Avladino kon Albert Israel en Yerushalayim: ENTRE ZIG I ZAG… (3)

Ver todos los artículos de esta sección 

ENTRE ZIG I ZAG… (3)

por Albert Israel

– Ayde salamon, el pranso tuyo ya esta pronto. Empesa a avlar ke ya me kitates la alma…

– Bueno kerido. Fin agora dimos los detaylos i las kondisyones ke dominaron en akeyos dias. En este atmosfer dicho, buskaron los lideres tsionistos, Haim Weizman, Harry Sacher i Nahum Sokolov suporto governal Inglez en favor de un estado djudyo en Erets Israel, en favor de la emigrasyon de los djudyos a Erets Israel i en favor de los institusyones tsiyonistos. Dospues de munchas diskusyones i esforsos de Weizman se topo una formula en forma de una letra deklarativa ke se va mandar de parte Arthur Balfour a Lord Lionel Walter Rothschild, para ke Rothschild la tranfere la letra a la «Organizasyon Tsiyonista mondial». En esta letra se va azer klaro ke los djudyos tyenen el derecho de fondar «Estado djudyo» en Palestina. Para este paso kaliya tomar el akordo de los aliados. Los inglezes no kijyeron azer esto diraktamente. El sekretaryo del kabinet, Sir Mark Sykes, mando a Nahum Sokolov a Paris i Roma para konvenser a los Fransezes, los Italyanos i el Papa de Roma Benedikt el 15, en la nesesita de este deklaramyento.

Balfour i Rothschild se letrearon muncho fin a ke kedaron de akordo a la formula de esta deklarasyon. En 31/10/1917 se arekojyeron los ministros del governo Inglez en Downing 10 para konfirmar el deklaramiento. Weizman fue envitado a la entrada de la sala para ser el primer ke va tomar avizo sovre la desizyon del governo. Weizman tomo kon el a Aharon Aharonson i los dos asperaron en la entrada asta ke salyo Sykes i les disho: «Nasyo ijo!». Kijo dizir ke la deklarasyon fue konfirmada. Los dos entraron ariyentro i se dyeron las manos kon el primer ministro Lloyd George.

Esta deklarasyon, yamada «La Deklarasyon de Balfour», fue publikada en 2/11/1947 dizyendo ke:

«El governo Inglez favorese el establesimiento de un ogar nasional para el puevlo djudyo en Palestina».

En 11/12/1947 entro el jeneral Edmund Henry Hynman Allenby a Yerushalayim komo vensedor grande.

Oy savemoz por siguro ke la deklarasyon de Balfour fue kondisyon nesesarya en la fondasyon del estado de Israel. Sin esta deklarasyon el dokumento internasyonal del mandato britaniko en Palestina, «The Mandate for Palestine», (ke se afirmo en 24/7/1922) no iva inkluir el indento de fraguar un ogar nasional para el puevlo djudyo en Palestina. Los Inglezes no ivan a abandonar sus responsabilitades en Palestina a las «Nasyones Unidas». Las «Nasyones Unidas» no ivan a rezultar la fondasyon del estado en 1947. I el estado de Israel no se iva pueder fondar legalmente.

Profesor Martin Kremer: «67 byervos ke no determinaron dinguna frontyera, mensyonaron solamente un «Ogar nasional para el puevlo djudyo». Esto ya abasto. La «Grande Britanya» no se pudo tornar de su prometa en su deklarsyon de Balfour.»

Israel Meydad, direktor del sentro Begin: «Ministro en el governo inglez moz dyo una koza ke el puevlo djudyo no se puedia kreer ke se puede rogar a obtener.»

Profesor Andrew Roberts: «Es klaro ke el estado de Israel no se iva pueder fondar sin la deklarasyon de Balfour. Esto es una eksperiensa ekstra ordinarya en la historya de la humanidad. Esto no pudia akonteser si no aviya un grupo chiko de no djudyos ke se adjuntaron en Downing 10, en medyo de una gerra terivle i pensaron kual es el paso bueno por el puevlo djudyo i por el puevlo inglez.»

Blanche Dugdale, la sovrina de Balfour: «Mi tiyo, en sus dias de alkavo, me disho ke esta deklarasyon era una ovra meresida.»

Arthur Balfour muryo en 19/3/1930. Aki pudemoz ver dos filmikos sovre esta deklarasyon.

Entendites agora ke pipino les enkashimoz a los Inglezes entre Zig* i Zag?? Este pipino, una fondasyon de estado, se les enfinko en el garon de eyos en partikular i en el garon de los otros governos en general, en una manera ke no lo pudyeron ni engrutir ni gomitar. Munchas vezes lo kijyeron gomitar i no reusheron. Asta ke se fondo el estado de Israel…

Na aki te meto unas kuantas fotos:

– Sano ke me estes!! Te va espertar esta noche para ke penses…

Albert Israel