron a la gerra. Los rusos estavan eryentro de la revolusyon grande i aviya peligro ke van a abandonar la gerra.
Ansi ke los inglezes no tenian dinguna idea ken finalmente va ganar la gerra. Kalia travar a los amerikanos ke se adjunten. De la otra vanda el tino teniyan en el kanal suets, ke es el kamino kurto a India, el diamante de la imperya.
Haim Weizman, nasido en 1874, emigrante de rusya i siantifiko sovre el kampo de kimya, era el prezidente de la federasyon tsionista dospues ke tomo este posto de Theodor Herzl. Haim reusho, en un proseso kimikal, a produizir aseton de misir (maiz). Por esta razon se izo una persona muy valoroza en los ojos del governo Inglez. Dospues del memorandum de Herbert Samuel los inglezes estavan en idea ke los djudyos tyenen muncha influensa en la politika amerikana i en la politika rusa. Uno ke los konvensyo en esta direksyon fue Haim Weizman. Haim izo esforsos grandes eksplikandoles ke para estos djudyos una deklarasyon del governo inglez en favor de un estado djudio tsionisto en Tyerra de Israel puede enfluensar, definivamente, a sus aksyones en sus paizes. En el parlamento inglez aviyan miembros «tsionistos». Se kreyiyan ke fuersa djudia pro Ingleza, serka del kanal suets, ke es luguar estratejiko de alta emportansya para eyos, va sirvir el intereso inglez. I es posible ke mas no van a tener menester a los fransezes para protejar el kanal.
Aharon Aharonson de Zihron Yaakov i su ermana Sara dirijaron una red, yamado Nil»i, de ajanes ke eran enstalados en los ofisyos del governo i en la armada osmana. Nil»i tenia el poder de obtener informasyones korektas i konfiables. Nil»i ofresyo sus servisyos a los inglezes. (Estas informasyones trusheron, en el fin del kuento, la viktorya de los inglezes i del jeneral Alenbi kontra los Osmanos) .
En 1916 David Lloyd George, el Galesyano, formo governo muevo azyendose primer ministro i nominando a Arthur James Balfour de eskosia (eksprimer ministro) por ministro de eksterior. Los dos eran tsionistos i kreiyan, de sus chikes, ke los djudyos deven de tornar a a sus patria, Erets Israel.
Bueno, el resto vamoz a kontar a la otra semana…
– Ya me matates, kuando es ke vamoz a saver kualo les enkashimoz entre Zig* i Zag??
– Pasensya kerido, pasensya… Tu apreja el vaziko de raki…
A kontinuar…
Albert Israel
